Lavekiaga he Fakakiteaga a Iesu Keriso
“Ka kia fiafia a . . . kia fiafia mo e olioli lahi ai a mutolu ka fakakite mai hana lilifu.”—1 PETERU 4:13.
1. Ne fakamaukoloa fefe e Iehova hana tau fekafekau?
NE KUA fakamaukoloa e Iehova hana Tau Fakamoli ke he tau mena fakaalofa loga. Ha ko e Fakaako Homo ue Atu ha tautolu, ne fakamaamatia e ia a tautolu ke he lotomatala katoatoa ne kua hagaao ke he hana finagalo mo e kakano ne fioia ai e ia. He puhala mai he agaga tapu hana, kua fakagahua e ia i loto ia tautolu e iloilo ke fakakikila atu e maama mo e loto malolo. Ne omoomoi he agaga tapu a Paulo, ke tala mai ki a tautolu ia 1 Korinito 1:6, 7: “Tuga ne talahauaga kia Keriso kua fakamoli ai kia mutolu; Ti kua nakai nonofogati ai a mutolu ke he taha mena fakaalofa noa, kua fakatalitali a mutolu ke he fakakiteaga he Iki ha tautolu ko Iesu Keriso.”
2. Ko e heigoa e amaamanakiaga olioli lahi ne tuku mai he “fakakiteaga he Iki ha tautolu ko Iesu Keriso”?
2 ‘Ko e fakakiteaga he Iki ha tautolu ko Iesu Keriso’—ko e heigoa e kakano he mena ia? Kua hagaao ke he magaaho ka fakakite mai ai a Iesu ko e Patuiki lilifu ue atu, kua taute e tau gahua ke age ke he tau tutaki mahani fakamoli hana, e palepale mo e ke fakahoko atu e tauiaga ke he tau tagata nakai mahani atua. Tuga he fakakite mai ia 1 Peteru 4:13, to eke ai mo magaaho he tau Kerisiano ne fakauku he agaga kua taofimau e mahani fakamoli, mo e ha lautolu a tau hoa fakamoli, he moto tagata tokologa, ke “fiafia mo e olioli lahi,” ti ko e mena ia ka fakakite mai e fakaotiaga he fakatokaaga he tau mena a Satani.
3. Kua lata a tautolu ke tu mauokafua fefe, ke tuga ne taute he tau matakainaga ha tautolu i Tesalonia?
3 He tata lahi mai e magaaho ia, kua ita a Satani ti fakatolomaki e fakapehiaaga ki a tautolu. Ati kua lata na tautolu ke taute e tau tuaga mauokafua! (1 Peteru 5:8-10) He tau magaaho ne fou agaia e tau matakainaga ha tautolu i Tesalonia i tuai ke he kupu moli, ne fa fakamamahi he tau mena matematekelea ne kua tuga e tau mena kua fa mahani ke lauia e tau tagata tokologa he Tau Fakamoli a Iehova he vaha nei. He pihia, ko e tau kupu he aposetolo ko Paulo ki a lautolu ne fai kakano lahi mahaki ki a tautolu. Ne tohia a ia: “Ko e mena tonu ke he Atua ke taui atu e matematekelea kia lautolu kua matematekelea ai a mutolu; Kia mutolu foki kua matematekelea, e okiokihaga fakalataha mo mautolu, ka fakakite mai e Iki mo Iesu mai he lagi, fakalataha mo e tau agelu he hana malolo, Ke he afi puhopuho, ke taui atu kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso.” (2 Tesalonia 1:6-8) E, to hoko mai e okiokiaga!
4. Ko e ha kua lata tonu e fakafiliaga ka fakahoko atu ke he vahega fekafekau lotu, he fakakiteaga a Iesu?
4 He vaha a Paulo, ne fakatupu he tau takitaki lotu Iutaia e tau mena matematekelea loga. Ti pihia foki he vaha nei, ne fa mahani e tau totokoaga ne taute ke he Tau Fakamoli a Iehova ko e tau tagata ne manako lahi ke he mafola ke kamata ni e lautolu ne ui ko e hukui e Atua, ti kua mua atu ke he vahega fekafekau lotu a Kerisitenitome. Ne fakatupua a lautolu nei ke iloa e Atua, ka kua nakai talia e lautolu ko e “tokotaha ni a Iehova” he Tohi Tapu, ti kua tautui aki e lautolu e mena nakai iloa ko e Tolu Taha. (Mareko 12:29, NW) Ne nakai omaoma a lautolu ke he tala mitaki kua hagaao ke he ha tautolu a Iki ko Iesu, ka e onoono atu ke he tau lagomatai ne taute he pule he tagata mo e nakai talia e tala mitaki ke he Kautu tututonu a Keriso kua hane hau. Ti kua lata e tau tagata lotu nei ne totoko ke mahikava he magaaho he “fakakiteaga he Iki ha tautolu ko Iesu Keriso”!
