Ko e Lalolagi Fou Tuga ne Mavehe he Atua
KO E Tohi Tapu, ko e Kupu tohia he Atua, kua fakapuke a tautolu aki e amaamanakiaga he magaaho ne pehe ai: “Ka e fakatalitali a tautolu ke he lagi fou mo e lalolagi fou, tuga ne hana talahaua mai, ke nofo ai e tututonu.”—2 Peteru 3:13.
Ko e heigoa e “lagi fou”? Ne tuku fakalataha he Tohi Tapu e lagi mo e pule. (Gahua 7:49) Ko e “lagi fou” ko e fakatufono fou ka pule ke he lalolagi. Kua fou ha ko e mena to hukui ai e pule he fakatokaaga nei; ko e fakalaulahiaga fou foki ke he gahuahuaaga he finagalo he Atua. Ko e Kautu ne fakaako e Iesu a tautolu ke liogi ki ai. (Mataio 6:10) Ha ko e Atua e Punaaga hana mo e nofo a ia he lagi, kua fakahigoa ai ko e “kautu he lagi.”—Mataio 7:21.
Ko e heigoa e “lalolagi fou”? Nakai ko e fua lalolagi fou, ha kua talahau fakamaaliali he Tohi Tapu ko e lalolagi to nonofo tukulagi e tau tagata i ai. Ko e “lalolagi fou” ko e fakalatahaaga fou he tagata. To fou ai kakano to vevehe kehe a lautolu ne mahani kelea. (Tau Fakatai 2:21, 22) Ko lautolu oti ka momou i he mogoia to fakalilifu mo e omaoma ke he Tufuga mo e to momoui fakalautatai ke he hana tau manako. (Salamo 22:27) Ko e tau tagata he tau motu oti kana kua uiina ke ako e tau puhala ia mo e ke taute e tau momoui ha lautolu ke lautatai mo e tau mena ia he mogonei. Kua taute nakai e koe e mena ia?
Ke he lalolagi fou he Atua, to fakalilifu he tau tagata oti e Hana pule. Kua omoomoi nakai he fakaalofa ke he Atua a koe ke omaoma ki a ia? (1 Ioane 5:3) Kua pihia moli nakai he kaina hau? he gahuaaga po ke aoga? ke he puhala kua fakaaoga aki e koe e moui hau?
He lalolagi fou ia, to tapuaki fakalataha e tau tagata ke he Atua moli. Tapuaki nakai a koe ke he Tufuga he lagi mo e lalolagi? Kua tamai fakalataha moli nakai he tapuakiaga hau a koe ke he tau matakainaga tapuaki hau he tau motu oti, tau lanu kehekehe oti, tau vagahau kehekehe oti?—Salamo 86:9, 10; Isaia 2:2-4; Sefanaia 3:9.
[Puha he lau 17]
Ko e Atua ne Mavehe Mai e Tau Mena Nei
Ko ia ko e Tufuga he lagi mo e palaneta Lalolagi. Ko e “Atua moli tokotaha ni” haia ne talahau e Iesu Keriso.—Ioane 17:3.
Ko e laulahi he tau tagata kua fakalilifu ke he tau atua ne talaga e lautolu ni. Totou miliona ne tukutuku hifo ke he tau mena talaga ne nakai fai moui. Falu kua fakaheke e tau fakatokatokaaga he tagata, tau pulotu ke he tau koloa fakatino, po ke tau manako ni ha lautolu. Pihia foki a lautolu ne tokutoku ke fakaaoga e Tohi Tapu kua nakai fakalilifu a lautolu oti ke he higoa ne fakakite mai i ai ‘ko e Atua moli.’—Teutaronome 4:35.
Hagaao ki a ia, ne pehe e Tufuga: “Ko au ko Iehova, ko e haku a higoa haia.” (Isaia 42:5, 8) Ko e higoa nei ne kavi ke laga 7,000 e tu he Tohi Tapu he tau vagahau fakamua. Ne fakaako e Iesu Keriso e tau tutaki hana ke liogi: “Ha mautolu a Matua na e, ha ha he lagi, kia tapu hau a higoa.”—Mataio 6:9.
Ko e vahega peresona fefe e Atua moli? Kua fakamaama e ia a ia ko e taha kua “fakaalofa hofihofi, mo e fakaalofa noa; kua fakatuai hana ita, to lahi e fakaalofa to fakamoli” mo e to nakai fakahao e ia mai he fakahala a lautolu ne holia pauaki e tau poakiaga hana. (Esoto 34:6, 7) Ko e fakamauaga tala tuai he fakafehagaiaga hana mo e tau tagata kua peehi e moli he fakamaamaaga ia.
Ko e higoa mo e peresona ne hukui e higoa ia kua latatonu ke fakatapu, po ke taute ko e mena tapu. Ha ko e Tufuga mo e Pule Katoatoa he Lalolagi mo e Lagi Katoatoa, kua tonuhia a ia ke omaoma mo e tapuaki katoatoa a tautolu ki a ia. Kua foaki fakatagata nakai e koe e tau mena nei ki a ia?
[Puha/Fakatino he lau 18]
Ko e Heigoa e Tau Hikihikiaga Ka Tamai he “Lagi Fou mo e Lalolagi Fou”?
Hiki e lalolagi ke he Parataiso Luka 23:43
Ko e fakalatahaaga ke he lalolagi Ioane 13:35;
katoa he tau motu oti, tau lanu Fakakiteaga 7:9, 10
kehekehe oti, tau vagahau kehekehe
oti kua pipi fakalataha he fakaalofa
Mafola e lalolagi katoa, haohao Salamo 37:10, 11;
mitaki ma e tau tagata oti kana Mika 4:3, 4
Fiafia e gahua, loga e tau mena kai Isaia 25:6; 65:17, 21-23
Utakehe e gagao, momoko, mate Isaia 25:8;
Ko e lalolagi kua kaufakalataha Fakakiteaga 15:3, 4
he tapuaki ke he Atua moli
[Puha/Tau Fakatino he lau 19]
To Aoga Nakai ki a Koe?
Nakai pikopiko e Atua!—Tito 1:2.
Talahau e Iehova: “Haku a kupu . . . [to] nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.”—Isaia 55:11.
Kua fita a Iehova he tufuga e “lagi fou mo e lalolagi fou.” Ko e fakatufono he lagi kua fita e fakagahuahua. Ko e fakaveaga ma e “lalolagi fou” kua fita he fakatu.
He mole e talahau hagaao ke he falu mena fulufuluola he “lagi fou mo e lalolagi fou” ka tamai ke he tau tagata, ne fatiaki he Fakakiteaga e Atua, ko e Pule Katoatoa he Lalolagi mo e Lagi Katoatoa, he pehe: “Kitiala, kua fakafou tuai e au e tau mena oti.” Pehe foki a ia: “Tohi ā; ha ko e tau kupu nai kua moli mo e fakamoli ia.”—Fakakiteaga 21:1, 5.
Ko e huhu aoga lahi, Kua taute nakai e tautolu e tau hikihikiaga kua lata ke maeke ke totoku kua aoga ke eke mo vala he “lalolagi fou” i lalo hifo he “lagi fou”?