Veveheaga 133

Fakakatoatoa e Iesu e Tau Mena Oti ne Ole he Atua

KO E magaaho ka utakehe he Patuiki-Kautau ko Iesu Keriso a Satani mo e hana a lalolagi nakai tututonu, to ha ha i ai e fiafia lahi! To kamata agataha e Pule Afe Tau mafola ha Iesu!

I lalo he takitakiaga ha Iesu mo lautolu ne patuiki fakalataha mo ia, ko lautolu ka hao mai i Amaketo ka fakamea e tau mena ne toe he moumouaga he felakutaki tututonu. To fanafanau a lautolu ne hao he lalolagi ke fai magaaho, mo e to gahua fakalataha a lautolu ke he gahua fiafia ke taute e lalolagi ke eke ia mo fonua fulufuluola ke tuga ni e katene.

To fai magaaho to tamai e Iesu e tau miliona mai he tau tukuaga ke fiafia ke he Parataiso fulufuluola nei. To taute e ia e mena nei ke fakamoli aki e hana ni a maveheaga: “Ha ko e mena hoko ke he aho ka o mai ai a lautolu katoa ha he tuagamau fakamanatu.”

Ia lautolu ka fakaliu tu mai e Iesu ko e tagata hala ne mate fakalataha mo ia ke he akau fakakikiveka. Manatu e maveheaga ha Iesu ki a ia: “Ko e moli, ke tala atu e au ki a koe, ko e aho nai ke fakalataha ai a taua mo koe i Parataiso.” Nakai, ko e tagata tane ia to nakai uta ke he lagi ke pule ko e patuiki mo Iesu, po ke liu foki a Iesu ke eke mo tagata ke moui ke he Parataiso he lalolagi mo ia. Ka to fakalataha a Iesu mo ia e tagata hala i tuai, kakano to fakaliu tu mai e Ia a ia ke moui ke he Parataiso mo e kitia ki ai ko e hana tau manako, fakafahi ua he tino mo e fakaagaga, to laveaki ai, tuga ke he fakatino he lau tohi ka mui mai.

Manamanatu la ke he mena nei! I lalo he levekiaga fakaalofa ha Iesu, ko e magafaoa katoa he tau tagata​—ko lautolu ne hao mai i Amaketo, ha lautolu a tau fanau, mo e tau afe he tau miliona ha lautolu ne mamate ka liliu tutu mai ne omaoma ki a ia​—to tutupu ia ke eke mo tau tagata mitaki katoatoa. Ko Iehova, puhala mai he hana a Tama patuiki, ko Iesu Keriso, to nofo fakaagaga mo e tau tagata. Ne logona e Ioane e leo mai he lagi ne pehe: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.” To nakai fai tagata he lalolagi ka matematekelea po ke gagao.

Ko e fakahikuaga he Pule Afe Tau ha Iesu, ko e tuaga to tuga ni e finagalo fakamua he Atua he magaaho ne tala age e ia ke he hoa uluaki fakamua ko Atamu mo Eva, ke fanafanau mo e fakapuke e lalolagi. E, to puke e lalolagi he tau tagata tututonu mo e mitaki katoatoa. Ko e maeke e mena nei ha ko e tau aoga he poa lukutoto ha Iesu ka fakagahua ia ma e tau tagata oti. To nakai liu fai mate ha ko e hala mai ia Atamu!

Ko e mena ia, to fakakatoatoa e Iesu e tau mena oti ne ole e Iehova ke taute e ia. Ti ko e kakano haia, he fakahikuaga he afe he tau tau, to liuaki e ia e Kautu mo e magafaoa he tau tagata mitaki katoatoa ke he hana a Matua. To fakatoka mai he Atua he magaaho ia a Satani mo e hana tau temoni mai he pahua ne tuga e mate he kua nakai gahuahua. Ka ko e heigoa e kakano?

Ko e fakahikuaga he afe he tau tau, ko e laulahi ha lautolu ne momoui he Parataiso ko lautolu haia ne liliu tutu mai ti nakai la kamatamata ha lautolu a tua. Fakamua to mamate a lautolu, ne nakai iloa e lautolu e tau maveheaga he Atua ti nakai fakagahuahua ha lautolu a tua ke he tau mena ia. Ti, he mole e fakaliliu tutu mai mo e fakaako ke he tau kupu moli he Tohi Tapu, to mukamuka ki a lautolu i Parataiso, ha kua nakai fai totoko ke fekafekau ke he Atua. Ka e kaeke ke fai magaaho a Satani ke lali ke taofi a lautolu he matutaki ke fekafekau ke he Atua, to fakakite la nakai e lautolu e mahani fakamoli ke he kamatamata? Ke tali aki e huhu nei, to fakatoka mai a Satani.

