Ko e Fakapuke Lahi​—Ko Hai ne Fanogonogo? Ko Hai ne Nakai Fanogonogo?

Laulahi he vahā a Noa ne taute e tau mena kelea. Kenese 6:5

Ne fanafanau a Atamu mo Eva, ti tokologa e tau tagata he lalolagi. Fai magaaho, ne matutaki e falu agelu mo e totokoaga a Satani.

Ne o hifo mai a lautolu ke he lalolagi ti fakafaliu ke he tau tino tagata ke mau mo e tau fifine. Ne fanau he tau fifine e tau tama taane makimaki, ne vale lahi mo e malolō.

Ne puke e lalolagi ke he tau tagata ne taute e tau mena kelea. Pehē e Tohi Tapu “kua lahi ni e mahani kelea he tau tagata ke he lalolagi; ko e tau fatuakiloto oti foki he tau manatu he tau loto ha lautolu, ko e kelea hokoia ni ke he tau aho oti kana.”

Ne fanogonogo a Noa ke he Atua ti ta e vaka. Kenese 6:13, 14, 18, 19, 22

Ko Noa ko e tagata mitaki. Ne tala age a Iehova ki a Noa ko e moumou fai e Ia e tau tagata mahani kelea ke he fakapuke lahi.

Ne tala age foki e Atua ki a Noa ke ta e vaka lahi, ti uta ki loto e magafaoa haana mo e tau manu kehekehe oti kana.

Ne hataki e Noa e tau tagata hagaao ke he Fakapuke hane hoko mai, ka e nakai fanogonogo a lautolu. Ne fekī falu ki a Noa; falu ne vihiatia a ia.

He mogo ne mau e vaka, ne uta e Noa e tau manu ki loto.