FAKAAKOAGA 27
Maeke Fēfē e Poko Toka Tohi he Fale he Kautu ke Aoga ki a Mautolu?
Isaraela
Repapiliki a Sekolovakia
Penini
Tau Aelani Kaimani
Manako nakai a koe ke taute e falu kumikumiaga ke fakatupu ki mua e iloilo haau ke he Tohi Tapu? Kua manamanatu pauaki nakai a koe ke he falu kupu tohi po ke tagata, matakavi, po ke mena ne talahau i loto he Tohi Tapu? Po ke manamanatu nakai a koe na maeke he Kupu he Atua ke lagomatai a koe ke he tau tupetupe fakatagata haau? Ti ahiahi atu ke he poko toka tohi he Fale he Kautu.
Foaki ai e tau koloa lagomatai ke kumikumi. Liga nakai moua oti e koe e tau tohi faka-Tohi Tapu he Tau Fakamoli a Iehova kua fai ke he vagahau haau. Ka ko e poko toka tohi he Fale he Kautu ne ha ha i ai e laulahi he tau tohi foou. Kua liga ha ha i ai foki e tau Tohi Tapu kehekehe, tohi fakamaama kupu mitaki, mo e falu tohi lagomatai kumikumi. Kua atāina a koe ke fakaaoga e tau tohi he poko toka tohi ato kamata mo e ka hili e tau feleveiaaga. Ka ha ha i ai e komopiuta, liga fai Watchtower Library i ai. Ko e tau polokalama komopiuta anei kua ha ha i ai loga he tau tohi ha mautolu mo e mafiti e fakaaoga he tau puhala kumikumi ke kumi e koe e tau matakupu, kupu, po ke kupu Tohi Tapu.
Aoga ai ma e tau tagata fakaako he Feleveiaaga he Moui mo e Fekafekauaga. Maeke ia koe ke fakaaoga fakamitaki e poko toka tohi he Fale he Kautu ka tauteute e tau kotofaaga haau. Ko e leveki he Feleveiaaga he Moui mo e Fekafekauaga kua takitaki e poko toka tohi. Kua leveki e ia ke mailoga ko e tau tohi foou i ai mo e kua fakatokatoka fakamitaki ai. Ko ia po ke faiaoga Tohi Tapu haau ka fakakite ki a koe e puhala ke moua e tau vala tala kua lata mo koe. Pete ia, nakai fai tohi kua lata ke utakehe he Fale he Kautu. Mooli kua manako a mautolu ke taute fakamitaki e tau tohi mo e nakai takiva ai.
Kua fakamaama he Tohi Tapu ke ‘moua ai e iloilo ke he Atua,’ kua lata ia mautolu ke makai he kumikumi ki ai “tuga he kumi e koloa galo.” (Tau Fakatai 2:1-5) Ko e poko toka tohi he Fale he Kautu ka lagomatai a koe ke kamata e kumikumi haau.
Ko e heigoa e tau koloa kumikumi kua maeke ke moua he poko toka tohi he Fale he Kautu?
Ko hai ka lagomatai a koe ke fakaaoga fakamitaki e poko toka tohi?