Fanogonogo a Laua ki a Satani​—Ti ko e Heigoa e Fua?

Ne nakai omaoma a Atamu mo Eva ke he Atua ti mamate a laua. Kenese 3:6, 23

Ne fanogonogo a Eva ke he gata ti kai e fua he akau. Fakamui, ne age foki e ia ki a Atamu, ti kai ai e ia.

Ko e mena ne taute e laua kua hehē​—ko e agahala. Ne vega kehe he Atua a laua he ha laua a kaina Parataiso.

Uka e moui ma laua mo e tau tama ha laua. Ne fuakau a laua ti mamate. Nakai o atu a laua ke he lalolagi fakaagaaga; ne mamate a laua.

Ko lautolu ne mamate kua nakai momoui, kua tuga e efuefu. Kenese 3:19

Mamate a tautolu ha kua tutupu mai oti ia Atamu mo Eva. Ko e tau tagata mamate kua nakai kitia po ke logona po ke taute ha mena taha.​—Fakamatalaaga 9:5, 10.

Nakai finagalo a Iehova ma e tau tagata ke mamate. Nakai leva to liuaki mai e ia a lautolu ne momohe he mate. Ka fanogonogo a lautolu ki a ia, to momoui tukulagi a lautolu.