Kua Hoko Mai e ‘Magaaho he Fakafiliaga’

IA FAKAKITEAGA, ko e tohi fakahiku he Tohi Tapu, kua fakailoa mai ki a tautolu e tala he agelu ne lele ke he pulagi mo e “vagahau mitaki tukulagi ke fakamatala atu.” Ne talahau e ia mo e leo lahi: “Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga.” (Fakakiteaga 14:6, 7) Ko e ‘magaaho he fakafiliaga’ ia kua putoia ai e tukuogo mo e fakahoko he fakafiliaga faka-Atua. Ko e mena ku e “magaaho.” Ko e fakahokoaga he fakafiliaga to hoko mai ko e tapunu he “tau aho fakamui,” hane nonofo ai a tautolu mogonei.​—2 Timoteo 3:1.

Ko e ‘magaaho he fakafiliaga’ ko e tala mitaki ke he tau tagata ne ofania e mahani tututonu. Ko e magaaho ka tamai he Atua e fakatotoka ke he hana tau fekafekau, ko lautolu ne matematekelea ha ko e favale, nakai fai fakaalofa he fakatokatokaaga nei.

He mogonei, ato fakaoti e ‘magaaho he fakafiliaga’ aki e moumou he fakatokaaga kelea nei, ne fakailoa ki a tautolu: “Kia matakutaku a mutolu ke he Atua, mo e ta age kia ia e fakahekeaga.” Kua taute pihia nakai e koe? Kua lahi atu e mena ne putoia ki ai mai he talahau, “Na talitonu au ke he Atua.” (Mataio 7:21-23; Iakopo 2:19, 20) Ko e matakutaku mea ke he Atua kua lata ke taute a tautolu ke tutu fakalilifu ki a ia. Kua lata ke fakaohooho a tautolu ke fuluhi kehe mai he kelea. (Tau Fakatai 8:13) Kua lata ke lagomatai a tautolu ke manako ke he mena mitaki mo e fakavihia e mena kelea. (Amosa 5:14, 15) Kaeke fakaheke a tautolu ke he Atua, to fanogonogo a tautolu ki a ia mo e fakalilifu lahi mahaki. To nakai lahi mahaki e lavelave ha tautolu ke he falu mena foki ke nakai totou tumau hana Kupu, ko e Tohi Tapu. To falanaki a tautolu ki a ia he tau magaaho oti mo e ha tautolu a loto katoatoa. (Salamo 62:8; Tau Fakatai 3:5, 6) Ko lautolu ne fakalilifu moli ki a ia to mailoga ko e Tufuga he lagi mo e lalolagi, ko ia ko e Pule Katoatoa he Lalolagi mo e Lagi Katoatoa, mo e omaoma fakaalofa ki a ia ko e Pule Katoatoa he tau momoui ha lautolu. Kaeke mailoga e tautolu kua lata ia tautolu ke onoono fakalahi ke he tau mena nei, kia taute pihia e tautolu mo e nakai fakamule.

Ko e magahala ka fakahoko e fakafiliaga ne talahau he agelu kua fakahigoa foki ko e “aho a Iehova.” Ko e “aho” pihia ne hoko ki Ierusalema i tuai he 607 F.V.N. ha kua nakai omaoma e tau tagata i ai ke he tau hatakiaga ha Iehova ne puhala mai he hana tau perofeta. He fakaholoholo fakahaga e aho ha Iehova ke he tau loto ni ha lautolu, ne mahomo atu e fakahagahaga kelea e lautolu e tau momoui ha lautolu. Ne fita e hataki e Iehova a lautolu: “Kua tata mai ni, kua fakaave mai ni.” (Sefanaia 1:14) Taha “aho a Iehova” ne hoko ai ki Papelonia i tuai he 539 F.V.N. (Isaia 13:1, 6) Ha kua mauokafua ke he ha lautolu a tau puipuiaga mo e tau atua ha lautolu, ne fakaheu he tau Papelonia e tau hatakiaga ne age he tau perofeta ha Iehova. Ka e he taha ni e po, ne veli a Papelonia e maaga lahi ke he tau Metai mo e tau Peresia.