Ko e ‘Hauaga’ a Iesu Keriso
5. Ne ta fakamahinohino mai fefe e fakakiteaga a Iesu ia Mataio 24:29, 30?
5 Kua ta fakamahinohino mai e Iesu e fakakiteaga ia ia Mataio 24:29, 30. He fakamaama mai e tau vala kehekehe he fakamailoga ke he hana ha ha hinei mo e fakahikuaga he fakatokaaga nei, ne pehe a ia: “Ati fakapouli ai agataha e la, nakai huhulu mai foki e mahina, to mokulu foki e tau fetu mai he lagi, to lulululu foki e tau kau he lagi.” He magaaho ia to “kitia ai ke he lagi e fakamailoga he Tama he tagata.” To eke ai e tau motu he lalolagi ke “tagi tatuki ai . . . ti kitia ai e lautolu e Tama he tagata [Patuiki Faka-Mesia he Atua] kua hau ke he tau aolagi, mo e malolo, mo e lilifu lahi.” Kua hagaao e ‘hauaga’ nei, ko e er·khoʹme·non he vagahau Heleni, ke he hokomaiaga a Iesu ke Fakamatalahi a Iehova.
6, 7. Ko e ha, kua pehe ai ko e “to kitia foki a ia he tau mata oti kana,” mo e ko hai ne fakalataha ia lautolu nei?
6 Ne fakamaama mai foki he aposetolo ko Ioane e ‘hauaga’ nei ia Fakakiteaga 1:7, ke he mena ne pehe a ia: “Kitiala, kua haele mai a ia mo e tau aolagi.” To nakai kitia mata moli he tau fi a Iesu, ha kua fakahaha ai he “tau aolagi,” to nakai kitia mata moli hana hauaga ke fakahoko e fakafiliaga. Kaeke ke kitia he tau mata noa he tau tagata muikau, hana lilifu he lagi to eke ai ni a lautolu ke pouli e tau mata, ke tuga e mena ne tupu ki a Saulo he puhala tu ki Tamaseko, ne lauia ti pouli e tau mata he magaaho ne tu ki mua hana a Iesu kua moua e lilifu ke he maama lupalupa lahi mahaki.—Gahua 9:3-8; 22:6-11.
7 Kua talahau mai he fakamauaga ia Fakakiteaga “to kitia foki a ia he tau mata oti kana, katoa mo lautolu ne hoka a ia; to tagi tatuki foki e tau faoa oti he laloalgi ha ko ia.” Ti ko e kakano he mena nei, to iloa ai he tau tagata totoko he lalolagi ka kitia e fakaotiaga ne fakato hifo e Iesu ki a lautolu, kua hau a ia fakalataha mo e malolo mo e lilifu lahi mahaki hana, ko e Fakahokoaga Mahakava a Iehova. Ko e ha, ne taute ai e fakamaamaaga ko e tau fi nai a “lautolu ne hoka a ia”? Kua pihia e kakano ha ko e ha lautolu a tau manamanatu konakoiti ke he tau fekafekau a Iehova he vaha nei, ne kua tuga ni ko e tau tagata ne favale atu ki a Iesu. To eke moli ni a lautolu ke ‘tagi tatuki ha ko ia.’
8. Ko e heigoa e tau hatakiaga ne tukuogo atu e Iesu mo Paulo kua hagaao ke he fakaotiaga fakalutukia?
8 To hoko mai fefe e aho he tauiaga a Iehova? I loto he perofetaaga ia Luka he veveheaga 21, ne fakamaama e Iesu e tau mena tutupu fakalutukia ne kua eke mo tau fakamailoga ke he hana ha ha hinei, talimai he tau 1914. Ti kua hataki mai a Iesu he tau kupu 34 mo e 35: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti.” E, to agataha ni ke hoko fakalutukia mai e aho he tauiaga a Iehova! Kua talahau fakatonu mai foki he aposetolo ko Paulo e mena nei ia 1 Tesalonia 5:2, 3 (NW), he pehe: “Ko e aho a Iehova to hoko mai ai ke tuga lahi ni e tagata kaiha he po. Ko e magaaho ka pehe a lautolu: ‘Kua mafola mo e nakai haofia!’ ti mogoia ni ke hokotia fakalutukia e fakaotiaga ki luga ia lautolu.” Ti kua taute foki he tau motu he magaaho nei e tau tutalaaga ke he mafola mo e nakai haofia mo e fakatokatoka ai ke ati hake fakamalolo e Tau Motu Kaufakalataha ke leoleo e tau matatepu fai lekua felakutaki he fakaaoga e malolo he tau matakautau.
