Talahau Tuai ha Tautolu a Vahā Anoiha Hane Tata Mai

HE TUTALA hagaao ke he vahā anoiha he tagata mo e lalolagi, ne tohi he aposetolo ko Peteru: “Ka e fakatalitali a tautolu ke he lagi fou mo e lalolagi fou, tuga ne hana [Atua] talahaua mai, ke nofo ai e tututonu.” (2 Peteru 3:13) Ko e maveheaga he “lagi fou mo e lalolagi fou” ne fakakite fakamua he puhala he perofeta ko Isaia. (Isaia 65:17; 66:22) He hagaao ke he perofetaaga nei, ne fakakite e Peteru kua nakaila fakamooli katoatoa ia he vahā haana.

He magaaho fakamui, kavi ke he tau 96 V.N., ko e Fakakiteaga ne puhala he aposetolo ko Ioane ne matutaki e “lalolagi fou” ia mo e tau monuina i lalo hifo he Kautu he Atua. (Fakakiteaga 21:1-4) Ko e tau kupu ha Iesu mo e tau kupu foki he aposetolo ko Paulo hagaao ke he tau tuaga he lalolagi to hoko mai e Kautu he Atua hane fakamooli mogonei. Ko e mena ia, kua amanaki a tautolu ke he Kautu ia ke tamai mafiti e lalolagi foou. To fēfē e lalolagi foou ia? Kua tala mai he tohi a Isaia he Tohi Tapu ki a tautolu.

Tau Monuina he Lalolagi Fou

Mafola e Lalolagi Katoa mo e Tapuakiaga Auloa. “[To] tukituki e lautolu ha lautolu a tau pelu ke eke mo tau koho, ko e ha lautolu a tau tao foki ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki e lautolu.”—Isaia 2:2-4.

Mafola e Tau Tagata mo e Tau Manu. “To nonofo fakalataha e luko mo e punua mamoe, to takoto foki e nameri fakalataha mo e punua koti, to fakalataha foki e punua povi mo e punua leona katoa mo e manu gako, to takitaki foki he tama tote a lautolu. To kai fakalataha e povi fifine mo e urosa, to takoto fakalataha ha laua a tau punua? To kai foki he leona e tau kakau saito tuga ne povi. . . . Nakai mahani kelea a lautolu, to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.”—Isaia 11:6-9.

Loga e Tau Mena Kai ma e Tau Tagata Oti. “To eke ai e Iehova Sapaota ke he mouga nai e galue ke he tau mena mitaki ma e tau motu oti, ko e galue e uaina ne toka ai e tau kele; ko e tau mena mitaki ue atu; ko e uaina ne toka ai mo e tau kele kua hakahaka.”—Isaia 25:6.

Nakai Fai Mate. “To fakaoti tukulagi e ia [Atua] e mate; to holoholo kehe foki he Iki ko Iehova e tau hihina mata mai he tau mata oti; to uta kehe foki e ia e mena ka mā ai hana motu ke he lalolagi oti ni; ha kua vagahau mai e Iehova.”—Isaia 25:8.

Liliu Tutū Mai a Lautolu ne Mamate. “To momoui mai hau a tau tagata mamate, to liliu tutu mai haku a tau tino mamate. Kia ala mai a, mo e kalaga fiafia . . . to liti atu foki he kelekele a lautolu ne mamate.”—Isaia 26:19.

Ko e Fakafili Tututonu e Mesia. “Nakai fakafili ai e ia ke lata mo e kitekite atu he hana tau fofoga; to nakai akonaki foki e ia ke lata mo e logona he hana tau teliga. Ka to fakafili ai e ia mo e tututonu e tau tagata lolelo[l]e, to akonaki foki e ia mo e tonu ha ko e tau tagata matematekelea ha ha he lalolagi.”—Isaia 11:3, 4.

Fakamaulu e Tau Matapouli mo e Teligatuli. “Ti fakaala ai e tau mata he tagata mata pouli, to logona foki e tau teliga he tau tagata teliga tuli.”—Isaia 35:5.

Fua Loga e Fonua Taluē. “To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute. To fiti lahi mai ni a ia, to olioli foki mo e olioli lahi, mo e kalaga fiafia.”—Isaia 35:1, 2.

Ko e Lalolagi Fou. “Kua eke e au e lagi fou [ko e fakatufono foou he lagi] mo e lalolagi fou [ko e fakalatahaaga foou he tau tagata tututonu]; nakai tuai manatu ke he tau mena fakamua, ti nakai hake ai ke he loto e tau mena ia. Ka e olioli ā mutolu mo e fiafia tukulagi ā mutolu ke he mena kua eke e au; . . . To ta fale e lautolu [ko e tau tagata ne nonofo he lalolagi foou ne mavehe mai he Atua], mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua. Nakai ta fale e lautolu ke nonofo ai e falu, ti nakai to uluvine e lautolu ke kai ai e falu; ha kua tuga e tau aho he akau e tau he haku motu; to oti ai kia lautolu ne fifili e au e tau mena ne eke ai ke he tau lima ha lautolu. Nakai gahua teao a lautolu, to fanau e lautolu, ka e nakai tupu ai e fakaatukehe; ha ko e fanau kua fakamonuina e Iehova a lautolu, katoa mo lautolu ke tutupu mai ia lautolu. Ka kua nakaila tauui e lautolu, to tali atu ai e au; ka kua vagahau mai e lautolu, to fanogonogo atu au.” “Ha ko e mena tuga ne tumau ki mua haku e lagi fou mo e lalolagi fou kua eke e au, kua pehe mai a Iehova, to tumau pihia ha mutolu a fanau mo e ha mutolu a higoa.”—Isaia 65:17-25; 66:22.

Talahau Tuai e Vahā Homo Ue Atu Anoiha

Ne nakai ko e tohi ni ha Isaia he Tohi Tapu ne talahau tuai e tau monuina he vahā anoiha. Kua puke e Tohi Tapu he tau perofetaaga ne fakamaama e tau mena homo ue atu ka taute he Atua mai he haana Kautu i lalo hifo he Keriso.a Manako nakai a koe ke nofo i lalo hifo he tau tuaga parataiso pihia? Maeke mooli a koe! Kumikumi ne koe ke iloa e mena ne fakaako mooli he Tohi Tapu hagaao ke he tau finagalo mitaki he Atua ma e vahā anoiha, ti fakaako e puhala ka maeke ia koe ke fai vala i ai. To fiafia e Tau Fakamoli a Iehova ke lagomatai a koe.

[Matahui Tala]

[Fakatino he lau 8]

To nonofo mafola e tau tagata oti mo e tau manu

[Fakatino he lau 9]

To liu momoui a lautolu ne mamate

[Fakatino he lau 10]

To eke e lalolagi katoa mo parataiso