Ko e heigoa ne fehagai mo tautolu he vaha nei? Taha agaia foki e ‘aho ha Iehova’ mo e to kaputia lahi. (2 Peteru 3:11-14) Ne fakatukuogo moli e fakafiliaga faka-Atua ki a ‘Papelonia Lahi.’ Hagaao ke he Fakakiteaga 14:8, ne fakapuloa he agelu: ‘Kua veli a Papelonia Lahi.’ Kua fita e fakahoko e mena ia. Kua nakai maeke ia ia ke taofi e tau tagata tapuaki ha Iehova. Ko e hana ni a mahani keukeu mo e putoia ke he tau felakutaki kua kitia maaliali. Magaaho nei kua tata lahi hana moumouaga fakahiku. Ma e kakano ia, kua fakaohooho he Tohi Tapu e tau tagata he tau matakavi oti: “Ati o kehe ā mutolu ia ia [Papelonia Lahi], neke fakalataha a mutolu mo ia ke he hana tau hala, neke moua foki a mutolu he hana tau malaia; ha kua o fakalataha mo ia hana tau hala kua hoko ni ke he lagi, kua manatu foki he Atua hana tau mahani hepehepe.”​—Fakakiteaga 18:4, 5.

Ko e heigoa a Papelonia Lahi? Ko e fakatokaaga lotu he lalolagi ne ha ha e tau fakamailoga ha Papelonia i tuai. (Fakakiteaga, tau veveheaga 17, 18) Kitekite ke he falu mena ne fetataiaki ai:

• Ko e tau ekepoa ha Papelonia i tuai kua hufia lahi mahaki ke he tau mena fakapolitika he motu. Kua moli foki e mena ia ke he tau lotu he vaha nei.

• Ko e tau ekepoa ha Papelonia ne fa mahani ke omoi e tau felatauaki he motu. Ko e tau lotu he vaha fou nei kua fa mahani ke tu matamua ke fakamonuina e tau kautau he o atu e tau motu ke felakutaki.

• Ko e tau fakaakoaga mo e tau gahua ha Papelonia i tuai ne takitaki e motu ke he mahani kelea muitui. Magaaho ne tuku kehe he tau takitaki lotu e tuaga mahani mitaki he Tohi Tapu, kua holofa e mahani kelea he tau akoako mo e tau tagata o tapu. Mailoga lahi foki e moli ha kua mahani fakataka a Papelonia Lahi mo e lalolagi fakalataha mo e hana tau fakatokaaga politika, ne fakamaama he Fakakiteaga a ia ko e fifine fakataka.

• Kua talahau foki he Tohi Tapu ko Papelonia Lahi kua moui ‘fakafiafia nakai ma.’ I Papelonia i tuai, ko e fakatokatokaaga he faituga kua loga lahi e vala kelekele ne moua, mo e monuina e tau ekepoa ke he tau matagahua moua tupe. He vaha nei, ke lafi ke he tau matakavi tapuaki, kua loga lahi e tau matagahua moua tupe ha Papelonia Lahi. Ko e tau fakaakoaga hana mo e tau aho okioki hana kua tamai e tau monuina ne mua ki a ia mo e ke he falu he lalolagi pisinisi.

• Ko e fakaaoga he tau mena fakatai, mana, mo e tau taulatua ko e tau mena mahani mau i Papelonia i tuai, tuga ni ke he loga he tau matakavi he vaha nei. Ko e onoono ke he mate ko e puhala ke he taha vahega moui foki. Kua puke a Papelonia he tau faituga mo e tau fale tapu ke fakaheke aki hana tau atua, ka e totoko he tau Papelonia e tau tagata tapuaki ha Iehova. Ko e tatai he tau taofiaga mo e tau gahua kua fakakite ai a Papelonia Lahi.

Ke he tau vaha i tuai, ne taute e Iehova e tau motu ne malolo fakapolitika mo e fakakautau ke fakahala a lautolu ne fakakite e totoko tumau ki a ia mo e hana finagalo. Ti kua moumou ai a Samaria he tau Asuria he 740 F.V.N. Ne moumou he tau Papelonia a Ierusalema he 607 F.V.N. mo e he tau Roma he 70 V.N. Ko Papelonia mogoia kua fakakaumahala he tau Metai mo Peresia he 539 F.V.N. Ma e vaha ha tautolu, ne fuafua tuai he Tohi Tapu ko e tau fakatufono fakapolitika, tuga e manu favale, to fuluhi ke he “fifine fakataka” mo e fakatelefua a ia, ti fakatapakupaku e mahani moli hana. To moumou katoatoa e lautolu a ia.​—Fakakiteaga 17:16.

