Veveheaga 114

Ko e Kaiaga Fakamanatuaga

NE MOLE he holoholo e Iesu e tau hui he hana tau aposetolo, ne liu a ia fatiaki e kupu tohi ia Salamo 41:9, mo e pehe: “Ko e tagata ne kai mena fakalataha mo au, kua aka mai e ia au ke he hana muihui.” Ko e magaaho ia ne tupetupe hana a agaga, mo e fakamaama e ia: “To afo e taha ia mutolu au.”

Ne kamata e tau aposetolo ke momoko mo e vagahau ki a Iesu takitokotaha: “Ko e Iki na e, ko au kia?” Ti fakalataha foki a Iuta Isakariota ke huhu atu. Ka ko Ioane ne takoto tata ki a Iesu he laulau, ne falanaki atu ke he fatafata ha Iesu mo e huhu: “Ko e Iki na e, ko hai kia?”

“Ko e taha he tokohogofulu ma ua, ko ia ha ne fufui fakalataha e tau lima ha maua ke he kumete,” he tali e Iesu. “Ko e fano ne fai e Tama he tagata tuga e mena ne tohia tuai kia ia; ka ko e tagata ka afo e Tama he tagata oi te fakaalofa ke he tagata ia, mitaki kia ia ane nakai fanau mai a ia.” Ne mole e mena ia, ti liu foki a Satani hu ia Iuta, mo e fakaaoga e ava ia he hana loto, ne kua mahani kelea. Ko e taha magaaho he po ia, ne lata ni he ui e Iesu a Iuta “ko e tagata he malaia.”

Ne tala age a Iesu he magaaho nei ki a Iuta: “Ko e tau mena ka eke e koe, kia eke fakaave a.” Ne nakai fai he tau aposetolo ne maama e kakano he tau kupu ha Iesu. Ne manatu e falu ha kua ha ha ia Iuta e puha tupe, ko e tala age a Iesu ki a ia: “Fakafua mai a e tau mena ke lata ia tautolu ke he galue,” po ke kua lata ia ia ke fano ke foaki atu falu mena ma lautolu ne nonofogati.

Ko e magaaho ne mole a Iuta, ne fakatu e Iesu e fakamanatuaga fou lahi mo e hana tau aposetolo fakamoli. Ne toto e ia e areto, mo e liogi fakaaue, ti tofitofi ai, mo e tufa age ki a lautolu mo e pehe: “Kia toto a mo e kai.” Ne fakamaama e ia: “Ko e haku a tino a enei, kua foaki atu ma mutolu; kia eke e mutolu e mena nai mo fakamanatuaga kia au.”

Ko e magaaho ne kua kai oti he areto, ne toto e Iesu e kapiniu uaina, ko e kapiniu ke fa aki ne fakaaoga he tauteaga he Paseka. Ne liu foki a ia liogi fakaaue, mo e foaki ki a lautolu, mo e ole ki a lautolu ke inu, mo e pehe: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.”

Ti ko e mena nei, ko e moli, ko e fakamanatuaga he mate ha Iesu. Ko e tau tau takitaha ia Nisana 14, kua lata ke liu taute foki, tuga he talahau e Iesu, ko e fakamanatuaga ki a ia. To fakamanatu ke he tau tagata he fakamanatuaga e mena ne taute e Iesu mo e hana Matua he lagi ke fakahao aki e tau tagata mai he fakahala he mate. Ma e tau Iutaia ne mumui ia Keriso, ko e fakamanatuaga ka hukui aki e Paseka.

Ko e maveheaga fou, ne fakagahua ha ko e toto ha Iesu ne fakamaligi, kua hukui aki e Fakatufono he maveheaga tuai. Ne fakafeilo e Iesu Keriso e tau matakau ne ua​—ko e taha fahi, ko Iehova ko e Atua, mo e fahi ne toe, ko e 144,000 ko e tau Kerisiano fakaagaga ne fakauku. Nakai ni ko e foaki e fakamagaloaga he tau hala, ka kua maeke foki he maveheaga ke fakatu e motu he tau ekepoa-patuiki he lagi. Mataio 26:​21-29; Mareko 14:18-25; Luka 22:19-23; Ioane 13:​18-30; 17:12; 1 Korinito 5:7.

▪ Ko e heigoa e perofetaaga he Tohi Tapu ne fatiaki e Iesu hagaao ke he kapitiga, mo e fakagahua fefe e ia e mena ia?

▪ Ko e ha ne momoko lahi e tau aposetolo, mo e ko e heigoa ha lautolu takitokotaha ne huhu?

▪ Ko e heigoa ha Iesu ne tala age ki a Iuta ke taute, ka e fakakakano fefe he falu aposetolo e tau fakatonuaga ia?

▪ Ko e heigoa e fakamanatuaga ne fakatu e Iesu he magaaho ne fano kehe a Iuta, mo e ko e heigoa e kakano ne taute pihia?

▪ Ko hai e tau matakau ke he maveheaga fou, mo e ko e heigoa kua maeke ha ko e maveheaga ia?