Veveheaga Ua
Fakaheke a Iehova ko e Atua Moli Tokotaha
1. Ko hai e Atua moli tokotaha?
PEHE e Tohi Tapu pete he tokologa kua talahaua ko e tau atua, “ha ha ia tautolu e Atua tokotaha ni ko e Matua.” (1 Korinito 8:5, 6) Ko e “Atua tokotaha” ia ko Iehova, ko e Tufuga he tau mena oti kana. (Teutaronome 6:4; Fakakiteaga 4:11) Ne hagaao a Iesu ki a ia ko e “haku a Atua mo e ha mutolu a Atua.” (Ioane 20:17) Ne talia a ia mo Mose, ne talahau fakamua: “Ko Iehova ko e Atua ni a ia, to nakai ha i ai taha ka ko ia ni.” (Teutaronome 4:35) Kua mua atu a Iehova ke he ha mena tapuaki fakatai, tuga e tau tupua ta, tau tagata tapu, po ke fi hana ko Satani ko e Tiapolo, ko e “atua he lalolagi nai.” (2 Korinito 4:3, 4) Ke fakatatai ke he tau mena oti nei, ko Iehova, tuga ne fakahigoa e Iesu a ia, “ko e Atua moli tokotaha.”—Ioane 17:3.
2. He ako a tautolu hagaao ke he Atua, lata ke lauia fefe e tau momoui ha tautolu?
2 Ko e tau tagata loto fakaaue ne ako e tau aga loto mafanatia he Atua, ti pihia ke he tau gahua ne taute mo e to taute e ia ma tautolu, kua futia atu ai ki a ia. He tupu e fakaalofa ha lautolu ki a Iehova, ne fakaohooho a lautolu ke fakaheke a ia. Fefe? Taha puhala ko e tutala ke he falu hagaao ki a ia. “Ko e gutu ke talahau ai, ke hoko mai ai e fakamouiaga,” he talahau he Roma 10:10. Taha puhala ke fifitaki ki a ia ke he tau kupu mo e tau gahua. “Kia fifitaki a mutolu ke he Atua tuga e tau fanau fakahelehele,” he talahau he Efeso 5:1. Ke taute katoatoa ai, latatonu ia tautolu ke iloa moolioli a Iehova.
3. Ko e heigoa e tau matapatu aga he Atua?
3 Ke he Tohi Tapu katoa, loga e tau talahauaga ne fakakite e tau aga kua mua atu he Atua. Ko e hana tau matapatu aga ne fa ko e pulotu, fakafili tonu, malolo, mo e fakaalofa. ‘Ne toka ia ia e pulotu.’ (Iopu 12:13) ‘Kua fakafili tonu hana tau puhala oti.’ (Teutaronome 32:4) Ko ia kua ‘malolo lahi.’ (Isaia 40:26) “Ko e Atua ko e fakaalofa.” (1 Ioane 4:8) Pete ia, he tau matapatu aga ne fa he Atua, ha e fe e aga kua mua atu, ko e aga kua mahomo hake e fakakite ko e Atua fefe a ia?
“Ko e Atua ko e Fakaalofa”
4. Ha e fe e tau aga he Atua ne fakamatapatu e tufugatiaaga hana he lagi mo e lalolagi katoatoa mo e tau mena momoui oti kana?
4 Manamanatu ke he mena ne omoomoi a Iehova ke tufuga e lagi mo e lalolagi katoatoa mo e tau mena momoui lotomatala fakaagaga mo e tau tagata. Ko e pulotu kia po ke malolo hana? Nakai, he fakaaoga he Atua e tau mena ia, ne nakai ko e tau mena ia e malolo omoomoi. Ti nakai fakaata he fakafili tonu hana ke fakaaoga auloa e ia e mena fakaalofa he moui. Ka e, ko e fakaalofa lahi he Atua ne omoomoi a ia ke olioli auloa e iloilo mo e falu. Ko e fakaalofa ne omoomoi a ia ke finagalo kua lata e tau tagata omaoma ke moui tukulagi he Parataiso. (Kenese 1:28; 2:15) Ko e fakaalofa ne fakatupu a ia ke utakehe e fakahala ne tamai e Atamu ke he tagata.
5. Hagaao ke he Tohi Tapu, ko e peresona a Iehova he aga fe, mo e ko e ha?
5 Ti, mai he tau aga oti he Atua, kua mua ue atu hana fakaalofa. Ko e tefito, po ke aga pauaki hana a ia. He aoga ni tuga e hana pulotu, fakafili tonu, mo e malolo, kua nakai talahau e Tohi Tapu ko Iehova ko e taha he tau mena ia. Ka e pehe ai ko ia ko e fakaalofa. E, ko Iehova ko e peresona he fakaalofa. Ko e fakaalofa anei ne takitaki he matapatu fakaakoaga, nakai he logonaaga. Fakave e fakaalofa he Atua ke he tau matapatu fakaakoaga he kupu moli mo e tututonu. Ko e vahega tokoluganea he fakaalofa, tuga ni ne fakakite e Iehova ko e Atua. Ko e fakaalofa pihia ko e fakakiteaga he nakai fulukovi mo e kua fakatauo tumau mo e fakamoliaga ne maeke ke kitia e fakagahuaaga.
