Veveheaga Hogofulu Ma ono
‘Kia Fakaalofa Lahi ko e Taha ki a Taha’
1. Ko e heigoa kua fa fakafiafia aki a lautolu ne fou mai ke he tau feleveiaaga he Tau Fakamoli a Iehova?
KAEKE o mai fakamua la ia e tau tagata ke he tau feleveiaaga he Tau Fakamoli a Iehova, ne fa fiafia tumau a lautolu ke he fakaalofa ne kitia i ai. Ne kitia e lautolu he puhala ne fakafeleveia ki a lautolu mo e fakafetuiaga mafanatia. Kua mailoga foki e lautolu ne ahiahi mai ke he tau fonoaga ha tautolu e fakaalofa nei. Taha e tagata tohi tala ma e nusipepa ne tohia hagaao ke he taha fonoaga: ‘Ai fai tagata i lalo hifo he malolo he tau tulaki po ke kava. Ai tui kalaga mo e tui ka. Ai taupoka. Ai tau omoi. Ai fai tagata ne kupu kelea po ke kaialu. Ai fai vaiga kiva po ke tau vagahau kelea. Ai fai ahua tapaka. Ai fai kaiha. Ai fai tagata ne tolo e tau gati apa ke he motietie. Ne kehe lahi mahaki.’ Ko e tau mena oti nei ko e fakamoliaga he fakaalofa, ko e vahega ne “nakai mahani fuafuakelea, nakai kumi e ia hana tau mena.”—1 Korinito 13:4-8.
2. (a) Fai magaaho he mole, ko e heigoa kua lata ke fakamoli kua fakakite e tautolu e fakaalofa? (e) He fifitaki ke he Keriso, ko e heigoa e vahega fakaalofa kua lata ia tautolu ke feaki?
2 Ko e fakaalofa fakamatakainaga ko e fakamailoga he tau Kerisiano moli. (Ioane 13:35) He tupu a tautolu fakaagaga, ne ako a tautolu ke fakakite fakalahi atu e fakaalofa. Ne liogi e aposetolo ko Paulo ke he fakaalofa he tau matakainaga Kerisiano hana ke “fakatupu lahi ue atu.” (Filipi 1:9) Ne fakakite he aposetolo ko Ioane kua lata e fakaalofa ha tautolu ke foaki noa. Ne tohia e ia: “Ko e mena foki hanai kua iloa ai e tautolu e fakaalofa he tuku atu e ia [ko e Tama he Atua] hana moui ke hukui aki a tautolu; lata foki kia tautolu ke tuku atu e moui ha tautolu ke hukui aki e tau matakainaga.” (1 Ioane 3:16; Ioane 15:12, 13) To tuku atu moli kia e tau momoui ha tautolu ke hukui aki e tau matakainaga ha tautolu? Ke he tau tutuaga loga to nakai pihia, ka e laulahi fefe e lali ha tautolu ke lagomatai a lautolu mogonei, pete he nakai hagahaga mitaki?
3. (a) Ko e heigoa e puhala ka liga fakakite fakalahi atu e tautolu e fakaalofa ha tautolu? (e) Ko e ha kua aoga ai ke fakaalofa lahi ko e taha ke he taha mogonei?
3 Fakalataha mo e tau gahua ha tautolu ne fakaata e agaga foaki fakatagata, kua lata ia tautolu ke mafanatia moli ke he tau matakainaga ha tautolu. Kua fakamalolo mai he Kupu he Atua ki a tautolu: “Kia fakafeheleaki ke he feofanaki he tau matakainaga.” (Roma 12:10) Kua logona pihia e tautolu oti ke he falu tagata. Ka e maeke nakai ia tautolu ke ako ke logona hofihofi pihia ke he falu foki? He tata mai e fakaotiaga he fakatokaaga tuai nei, kua aoga lahi ma tautolu ke fakatata fakalahi ke he tau matakainaga Kerisiano ha tautolu. Pehe e Tohi Tapu: “Kua tata mai tuai e fakatulakiaga he tau mena oti; . . . Kua mua ke he tau mena oti ke moua e mutolu e fakaalofa lahi ko e taha kia taha, ha ko e fakaalofa ke ufiufi ai e tau hala loga.”—1 Peteru 4:7, 8.