9. Ma hai ne ‘lupa mai foki e maama,’ mo e ko e ha?
9 I loto he 1 Tesalonia 5 tau kupu 4 mo e 5 (NW), kua fakaholo atu e aposetolo ke tala mai ki a tautolu: “Ka e, ko mutolu, ma tau matakainaga, nakai ha ha he pouligia a mutolu, ke eke ai e aho ia ke lakafia a mutolu ke tuga ka taute he tau tagata kaiha, ha ko mutolu ko e tau tama tane oti kana he maama mo e tau tama tane he aho. Kua nakai ha ha he po, po ke pouligia a tautolu.” Ne loto olioli a mautolu ke eke ko e tau tama tane he maama—ko e tau tagata kua fua e maama ke taatu ke he falu tagata kua manako lahi ke moua e mafola moli mo e nakai haofia he lalolagi fou he Atua. Ia Salamo 97:10, 11, kua totou e tautolu: “Ko mutolu kua fakaalofa atu kia Iehova, kia fakavihia e mutolu e tau mena kelea; kua leoleo e ia e tau agaga he hana tau tagata tapu, kua laveaki e ia a lautolu mai he tau lima he tau tagata mahani kelea. Kua gana e maama mo e tagata tututonu, kua gana foki e fiafia mo lautolu kua loto fakamoli.”
Ko e Fakaatuatu he Tau Mena Tutupu
10. Ko e heigoa e fakailoaaga tuai kua lata a tautolu ke fakanogonogo ki ai ne kua hagaao ke he aho he tauiaga he Atua? (Fakakiteaga 16:15)
10 To fakaatuatu fefe e tau mena tutupu he magaaho ka tokia ai e matematekelea lahi? Kia fuluhi a tautolu ke he veveheaga 16 a Fakakiteaga. Mailoga la, e mena ne fakamaama mai he tau kupu 13 ke he 16, kua fakapotopoto he tau agaga fakatemoni nakai mea e tau motu he lalolagi katoa ki Amaketo, ko e tauaga he aho lahi mahaki he Atua Malolo Mua ue Atu. Ti kua liu foki ke pehi e mahani he aho he tauiaga ka tokia mai tuga e tagata kaiha, mo e hataki mai ki a tautolu ke mataala tumau—ke taofimau e tau tapulu fakaagaga kua fakamailoga aki a tautolu ma e fakamouiaga. Kua hoko mai tuai e magaaho ke fakafili e tau tagata he lalolagi, tau motu, mo e—taha peresona foki. Ko hai a ia?
11. Ne fakakite mai fefe he fifine ia Fakakiteaga 17:5 na ia ni?
11 Ko e fifine he fakatai haia, ne lali moli ke taute na ia mo “tagata tokoluga.” Ne fakamaama mai ia Fakakiteaga 17:5 hagaao ki a ia ne tuga ‘ko e mena galo: ko Papelonia, ko e maaga lahi, ko e matua he tau fifine fakataka, mo e tau mena vihiatia he lalolagi.’ Ka e nakai kua eke a ia ko e mena nakai iloa ke he Tau Fakamoli a Iehova he mogonei. Kua fita he fakakite maaliali e ia a ia ko e kautu he lotu fakavai he lalolagi, ti ko e vala lahi he mena ia e tau vahega kehekehe a Kerisitenitome. Ti kua teteki lahi ke he tau mata a Iehova, tau lima lakulaku fakapolitika hana, ne kua eke ai a ia ke “konahia ke he toto he tau tagata tapu” he favale ke he tau Kerisiano moli, mo e kua lago ki a ia e matagahua fakaligi toto ha “lautolu oti ne kelipopo ke he lalolagi,” ti kua lafi ki ai foki a lautolu kua molea e teau miliona ne kelipopo he tau tauaga he senetenari ke 20 aki nei ni hokoia.—Fakakiteaga 17:2, 6; 18:24.
