“Vagahau Mitaki” Mai he Apakalifa

“Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi.”​—FAKAKITEAGA 14:6.

1. Pete he talitonu e Tau Fakamoli a Iehova ke he omoomoiaga he tohi Apakalifa, ko e ha ne nakai ko e “vahega lotu fakaapakalifa” a lautolu?

KEHE mai he tau tukumale ki a lautolu, ko e Tau Fakamoli a Iehova nakai ko e taha “vahega lotu fakaapakalifa ” po ke “lotu he aho fakafili.” Ka kua talia e lautolu e Apakalifa, po ke tohi he Fakakiteaga, ko e vala he Kupu omoomoi he Atua. Moli, kua tokai he Fakakiteaga e tau matafekau he fakafiliaga ke he tau tagata kelea. Ka e he fakamatalaaga ha lautolu ke he toloaga tagata, kua matapatu e fakamahao he tau fekafekau he Atua ke he amaamanakiaga homo ue atu ne toka i loto he Tohi Tapu, ne haia foki i loto he Apakalifa, po ke Fakakiteaga. Ti kua nakai lafi ki ai po ke uta kehe mai e lautolu e tau kupu fakaperofeta ne ha ha i loto.​—Fakakiteaga 22:18, 19.

Tau Fakapuloa he Vagahau Mitaki

2. Ko e heigoa falu kupu Tohi Tapu ne fa fakaaoga he Tau Fakamoli a Iehova he tau gahua fakamatala ha lautolu?

² Ko e fakaveaga faka-Tohiaga Tapu ma e fekafekauaga ke he toloaga tagata ne fatiaki tumau he Tau Fakamoli a Iehova ko e talahauaga a Iesu: “To fakapuloa atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14, matahui tala, NW) Ti ko e heigoa e “tala mitaki nai he kautu”? Tokologa e Tau Fakamoli ka tali he fatiaki e tau kupu mai he Fakakiteaga veveheaga 20 mo e 21 ne hagaaki ke he Pule Afe Tau he Keriso mo e hana fakatufono he Kautu, mo e kaufakalatahaaga tagata, ka eke ai e mate, fakatutuku, mo e matematekelea ke “nakai tuai fai.”​—Fakakiteaga 20:6; 21:1, 4.

3. Ko e heigoa e matagahua ne fakatatai e fekafekauaga ke he toloaga tagata he Tau Fakamoli a Iehova ki ai?

³ Ko e tau tagata fakapuloa he tau vagahau mitaki nei, ko e Tau Fakamoli a Iehova ko e tau gutu vagahau moli he utafekau fakatai he lagi, ne tohi foki e matagahua he Fakakiteaga. “Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakiteaga 14:6) Ko e “vagahau mitaki tukulagi” kua putoia e fakapuloaaga ko e “kautu [po ke, pule] he lalolagi kua eke ma e Iki ha tautolu mo e hana Keriso” mo e kua hoko e “vaha” a Iehova “ke moumou ai foki a lautolu kua moumou e lalolagi.” (Fakakiteaga 11:15, 17, 18) Nakai kia ko e tala mitaki moli a ia?

Ko e Heigoa i Loto he Fakakiteaga ma Tautolu?

4. (a) Ko e heigoa e matapatu he tau kupu moli ne haia he Fki veveheaga 1 he Fakakiteaga? (e) Ko e heigoa e poakiaga ma lautolu ne manako ke aoga mai he tau vagahau mitaki?

⁴ Ko e hafagiaga he veveheaga he tohi a Fakakiteaga kua fakakite a Iehova ko e “Alefa mo e Omeka, . . . ko ia kua moui ni, ne moui tuai foki, ko ia foki ke haele mai, ko ia hana e malolo oti kana.” Mo e fakakite hana Tama, ko Iesu Keriso, ko e “talahau fakamoli,” “ko e uluaki ha lautolu kua mamate,” mo e “ko e Iki foki he tau patuiki he lalolagi.” Kua vagahau foki hagaao ki a Iesu “ko ia kua fakaalofa mai kia tautolu, ne fakakoukou foki e ia a tautolu mai he tau hala ha tautolu ke he hana toto.” (Fakakiteaga 1:5, 8) Ti mai he hafagiaga, ne fakamaama he Fakakiteaga e matapatu fakamouiaga he kupu moli. “Kia lautolu kua nonofo ke he lalolagi” to nakai aoga mai he tau vagahau mitaki ane mai ke mailoga e lautolu e pule katoatoa ha Iehova, tua ke he toto ha Iesu, mo e talitonu kua liu fakatu mai e Iehova a ia mo e ko Keriso he mogonei ko e Pule kotofa he Atua ke he lalolagi.​—Salamo 2:6-8.