Ka Tutupu e Tau Lekua
4. (a) Ko e ha ne maeke e tau lekua ke tupu ki a lautolu i loto he fakapotopotoaga? (e) He nakai hihiga mau a tautolu ke taute pihia, ko e heigoa e tau mena mitaki ka fua mai he fakagahua e tautolu e tau fakatonuaga he Tohi Tapu?
4 Moli, ha kua nakai mitaki katoatoa a tautolu to ha ha e tau magaaho ka taute e tautolu e tau mena ka fakahukia ke he falu. Ko e tau matakainaga foki ha tautolu to liga hala mai ki a tautolu ke he tau puhala kehekehe. (1 Ioane 1:8) Kaeke ha ha a koe he tuaga ia, ko e heigoa hau kua lata ke taute? Kua foaki mai he tau Tohiaga Tapu e tau takitakiaga kua lata. Ka e ko e tau talahauaga i ai to liga nakai felauaki mo e tau mena ne hihiga a tautolu ko e tau tagata nakai mitaki katoatoa ke taute. (Roma 7:21-23) Ka e, ko e fakamakamaka ha tautolu ke fakagahua e fakatonuaga he Tohi Tapu ka foaki e fakamoliaga kua manako moli a tautolu ke fakafiafia a Iehova. Ka taute pihia to mahomo atu foki e mitaki he aga fakaalofa ha tautolu ke he falu.
5. Kaeke fakahukia mai he taha a tautolu, ko e ha kua nakai lata ia tautolu ke taui?
5 Ka hukia e tau tagata, ne fa kumi puhala a lautolu falu magaaho ke taui e tagata ne hepe. Ka e kua fakaauatu he mena ia e kelea he tuaga. Ka lata ke taui, kua lata ia tautolu ke toka e mena ia ke he Atua. (Tau Fakatai 24:29; Roma 12:17-21) Liga lali falu ke kalo mai he matutaki mo e tagata ne taute lekua. Ka e nakai lata ia tautolu ke pihia ke he tau matakainaga tapuaki, ha ko e taliaaga he tapuakiaga ha tautolu kua lauia foki e fakaalofa ha tautolu ke he tau matakainaga ha tautolu. (1 Ioane 4:20) Ti, tohi e Paulo: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a Keriso kia mutolu, kia pihia foki a mutolu.” (Kolose 3:13) Maeke nakai ia koe ke taute pihia?
6. (a) Lata ke lagafiha e fakamagalo e tautolu ha tautolu a matakainaga? (e) Ko e loto fakaaue ha tautolu ke he heigoa ka lagomatai a tautolu ke fehagai mo e tau agahala mai ki a tautolu?
6 Ka e kua ka fai tagata kua agahala tumau mai ki a tautolu ka e nakai taute e ia ha agahala muitui ke hokotia a ia ke tuku ki tua he fakapotopotoaga? Ma e tau agahala ikiiki pihia, ne pulega mai e aposetolo ke Peteru ke fakamagalo ke hoko ke he “laga fitu.” Ka e pehe a Iesu: “Nakai tala atu e au kia koe ke lagafitu, ka kia laga fitugofulu kua taki fitu.” Ne talahau e ia e lahi mahaki toili he kaitalofa ha tautolu ke he Atua ke fakatatai ke he ha tagata ne taute mai ki a tautolu. (Mataio 18:21-35, NW) Ke he tau puhala kehekehe ne agahala a tautolu ke he Atua he tau aho oti—falu magaaho ha ko e lotokai, ke he tau kupu po ke manatu ha tautolu, po ke tau mena kua mahala a tautolu ke taute—he nakai mailoga kua agahala a tautolu. (Roma 3:23) Ka e, matutaki agaia e Atua ke fakaalofa noa mai ki a tautolu. (Salamo 103:10-14; 130:3, 4) Kua manako a ia ki a tautolu ke fehagai pihia ko e taha ki a taha. (Mataio 6:14, 15; Efeso 4:1-3) Ti kua fakagahua e tautolu e fakaalofa ne “nakai talahaua e kelea.”—1 Korinito 13:4, 5; 1 Peteru 3:8, 9.
