Veveheaga 95

Tau Fakaakoaga ke he Vevehe mo e Fakaalofa ma e Fanau

KO IESU mo e hana tau tutaki hane fenoga atu ki Ierusalema ke he Paseka he 33 V.N. Ne o atu a lautolu ke he taha fahi he Vailele Ioritana mo e o atu he hala he fahi i Perea. Ha ha i Perea a Iesu he falu fahi tapu gahoa fakamua, ka kua aahi atu ke fano ki Iutaia he gagao hana kapitiga ko Lasalo. Ne nofo agaia i Perea, ti tutala a Iesu ke he tau Farasaio hagaao ke he vevehe, ti kua liu foki a lautolu fakatutala ke he mena nei.

Kua ha ha he tau Farasaio e kehekehe he tau fakaakoaga ke he vevehe. Ne talahau a Mose ko e maeke e fifine ke vevehe ha ko e “ha mena kelea kia ia.” Ko e falu ne talitonu ko e hagaao ni e mena nei ke he nakai mahani fakamoli. Ka ko e falu ne manatu ke he “ha mena kelea” kua putoia ai e tau agahala ikiiki oti. Ti, ke kamatamata a Iesu, ne huhu e tau Farasaio: “Kua lata nakai ke tiaki he tagata hana hoana ha ko e tau mena oti?” Ne mauokafua a lautolu ko e ha mena ni ha Iesu ka vagahau to putoia a ia ke he tau mena vihi mo e tau Farasaio ha ko e ha lautolu a talahauaga kehe.

Ne tali e Iesu mo e lotomatala e huhu, he nakai tapiki ke he tau manatu fakatagata, ka e onoono ki tua ke he kamataaga he fakamauaga. “Nakai kia totou e mutolu,” he huhu e ia, “ko ia ne eke e tagata ke he kamataaga, ne eke e ia a laua ko e tane mo e fifine. Mo e pehe mai a ia, Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana; ati eke ai a laua mo tino taha? Haia kua nakai tuai tokoua, ka kua tino taha na laua; hanai, ko ia kua fakalataha he Atua, aua neke vevehe he taha tagata.”

Ko e finagalo fakamua he Atua, ne fakakite e Iesu, ko e nonofo fakalataha e tau hoa ne kua fakamau, ti nakai vevehe. Kaeke kua pihia, he tali he tau Farasaio, “ti poaki mai ai he ha kia a Mose ke age e tohi vega, ti tiaki ai a ia?”

“Ha ko e mao he tau loto ha mutolu ne tuku mai ai kia mutolu e Mose ke tiaki ha mutolu a tau hoana,” he tali e Iesu, “ka e nakai pihia ke he kamataaga.” E, ko e magaaho ne fakatoka he Atua e tuaga moli ma e fakamauaga he katene i Etena, ne nakai taute e ia ha mena ke vevehe.

Ne matutaki a Iesu ke tala age ke he tau Farasaio: “Ke tala atu foki e au kia mutolu, ko ia kua tiaki hana hoana, ka e nakai faivao a ia [mai he faka-Heleni, por·neiʹa], ti hoana ke he taha, kua faivao a ia.” Ti ko e fakakite mai e ia ko e por·neiʹa, ko e faivao kelea muikau, ko e kakano ni a ia ne talia he Atua ke vevehe.

Kua mailoga ai ko e fakamauaga kua lata ke tumau tukulagi mo e ko e mena nei ni ke vevehe aki, ati pehe ai e tau tutaki: “Kaeke ke pihia e mahani he tane mo e fifine, laukauka he nakai fai hoana.” Kua nakai fakauaua, ko ia ne manatu ke fai tokoua kua lata ke manamanatu fakahokulo ke he fakaveaga tukulagi he fakamauaga!

Ne matutaki e tala ha Iesu ke he nofo tokotaha. Ne fakamaama e ia ko e falu a fanau tane ne fanau eunuka mai, kua nakai fai hoana he nakai katoatoa ke lata mo e mahani fakatane mo e fifine. Ko e falu ne fakaeunuka he falu tagata tane, ha kua taute fakakelea ke nakai maeke ke lata mo e mahani fakatane mo e fifine. Ko e fakahikuaga, ne fakauka e falu ke lata mo e manako ke fai hoana mo e fakafiafia ke he mahani fakatane mo e fifine ke maeke ia lautolu ke foaki katoatoa ke he tau mena ke lata mo e Kautu he lagi. “Ko ia kua maeke ke talia [ke nofo tokotaha], kia talia ai e ia,” he fakaoti e Iesu.

Kua kamata e tau tagata mogonei ke tamai e tau fanau ha lautolu ki a Iesu. Ka e taha e mena ko e tau tutaki ne hataki ke he tau fanau mo e lali ke vega kehe a lautolu, ha ko e manako ke puipui ia Iesu mai he fakatupetupe noa. Ka e pehe a Iesu: “Tokai e tau tama ikiiki, ke o mai a lautolu kia au, ti ua hataki a lautolu; ha ko e mena tuga a lautolu nai e tau tagata ha ha he kautu he Atua. Ko e moli ke tala atu e au kia mutolu, ko e tagata nakai talia e kautu he Atua tuga ne tama tote, nakai hao ni a ia ki ai.”

Ko e fakaakoaga mitaki ha ia ne foaki mai e Iesu! Ke moua e Kautu he Atua, kua lata ia tautolu ke fakafifitaki e mahani fakatokolalo mo e fiafia ke he fakaakoaga he tau fanau ikiiki. Ka ko e fakafifitakiaga ha Iesu kua fakaako foki e aoga, mua atu ke he tau matua, ke fai magaaho ma e tau fanau ha lautolu. Ne fakakite e Iesu he magaaho nei hana fakaalofa ma e tau fanau ikiiki he lopoti mai a lautolu ki a ia aki hana tau lima mo e fakamonuina a lautolu. Mataio 19:​1-15; Teutaronome 24:1; Luka 16:18; Mareko 10:​1-16; Luka 18:​15-17.

▪ Ko e heigoa e tau onoonoaga kehekehe he tau Farasaio hagaao ke he vevehe, mo e kamatamata fefe e lautolu a Iesu?

▪ Taute fefe e Iesu e lali he tau Farasaio ke kamatamata a ia, mo e ko e heigoa ne talahau e ia ke eke mo fakaveaga hokoia ma e vevehe?

▪ Ko e ha ne talahau he tau tutaki ha Iesu ke laukauka ni he nakai mau, mo e ko e heigoa e lagomataiaga ne foaki e Iesu?

▪ Ko e heigoa ha tautolu ne fakaako mai e Iesu ke he hana tauteaga he tau fanau ikiiki?