Ko e Heigoa e Finagalo he Atua ma e Lalolagi?

1. Ko e ha ne tufuga he Atua e lalolagi?

Ne age e Iehova e lalolagi ke he tau tagata taane mo e tau fifine. Ko e kaina ha tautolu. Mena ia, ko e hoa fakamua, ko Atamu mo Eva ne nakai tufuga ke fakapuke e lagi​—ne fitā e tufuga he Atua e tau agelu ke nonofo he lagi. (Iopu 38:4, 7) Ka e uta he Atua e tagata taane fakamua ti tuku a ia ke he parataiso fulufuluola ne fakahigoa ko e kaina ko Etena. (Kenese 2:15-17) Ne age e Iehova ki a ia mo e tau fanau haana anoiha e amaamanakiaga he fiafia e moui tukulagi ke he lalolagi.​—Totou Salamo 37:29; 115:16.

He kamataaga, ko e kaina ni ko Etena e parataiso. Ko e hoa fakamua kua lata ke fakatokologa e lalolagi ke he tau hologa ha laua. Nakai leva, kua lata a laua ke fakapuke e lalolagi katoa ti eke ai mo parataiso. (Kenese 1:28) Ko e fua lalolagi to nakai moumou ai. To eke tumau ai mo kaina he tau tagata.​—Totou Salamo 104:5.

Kitekite e vitiō Ko e Ha ne Tufuga he Atua e Lalolagi

2. Ko e ha e lalolagi ne nakai ko e parataiso mogonei?

Ko Atamu mo Eva ne nakai omaoma ke he Atua, ti vega e Iehova a laua mai he kaina. Ne galo e parataiso, ti nakai fai tagata ne maeke ke liuaki mai ai. Pehē e Tohi Tapu: “Kua tuku age e lalolagi ke he lima hana ne mahani kelea.”​—Iopu 9:24.​—Totou Kenese 3:23, 24.

Kua tiaki kia e Iehova e finagalo fakamua haana ma e tau tagata? Nakai! Kua malolō ue atu a ia. Nakai kaumahala a ia. (Isaia 45:18) To liuaki mai e ia e lanu tagata ke he puhala ne finagalo a ia ki ai.​—Totou Salamo 37:11, 34.

3. To liuaki mai fēfē e Parataiso?

To liuaki mai e parataiso he lalolagi he magahala ka pule a Iesu ko e Patuiki he Atua. He tauaga ne higoa ko Amaketo, to takitaki e Iesu e tau agelu he Atua mo e moumou a lautolu oti ne totoko ke he Atua. Mogoia, to līlī e Iesu a Satani ke he 1,000 tau. Ko e tau tagata he Atua to laveaki mai he moumouaga ha ko e mena to takitaki mo e puipui e Iesu a lautolu. To fiafia e lautolu e moui tukulagi ke he Parataiso he lalolagi.​—Totou Fakakiteaga 20:1-3; 21:3, 4.

4. Magaaho fe ka fakaotioti e matematekelea?

Magaaho fe ka tamai he Atua e fakaotiaga ke he kelea muitui he lalolagi? Ne foaki e Iesu e “fakamailoga” ke fakakite e magaaho kua tata mai e fakaotiaga. Ko e tau tuaga he lalolagi mogonei kua fakamatakutaku e fakahaoaga he tagata mo e fakakite kua nonofo a tautolu mogonei he “fakaotiaga he lalolagi.”​—Totou Mataio 24:3, 7-14, 21, 22.

He pule 1,000 tau ha Iesu mai he lagi ke he lalolagi, to fakaotioti e ia e tau matematekelea oti kana. (Isaia 9:6, 7; 11:9) He nakai ni ko e Patuiki, to eke a Iesu mo Ekepoa ne Mua mo e to utakehe e tau agahala ha lautolu kua ofania e Atua. Ti puhala ia Iesu, to utakehe he Atua e gagao, fuakau, mo e mate.​—Totou Isaia 25:8; 33:24.

5. Ko hai ka moui he Parataiso anoiha?

Ko e tau tagata kua omaoma ke he Atua to momoui he Parataiso. (1 Ioane 2:17) Ne fakafano e Iesu e tau tutaki haana ke kumi e tau tagata mahani molū mo e ke fakaako a lautolu ke he puhala ke talia he Atua. He vahā nei, kua tauteute e Iehova e tau miliona tagata ma e moui he Parataiso anoiha he lalolagi. (Sefanaia 2:3) He tau Fale he Kautu he Tau Fakamoli a Iehova, kua fakaako e tau tagata ke eke mo tau taane mo e tau matua taane mitaki mo e eke mo tau hoana mo e tau matua fifine mitaki. Ko e tau fanau mo e tau matua kua tapuaki auloa mo e fakaako e puhala ke aoga mai he tala mitaki.​—Totou Mika 4:1-4.