5. Ko e heigoa e matagahua he Keriso ne fakakite he Fki tau veveheaga 2 mo e 3 he Fakakiteaga?

⁵ Ko e tau veveheaga ua ne mui mai kua fakakite a Iesu Keriso ko e Leveki fakaalofa he lagi ke he tau fakapotopotoaga he tau tutaki hana he lalolagi. Ko e tohi vakai ne hagaao ke he tau fakapotopotoaga Kerisiano fifili ne fitu ne ha ha i Asia Tote he senetenari ke fakamua aki V.N. kua tokai e fakamafanaaga mo e fakatonuaga malolo ne kua gahuahua agaia he vaha nei. Ko e tau fekau ne fakafano ke he tau fakapotopotoaga kua fa kamata aki e tau kupu pehenei “Kua iloa e au hau a tau gahua” po ke “Kua iloa e au hau . . . a matematekelea.” (Fakakiteaga 2:2, 9) E, kua iloa moli e Keriso e tau matagahua i loto he tau fakapotopotoaga he tau tutaki hana. Ne nava a ia ke he falu ha ko e ha lautolu a fakaalofa, tua, fakafita ke he fekafekauaga, fakauka, mo e tua fakamoli ke he hana higoa mo e kupu. Ko e falu ne akonaki e ia ha kua tiaki e lautolu e fakaalofa ha lautolu ki a Iehova mo e hana Tama, mo e mahala a lautolu ke he mahani feuaki he fakatane mo e fifine, tapuaki tupua, po ke taute e tau vahega lotu tiaki taofiaga.

6. Ko e heigoa e fakakiteaga ne fakamau he Fki veveheaga fa ne lagomatai aki e tau tagata ke maama?

⁶ Fki Veveheaga 4 ne foaki e fakakiteaga ofogia he nofoaiki ha Iehova ko e Atua he lagi. Kua fakakite fakaku mai e lilifu he nofoaga a Iehova mo e he puhala pule he lagi ka fakaaoga e ia. Ko e tau pule ne foufou patuiki, ne viko takai e tau nofoaiki ha lautolu he nofoaiki ne mua he lalolagi mo e lagi katoatoa, kua fakafeilo ki a Iehova mo e tuogo atu: “Ko e Iki na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu, mo e eke ai a lautolu.”​—Fakakiteaga 4:11.

7. (a) Ko e heigoa ne fekau he agelu e tau tagata ne nonofo ke he lalolagi ke taute? (e) Ko e heigoa e vala ne mua he gahua fakaako ha tautolu?

⁷ Fai kakano kia e mena nei ke he tau tagata he vaha nei? E fai kakano moli. Ka manako a lautolu ke moui i lalo he Kautu he Afetau, lata ia lautolu ke omaoma ke he mena ne tuogo atu he “taha agelu kua lele ke he pulagi”: “Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga.” (Fakakiteaga 14:6, 7) Ko e taha kakano ne mua he gahua fakaakoaga he Tohi Tapu ne taute he Tau Fakamoli a Iehova ko e lagomatai a “lautolu kua nonofo ke he lalolagi” ke iloa mo e tapuaki ki a Iehova, mailoga hana tuaga Tufuga, mo e pauaki ke omaoma ke he pule katoatoa tututonu hana.

Ko e Punua Mamoe kua Lata he Fakalilifu

8. (a) Kua talahau fefe e Keriso he Fki tau veveheaga 5 mo e 6? (e) Ko e heigoa kua ako e lautolu oti ne fanogonogo ke he vagahau mitaki he fakakiteaga nei?