12. Ko e ha kua tu ai e tau vahega kehekehe a Kerisitenitome he mena fakahala?
12 Ka kua mua atu e kelea foki, he eke fakakelea he tau vahega kehekehe a Kerisitenitome e higoa he Atua, ne kua talahau fakatupua e lautolu ko e hukui e lautolu. Ne fakaako e lautolu e tau fakaakoaga fakataitai a Papelonia mo Heleni, ka e nakai ko e Kupu mea he Atua mo e fai vala ne fakalahi ki luga ke he tau mahani keukeu he tau motu katoa, he talia ke tokaholo e tau puhala he tau momoui kua vihiatia e tau mahani he Tohi Tapu. Kua fakahala he tau kupu ia Iakopo 5:1, 5, e tau tagata fakafuakoloa lotokai ne fakafua mena mo lautolu: “Kitiala, ko mutolu na ko e tau maukoloa, kia tagi mo e tagi tautau a mutolu ha ko e tau matematekelea ke hohoko mai kia mutolu. Kua nonofo a mutolu ke he motu mo e mitaki hololoa, mo e hula a mutolu ke he tau mena he tino; kua fagai e mutolu a mutolu tuga e tau manu mo e aho ke tamate ai.”
Tahifo ki Lalo a Papelonia ko e Maaga Lahi!
13. Ne kamata fefe, ke mafuta mai e matematekelea lahi mahaki, mo e mena fakatepetepe fe ne pehi fakalahi mai ia Fakakiteaga 18:4, 5?
13 To hoko ai e kamataaga he mafuta mai e matematekelea lahi ke fakahoko e fakafiliaga a Iehova ki a Papelonia ko e Maaga Lahi. Ne fakamaama fakahinohino mai ia Fakakiteaga 17:15-18 e “finagalo” he Atua—ke fakaholoholo kehe he “tau hoe foki ne hogofulu,” ko e tau pule malolo lahi mahaki i loto he “manu favale” ko e MK he lalolagi, a ia. “Ko e tau hoe foki ne hogofulu ne kitia e koe ke he manu favale, to fakavihia e lautolu e fifine fakataka mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi. Ha kua tuku atu he Atua ke he tau loto ha lautolu ke eke hana finagalo.” Ti kua nakai ofo ai mogoia he hataki fakatepetepe mai e leo i luga he lagi ia Fakakiteaga 18:4, 5: “Haku motu na e, ati o kehe ā mutolu ia ia, neke fakalataha a mutolu mo ia ke he hana tau hala, neke moua foki a mutolu he hana tau malaia; Ha kua o fakalataha mo ia hana tau hala kua hoko ni ke he lagi, kua manatu foki he Atua hana tau mahani hepehepe.” Ti kua fakatumau ai e uiaga ke tukuogo atu: Kia mumutu kehe oti kana e tau matutakiaga mo e lotu fakavai, neke tomui lahi!
14. Ko hai ka maanu he moumou a Papelonia ko e Maaga Lahi, mo e ko e ha?
14 To onoono fefe e lalolagi ke he moumouaga a Papelonia ko e Maaga Lahi? Kua tutu mai he mena mamao e tau tagata politika fakafualoto—“ko e tau patuiki foki he lalolagi”—kua momoko lahi ki a ia kakano ha ko e fakafetuiaga fiafia ha laua he tau senetenari, mai he feuaki fakaagaga ha laua. Kua tagi foki mo e maanu ki a ia e tau tagata lotokai he tau fakatuaga gahua, “ko lautolu kua fakafua . . . , ko lautolu ne maukoloa ha ko ia.” Kua tutu fakamamao foki a lautolu nei mai ia ia, kua pehe: “Oi te, oi te, e māga lahi, ne tapulu ke he ie mitaki, mo e uhi, mo e kula, ne fakatufele foki ke he auro, mo e tau maka uho, mo e tau penina; Ha ko e magaaho taha ni kua fakaoti ai e koloa kua homo he lahi.” Ko e tau tapulu mitaki fakaekalesia mo e fulufuluola he tau fale tapu lalahi he lalolagi ka galo moki tukulagi! (Fakakiteaga 18:9-17) Ka e to maanu nakai e tau tagata oti ha ko Papelonia ko e Maaga Lahi?
15, 16. Ti ko e heigoa ke eke aki e tau tagata he Atua ke olioli?
