Fakaholoaga Fou ma e Tau Fata Tohi he Tau Fale he Kautu
Ke he loga he tau tau mogonei, kua aoga mai e tau fakapotopotoaga takitaha he lalolagi katoa he fakaaoga e tau fata tohi he ha lautolu a Fale he Kautu, ne fakahigoa fakamua ko e fata tohi he Aoga Fekafekau Fakateokarasi. He tau vaha kua mole, kua manatu ai kua latatonu ke igatia e tau fakapotopotoaga mo e fata tohi. Ke he mogonai, ha kua loga e Fale he Kautu kua molea e taha e fakapotopotoaga ne fakaaoga ai, falu ko e tau fakapotopotoaga vagahau kehekehe, ti liga mitaki ke taha ni e fata tohi he Fale he Kautu ma e tau vagahau takitaha ka e maopoopo mo e katoatoa ti fou, ka toka he tau Fale he Kautu. Ke he tau Fale he Kautu ne molea e taha e poko lahi, kua lata ke igatia e poko lahi ia mo e fata tohi ma e tau vagahau kehekehe he tau matakau ne feleveia he mena ia.
Kua amanaki e fakaholoaga nai ke fakaaoga fakamitaki e tau poko mo e tau tupe fakaaoga. Ke lafi ki ai, ko e lafi he tau fata tohi he ua po ke loga atu e fakapotopotoaga to liga moua taha e fata tohi kua mua atu e aoga. He lafi e tau fata tohi nai, ko e tau tohi ne molea e taha e lagaki to fakaputu fakamitaki e faoa ia ke fakaaoga he taha magaaho foki ka ta fou e tau Fale he Kautu. Ka fai komopiuta e Fale he Kautu mo e Watchtower Library he CD-ROM, to aoga lahi e koloa nai ke he falu.
To igatia e fata tohi he tau Fale he Kautu mo e taha e matakainaga tane, mitaki lahi kaeke ko e taha he tau leveki Aoga Fekafekau Fakateokarasi, ke eke mo tagata leveki fata tohi. Kua lata a ia ke matutaki ke lafi e tau tohi kua lata ke he fakaputuaga tohi, he fakamailoga fakamitaki ki loto he tau kili tohi takitaha ko e tohi he fata tohi he Fale he Kautu a ia. Liga kavi ke lagataha he tau, kua lata a ia ke fakakia kua maopoopo mo e mau mitaki agaia e tau tohi he fata tohi. Ko e tau tohi he tau fata tohi nai to nakai maeke ke uta kehe mai he Fale he Kautu.
Ko e fata tohi he Fale he Kautu to matutaki ke aoga lahi ki a lautolu ne fakalataha ke he fakapotopotoaga. Kia fakakite e tautolu kua uho moli ki a tautolu fakatagata e fakaholoaga nai he leveki mo e fakaaoga ai ke kumikumi “e iloilo ke he Atua.”—Fakatai 2:5.