6. Ko e heigoa ati maeke a tautolu ke fifitaki e Atua, pete he tokoluga mua ue atu a ia ki a tautolu?
6 Ko e aga fulufuluola fakaalofa nei kua maeke ia tautolu ke fifitaki e Atua pihia. Ha ko e tau tagata tokolalo, nakai mitaki katoatoa, tau tagata hihiga mau ke hepe, liga manatu a tautolu to nakai maeke ia tautolu ke taute mo e kautu ai. Ka e hanei taha fakataiaga he fakaalofa lahi mahaki ha Iehova: Kua mailoga e ia e tau kuku ha tautolu mo e nakai manako ke he mitaki katoatoa mai ia tautolu. Iloa e ia kua mamao ligo a tautolu mai he mitaki katoatoa mogonei. (Salamo 51:5) Ko e kakano haia kua pehe e Salamo 130:3, 4: “Ane mai tokaloto e koe e tau mahani hepehepe, po ko hai, ma Iki na e, ke maeke ke tu atu? Ka e ha ha ia koe ke fakamagalo e tau hala.” E, ko Iehova ko e “Atua fakaalofa hofihofi noa mo e fakaalofa noa, fakatuai ke ita mo e lahi e fakaalofa-totonu.” (Esoto 34:6, NW) “[Iehova] na e, kua mitaki ni a koe, ti fakamagalo e tau hala.” (Salamo 86:5) Ko e mafanatia ha ia! Kua hauhau ha ia ke fekafekau ke he Atua homo ue atu nei mo e ke iloa hana leveki fakaalofa mo e fakaalofa noa!
7. Maeke fefe ke kitia e fakaalofa ha Iehova ke he hana tau tufugatia?
7 Maeke foki e fakaalofa ha Iehova ke kitia ke he hana tau gahua he tufugatia. Manamanatu ke he tau mena mitaki loga ne foaki e Iehova ke olioli a tautolu, tuga e tau mouga, tau vao uhi, tau namo, mo e tau moana fulufuluola. Kua foaki mai e ia e tau mena kai kua ofoofogia e kehekehe ke fiafia a tautolu he kai mo e fakamalolo e tau tino ha tautolu. Pihia foki, ne loga lahi mo e kehekehe e tau fiti fulufuluola mo e manogi ne foaki e Iehova pihia mo e tufugatia he tau manu fuluola. Ne taute e ia e tau mena ke fakafiafia aki e tagata, pete he nakai lata ia ia ke taute pihia. Moli, he nonofo he lalolagi kelea nei he tuaga nakai mitaki katoatoa ha tautolu, kua nakai maeke ia tautolu ke olioli katoatoa hana tau tufugatia. (Roma 8:22) Ka e manamanatu la ke he tau mena ka taute e Iehova ma tautolu he Parataiso! Kua fakamafana mai he salamo a tautolu: “Kua fakamafola e koe hāu a lima, mo e fakamakona e manako [mitaki] he tau mena momoui oti.”—Salamo 145:16.
8. Ko e heigoa e fakafifitakiaga mua ue atu he fakaalofa ha Iehova ma tautolu?
8 Ko e heigoa e fakafifitakiaga mua ue atu he fakaalofa ha Iehova ke he tau tagata? Ne fakamaama he Tohi Tapu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Kakano kia ha kua mitaki e tagata ati taute e Iehova e mena nei? Tali he Roma 5:8: “Kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.” E, ne fakafano mai he Atua hana Tama mitaki katoatoa ke he lalolagi ke foaki e moui hana mo poa lukutoto ke laveaki a tautolu mai he fakahala he hala mo e mate. (Mataio 20:28) Kua hafagi he mena nei e puhala ma e tau tagata ne fakaalofa ke he Atua ke moua e moui tukulagi. Fakaaue ai, kua fakalaulahi atu e fakaalofa he Atua ki a lautolu oti kua manako ke taute hana finagalo, he talahau he Tohi Tapu ki a tautolu: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.