15 Kua tali mai ia Fakakiteaga 18:20, 21: “Kia fiafia ha ko ia, ko e lagi na e, katoa mo mutolu ko e tau aposetolo tapu, mo e tau perofeta; ha kua fakahala he Atua a ia he fakahala e ia a mutolu.” Ke tuga e makaholo lahi mahaki ne liti ke he tahi, “to liti hifo fakalahi pihia a Papelonia ko e māga lahi, ti nakai tuai kitia ni.”
16 Ko e mena fakaolioli lahi ha! Ne fakamoli mai ia Fakakiteaga 19:1-8 (NW) e mena nei. Ne laga fa e tau magaaho ne hea mai he lagi, “Kia fakaheke ki a Ioha, a mutolu ma tau tagata!” Kua laga tolu mai he tau Haleluia nei ne fakaheke a Iehova kakano ha kua fakahoko e ia e fakafiliaga tututonu ke he fifine fakataka talahaua, ko Papelonia ko e Maaga Lahi. Ti kua oti tuai e kautu he lotu fakavai he lalolagi! Kua hea mai e leo he nofoaiki he Atua, kua pehe: “Kia fakaheke ha tautolu a Atua, a mutolu oti kana ko e hana tau tupa, ko mutolu ne matakutaku ki a ia, ko lautolu ko e tau lalo tagata mo e tau tagata tokoluga.” Kua monuina lahi ha a tautolu ke lologo auloa e lologo ia!
Ko e Fakamauaga he Punua Mamoe
17. He fakatatai a Fakakiteaga 11:17 mo e 19:6, kua kakano ke he heigoa kua kamata ai a Iehova ke pule tuga e Patuiki?
17 Kua kamata mai he Haleluia ke fa aki e taha mataulu tala: “Kia fakaheke ki a Ioha, a mutolu ma tau tagata, kakano ha ko Iehova ko e ha tautolu a Atua, ko e Malolo Mua ue Atu, kua kamata tuai ke pule tuga e patuiki.” Ka e nakai kia ne taute pihia foki e taha kupu lologo ia Fakakiteaga 11:17 (NW)? Kua totou e tautolu he mena ia: “Kua fakaaue a mautolu ki a koe, ma Iehova ko e Atua, ko e Malolo Mua ue Atu, . . . kakano ha kua toto e koe hau a malolo lahi mahaki mo e kamata ai ke pule tuga e patuiki.” E. Ka e pete ni ia, kua hagaao e tau kupu ia Fakakiteaga 11:17 (NW) ki a Iehova ne tamai e Kautu faka-Mesia he tau 1914 ke “pule ke he tau motu oti ke he tokotoko lapatoa.” (Fakakiteaga 12:5) Kua ha ha ia Fakakiteaga 19:6 (NW), e tau kupu ke he fakaotiaga a Papelonia ko e Maaga Lahi. Kua fakalataha ki ai e uta keheaga he lotu ne tuga e fifine fakataka, ti kua fakamatalahi tuai e tuaga faka-Atua a Iehova. Kua tapuaki ki a ia ha ko e Pule Katoatoa ne Mua ue Atu mo e Patuiki, ka hoko ke he fakatulakiaga he lalolagi he magaaho nei ato hoko atu ki tukumalagi tukumuitea!
18. He uta kehe a Papelonia ko e Maaga Lahi ti kua hafagi ai e puhala ke taute e fakapuloaaga olioli lahi mahaki fe?
18 Ha kua pihia, liga kua lata ai ke taute e fakapuloaaga olioli lahi mahaki: “Kia taute ai a tautolu ke loto olioli mo e ke molea lahi e olioli, mo e kia taute a tautolu ke tuku atu ki a [Ioha] e lilifu, kakano ha kua hoko mai tuai e fakamauaga he Punua Mamoe mo e hana hoana foki kua tauteute tuai ne ia a ia. E, kua fita he tuku atu ki a ia ke tapulu e ie lino ne kikila lahi, mea, mo e mitaki, ha kua hagaao e ie lino mitaki ke he tau gahua tututonu ha lautolu ne tapu.” (Fakakiteaga 19:7, 8, NW) Ka kua nakai talahau mai e magaaho tonu ka moua e lautolu ne fakauku kua nonofo agaia he lalolagi ha lautolu a fakaliu tu mai ke he lagi. Ka e talahau fakatonu e fakamafanatiaaga ki a tautolu mai i loto he tala nei, hagaao ke he ha lautolu a fakamauaga auloa ke he Punua Mamoe, ko Iesu Keriso, ka eke ai ko e magaaho fiafia mo e kua pihia foki ni, kakano, ha ko e mena to kitia mata moli e lautolu e fakama ka hoko ke he fifine fakataka talahaua, ko Papelonia ko e Maaga Lahi.