To taute moli kia he tau fakatufono he lalolagi e taha mena pihia? Talahau mai he Tohi Tapu ‘to tuku he Atua ke he tau loto ha lautolu.’ (Fakakiteaga 17:17) To fakaofo mai, fakalutukia, ofoofogia, nakai kitia tuai po ke fano fakahaga ai.

Ko e heigoa kua lata ia koe ke taute? Huhu ki a koe ni: ‘Tapiki agaia nakai au ke he tau fakatokatokaaga fakalotu ne ilaila he tau fakaakoaga mo e tau gahua ne fakamailoga aki ko e taha vala ha Papelonia Lahi?’ Pete he nakai ko koe taha he matakau ia, liga huhu a koe ki a koe ni: ‘Kua fakaata kia e au e aga ia ke fakaohooho aki au?’ Ko e vahega aga fefe? Ko e aga ke talia e tau mahani kelea, manako ke he tau koloa he tino mo e tau mena ke fiafia ai ka e nakai manako ke he Atua, po ke fakaheu pauaki (pihia ke he tau mena ne tuga kua ikiiki) e Kupu ha Iehova. Manamanatu fakamitaki ke he tali hau.

Ke moua e tautolu e fiafia ha Iehova, kua aoga ma e tau gahua mo e tau manako he tau loto ha tautolu, ke fakakite kua nakai fai vala moli a tautolu ia Papelonia Lahi. Kua nakai fai magaaho ke fakamule ai. He fakailoa mai ki a tautolu to hoko mai fakaofo e fakaotiaga, kua pehe e Tohi Tapu: “To liti hifo fakalahi pihia a Papelonia ko e māga lahi, ti nakai tuai kitia ni.”​—Fakakiteaga 18:21.

Ka e loga atu foki ne toe. Ke he taha fahi he ‘magaaho he fakafiliaga’ ia, to fakahoko e Iehova ko e Atua e fakafiliaga ke he fakatokatokaaga fakapolitika he lalolagi, hana tau takitaki, mo lautolu oti ne fakaheu hana tutonuhia ke pule ne puhala mai he Kautu he lagi ha he pule a Iesu Keriso. (Fakakiteaga 13:1, 2; 19:19-21) Ko e fakakiteaga fakaperofeta ne fakamau ia Tanielu 2:20-45 kua fakamaama e pule fakapolitika tali mai he magaaho ha Papelonia i tuai ke hoko mai ke he magaaho nei ko e tupua talaga aki e auro, ario, lapatoa, mo e kelekele. Hagaao ke he vaha ha tautolu, ne talahau tuai he perofetaaga: “To fakatu ai he Atua he lagi e kautu nakai fakaoti tukulagi.” Ti hagaao ke he mena ne nakaila taute he Kautu ia he magahala he ‘magaaho he fakafiliaga’ ha Iehova, kua fakapuloa he Tohi Tapu: “To tuki malipilipi mo e fakaotioti e tau kautu oti ia [ne talaga he tagata], ka ko ia to tumau tukulagi a ia.”​—Tanielu 2:44.

Kua hataki he Tohi Tapu e tau tagata tapuaki moli hagaao ke he manako ke he “tau mena ha ha he lalolagi”​—ko e puhala moui ne fakaohooho he lalolagi nei ne kua vevehe kehe mai he Atua moli. (1 Ioane 2:15-17) Kua fakakite nakai he tau fifiliaga mo e tau gahua hau kua fakamoli a koe ma e Kautu he Atua? Kua tuku fakamua moli nakai e koe he moui hau?​—Mataio 6:33; Ioane 17:16, 17.

[Puha he lau 14]

To Hoko Mai A Fe e Fakaotiaga?

“Ko e magaaho nakai manatu ai e mutolu, ke hau ai e Tama he Tagata.”​—Mataio 24:44.

“Kia mataala a mutolu, ha kua nakai iloa e mutolu e aho, po ke magaaho.”​—Mataio 25:13.

“Nakai mule mai.”​—Hapakuka 2:3.

[Puha he lau 14]

To Fai Kehe Nakai Kaeke Iloa Tuai e Koe?

Kaeke iloa moolioli tuai e koe kua fai tau gahoa agaia to hoko mai e moumouaga matakutakuina he fakafiliaga faka-Atua, to hiki nakai he mena ia e puhala kua fakaaoga aki e koe e moui hau? Kaeke kua fita e mule e fakaotiaga he fakatokatokaaga tuai nei ke he mena kua amaamanaki a koe ki ai, kua fakaata kia e koe e mena nei ke fakamanou aki a koe he fekafekauaga ha Iehova?​—Heperu 10:36-38.

