Ko e Moui he Lalolagi Foou Mafola
Ka onoono a koe ke he tama tohi nei, ko e heigoa haau a tau manamanatuaga? Nakai kia manako a koe ke he mafola, fiafia, mo e monuina ne kitia ai? Mooli lahi. Ka e tuga noa ni kia e miti, po ke manamanatuaga, ke tua to gahuahua mooli nakai e tau mena nei he lalolagi?
To liga tokologa e tau tagata ka manatu pihia. Ko e tau mena kua fakamooli he vaha nei ko e latau, taute mena kelea, hoge, gagao, fuakau—ko e falu a mena gahoa ni a ia. Ka e fai amaamanakiaga agaia ni. Onoono atu ki mua, ha kua talahau mai he Tohi Tapu ke “fakatalitali a tautolu ke he lagi fou mo e lalolagi fou, tuga ne talahau mai he [Atua], ke nofo ai e tututonu.”—2 Peteru 3:13; Isaia 65:17.
Ko e “lagi fou” mo e “lalolagi fou” nei, ne fakamaama mai he Tohi Tapu, nakai ko e lagi foou mai he lagi he vaha nei po ke lalolagi foou mai he lalolagi he mogonei. Ka ko e lalolagi mo e lagi kua taute ke mitaki katoatoa, kua fakakite mai he Tohi Tapu to tumau ia tukulagi. (Salamo 89:36, 37; 104:5) Ko e “lalolagi fou” ko e sosaiete tututonu he tau tagata ka nonofo he lalolagi, ko e “lagi fou” ko e kautu mitaki katoatoa he lagi, po ke fakatufono, ka pule katoatoa ke he sosaiete he tau tagata he lalolagi nei. Ka kua lata nakai ke fakamooli ko e “lalolagi fou,” po ke lalolagi fou fulufuluola, ko e mena mooli?
Mafola, manatu ko e tuaga mooli pihia ko e vala he finagalo fakamua he Atua ma e lalolagi. Ne fakatoka e ia e tau matua fakamua ke he Parataiso ko Etena mo e age ki a laua e kotofaaga mitaki lahi: “Kia fanau a mo e fakatokologa, kia fakapuke foki e lalolagi, mo e kautu ki ai.” (Kenese 1:28) E, ko e finagalo he Atua ki a laua ke fanau e tau fanau mo e ke fofola atu ha laua a Parataiso ke he lalolagi oti. Pete ni kua fifili e laua he magaaho fakamui ke liuliu ke he Atua, mo e fakamooli ai e nakai lata ke moui tukulagi, ka ko e finagalo fakamua he Atua to nakai hiki. To fakamooli ni he lalolagi foou!—Isaia 55:11.
Ko e mena nei, ka liogi e koe e Liogi he Iki, po ke ko e ha Mautolu a Matua na e, mo e ole ke hoko mai e Kautu he Atua, ko e liogi a koe ke he haana a fakatufono he lagi ke uta kehe e lalolagi matahavala mo e ke pule ke he lalolagi foou nei. (Mataio 6:9) To fakamooli a tautolu to tali he Atua e liogi ia, ha kua mavehe mai haana a Kupu: “To eke ni e motu ma e tau tagata tututonu, to nonofo muatua ai a lautolu.”—Salamo 37:29.
Ko e Moui he Lalolagi Foou he Atua
To ta mai he Kautu he Atua ke he lalolagi e tau monuina nakai fai gataaga, ko e fakakatoatoaaga he tau mena mitaki oti ne finagalo tuai mai he Atua ma e haana a tau tagata ke fiafia he lalolagi. To uta kehe e fevihiatiaaki mo e tau mahani fakahanoa, ka to moua fakahaga he tau tagata he lalolagi e fekapitigaaki. I loto he Tohi Tapu, kua mavehe mai e Atua ‘to fakahiku e ia e tau ke hoko ke he tau matapotu oti he lalolagi.’ “To nakai nikiti atu he taha motu e pelu ke he taha motu,to nakai liu ako tau foki a lautolu.”—Salamo 46:9; Isaia 2:4.
