Magaaho Fe ka Pule e Kautu he Atua ke he Lalolagi?

KO E HEIGOA E TAU MENA TUTUPU NE TALAHAU E IESU KA HOHOKO?

Pehē a Iesu: “To laga e taha motu ke he taha motu, ko e taha kautu foki ke he taha kautu. To ha i ai e tau mafuike lalahi ke he taha mena mo e taha mena, ko e tau hoge foki, mo e tau tatalu.” (Luka 21:10, 11) Tuga e tau laini he pite he matalima, ko e tau mena oti nei ne tutupu kua fakakite fakamaali e fakamailoga. Pihia foki e pite he matalima kua fakakite aki e tagata, ko e tau mena nei ne tutupu he taha e magaaho ka fakakite “kua tata tuai e kautu he Atua.” Kua tutupu kia e tau mena ia he taha e magaaho ti kitia ai ke he lalolagi katoa? Manamanatu ke he fakamooliaga.

1. TAU FELAKUTAKI

He 1914, ne hoko e felakutaki ne nakaila pihia fakamua he fakamauaga tala tuai! Fa hagaao e tau tagata tohi tala tuai ke he tau 1914 ko e magaaho ne hiki lahi he fakamauaga tuai ha ko e felakutaki fakamua laia he lalolagi. Ko e felakutaki ia ne kamata ke fakaaoga lahi e tau tula tau, tau pomu ne fakatoka mai he tau vakalele, tau masinikani (machine gun), tau kese kona, mo e falu kanavaakau kelea muitui. Ti mui mai ai e felakutaki ke uaaki he lalolagi, ne tamata e tau kanavaakau niukilia. Matutaki e tau tagata ke felakutaki he tau matakavi kehekehe tali mai he 1914, ti totou miliona e tau tagata ne mamate he tau felakutaki ia.

2. TAU MAFUIKE

He tau tau takitaha kavi ke he 100 e mafuike ne lalahi mahaki ke tupu e “malona tiaki,” he talahau he Britannica Academic. Pehē e United States Geological Survey “hagaao ke he tau fakamauaga kua leva (tali mai he kavi 1900), ne amanaki a tautolu ke kavi 16 e mafuike lalahi he tau tau.” Pete kua manatu e falu na loga atu e mafuike mogonei ha kua holo ki mua e tau puhala ke fuafua aki, ka ko e tau mafuike lalahi he lalolagi katoa kua fakatupu e matematekelea mo e mamate e tau tagata, nakaila pihia ia tali mai.

3. NAKAI LAHI E MENA KAI

Ko e nakai lahi e mena kai he lalolagi katoa kua lagā mai he felakutaki, matahavala, tau lekua fakatupe, kelea e levekiaga he faahi gahua fonua, po ke tote e fakatokaaga ma e tau matagi hagahaga kelea lahi. Ko e World Food Programme he “2018 Year in Review” ne pehē: “He lalolagi katoa, 821 e miliona tagata ne nakai fai mena kai​—124 e miliona kua matehoge.” Ko e nakai huhua mitaki he tau mena kai ne lafi ke he mamate he kavi ke he 3.1 e miliona he tau fanau he tau tau takitaha. He tau 2011, ko e mena nei ne mamate ai kavi ke he 45 e pasene he tau fanau he lalolagi katoa.

4. TAU GAGAO MO E TAU TATALU

Ko e tohi he World Health Organization ne pehē: “Ko e senetenari ke 21 aki kua fitā he tutupu e tau tatalu lalahi. Tau gagao tuai ko e cholera mo e fiva ago kua liu mafuta mai, mo e tau gagao foou kua kitia ko e SARS, pandemic influenza, MERS, Ebola mo e Zika.” Ko e COVID-19 e gagao foou lahi mogonei. Pete he lahi atu e tau iloaaga he tau saienetisi mo e tau ekekafo hagaao ke he tau gagao, kua nakai maeke a lautolu ke moua e tuluiaga he tau gagao oti.

5. GAHUA FAKAMATALA HE LALOLAGI KATOA

Fakakite e Iesu e taha vala he fakamailoga he talahau tuai e ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) He lauia e lalolagi he tau lekua kelea lahi, molea e valu miliona e tagata mai he tau motu oti hane fakamatala e tala mitaki he Kautu he Atua ke he 240 e motu mo e ke molea 1,000 e vagahau. Nakaila tupu e mena nei he fakamauaga tala tuai.

KO E HEIGOA E KAKANO HE FAKAMAILOGA MA TAUTOLU?

Ko e tau mena ia he fakamailoga ne talahau e Iesu hane tutupu he vahā nei. Ko e ha kua manako a tautolu ke iloa e mena ia? Ha kua pehē a Iesu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.”​—Luka 21:31.

Ko e fakamailoga ne talahau e Iesu, fakalataha mo e matohiaga he Tohi Tapu kua lagomatai a tautolu ke maama na fakatū he Atua e Kautu haana he lagi he tau 1914.a He mogoia, fakatū he Atua e Tama haana ko Iesu Keriso mo Patuiki. (Salamo 2:2, 4, 6-9) Nakai leva, to pule e Kautu he Atua ke he lalolagi mo e to utakehe e tau pule oti ne totoko ti taute e lalolagi mo parataiso ke nonofo tukulagi e tau tagata.

Nakai leva, ko e tau kupu he liogi fakatai ne fakaako e Iesu to fakamooli: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:10) Ka ko e heigoa hane taute he Kautu tali mai he kamata ke pule he 1914? Ti ko e heigoa ka amaamanaki atu a tautolu ki ai ka pule katoatoa e Kautu ke he tau tagata?