⁸ Ko e tau veveheaga ua ne mui mai, Fki 5 mo e 6, kua fakakite a Iesu Keriso ko e Punua Mamoe kua lata ke vevete e tohi vakai mo e tau fakamau fakamailoga ne fitu, ti kua fakakite he vagahau fakatai e tau mena ne fa e tutupu he vaha ha tautolu. (Fakatatai Ioane 1:29.) Ke he Punua Mamoe fakatai nei, ne pehe mai e tau leo he lagi: “Kua lata ni ia koe ke toto e tohi, mo e vevete hana tau fakamau fakamailoga; ha ko e mena ne keli a koe, ti fakafua foki e koe a mautolu ma e Atua ke he toto hau, mai he tau magafaoa oti, mo e tau vagahau kehekehe, mo e tau motu, katoa mo e atu motu; kua eke foki e koe a mautolu mo tau patuiki, mo tau ekepoa ke he Atua ha mautolu; kua eke foki a mautolu mo tau patuiki ke he lalolagi.” (Fakakiteaga 5:9, 10) Kua fakaako mai he fakakiteaga nei, ko e fakaveaga he toto he Keriso, kua ui ai falu tagata he tau motu oti ke fakalataha mo ia ki luga he lagi mo “tau patuiki ke he lalolagi.” (Fakatatai Fakakiteaga 1:5, 6.) Ko e numera tote ha lautolu kua fakakite mai he vala fakahiku he Fakakiteaga.

9. Kua fakakite fefe e Keriso he Fki veveheaga 6?

⁹ He taha fakakiteaga, kua fakakite e Keriso ko e tagata fakafoufou ne heke he solofanua hina, ne fina atu ai “kua kautu, to kautu ni a ia.” Fiafia ai, to kautu a ia ke he tau lauiaaga kelea ne fakatino he falu tagata heke solofanua ne tolu he Apakalifa, ne ta mai he heke nua vale ha lautolu e felakutaki, hoge, mo e mate ke he tau tagata tali mai he tau uho lahi he 1914. (Fakakiteaga 6:1-8) Ko e matagahua kehe ue atu he Keriso, ko e Punua Mamoe he Atua, ke he fakamouiaga he tau tagata mo e he fakamoliaga he tau finagalo homo ue atu a Iehova, ko e matapatu tala he gahua fakaakoaga he Tohi Tapu he Tau Fakamoli a Iehova.

10. (a) Ko e heigoa e talahauaga aoga ne ha ha he Fki veveheaga 7? (e) Vagahau fefe e Keriso hagaao ki a lautolu ne moua e Kautu?

¹⁰ Fki Veveheaga 7 kua tokai e moli e tau vagahau mitaki. Kua moua ni e tautolu i loto he tohi he Fakakiteaga e numera ha lautolu ne ui aki e Iesu ko e “fuifui mamoe gahoa” ne foaki he Matua he Punua Mamoe e Kautu ki ai. (Luka 12:32; 22:28-30) Ne fakamau fakamailoga e Iehova ko e Atua a lautolu nei he kakano he hana agaga. (2 Korinito 1:21, 22) Ko e aposetolo ko Ioane, ne moua e Fakakiteaga, ne talahau: “Ne logona foki e au e totouaga ha lautolu ne fakamau fakamailoga; ko e taha teau e afe, ti fagofulu ma fa e afe.” (Fakakiteaga 7:4) Ko e numera tonu nei kua fakamoli ai he veveheaga he vala fakahiku ko e katoatoa aia ha lautolu ne “fakafua mai he tau tagata” ke pule mo e Punua Mamoe i luga he Mouga ko Siona he lagi. (Fakakiteaga 14:1-4) Pete he foaki he tau lotu a Kerisitenitome e fakamaama taumaleku mo e nakai makona ke he numera nei, kua fuluola e mena ne talahau he tagata fakaako tokoluga he Tohi Tapu ko E. W. Bullinger hagaao ki ai: “Ko e talahauaga nukua moli: ko e numera iloa tonu kua kehe mai he numera nakai iloa tonu he veveheaga nei.”