Ne Fakaoti e Lalolagi a Satani
19. Ka ko e heigoa e falu mena tutupu ne fakamaama mai ia Fakakiteaga 19:11-21?
19 Kua liu foki e solofanua tea ne talahau fakamua ia Fakakiteaga 6:2 ke kitia mai. Kua totou e tautolu ia Fakakiteaga 19:11 (NW): “Ko ia ne nofo i luga ia ia [ko e solofanua tea] ne kua ui aki ko e Fakamoli mo e Moli, mo e taute e ia e fakafili mo e tauaga tututonu.” Ti ko e “Patuiki he tau patuiki mo e Iki he tau iki” kua heke atu ke fakatokai e tau motu mo e ke “taholi foki e ia e holiaga vine he ita lahi he Atua ko e Malolo Mua ue Atu.” Ti kua fakapotopoto teao e “tau patuiki he lalolagi mo e ha lautolu a tau matakautau” ke felakutaki atu he tauaga i Amaketo. Kua fakakatoatoa e Ia ne Heke he solofanua tea, hana totokoaga fakakaumahala. Ti kua nakai fai mena ne toe agaia he fakatokatokaaga a Satani ke he lalolagi.—Fakakiteaga 19:12-21, NW.
20. Ko e heigoa ne tupu ki a ia ko e Tiapolo?
20 Ka e kua a ia ko e Tiapolo? Ia Fakakiteaga 20:1-6, ko e fakamaama maiaga hagaao ki a Iesu Keriso ne tuga e “agelu kua hifo mai he lagi, ha ia ia e kei he pahua nakai gata mai, ha he lima foki hana e toua lapatoa lahi.” Ne tapaki e ia e tarako, ko e Gata fakamua, ko ia ko e Tiapolo ko Satani, kua pipi a ia, ti liti a ia ki loto he pahua, mo e pa mo e fakamau ai ki luga ia ia. Ha kua uta kehe e fakalavelaveaga a Satani mai he puhala mo e kua nakai maeke foki ke fakahehe e tau motu, ti kua kamata ai e Pule Afe Tau lilifu ue atu he Punua Mamoe mo e hana kitofaitane. Ti kua nakai fai hihina mata momoko! Kua nakai fai mate ne tupu mai ia Atamu! Kua nakai maanu, kua nakai tagi tatuki, kua nakai mamahi! “Ha kua mole atu e tau mena fakamua.”—Fakakiteaga 21:4.
21. He fakatalitali a tautolu mo e amaamanaki lahi ke he fakakiteaga a Iesu Keriso, ti kua lata mogoia ko e heigoa e fifiliaga mauokafua ha tautolu?
21 He fakatalitali a tautolu mo e amaamanaki lahi ke he fakakiteaga he ha tautolu a Iki ko Iesu Keriso, kia fakakite a e tautolu e loto fakamakutu lahi ke tala age ke he falu tagata e tau mena hagaao ke he tau maveheaga fakaalofa he Atua ke he Kautu. Kua tata lahi mai tuai e laveakiaga! Kia eke a a tautolu ke o atu ki mua, mo e o taha ni ki mua, tuga e tau fanau maamatia he Pule Katoatoa he Iki ko Iehova!
Ke Fakamanatu
◻ Kua fakakite mai he heigoa kua tata lahi mai e fakakiteaga a Iesu Keriso?
◻ To hoko mai fefe e aho he tauiaga a Iehova?
◻ Kua lata a ‘lautolu ne fakaalofa ki a Iehova,’ ke fefe e tau onoonoaga ke he tutuaga he lalolagi he magaaho nei?
◻ To fakaatuatu fefe e tau mena tutupu he magaaho ka tokai mai e matematekelea lahi?
[Fakatino he lau 28]
Ne ‘haele mai mo e tau aolagi’ a Iesu, ne nakai kitia mata, ke fakahoko atu e fakafiliaga
[Fakatino he lau 30]
To nakai leva ko e lotu fakavai, ko e fakatokaaga kelea a Satani, mo ia ni ko Satani ka malolo hifo oti kana ki lalo