Veveheaga 101

I Petania, he Fale ha Simona

KO E magaaho ne toka e Iesu a Ieriko, ne fano a ia ki Petania. Ne katoa e aho he fenoga, ha ko e toli ke he 19 kilomita he kelekele nakai lau tatai. Ko Ieriko liga ko e 250 mita i lalo he toka he tahi, mo Petania ke he falu 760 mita he mamao hake mai he tahi. Liga manatu e koe a Petania, ko e kaina ha Lasalo mo e hana lafu mahakitaga. Ko e maga tote liga tolu e kilomita mai i Ierusalema, ne toka ke he fahi papati i uta he Mouga ko Olive.

Tokologa ne kua fita he hohoko ki Ierusalema ke he Paseka. Ne o tuai a lautolu ke fakamea a lautolu ke lata mo e fakamanatuaga. Liga kua amoamo e lautolu e tino mate po ke taha mena ne taute ke nakai mea a lautolu. Ti ko e mena ia ne mumui tua ke he tau puhala ke fakamea aki a lautolu ke maeke ke fakamanatu e Paseka ke he puhala kua tonu. Hane fakapotopoto a lautolu nei ne hohoko tuai ke he faituga, tokologa ne fuafua manatu ko e fakalataha nakai a Iesu ke he Paseka.

Ne lahi mahaki e fetoko hagaao ki a Iesu i Ierusalema. Ne kua iloa oti kua manako e tau takitaki lotu ke tapaki a ia ke kelipopo. Ko e moli, kua fita he poaki e tau poakiaga, kaeke kua iloa he taha hana a nofoaga, kua lata ke hokotaki e lautolu a ia ki a lautolu. Ko e lagatolu ia he atu mahina ia ni​—ke he Galue he Tau Fale Api, ke he Galue he Fakaulu Fale, mo e magaaho he mole e fakaliu tu mai e ia a Lasalo​—ko e tau takitaki nei ne lali ke kelipopo a ia. Ti ko e mena ia, ne manamanatu e tau tagata, to fano nakai a Iesu ke he toloaga tagata ke he taha magaaho ia foki? “Kua manatu a mutolu ke ha?” he fehuhuaki a lautolu.

Ka ko e magaaho ia, ne hoko atu a Iesu ki Petania ono e aho to hoko e Paseka, ka fakahoko ai he Nisana 14 ke lata ia mo e kalena faka-Iutaia. Ne hoko a Iesu ki Petania he magaaho afiafi he Aho Faraile, ko e kamataaga he Nisana 8. Ne nakai fano fenoga a ia ki Petania he Aho Faiumu ha ko e fano fenoga he Sapati​—kamata mai he to la he Aho Faraile ke he to la he Aho Faiumu​—ne nakai maeke he fakatufono faka-Iutaia. Liga fano a Iesu ke he kaina ha Lasalo, tuga ni fakamua, mo e nofo ai he po Faraile.

Ka e taha e mena, ko e taha tagata ne nofo i Petania ne uiina a Iesu fakalataha mo e hana tau kapitiga ke he kaiaga he afiafi he Aho Faiumu. Ko e tagata ia ko Simona, ko ia ko e lepela fakamua, liga fakamaulu e Iesu he taha magaaho fakamua. Ha ko e hana a aga makaukau, ne leveki e Mareta a lautolu ne uiina. Ka e, tuga ne fa mahani, ne fanogonogo a Maria ki a Iesu, ka ko e magaaho nei ke he puhala ke fakatupu e fetoko.

Ne hafagi e Maria e lupo alapasa, po ke tama lupo tote, ne liga puke ke he hafa e kilokuleme he lolo manogi, “lolo nato.” Ko e koloa uho lahi a nei. Moli, ko e uho hana kua tatai ia mo e totogi he taha e tau! Ko e magaaho ne liligi e Maria e lolo ke he ulu ha Iesu mo e hana tau hui mo e fakamomo hana tau hui aki hana tau lau ulu, ne manogi e fale katoa he lolo.

Ne ita e tau tutaki mo e huhu: “Kua moumou he ha e mena na?” Ti pehe a Iuta Isakariota: “Ko e ha nakai fakafua ai e lolo manogi ia ke he tolu geau e tenari, mo e age ke he tau nonofogati?” Ka e nakai tupetupe moli a Iuta ke he tau nonofogati, ha ko e mena kaiha mai a ia he puha tupe ne toka he tau tutaki.

Ne lago a Iesu ki a Maria. “Toka ai a ia,” he poaki e ia. “Kua fakalavelave mo ha e mutolu a ia? ko e mena mitaki ne eke e ia kia au nai. Ha kua nonofo mau e tau tagata nonofogati ia mutolu, ko e tau aho oti ka loto ki ai a mutolu, kua maeke ia mutolu ke eke fakamitaki atu kia lautolu; ka ko au nai, nakai nofo mau au ia mutolu. Kua eke e ia e mena ne maeke ia ia, kua fakatākai tuai e ia haku a tino, ko e tauteaga he haku a tukuaga. Ko e moli ke tala atu e au kia mutolu, ko e tau mena oti kana ha he lalolagi ke fakamatala ai e vagahau mitaki nai, to talahau foki ki ai e mena nai kua eke e ia ke eke mo fakamanatuaga kia ia.”

Kua ha ha i Petania a Iesu mogonei kua molea e 24 e tula, mo e kua tuogo hana a ha ha i ai ke he tau kalakala oti ia. Ti ko e mena ia, ne tokologa ne o mai ke he fale ha Simona ke kitia ia Iesu, ka e o mai foki a lautolu ke kitia ia Lasalo, ne ha ha i ai foki. Ti ko e tau ekepoa ne mua ne poaki ke nakai keli ni a Iesu hokoia ka ko Lasalo foki. Ko e kakano he mena nei, tokologa e tau tagata ne tua ki a Iesu kakano ha kua kitia a ia ne moui he fakaliu tu mai e ia he mate! Ko e moli, ko e kelea muikau ha ia he tau takitaki lotu nei! Ioane 11:​55–​12:11; Mataio 26:​6-13; Mareko 14:​3-9; Gahua 1:12.

▪ Ko e heigoa e fakatutalaaga ne fa e fakatutala he faituga i Ierusalema, mo e ko e ha?

▪ Ko e ha ne hoko mai a Iesu ki Petania he Aho Faraile ka e nakai he Aho Faiumu?

▪ Ko e magaaho ne hoko a Iesu ki Petania, i fe ne liga fano a ia ki ai he Sapati?

▪ Ko e heigoa ha Maria ne taute ati laga mai e fetoko, mo e lago fefe e Iesu a ia?

▪ Ko e heigoa ne fakakite aki e kelea muikau he tau ekepoa ne mua?