Ko e fakakiteaga ne foaki ki a Ioane ne fakakite ke he magaaho he mole e Pule Afe Tau ha Iesu, to kautu a Satani he fuluhi kehe mai e numera loga he tau tagata mai he fekafekau ke he Atua. Ka ko e magaaho ka oti e kamatamata fakahiku, ko Satani mo e hana tau temoni, mo lautolu oti ne fakahehe e ia to fakaotioti ia tukulagi. Ka ko e taha fahi, ko lautolu kua katoatoa e kamatamata, ko e tau tagata fakamoli ne hao mai to hololoa atu e tau momoui ke olioli e tau monuina he ha lautolu a Matua he lagi ke he tukulagi tukumuitea.

Mahino ai, nukua taute e Iesu, mo e to matutaki ke taute foki, e vala aoga lahi he fakakatoatoa e finagalo he lilifu he Atua. Ko e vaha anoiha kua mua ue atu e mitaki ka fiafia ai a tautolu ha ko e fua he tau mena oti ne kautu ai a ia ko e Patuiki ne mua he Atua he lagi. Ka e, nakai maeke ia tautolu ke nimo e tau mena oti ne taute e ia he magaaho ne tagata a ia.

Ne fiafia a Iesu ke hau ke he lalolagi mo e fakaako a tautolu ke he hana Matua. Ne fakafifitaki e ia e tau mahani uho he Atua. Ne fakalagalaga ha tautolu a tau loto ka manamanatu ke he hana a malolo lahi mo e hana a malolo fakatagata, hana a pulotu ne nakai fakatatai mo e taha, hana a malolo ko e akoako, hana takitakiaga ne nakai fai matakutaku, mo e hana a fakaalofa hofihofi noa mo e manamanatu ma e falu. Ka manatu e tautolu e hana a mamahi he lukutoto ne nakai maeke ke fakamaama, ha ko e puhala ni a ia hokoia ke moua aki e tautolu e moui, ko e moli ni to fakalagalaga ha tautolu a tau loto ke fakaaue ki a ia!

Ko e moli, ko e tagata mua ue atu ha ia kua kitia e tautolu he fakaakoaga nei ke he moui ha Iesu! Kua kitia maali mo e kua tokoluga e mua ue atu hana. Kua fakalagalaga a tautolu ke talahau e tau kupu he kavana Roma ko Ponotio Pilato: “Kitiala e tagata!” E, moli, “E tagata,” ko e tagata mua ue atu ne moui!

Ha ko e ha tautolu a talia ke he foakiaga he hana a poa lukutoto, to utakehe mai ia tautolu e kavega he hala mo e mate ne moua mai ia Atamu, ti maeke ia Iesu ke eke mo “Matua Tukulagi” ha tautolu. Ko lautolu oti ka moua e moui tukulagi kua lata ke fakaako ke iloa nakai ni ko e Atua, ka e pihia foki e hana Tama ko Iesu Keriso. Kia eke hau a totou mo e fakaako ke he tohi nei ke lagomatai a koe ke moua e iloilo foaki moui pihia! 1 Ioane 2:17; 1:7; Ioane 5:​28, 29; 3:16; 17:3; 19:5; Luka 23:43; Kenese 1:28; 1 Korinito 15:​24-28; Fakakiteaga 20:​1-3, 6-10; 21:​3, 4; Isaia 9:6.

▪ Ko e heigoa e monuina fiafia ka moua e lautolu ka hao mai i Amaketo mo e ha lautolu a tau fanau?

▪ Ko hai ka fiafia foki i Parataiso fakalataha mo lautolu ka hao mai i Amaketo mo e ha lautolu a tau fanau, mo e ko e heigoa e kakano ka fakalataha a Iesu mo lautolu?

▪ Ko e heigoa e tuaga he fakahikuaga he afe tau, mo e ko e heigoa ha Iesu ka taute he magaaho ia?

▪ Ko e ha ne fakatoka mai ai a Satani he pahua, mo e ko e heigoa e fakahikuaga ki a ia mo lautolu oti ne mumui ki a ia?

▪ Maeke fefe a Iesu ke eke mo “Matua Tukulagi” ha tautolu?