He nakai iloa e tautolu e magaaho tonu kua fakaata mai ai ke fakakite kua fekafekau a tautolu ke he Atua mai he tau loto mea. Kua mailoga e lautolu ne iloa a Iehova ko e fakatata he fakamakamaka he mogo fakahiku to nakai fakafiafia e Atua, ko ia ne kitia e tuaga he loto.​—Ieremia 17:10; Heperu 4:13.

Ma lautolu ne fakaalofa moli ki a Iehova, kua tuku fakamua tumau a ia. Ke tuga ni falu tagata, kua liga gahua tupe foki e tau Kerisiano moli. Pete ia, ko e foliaga ha lautolu, ke nakai muhukoloa ka e ke fai koloa fakatino mo e maeke ke foaki ke he falu. (Efeso 4:28; 1 Timoteo 6:7-12) Kua olioli foki a lautolu ke he tau fakafiafiaaga tino atihake mo e ke fakakehekehe he tau gahua, ka e ko e manako ha lautolu ke moua e fakahauhau, nakai taute ha kua taute pihia he tau tagata oti. (Mareko 6:31; Roma 12:2) Tuga a Iesu Keriso, kua fiafia a lautolu he taute e finagalo he Atua.​—Salamo 37:4; 40:8.

Kua manako e tau Kerisiano moli ke momoui mo e fekafekau tukulagi ki a Iehova. Kua nakai fakateaga e amaamanakiaga ia ha kua levaleva e fakatali ke he tau monuina pauaki ne liga amaamanaki e falu ki ai.

[Puha/​Fakatino he lau 15]

Ko e Matakupu he Pule Katoatoa

Ke maama e kakano ati fakaata he Atua e matematekelea lahi mahaki, kua lata ia tautolu ke maama e matakupu he pule katoatoa. Ko e heigoa e pule katoatoa? Ko e pule kua mua ue atu.

Ha ko Iehova ko e Tufuga, kua ha ha ia ia e tonuhia ke pule ke he lalolagi mo lautolu oti ne nonofo i ai. Ka e, kua fakamaama he Tohi Tapu e fakamauaga tala tuai he tagata fakamua atu, ne totoko ke he pule katoatoa ha Iehova. Ko Satani ko e Tiapolo ne talahau ko Iehova ne molea e puipui, ne pikopiko a Ia ke he tau matua uluaki ha tautolu hagaao ke he mena ka tupu ka fakaheu e laua e fakatufono he Atua ka e taute e tau mena ke he puhala ha laua ni, mo e to mua hake moli e mitaki ka pule ni e laua a laua he tu kehe mai he Atua.​—Kenese, tau veveheaga 2, 3.

Kaeke moumou he Atua e tau tagata totoko he mogoia ni, to liga fakatata he mena ia e malolo hana, ka e liga nakai fakatotoka e tau matakupu ne kua fakalaga mai. Ka e he nakai moumou e tau tagata totoko he mogo tonu ia ni, ne fakaata e Iehova e tau tufugatia lotomatala oti ke kitia e fakahikuaga he totokoaga. Pete kua putoia e mena nei ke he matematekelea, nukua tuku mai foki e magaaho ke fanau mai a tautolu.

Fakalaulahi atu foki, he totogi lahi mahaki ki a ia ni, ne foaki fakaalofa e Iehova ma e tau tagata ka omaoma ki a ia ke fakagahuahua e tua ke he poa lukutoto he hana Tama ke maeke ke fakatokanoa mai he agahala mo e tau lauiaaga hana mo e momoui ke he Parataiso. Kaeke kua lata, to liga taute e mena nei puhala he liu tu mai he mate.

He fakaata taha magaaho ke fakatotoka e matakupu kua foaki foki e magaaho ke he tau fekafekau he Atua ke fakakite kua maeke ia lautolu ke tali atu ke he fakaalofa he Atua mo e fakakite ha lautolu a mahani fakamoli ki a Iehova i lalo he tau tutuaga kehekehe. Ko e tali ke he matakupu he pule katoatoa faka-Atua, fakalataha mo e falu matakupu pihia he mahani fakamoli he tagata, kua aoga lahi ke moua e fakalilifu kua tonu ma e fakatufono he lalolagi mo e lagi katoatoa. Ka nakai fai mena pihia, to nakai maeke e mafola moli.a

[Matahui Tala]

[Fakatino]

Ko e pule fakapolitika he fakatokaaga he lalolagi to hoko hana fakaotiaga