Veveheaga 112

Paseka Fakahiku ha Iesu kua Hoko Mai

HA KUA tata e fakahikuaga he Aho Ua, Nisana 11, ne oti e fakaako e Iesu e tau aposetolo he Mouga ko Olive. Ko e aho lavelave mo e lahi e gahua! Ko e magaaho nei, liga ko e liliu mai i Petania he po ia ti tala age e ia ke he hana a tau aposetolo: “Kua iloa e mutolu ka mole ua e aho, ti eke ai e paseka, kua tuku atu foki e Tama he tagata kia fakatautau.”

Ko e moli ne nofo a Iesu he aho hake, ko e Aho Lotu, Nisana 12, ke okioki mo e hana a tau aposetolo. Ko e aho fakamua, ne akonaki e ia e tau takitaki lotu i mua he tau tagata, ti mailoga e ia ko e kumi a lautolu ke kelipopo ia ia. Ti ko e mena ia he Aho Lotu ne nakai fakakite e ia a ia, he nakai manako a ia ke fai mena ke fakalavelave aki hana fakamanatuaga he Paseka mo e hana tau aposetolo he afiafi he aho hake.

Ko e magaaho ia, ko e tau ekepoa ne mua mo e tau patu he tau tagata kua fakapotopoto ke he lotopa he ekepoa ne mua ko Kaiafa. Ha kua mamahi he tau akonakiaga ha Iesu he aho fakamua, ne taute fakatokatokaaga a lautolu ke tapaki a ia ha ko e tau lagatau kelea mo e kelipopo a ia. Ka e taha e mena ne talahau tumau a lautolu: “Aua ia, mo e galue, neke fakalagalaga ai e tau tagata.” Ne matakutaku a lautolu he tau tagata, ha kua fiafia a Iesu ke he ha lautolu a talia ki ai.

Hane fa e kumi lagatau kelea e tau takitaki lotu ke kelipopo aki a Iesu, ne hu mai e taha tagata ki a lautolu. Ne ofo a lautolu, ko e taha ni mai he tau aposetolo ha Iesu, ko Iuta Isakariota, ko ia kua to e Satani e manatu kelea ke afo hana a Iki! Ko e fiafia ha a ia ha lautolu he huhu a Iuta: “Ko heigoa e mena ke ta mai e mutolu māku, ka e afo e au a ia kia mutolu?” Ne talia fiafia a lautolu ke totogi a ia ke he tau tupe ario ne 30, ko e totogi he tupa ke lata ia mo e maveheaga he Fakatufono faka-Mose. Ne kamata mai he magaaho ia, he kumi e Iuta e taha magaaho mitaki ne nakai fai moto tagata ne agaagai mai ke afo a Iesu ki a lautolu.

Ne kamata e Nisana 13 he toaga la he Aho Lotu. Ne hoko mai a Iesu i Ieriko he Aho Faraile, ti ko e po ke onoaki mo e fakahiku aki a nei ne nofo ai a ia i Petania. Ko e aho hake, ko e Aho Tuloto, ko e tau tauteaga fakahiku ke lata mo e Paseka, ka kamata ai he toaga la. Ko e magaaho haia ka keli e punua mamoe he Paseka mo e tao katoatoa e tino. Ko e taute i fe e fakamanatuaga he galue, mo e ko hai ka taute e tau fakatokatokaaga?

Ne nakai talahau fakamatafeiga e Iesu e tau mena nei, liga ke taofi aki a Iuta he tala age ke he tau ekepoa ne mua ti liga tapaki e lautolu a Iesu he fakamanatuaga he Paseka. Ka ko e magaaho nei, liga ko e magaaho fakamua he pale la he Aho Tuloto, ne fakafano e Iesu a Peteru mo Ioane mai i Petania, mo e pehe: “O a a mua ke taute e paseka ma tautolu, ke kai ai a tautolu.”

“Ko fe ne finagalo a koe ki ai ke taute ai e maua?” he huhu e laua.

“Ka hohoko a mua ke he māga,” he fakamaama e Iesu, “ti fakataupa ai a mua mo e taha tagata ha ne uta e vai kelekele kula, ti mumui atu a mua kia ia ke he fale ka hu atu a ia ki ai. Ti tala age a mua ke he patu he fale, Kua poaki mai e Akoako kia koe, Ko fe e poko ke api ai e tau fenoga ke kai ai e mautolu e paseka mo e haku a tau tutaki? To fakakite atu ai e ia e poko lahi tapa ki luga, kua oti he taute; ke taute ai e mua ke he mena ia.”

Ne nakai fakauaua ko ia e tagata he fale ko e tutaki ha Iesu ne liga mautali ke he ole ha Iesu ke fakaaoga hana fale ke lata mo e magaaho pauaki nei. Ke he ha mena ni, he magaaho ne hohoko a Peteru mo Ioane ki Ierusalema, ne moua e laua e tau mena tuga ni he talahau tuai e Iesu. Ti ko laua tokoua ne kitia kua mau e punua mamoe mo e kua tauteute e tau fakatokatokaaga oti ke lata mo e toko 13 a lautolu ka fakamanatu e Paseka, ko Iesu mo e hana tau aposetolo toko 12. Mataio 26:​1-5, 14-19; Mareko 14:​1, 2, 10-16; Luka 22:​1-13; Esoto 21:32.

▪ Ko e heigoa ha Iesu ne taute he Aho Lotu, mo e ko e ha?

▪ Ko e heigoa e fono ne fakahoko he kaina he ekepoa ne mua, mo e ko e heigoa e kakano ne finatu a Iuta ke ahi e tau takitaki lotu?

▪ Ko hai ne fakafano e Iesu ki Ierusalema he Aho Tuloto, mo e ko e heigoa e kakano?

▪ Ko e heigoa ha laua ne fakafano atu ne moua, ke liu fakakite aki e malolo mana ha Iesu?