9. Kua lata ke fakaohooho fefe a tautolu ha kua foaki e Iehova hana Tama ke lukutoto ma tautolu?
9 Maeke fefe he foaki e Iehova hana Tama ke lukutoto ma tautolu, he hafagi e puhala ke he moui tukulagi, kua fakaohooho e puhala ne fakaaoga e tautolu e tau momoui ha tautolu mogonei? Kua lata ke fakahokulo atu e fakaalofa ha tautolu ke he Atua moli, ko Iehova. He magaaho taha, kua lata ke taute a tautolu ke manako ke fanogonogo ki a Iesu, ne hukui e Atua. “Ne matulei foki a [Iesu] ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei.” (2 Korinito 5:15) Ko e mitaki ha ia ke muitua ke he tau tuagahui a Iesu, ha ko ia e fakafifitakiaga ne muitua ke he fakaalofa mo e fakaalofa hofihofi noa ha Iehova! Kua fakakite he mena nei e talahauaga ha Iesu ki a lautolu kua fakatokolalo: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.”—Mataio 11:28-30.
Fakakite e Fakaalofa ke he Falu
10. Ko e heigoa falu puhala kua maeke ia tautolu ke fakakite e fakaalofa ke he tau matakainaga Kerisiano?
10 Fakakite fefe e tautolu kua ha ha ia tautolu e fakaalofa ma e tau matakainaga Kerisiano tuga he fakaalofa a Iehova mo Iesu ki a tautolu? Mailoga e tau puhala loga kua maeke ia tautolu ke taute e mena nei: “Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga, nakai mahani fuafuakelea, nakai kumi e ia hana tau mena, nakai ita vave, nakai talahaua e kelea ke he taha, nakai fiafia ke he tau mahani kelea, ka e fiafia ni mo e kupu moli; kua fakauka ke he tau mena oti, kua talia e tau mena oti, kua amaamanaki ke he tau mena oti, kua fakamanavalahi ke he tau mena oti. Nakai tuai oti e fakaalofa.”—1 Korinito 13:4-8; 1 Ioane 3:14-18; 4:7-12.
11. Ko hai foki kua lata ke fakakite e tautolu e fakaalofa ki ai, mo e fefe?
11 Ko hai foki kua lata ke fakakite e tautolu e fakaalofa ki ai, mo e fefe? Ne pehe a Iesu: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e [a]gaga [t]apu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Putoia ke he mena nei e folafola he tala mitaki ke he parataiso he Atua hane hau ki a lautolu ne nakaila ko e tau matakainaga Kerisiano ha tautolu. Ne fakakite fakamahino e Iesu kua nakai lata e fakaalofa ha tautolu ke fakamahao ni ki a lautolu ne tatai e tau taofiaga mo tautolu, he pehe a ia: “Kaeke foki ke fakaalofa atu [hokoia] a mutolu kia lautolu ne fakaalofa mai kia mutolu, ko [e] heigoa kia e palepale kua moua e mutolu? Ka e nakai kia eke he tau telona e mena foki ia? Kaeke ke fakaalofa a mutolu ke he tau matakainaga ha mutolu hoko lautolu, ko heigoa kia e mena uho kua eke e mutolu? Ka e nakai kia eke pihia he tau telona.”—Mataio 5:46, 47; 24:14; Kalatia 6:10.
‘O he Higoa a Iehova’
12. Ko e ha e higoa he Atua kua maeke ke hagaao ki a ia ni hokoia?
12 Taha vala uho foki he fakaheke e Atua moli ko e iloa, fakaaoga, mo e fakaako e falu ke he hana higoa kehe lahi, ko Iehova. Ne talahau he salamo e manako nei: ‘Ti iloa ai e lautolu a koe, ko e hāu a higoa ko Iehova, hoko koe ni kua Mua Ue Atu ke he lalolagi oti.’ (Salamo 83:18) Ko e kakano he higoa Iehova “Ko Ia ne Taute ke Tupu Moli.” Ko ia ko e Finagalo Mua Ue Atu, kua kautu tumau e fakahikuaga he hana tau finagalo. Ti ko e Atua moli tokotaha ni kua tonuhia ke moua e higoa ia, ha kua nakai iloa moli he tau tagata to kautu nakai ha lautolu a tau laliaga. (Iakopo 4:13, 14) Ko Iehova hokoia ni ka talahau ko e hana kupu ‘to kautu ni’ ke he mena ne talahau e ia. (Isaia 55:11) Tokologa kua fiafia lahi he kitia fakamua e lautolu e higoa he Atua i loto he tau Tohi Tapu ha lautolu mo e ako e kakano. (Esoto 6:3) Ka e to aoga ni a lautolu mai he iloilo nei kaeke ‘o a lautolu he higoa a Iehova tukulagi tukumuitea.’—Mika 4:5.