7. Ko e heigoa ha tautolu kua lata ke taute kaeke fai kelea e matakainaga ki a tautolu?
7 Liga ha ha e tau magaaho ka mailoga e tautolu pete he nakai fai kelea a tautolu ke he matakainaga ha tautolu, kua fai kelea a ia ki a tautolu. Maeke ia tautolu ke fifili ke ‘ufiufi aki e fakaalofa,’ tuga ne talahau he 1 Peteru 4:8. Po ke maeke ia tautolu ke fina atu mua ke fakatutala mo ia mo e lali ke liuaki mai e tau fakafetuiaga mafola.—Mataio 5:23, 24.
8. Kaeke taute he taha matakainaga talitonu taha mena ne fakahukia ki a tautolu, ko e heigoa kua lata ke taute aki?
8 Liga kua taute he matakainaga talitonu taha mena kua fakatupetupe, nakai ki a koe ni, ka e pihia foki ke he falu. Nakai kia mitaki ke fakatutala mo ia? Neke maeke. Kaeke fakamaama fakatagata e koe e lekua ki a ia ke he puhala totonu, to liga moua e tau fua mitaki. Ka e fakamua kua lata ia koe ke huhu hifo: ‘Kua taute kia e ia taha mena kua nakai faka-Tohi Tapu?’ Po ke lahi e lekua ha kua kehe haku a feakiaga mo e fakaakoaga mai he hana. Kia fakaeneene ke nakai fakatoka e koe e tau tutuaga ni hau ti fakafili hagaao ke he tau mena nei. (Iakopo 4:11, 12) Ne nakai fili tagata a Iehova he talia e tau tagata mai he tau tupumaiaga kehekehe mo e kua fakauka ki a lautolu he tupu a lautolu fakaagaga.
9. (a) Ko hai ka fakakia e tau lekua he hehe muitui i loto he fakapotopotoaga? (e) Magaaho fe ka lago ke gahua mua a ia ne ekefakakelea ki ai, mo e heigoa e foliaga?
9 Kaeke fai he fakapotopotoaga ne putoia ke he hehe muitui, tuga e mahani kelea, kua lata ke fakakia fakamafiti. E hai? He tau motua. (Iakopo 5:14, 15) Pete ia, kaeke agahala ke he taha, liga ke he tau fekau fakapisinisi po ke fakaaoga lauia kelea he alelo, kua lata ia ia ne agahala ki ai ke fakamakamaka ke fina atu mua ki a ia ne taute e kelea hoko laua ni. (Mataio 18:15) Kaeke nakai maeke e lekua he taute pihia, lata ke fai lakaaga foki ka taute, tuga he fakakite ia Mataio 18:16, 17. Ko e fakaalofa ke he matakainaga ha tautolu kua hehe mo e manako ke ‘moua’ mai a ia ka lagomatai a tautolu ke taute ke he puhala ke hokotia ke he loto hana.—Tau Fakatai 16:23.
10. Ka tupu e lekua, ko e heigoa ka lagomatai a tautolu ke onoono fakamitaki ke he lekua?
10 Ka tupu e lekua, pete he lahi po ke tote, to lagomatai ki a tautolu kaeke eketaha a tautolu ke maama e puhala ne onoono a Iehova ki ai. Ne nakai talia e ia ha agahala taha, mo e ke he magaaho ni hana, ko lautolu ne nakai fakatokihala mai he tau agahala muitui to tuku kehe mai he hana fakatokatokaaga. Pete ia, kia nakai nimo ia tautolu kua agahala oti a tautolu ke he tau mena ikiiki hifo ti kua lata ke moua hana fakamanavalahi mo e fakaalofa noa. Ne fakatoka e Iehova e puhala ke mumuitua e tautolu oti ka fakafehagai mo e tau agahala he falu. Ka fakaalofa noa a tautolu, kua fakaata e tautolu e fakaalofa hana.—Efeso 5:1, 2.
