Vala 8
Moui Tukulagi he Lalolagi Parataiso
1, 2. To fefe la e moui i lalo hifo he pule he Kautu he Atua?
To fefe la e moui he magaaho ka uta kehe he Atua e mahani kelea mo e matematekelea mai he lalolagi mo e ta mai e lalolagi fou hana i lalo he pule ofania he Kautu hana he lagi? Ne mavehe e Atua ke ‘fakamafola hana lima mo e fakamakona e manako he tau mena momoui oti.’—Salamo 145:16.
2 Ko e heigoa e tau manako moli hau? Nakai kia ma e moui fiafia, gahua mitaki, koloa loga, fulufuluola e tau takaiaga, mafola e tau tagata oti kana, mo e tokanoa mai he nakai fakafiliaga tonu, gagao, matematekelea, mo e mate? Mo e, ka e kua foki e fiafia ke he tau mena fakaagaga? Nakai leva, ko e tau mena oti nei to mailoga ai i lalo he pule he Kautu he Atua. Mailoga la e tau perofetaaga he Tohi Tapu hagaao ke he tau fakamonuinaaga homo ue atu ka ta mai he lalolagi fou ia.
Mafola Katoatoa e Tau Tagata
3-6. Ko e heigoa e fakamoliaga ne ha ha ia tautolu to mafola e tau tagata he lalolagi fou?
3 “Kua fakahiku [he Atua] e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao; kua huhunu foki e ia e tau kariota [tau] ke he afi.”—Salamo 46:9.
4 “Ti tukituki e lautolu ha lautolu a tau pelu ke eke mo tau koho, ko e ha lautolu a tau tao foki ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki e lautolu.”—Isaia 2:4.
5 “Ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”—Salamo 37:11.
6 “Kua okioki e lalolagi oti, kua nonofo fakatekiteki ni; kua kalaga a lautolu mo e fiafia.”—Isaia 14:7.
Mafola e Tau Tagata mo e Tau Manu
7, 8. Ko e heigoa e mafola ka ha ha ai he vahaloto he tau tagata mo e tau manu?
7 “To nonofo fakalataha e luko mo e punua mamoe, to takoto foki e nameri fakalataha mo e punua koti, to fakalataha foki e punua povi mo e punua leona katoa mo e manu gako, to takitaki foki he tama tote a lautolu. To kai fakalataha e povi fifine mo e urosa, to takoto fakalataha ha laua a tau punua? to kai foki he leona e tau kakau saito tuga ne povi. To fefeua foki e tama kai huhu ki luga he luo he asipi, ko e tama kua tapani foki, to tuku atu e ia hana lima ki luga he ofaga he gata gagau. Nakai mahani kelea a lautolu, to nakai moumou mena ai e lautolu.”—Isaia 11:6-9.
8 “Ko e aho ia to eke ai e mautolu e maveheaga ha ko lautolu mo e tau manu he vao, mo e tau manu lele he pulagi, mo e tau mena totolo he kelekele . . . ko au foki ke tatakoto ai a lautolu mo e monuina.”—Hosea 2:18.
Tino Malolo Katoatoa, Moui Tukulagi
9-14. Fakamaama e tau tutuaga he tino malolo he lalolagi fou.
9 “Ti fakaala ai e tau mata he tau tagata mata pouli, to logona foki he tau teliga he tau tagata teliga tuli. Ti hopohopo ai e tagata kulikuli tuga ne aila, to kalaga fiafia foki e alelo he tagata kuhukuhu.”—Isaia 35:5, 6.
10 “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.”—Fakakiteaga 21:4.
11 “To nakai pehe mai foki taha kua nofo ai, Kua gagao au.”—Isaia 33:24.
12 “Kua liu moui mitaki hana tino ke homo atu ke he tino he tama tote; to liu foki a ia ke he hana vaha fuata.”—Iopu 33:25.
13 “Ko e moui tukulagi ko e mena foaki noa mai he Atua haia, ke he Iki ha tautolu ko Keriso Iesu.”—Roma 6:23.
14 ‘Ko lautolu ne tua kia ia, to moua e lautolu e moui tukulagi.’—Ioane 3:16.
Liuaki Mai a Lautolu ne Mamate ke he Moui
15-17. Ko e heigoa e amaamanakiaga ma lautolu ne kua mamate?
15 “[To] liu foki tutu mai a lautolu kua mamate, ko lautolu ne tututonu katoa mo lautolu ne hepehepe.”—Gahua 24:15.
16 “Ko e mena hoko ke he aho ke logona ai ke he hana leo a lautolu katoa ha he tau tukuaga [manatuaga he Atua], mo e o mai ai.”—Ioane 5:28, 29.