11. Ko e heigoa e vagahau mitaki ka moua he Fki veveheaga 7? (e) Ko e heigoa e amaamanakiaga kua hafagi ki a lautolu he “moto tagata tokologa”?

¹¹ Ko e heigoa e numera nakai iloa tonu ne hagaao a Bullinger ki ai? He Fki 7 kupu 9, ne tohia he aposetolo ko Ioane: “Kua mole atu e tau mena ia, ti kitia ai e au, kitiala, ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakiteaga 7:9) Ko hai ne fafati e moto tagata tokologa nei, ko e heigoa e tuaga ha lautolu he mogonei ki mua he Atua, mo e ko e heigoa he vaha anoiha ma lautolu? Ko e tali ke he afetau ko e tala mitaki ma e tau tagata nonofo ke he lalolagi. Kua totou e tautolu: “Ko lautolu na kua o mai mai he matematekelea lahi, kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.” Ha kua tua ke he toto he Keriso, to puipui a lautolu he magahala he “matematekelea lahi.” To “takitaki [he Keriso] a lautolu ke he tau vaipuna he moui; to holoholo kehe foki he Atua e tau hihinamata oti mai he tau mata ha lautolu.” (Fakakiteaga 7:14-17) E, ko e totou miliona he tau tagata ne momoui he vaha nei to eke mo vala he moto tagata nakai maeke ke totou ka hao mai he fakaotiaga he fakatokaaga kelea nei he tau mena. Ko e tau tagata he Patuiki ko Iesu Keriso he magahala he hana Pule Afetau, to takitaki e ia a lautolu ke he moui tukulagi he lalolagi. Nakai kia ko e tala mitaki a ia?

“To Tonu Hana Tau Fakafiliaga”

12, 13. (a) Ko e heigoa ne tokai he Fki tau veveheaga 8 ke hoko ke he 19? (e) Ko e ha kua nakai lata e tau tagata loto fakamoli ke tupetupe he tau perofetaaga pihia?

¹² Fki Veveheaga 8 ke he 19 kua hili lahi ki ai e talahauaga mahuiga ko e tohi Apakalifa, po ke Fakakiteaga, ko e tohi ne talahau tuai e tau mena fakamatakutakuina. Ne tokai e tau matafekau mao he fakafiliaga (fakatino he tau ulo pu, tau malaia, mo e tau kapiniu he ita faka-Atua) ne fakatonutonu atu ke he tau vala kehekehe he fakatokaaga he tau mena a Satani. Ko e tau fakafiliaga nei kua fakahoko, fakamua ke he lotu fakavai (“Papelonia ko e Maga Lahi”), ti fakahoko ke he tau fakatokaaga politika nakai mahani Atua, ne fakatino he manu favale.​—Fakakiteaga 13:1, 2; 17:5-7, 15, 16.a

¹³ Ko e tau veveheaga nei kua fakakite e fakameaaga he lagi, mo Satani mo e hana tau temoni kua liti hifo ke he takaiaga he lalolagi. Kua foaki ai he mena nei e fakamaamaaga tonu ke he fakaagitau nakala pihia he lalolagi tali mai he 1914. (Fakakiteaga 12:7-12) Kua fakamaama foki he tau veveheaga ia, ke he vagahau fakatai, e fakatulakiaga he fakatokaaga kelea he tau mena a Satani he lalolagi. (Fakakiteaga 19:19-21) Kua lata kia e tau tagata loto fakamoli ke ofo ha ko e tau mena tutupu maaliali ia? Nakai, ha ko e magahala he fakafiliaga he Atua, ne tagi e kau he lagi: “Haleluia; kia ha ha he Iki ha tautolu a Atua e fakamouiaga, mo e fakahekeaga mo e lilifu, mo e malolo; ha kua fakamoli, to tonu hana tau fakafiliaga.”​—Fakakiteaga 19:1, 2.