Kumi e Tau Puhala ke ‘Fakalahi Atu’
11. Ko e ha ne fakamafana e Paulo e tau Korinito ke ‘fakalahi atu’?
11 Ne loga e mahina ne fakaaoga e Paulo ke atihake e fakapotopotoaga i Korinito, Heleni. Ne gahua malolo a ia ke lagomatai e tau matakainaga hana i ai, ti fakaalofa a ia ki a lautolu. Ka e nakai mafanatia e logonaaga he falu ki a ia. Ne lahi e tuhituhi ha lautolu ki a ia. Ne fakamalolo e ia a lautolu ke ‘fakalahi atu’ he fakakite e fakaalofa hofihofi. (2 Korinito 6:11-13; 12:15) Kua manako oti a tautolu ke manamanatu ke he laulahi he fakaalofa ne fakakite e tautolu ke he falu mo e kumi puhala ke fakalahi atu ai.—1 Ioane 3:14.
12. Puhala fefe kua maeke ke tupu e fakaalofa ha tautolu ma lautolu oti he fakapotopotoaga?
12 Fai nakai i loto he fakapotopotoaga ne uka ia tautolu ke tata ki ai? Kaeke fakamakamaka a tautolu ke ufiufi e ha fekehekeheaki he tau mahani fakatagata—tuga he manako a tautolu ke taute foki e lautolu ki a tautolu—maeke e mena nei ke lagomatai ke mafanatia e tau vahaloto he fakafetuiaga ha tautolu. Maeke foki e tau logonaaga ha tautolu ki a lautolu ke tolomaki ki mua ka kumi e tautolu e tau aga mitaki ha lautolu ti gahua ke he tau mena nei. To fakatupu he mena nei e fakaalofa ha tautolu ma lautolu ke tupu ki mua.—Luka 6:32, 33, 36.
13. Maeke fefe ia tautolu ke fakalahi atu he fakakite e fakaalofa ki a lautolu he fakapotopotoaga ha tautolu?
13 He talahau fakamoli, ha ha ai e tau fakakaupaaga ke he mena kua maeke ia tautolu ke taute ma e falu. To liga nakai maeke ia tautolu ke fakafeleveia oti a lautolu he tau feleveiaaga takitaha. To liga nakai maeke ke putoia oti a lautolu ka uiina e tautolu e tau kapitiga ma e taha kaiaga. Ka e maeke nakai ia tautolu ke fakalahi atu he fakaaoga e falu minuti gahoa ke iloa mitaki taha i loto he fakapotopotoaga? Liga uiina e tautolu taha ne nakai iloa mitaki e tautolu ke gahua mo tautolu he fekafekauaga he fonua?
14. Ka ha ha i ai mo e tau Kerisiano ne nakaila feleveia mo tautolu, maeke fefe ia tautolu ke fakakite e fakaalofa lahi ko e taha ki a taha?
14 Ko e tau fonoaga faka-Kerisiano kua tuku mai ki a tautolu e tau magaaho ke fakalahi atu e fakaalofa ha tautolu. Liga totou afe ka ha ha i ai. Nakai maeke ia tautolu ke feleveia mo lautolu oti, ka e maeke ia tautolu ke mahani ke he puhala kua fakakite kua tuku fakamua e tautolu e hagahaga mitaki ha lautolu ke he ha tautolu. Ke he tau magaaho ka okioki e fakaholoaga, maeke ia tautolu ke fakakite e fiafia fakatagata he fakamakai ke feleveia mo e falu he tapa ha tautolu. To hoko taha aho ko lautolu oti ka nonofo he lalolagi ko e tau matakainaga ha tautolu, kua fakalataha he tapuaki ke he Atua moli tokotaha mo e Matua he tau tagata oti kana. Ko e olioli ha ia ka pihia he maeke ke feiloaaki e taha mo e taha! Ko e fakaalofa lahi ka omoomoi a tautolu ke manako ke taute e mena ia. Ko e ha nakai kamata ai mogonei?
Fakatutala Fakamanatu
• Ka tutupu e tau lekua ke he vahaloto he tau Kerisiano, kua lata ke taute fakatotoka fefe e tau mena nei, mo e ko e ha?
• He tupu fakaagaga a tautolu, ko e heigoa e tau puhala kua lata foki he fakaalofa lahi ha tautolu ke tupu?
• Maeke fefe ke fakakite e fakaalofa lahi ke molea atu he tau kapitiga tata ha tautolu?
[Fakatino he lau 148]
Loga e puhala ke fakatata e fakaalofa faka-Kerisiano, tuga he tau feleveiaaga fakapotopotoaga