17 “Kua ta atu he tahi a lautolu kua mamate ha i ai, kua ta atu foki he mate mo e Hate [he tukuaga] a lautolu kua mamate ha i ai.”—Fakakiteaga 20:13.
Lalolagi, ko e Parataiso Mautu
18-22. To fakafou fefe e lalolagi katoa?
18 “To ha i ai e tau uha ke monuina ai. To fua mai e akau he fonua hana tau fua; to fua mai foki e kelekele hana tau fua; to nonofo fakatekiteki foki a lautolu ke he ha lautolu a motu.”—Esekielu 34:26, 27.
19 “Kua fua mai he kelekele hana tau fua; ko e Atua, ko e ha mautolu a Atua kua fakamonuina mai e ia a mautolu.”—Salamo 67:6.
20 “To fiafia ha ko lautolu e tutakale, mo e motu nakai fai vai; to olioli e motu taluē, mo e fiti mai tuga ne kaute.”—Isaia 35:1.
21 “To leo lalahi ai mo e kalaga fiafia he tau mouga mo e tau matiketike ki mua ha mutolu, to pati lima foki he tau akau oti he vao. To tupu hake e perosi ke totogi aki e akau fotofoto; to tupu hake e maile ke totogi aki e akau magiho.”—Isaia 55:12, 13.
22 “[To] fakalataha ai a taua mo koe i parataiso.”—Luka 23:43.
Tau Fale Mitaki ma e Tau Tagata Oti Kana
23, 24. Ko e heigoa e fakamoliaga ne ha ha ia tautolu to mitaki e tau fale ma e tau tagata oti kana?
23 “To ta fale a lautolu, mo e nonofo ai a lautolu . . . Nakai ta fale e lautolu ke nonofo ai e falu, ti nakai to uluvine e lautolu ke kai ai e falu . . . To oti ai kia lautolu ne fifili e au e tau mena ne eke ai ke he tau lima ha lautolu. Nakai gahua teao a lautolu, to fanau e lautolu, ka e nakai tupu ai e fakaatukehe.”—Isaia 65:21-23.
24 “To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai.”—Mika 4:4.
Maeke a Koe ke Moui Tukulagi he Parataiso
25. Ko e heigoa e amaamanakiaga mitaki ha tautolu ma e vaha anoiha?
25 Ko e homo ha ia he amaamanakiaga ma e vaha anoiha! Ko e kakano moli ha ia he tau momoui he mogonei he taula aki e amaamanakiaga mao ko e lalolagi fou he Atua to eke e tau mena vihi oti kana he vaha nei mo tau mena kua mole! “Nakai tuai manatu ke he tau mena fakamua, ti nakai hake ai ke he loto e tau mena ia.” (Isaia 65:17) Mo e mafanatia ha ia he iloa to tukulagi e moui he magaaho ia: “To fakaoti tukulagi [he Atua] e mate.”—Isaia 25:8.
26. Ko e heigoa e kei ke moui tukulagi he lalolagi fou he Atua?
26 Manako nakai a koe ke moui tukulagi he Parataiso he lalolagi fou ia ne tata lahi mai he mogonei? ‘Ko e heigoa kua lata ke taute e au ke moua e taliaaga he Atua he fakahikuaga he lalolagi nei mo e moui atu ke he hana lalolagi fou?’ ka liga huhu e koe. Kua lata ia koe ke taute e mena ne talahau e Iesu i loto he liogi ke he Atua: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”—Ioane 17:3.
27. Ko e heigoa kua lata ia koe ke taute ke fai vala he finagalo he Atua?
27 Ti kua lata ni ke moua taha Tohi Tapu, mo e fakamoli e mena ne totou e koe i loto he porosua nei. Kia kumi a lautolu ne faala mo e fakaako e tau kupu moli nei he Tohi Tapu. Kia mafai mai he tau lotu fakatupua ne fakaako mo e taute e tau mena ne kehe mamao mai he Tohi Tapu. Kia kumi kua maeke fefe ia koe, katoa mo e totou miliona he falu foki ne kua fita he taute e finagalo he Atua, ke fakalataha ke he finagalo he Atua ke moui tukulagi e tau tagata he parataiso lalolagi. Mo e tokaloto e mena ne fakailoa he Kupu mai he agaga he Atua hagaao ke he vaha anoiha ne tata mai: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:17.
[Fakatino he lau 31]
Ko e finagalo he Atua ke liuaki mai e lalolagi parataiso to nakai leva ti mailoga ai