14, 15. (a) Puhala fe ka ta mai he fakaotiaga he fakatokaaga kelea nei e tututonu? (e) Ko e ha kua eke e vala nei he Apakalifa mo mena ke fiafia ki ai e tau tagata loto fakamoli?

¹⁴ To nakai ta mai e Iehova e fakatokaaga tututonu he tau mena ka e nakaila uta kehe mai he lalolagi a lautolu ne moumou ai. (Fakakiteaga 11:17, 18; 19:11-16; 20:1, 2) Ka, kua nakai fai tagata po ke fakatufono fakapolitika kua ha ha ai e pule po ke malolo ke taute e mena nei. Ko Iehova ni mo e hana Patuiki mo e Ikifakafili kotofa, ko Keriso Iesu, ka maeke ke taute e mena nei ke he tututonu.​—2 Tesalonia 1:6-9.

¹⁵ Tuga ne fakakite fakamaaliali he Apakalifa, kua finagalo a Iehova ke ta mai e fakaotiaga ke he fakatokaaga kelea nei. Kua lata ai mogoia mo mena ke fiafia ai e tau tagata tane mo e tau fifine ne “kua tauoi mo e mānu ha ko e tau mena vihiatia kua eke.” (Esekielu 9:4) Kua lata ai ke mailoga e lautolu e manako mafiti ke omaoma ke he fakapuloaaga ne taute he agelu mo e vagahau mitaki, ne talahau: “Kia matakutaku a mutolu ke he Atua . . . ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi.” (Fakakiteaga 14:7) Ko e tau tagata pihia, kia tapuaki mo e fekafekau ki a Iehova fakalataha mo e hana Tau Fakamoli, ne “omaoma ke he tau poaki he Atua, mo e taofi e talahauaga kia Iesu.”​—Fakakiteaga 12:17.

Ko e Pule Lilifu Ue Atu he Afetau

16. (a) Ko e ha ne fakaheu he tau lotu a Kerisitenitome e amaamanakiaga he Afetau? (e) Ko e ha ne talitonu e Tau Fakamoli a Iehova to tali mai e liogi fakatai?

¹⁶ Fki Veveheaga 20 ke he 22 he tohi he Fakakiteaga kua tokai e fakaveaga faka-Tohiaga Tapu ma e amaamanakiaga ke he Afetau. Ko e vala hokoia ni anei he Tohi Tapu ne totoku e magahala he afe tau ka takitaki atu ke he fiafia tukumalagi he lagi mo e he lalolagi. Ko e tau lotu a Kerisitenitome kua fakaheu e amaamanakiaga he Afetau. Ko e taofiaga mahuiga anei he tau lotu, ko lautolu ne tututonu kua o hake ke he lagi ka e o a lautolu ne mahani kelea ki helo, kua nakai fai nonofoaga he lalolagi parataiso. Ko e liogi fakatai, ne ole ke ‘eke e finagalo he Atua ke he lalolagi tuga ne eke ke he lagi,’ kua galo tamoki e kakano ke he laulahi ia lautolu he tau lotu a Kerisitenitome. (Mataio 6:10) Ka kua nakai moli e mena ia ke he Tau Fakamoli a Iehova. Kua talitonu mauokafua a lautolu, ko Iehova ko e Atua kua nakai “eke noa” e lalolagi ka “ke nonofo ai e tau tagata.” (Isaia 45:12, 18) Ti, ko e perofetaaga he vaha i tuai, ko e liogi fakatai, mo e amaamanakiaga he Afetau kua tatai oti e tau manatu. He magahala he Pule Afe Tau, to fakamoli e Keriso ke eke e finagalo a Iehova he lalolagi, tuga ne eke he lagi.

17. Fakakite he heigoa ko e “tau tau ne taha e afe” kua lata ke mailoga ko e moli?

¹⁷ Ko e tau kupu “tau tau ne taha e afe tau” kua kitia laga ono ke he tau kupu fitu fakamua he Fakakiteaga veveheaga 20 tau kupu 1-7. Ka e taha e mena ne mailoga lahi ha kua fakaaoga lagafa mo e tau kupu fakatonu “e, he” ti kua fakakite ai kua hagaao ke he afetau moli, nakai ko e taha vaha loa ne nakai kua talahau, tuga ne manako e tau tagata fakahokohoko kupu a Kerisitenitome ke talitonu a tautolu ki ai. Ko e heigoa mogoia ka tupu he magahala he Afetau? Fakamua, to nakai fakagahuahua a Satani ke he vaha katoa ia. (Fakakiteaga 20:1-3; fakatatai Heperu 2:14.) Ko e tala mitaki ha a ia!

