Tata Mai Tuai e Parataiso!

Ko e tau mena kelea hane tutupu mogonei he lalolagi kua fakakite kua tata mai tuai e Parataiso. Kua talahau he Tohi Tapu to kitia e tautolu e tau vaha matakutakuina fakamua to hoko mai e Parataiso. Kua nonofo a tautolu he mogonei he magaaho pihia! Hanei falu mena ne talahau he Tohi Tapu to tutupu:

Tau felakutaki lalahi. “To laga e taha motu ke he taha motu, ko e taha kautu ke he taha kautu.” (Mataio 24:7) Kua fita e fakamoli e perofetaaga nei. Tali mai he 1914, ha ha i ai ua e felakutaki lalahi he lalolagi mo e loga e tau felakutaki ikiiki. Totou miliona e tagata ne mamate i ai.

Gagao holofa fano. To ha ha i ai e ‘tau tatalu ke he taha mena mo e taha mena.’ (Luka 21:11) Kua fakamoli kia e mena nei? E. Kua tamate he gagao kanesa, atevili, mama pala, malaria, AIDS, mo e falu gagao foki e tau miliona tagata.

Tote e mena kai. Ha ha he lalolagi katoa e tau tagata ne temotemoai e tau mena kai. Totou miliona e tau tagata ne mamate he hoge he tau tau takitaha. Ko e taha fakamailoga foki anei to nakai leva ti hoko mai e Parataiso. Kua talahau he Tohi Tapu: “To ha i ai foki e tau hoge.”—Mareko 13:8.

Tau mafuike. “To ha ha i ai e . . . tau mafuike ke he taha mena mo e taha mena.” (Mataio 24:7) Kua fakamoli foki e mena nei he vaha ha tautolu. Molea e miliona tagata ne mamate he tau mafuike tali mai he 1914.

Tau tagata mahani kelea. To “velevele koloa” mo e “ofaofa he tau tagata a lautolu ni.” To manako lahi a lautolu ke he “tau mena ke fiafia ki ai, ka e manako tote ke he Atua.” “To faliuliu ke he tau matua” e tau fanau. (2 Timoteo 3:1-5) Nakai kia talia e koe kua tokologa e tau tagata pihia he vaha nei? Nakai fai fakalilifuaga a lautolu ma e Atua, ti fakatupu kelea foki a lautolu ma lautolu kua lali ke ako hagaao ke he Atua.

Holifono. To ha ha i ai foki e “tupu lahi he mahani hepehepe.” (Mataio 24:12) Liga to talia e koe kua muitui e kelea he matahavala mogonei ke he tau tau kua mole. Kua nonofo tupetupe e tau tagata he tau matakavi oti ha ko e kaiha, fakavai, po ke fakapakia.

Kua fakakite he tau mena oti nei kua tata mai tuai e Kautu he Atua. Kua talahau he Tohi Tapu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.” (Luka 21:31) Ko e heigoa e Kautu he Atua? Ko e fakatufono he Atua he lagi ka ta mai ai e Parataiso ke he lalolagi nei. To hukui he Kautu he Atua e tau fakatufono he tagata.—Tanielu 2:44.