Tauteute ma e Afetau ne Aoga!
KO E Pule Afetau he Keriso to ta mai e tau monuina loga ke he magafaoa tagata. I lalo he takitakiaga totonu ha Iesu, to malikiti hake e tau tagata mai he tuaga momokoina ke he mitaki katoatoa lilifu. Manatu la ke he kakano he mena ia ma hau. Ko e tino malolo katoatoa! Manatu la ka ala hake he tau pogipogi oti mo e mua atu e malolo mai i ne afi. Totou miliona e tau tagata tane, tau fifine, mo e fanau kua talifaki ke nonofo he magahala he magaaho fiafia ia. Kua amanaki lahi a lautolu ki ai, mo e liogi ki ai. Ko e ha lautolu a kumikumi ke he Tohi Tapu ne fakamoli ki a lautolu ko e tau monuina nei to eke ma lautolu ke olioli ki ai.
Ka e fakamua to kamata hana Pule Afetau, kua lata ia Iesu ke uta kehe he lalolagi a lautolu oti ne totoko hana pule. To taute e ia e mena nei he tauaga ne higoa ko Amaketo i loto he Tohi Tapu. (Fakakiteaga 16:16) Ko e tau Kerisiano moli he lalolagi to nakai tau he tauaga ia. Ko e tauaga he Atua. Mo e to nakai hoko ni ke he matakavi taha he lalolagi. Talahau e Tohi Tapu to hoko ke he tau matapotu mamao he lalolagi. Ko e tau fi he pule ha Iesu to tamate. Nakai fai ka hao!—Ieremia 25:33.
Oti mogoia ti fuluhi a Iesu ki a Satani ko e Tiapolo mo e hana tau temoni. Fakatino la e mena ne tupu, he kitia ai he tagata ne tohia e tohi a Fakakiteaga: “Ne kitia foki e au e agelu [Iesu Keriso] kua hifo mai he lagi, ha ia ia e kei he pahua nakai gata mai, ha he lima foki hana e toua lapatoa lahi. Ti tapaki e ia e tarako, ko e gata tuai, ko e tiapolo ia mo Satani, ti lili e ia a ia ke he tau tau ne taha e afe.” (Fakakiteaga 20:1, 2) He magaaho fakamui, ko Satani mo e tau temoni hana to fakaotioti tukulagi.—Mataio 25:41.
“Ko e moto tagata tokologa, kua nakai maeke ia taha ke totou,” ka hao mai ia Amaketo. (Fakakiteaga 7:9) To takitaki he Keriso a lautolu nei ke aoga katoatoa mai he “tau vaipuna he moui,” tuga he takitaki he leveki mamoe e tau mamoe hana ke he tau vai fakamoui. (Fakakiteaga 7:17) He kua nakai fakapouli e Satani mo e hana tau temoni ha lautolu a tolomaki fakaagaga, ko lautolu nei ne hao mai ia Amaketo to lagomatai fakahaga ke kautu ke he tau agahala ha lautolu ato fakahiku a lautolu ke hokotia ke mitaki katoatoa!
I lalo he pule totonu he Keriso, to mitaki tumau e tau nonofoaga. Ko Iehova ko e Atua, he puhala ia Iesu Keriso, to uta kehe e tau mena oti ne fakatupu e tau matematekelea mo e fakatutuku. “To holoholo kehe [e Ia] e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.” (Fakakiteaga 21:4) Ne fakakatoatoa he perofeta ko Isaia e fakatino, he talahau: “Ti fakaala ai e tau mata he tau tagata mata pouli, to logona foki he tau teliga he tau tagata teliga tuli. To hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu.” (Isaia 35:5, 6) Mo lautolu ne mamate, “ko e tau lalo tagata katoa mo e tau iki,” to liliu moui mo e amaamanakiaga ke nakai liliu ke mamate foki!—Fakakiteaga 20:12.
Pihia foki he mogonei, ko e “moto tagata tokologa” ka hao mai ia Amaketo hane fakapotopoto mai. Kua tauteute a lautolu ma e Pule Afetau he Keriso. Pete kua nakai iloa e lautolu e magaaho ka kamata e pule ia, kua mauokafua a lautolu he vaha kotofa he Atua, to ta mai ai. Maeke ia koe ke fakalataha mo lautolu, ka kua lata ia koe ke tauteute foki—nakai he fakafua e tau koloa hau mo e fenoga atu ke he matakavi he taha motu, ka e he iloa tonu a Iehova ko e Atua mo e hana tau finagalo he puhala he fakaakoaga he Tohi Tapu. Mo e nakai fai totogi po ke maveheaga, to fiafia lahi e Tau Fakamoli a Iehova ke fakakite ki a koe e puhala ka lagomatai he fakaakoaga he Tohi Tapu a koe mo e hau a magafaoa. Ko e tau tagata fakailoa he mekasini nei to fiafia ke foaki atu e falu fakailoaaga foki.
[Puha he lau 7]
Ko e Afetau—Moli po ke Fakataiaga?
Ha kua laulahi e tohi Tohi Tapu he Fakakiteaga ke tohia ke he vagahau fakatai, kua mafuta hake e huhu. Ka e kua e Pule Afetau he Keriso ne totoku i loto he Fakakiteaga? Ko e vaha moli kia po ke fakataiaga?
Ha ha ai e tau fakailoaaga loga ko e vaha moli e afetau. Manamanatu la: Ne hagaao e aposetolo ko Paulo ke he Pule Afetau he Keriso, magahala ka fakafili e tau tagata, kua tuga e aho. (Gahua 17:31; Fakakiteaga 20:4) Ne tohia he aposetolo ko Peteru ko e taha e aho (24 e matahola) ki a Iehova kua tuga e afetau. (2 Peteru 3:8) Kua kakano e mena ia ko e “aho” fakafili nei ko e taha moli e afetau he loa. Ke lafi ki ai, he Fakakiteaga 20:3, 5-7, ne laga fa e totou kehekehe e tautolu, nakai “ke he tau tau ne taha e afe,” ka ko “e tau tau ne taha e afe.” Kua fakakite he mena nei e loa moli he vaha.