Ko e lalolagi katoa to ta mai fakahaga ai ato hoko ke he tuaga he kaina tuga e parataiso. Kua pehe mai e Tohi Tapu: “To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute . . . Ha kua tafe mai ke he tutakale, mo e tau vailele ke he motu talue; To eke foki e ata noa mo vai namo, ti eke e motu nakai fai vai mo tau vaipuna.”—Isaia 35:1, 6, 7.
Kua lata ni ke fiafia ke loto he Parataiso he lalolagi. To nakai liu hoge e tau tagata he ku e tau mena kai. “Kua fua mai he kelekele hana tau fua,” he talahau mai he Tohi Tapu. (Salamo 67:6; 72:16) To fiafia oti ai ha ko e tau fua ne gahua e lautolu, tuga ne mavehe mai he ha tautolu a Tufugatia: “To to e lautolu e tau ulu vine, mo e kai ai e lautolu ha lautolu a tau fua. . . . ti nakai to uluvine e lautolu ke kai ai e falu.”—Isaia 65:21, 22.
He lalolagi foou he Atua, to nakai liu nonofo fakamamapita e tau tagata ke he tau fale lalahi po ke tau maaga kiva, ha kua finagalo mai e Atua: “To ta fale a lautolu, mo e nonofo ai a lautolu . . . Nakai ta fale a lautolu ke nonofo ai e falu.” Ti mavehe mai foli e Tohi Tapu: “Nakai gahua teao a lautolu.” (Isaia 65:21-23) Ko e mena ia to moua he tau tagata e tau fua mo e fiafia he tau gahua. To nakai ahumate e moui.
To hoko mai e vaha, ke liu fakatu he Kautu he Atua e fakafetuiaga mafola ne taute fakamua he kaina ko Etena ke he tau manu ti pihia ni ke he tau manu mo e tau tagata. Kua pehe mai e Tohi Tapu: “To nonofo fakalataha e luko mo e punua mamoe, to takoto foki e nameri fakalataha mo e punua koti, to fakalataha foki e punua povi mo e punua leona katoa mo e manu gako, to takitaki foki he tama tote a lautolu.”—Isaia 11:6-9; Hosea 2:18.
Manamanatu la, ke he lalolagi Parataiso, ko e tau gagao mo e tau lolelole oti to fakamaulu ai foki! Kua fakamooli mai he Kupu he Atua ki a tautolu: “To nakai pehe mai foki taha kua nofo ai, ‘Kua gagao au.’” (Isaia 33:24) “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:4.
Maeke Fefe e Mena Ia ki a Koe
Ko e mooli to fakagahuahua he tau maveheaga he Atua e loto haau, aki e tututonu he haana a lalolagi foou. Ti ka manatu ai he falu e mailogaaga he tau fakamonuinaaga pihia kua mitaki lahi ke pehe kua mooli, ka e nakai mitaki lahi a lautolu ke tupu mai, mai he lima he ha tautolu a Tufugatia fakahelehele.—Salamo 145:16; Mika 4:4.
Mooli, kua ha ha i ai e tau mena ke taute e tautolu kaeke kua fia nonofo tukulagi a tautolu he Parataiso he lalolagi ka hoko mai. Ne fakakite e Iesu e matapatu he mena ia ke he liogi ne liogi e ia ke he Atua: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.
Ti ka manako mooli a tautolu ke nonofo he lalolagi foou he Atua kua lata ni ke fakaako fakamua e tautolu e finagalo he Atua, ka oti ia ti taute. Ha ko e mena: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi,” ke fiafia tukulagi ke he tau fakamonuinaaga ka fakakite hifo mai he ha tautolu a Tufugatia fakahelehele.—1 Ioane 2:17.
Kaeke kua nakai fakamaama atu, ko e tau kupu Tohi Tapu i loto he tohi nei kua moua mai he Tohi Tapu Niue he 1914.