18. (a) Ko e ha ne kua ui e Afetau ko e “aho” he fakafiliaga? (e) Ko e heigoa ka tupu he matahiku he afe tau?

¹⁸ Ha kua tuku age e “fakafiliaga” ki a lautolu ka eke “mo tau patuiki fakalataha mo ia [Keriso] ke he tau tau ne taha e afe,” ko e magaaho moli nei, ko e “aho” afe tau he fakafiliaga. (Fakakiteaga 20:4, 6; fakatatai Gahua 17:31; 2 Peteru 3:8.) To liu fakatutu mai e tau tagata mamate mo e, fakalataha mo lautolu ne hao mai he “matematekelea lahi,” to fakafili tonu ni hagaao ke he tau gahua ha lautolu he magahala he magaaho ia. (Fakakiteaga 20:12, 13) He matahiku he afe tau, to fakatoka fakaku a Satani ke kamatamata fakahiku aki e tau tagata ti ka oti mogoia, ko ia mo e hana tau temoni, po ko hai ni ne mumui ki a ia he lalolagi to fakaotioti tukumalagi. (Fakakiteaga 20:7-10) Ko e tau tagata ne kautu mai he kamatamata to tohia tukulagi e tau higoa ha lautolu ke he “tohi he moui” mo e to takitaki atu a lautolu ke he magaaho tukulagi he moui fiafia, ke fekafekau mo e tapuaki ki a Iehova he lalolagi parataiso.​—Fakakiteaga 20:14, 15; Salamo 37:9, 29; Isaia 66:22, 23.

19. (a) Ko e ha kua mauokafua a tautolu ko e tau maveheaga homo ue atu ne ha ha he tohi he Fakakiteaga to fakamoli ai mo e nakai kaumahala? (e) Ko e heigoa ka tutala ki ai he vala tala ka mui mai?

¹⁹ Ko e tau vagahau mitaki a ia ne fakatoka mai i loto he Apakalifa. Nakai ko e tau maveheaga gati ne taute he tau tagata. Ne tohia he aposetolo ko Ioane: “Kua tala mai foki a ia kua nofo ke he nofoaiki, Kitiala, kua fakafou tuai e au e tau mena oti. Kua tala mai foki a ia kia au, Tohi ā; ha ko e tau kupu nai kua moli mo e fakamoli ia.” (Fakakiteaga 21:5) Ko e heigoa mogoia kua lata ia tautolu ke taute ke fakalataha atu ke he fakamoliaga he tau vagahau mitaki nei? Ko e tohi he Fakakiteaga kua tokai loga e fakatonuaga ma lautolu ne manako ke fakafiafia e Atua. He muitua ke he tau fakatonuaga pihia ka ta mai e fiafia mahaki, he mogonei mo e tukumalagi, tuga he fakakite he vala tala ka mui mai.

[Matahui Tala]

Tau Matakupu Fakamanatu

◻ Ko e matapatu he tau kupu moli fe, ne moua he Fakakiteaga veveheaga 4 ke he 6, ne fakatokatoka e vala aoga lahi he vagahau mitaki?

◻ Ko e heigoa e vagahau mitaki ka moua he Fakakiteaga veveheaga 7?

◻ Ko e ha kua nakai lata e tau tagata loto fakamoli ke nakai tupetupe ke he tau matafekau he fakafiliaga, ne moua he Fakakiteaga?

◻ Ko e heigoa e tau puhala ka eke e Afetau mo “aho” he fakafiliaga?

[Fakatino he lau 20]

Ko e Patuiki ko Iesu Keriso to uta kehe katoatoa mai he lalolagi e felakutaki, hoge, mo e mate