13. Ko e heigoa kua putoia ke he iloa e higoa ha Iehova mo e o he hana higoa?
13 Hagaao ke he higoa he Atua, pehe e Salamo 9:10: “To tua kia koe a lautolu kua iloa hāu a higoa.” Kua lahi atu e mena ne putoia he iloa ni he higoa Iehova, nukua nakai kakano to falanaki pauaki ki a ia. Ko e iloa e higoa he Atua kakano ke loto fakaaue ke he Atua ia ko Iehova, he fakalilifu hana pule, he omaoma hana tau poaki, he falanaki ki a ia ke he tau mena oti kana. (Tau Fakatai 3:5, 6) Tatai ai, ko e o he higoa ha Iehova kakano ke tukulele ki a ia mo e hukui a ia ko e taha he hana tau tagata tapuaki, he fakaaoga moli e tau momoui ha tautolu fakalautatai mo e finagalo he Atua. (Luka 10:27) Kua taute nakai e koe e mena ia?
14. Kaeke ke fekafekau tukulagi a tautolu ki a Iehova, ko e heigoa kua lata ke lafi ki ai he nakai taute noa ni ko e matagahua?
14 Kaeke ke fekafekau tukulagi a tautolu ki a Iehova, kua nakai lata ia tautolu ke taute noa ni ko e taha matagahua. Ne fakamalolo he aposetolo ko Paulo a Timoteo ne loga e tau tau ne fekafekau ki a Iehova: “Kia ako fakamahani a koe ni ke he mahani Atua fakamoli, mo hau ni a foliaaga.” (1 Timoteo 4:7, NW) Ko e fakamoliaga kua hake mai he loto fakaaue ma e tagata kua tuku atu ki ai e fakamoli. Ko e “mahani Atua fakamoli” kua talahau e hokulo he fakalilifu ma Iehova ni hokoia. Kua fakakite e pipiki fakaalofa ki a ia kakano kua lahi mahaki e fakahekeaga ki a ia mo e hana tau puhala. Kua fakatupu ia tautolu e manako ke tuku fakatokoluga he tau tagata oti kana hana higoa. Kua latatonu ia tautolu ke feaki e mahani Atua he tau momoui ha tautolu kaeke o tukulagi a tautolu ke he higoa ha Iehova, ko e Atua moli tokotaha.—Salamo 37:4; 2 Peteru 3:11.
15. Maeke fefe ia tautolu ke foaki ke he Atua ha tautolu a fakamoli katoatoa?
15 Ke fekafekau fakamitaki ke he Atua, kua latatonu ia tautolu ke foaki ki a ia e tapuaki katoatoa, ha ko ia “ko e Atua manako lahi ke he fakamoli katoatoa.” (Esoto 20:5, NW) Nakai maeke ia tautolu ke fakaalofa ke he Atua ti he magaaho taha fakaalofa ke he lalolagi kelea, ne ko Satani e atua. (Iakopo 4:4; 1 Ioane 2:15-17) Kua iloa tonuhia e Iehova e vahega tagata ne igatia lali a tautolu ki ai. (Ieremia 17:10) Kaeke ofania moli e tautolu e tututonu, kua kitia ai e ia mo e to lagomatai a tautolu ke fakauka he tau kamatamata ha tautolu he tau aho takitaha. He lalago a tautolu aki hana agaga tapu malolo lahi, to lagomatai e ia a tautolu ke kautu mai he kelea nukua tupu lahi he lalolagi nei. (2 Korinito 4:7) To lagomatai foki e ia a tautolu ke fakatumau e amaamanakiaga malolo he moui tukulagi ke he lalolagi parataiso. Ko e amaamanakiaga lilifu ha a ia! Kua lata ke hokulo e loto fakaaue ha tautolu ki ai mo e fekafekau fakamakai ke he Atua moli, ko Iehova, ko ia ati maeke e tau mena ia.
16. Ko e heigoa hau kua lata ke manako ke taute, fakalataha mo e falu ne totou miliona?
16 Totou miliona e tau tagata he lalolagi katoa nukua talia fiafia e uiina he salamo ne tohi: “Kia nava atu a mutolu kia Iehova fakalataha mo au; kia fakaheke fakalataha a tautolu ke he hana higoa.” (Salamo 34:3) Kua uiina e Iehova a koe ke eke mo taha he moto tagata he tau motu oti hane taute e mena nei.
Fakatutala Fakamanatu
• Ko e peresona fefe a Iehova? Aoga fefe ki a tautolu he moua e maamaaga mahino ke he tau aga hana?
• Lagomatai fefe e tautolu falu tagata ke ako e kupu moli hagaao ke he Atua?
• Ko e heigoa kua putoia he iloa e higoa ha Iehova mo e o he hana higoa?
[Tau Fakatino he lau 14]
Ko Iehova, he hana fakaalofa ue atu, ‘to hafagi hana lima mo e fakamakona e manako he tau mena momoui oti kana’