Veveheaga 105

Kamataaga he Aho Aoga Lahi

KO E magaaho ne toka e Iesu a Ierusalema he afiafi he Aho Gofua, ne liu a ia ki Petania he fahi uta he Mouga ko Olive. Ko e ua e aho he hana a feua fakamatala fakahiku i Ierusalema kua oti tuai. Ne nakai fai fakauaua ne nofo a Iesu he po ia mo e hana a kapitiga ko Lasalo. Tali he hoko mai i Ieriko he Aho Faraile, ko e po ke faaki a nei he nofo a ia i Petania.

Ko e magaaho nei, he pogipogi Aho Ua, Nisana 11, ne fita a ia mo e hana tau tutaki he puhala tu. Ko e aho aoga lahi a nei he feua fakamatala ha Iesu, ko e aho lavelave lahi. Ko e aho fakahiku a nei hana ke he faituga. Mo e ko e aho fakahiku a nei hana he feua fakamatala ke he tau tagata to hoko hana kamatamata mo e mate.

Ko Iesu mo e hana tau tutaki ne o ni he hala agaia he Mouga ko Olive ki Ierusalema. Ko e puhala ia i Petania, ne mailoga e Peteru e akau ne kaialu e Iesu he pogipogi fakamua. “Rapai na e, kitiala,” he talahau e ia “e mati ne kaialu e koe, kua mago tuai.”

Ka ko e ha ne tamate e Iesu e akau? Ne fakakite e ia e kakano he magaaho ne pehe a ia: “Ko e moli, ke tala atu e au kia mutolu, Kaeke kua toka ia mutolu e tua, mo e nakai mahalohalo a mutolu, ti eke ai e mutolu, ka e nakai ko e mena hokoia ne eke ke he mati; kaeke ke tala age e mutolu ke he mouga nai, [ko e Mouga ko Olive ne tutu ai a lautolu] Kia lagaaki e koe, mo e liti ke he tahi; ti eke ai ni. Ko e tau mena oti foki ke ole mai ai a mutolu ke he liogi mo e tua ki ai, to moua e mutolu.”

Ti ko e fifigo he akau, kua foaki e Iesu ma e hana tau tutaki e fakaakoaga ke lata ia lautolu ke tua ke he Atua. Tuga he talahau e ia: “Ko e tau mena oti kana ka ole atu ai a mutolu ke he tau liogi ha mutolu, kia tua a a mutolu ke moua e mutolu, to eke ai ni ma mutolu.” Ko e fakaakoaga ne mua atu he aoga ke fakaako e lautolu, mua atu ha ko e tau kamatamata lalahi ne kua tata mai i mua ka hoko! Ka e taha e mena, ne ha ha i ai taha matutakiaga he mati ne fifigo mo e tuaga he tua.

Ko e motu ha Isaraela, tuga e mati nei, ne fakatuaha noa. Pete he ha ha i ai e fakafetuiaga he motu mo e Atua ke he maveheaga mo e tuga ko e omaoma ke he hana tau fakatonuaga he onoono atu i fafo, ka kua fakamoli e nakai ha ha i ai e tua, nakai fai fua ke he tau fua mitaki. Ha kua nakai ha ha i ai e tua, kua ha ha i ai foki ke he tuaga ke tiaki e Tama ni he Atua! Ti ko e mena ia, he fakafifigo e mati ne nakai fua, ko e fakakite fakatino e Iesu e fakahikuaga he motu nakai fai fua mo e nakai tua.

Ne nakai leva, ti hohoko a Iesu mo e hana tau tutaki ki Ierusalema, ti ko e mahani ha lautolu, ke o ke he faituga, mo e kamata a Iesu ke fakaako. Ko e tau ekepoa ne mua, mo e tau tagata tane momotua, kua nakai fakauaua ne manatu e lautolu e tau gahua ha Iesu he aho fakamua ke he tau tagata ne taute e tau tupe, ne totoko atu ki a ia: “Ko e heigoa e pule kua eke ai e koe e tau mena na? ti age e hai kia koe e pule nai?”

Ko e tali ha Iesu ne pehe: “Ke hūhu atu foki au kia mutolu e taha e kupu; kaeke ke talahau mai e mutolu kia au e mena ia, ati talahau atu ai e au e pule kua eke ai e au e tau mena nai. Ko e papatisoaga ha Ioane, mai fe kia? mai he lagi kia, po ke mai he tau tagata?”

Ne fakatutala e tau ekepoa mo e tau tagata tane momotua ko e tali fefe e lautolu. “Kaeke ke tala atu a tautolu, Mai he lagi; ti pehe mai a ia ki a tautolu, Ti ko e ha nakai talia ai e mutolu a ia? Kaeke foki ke tala atu a tautolu, Mai he tau tagata; kua matakutaku a tautolu ke he lanu tagata; ha ko e taofi ha lautolu oti kia Ioane, ko e perofeta a ia.”

Ne nakai iloa he tau takitaki ke tali. Ti pehe a lautolu ki a Iesu: “Nakai iloa e mautolu.”

Ne pehe atu a Iesu: “Nakai tala atu foki e au kia mutolu e pule kua eke ai e au e tau mena nai.” Mataio 21:​19-27; Mareko 11:19-33; Luka 20:1-8.

▪ Ko e heigoa ne kua lata ke mailoga hagaao ke he Aho Ua, Nisana 11?

▪ Ko e heigoa e tau fakaakoaga ne foaki mai e Iesu he magaaho ne fakafifigo e ia e mati?

▪ Tali fefe e Iesu a lautolu ne huhu ko e pule ha hai ne taute ai e ia e tau mena ia?