I Fe e Parataiso ne Fakakite he Tohi Tapu?

Ne mavehe a Iesu ke he tagata kua teitei mate ne fakakite fakamalolō e tua ki a ia: “[To] fakalataha ai a taua mo koe i parataiso.” (Luka 23:43) To fano ki fe e tagata ia? Kua haia kia e Parataiso he lagi, he lalolagi, po ke he taha matakavi he vahāloto ka fakatali ai e tau tagata ke fakafili?

Taha e magaaho ne nonofo e tau matua tupuna ha tautolu he Parataiso. Kua tala mai e Tohi Tapu ki a tautolu: “Ne to foki e Iehova ko e Atua e kaina i Etena ke he fahi uta; ti tuku ai e ia e tagata ne eke e ia. . . . Ne uta foki e Iehova ko e Atua e tagata, mo e tuku a ia ke he kaina ko Etena, ke gahua ai mo e leoleo ai.” (Kenese 2:8, 15) He magaaho ne fakaliliu e tau kupu ia ke he vagahau Heleni, ne fakahigoa e kaina ia ko e “parataiso.”

Tuga ne hoa ka fakalahi e kaina ha laua ka tokologa foki e tama ha laua, ti amanaki pihia ke he tau matua fakamua ha tautolu ke fakalahi atu e Parataiso ke molea e tau katofia i Etena he tupu ki mua e magafaoa he tagata. Ne tala age e Atua ki a laua: “Kia fakapuke foki e lalolagi, mo e kautu ki ai.”—Kenese 1:28.

Ko e finagalo mogoia he Tufuga ha tautolu ma e tau tagata ke momoui mo e fanafanau e tau tama he Parataiso he lalolagi nei. To momoui tukulagi a lautolu he kaina he lalolagi ti nakai lata ke fai tanuaga. Kua lata e lalolagi ke eke mo kaina tukulagi ma e tau tagata oti kana. Ko e mena haia ne loga e tau tufugatia pauaki he palaneta ha tautolu ne fakafiafia lahi aki a tautolu! Kua tufugatia a tautolu ke momoui he lalolagi fulufuluola.

Kua hiki kia e finagalo he Atua? Nakai. Ha kua fakamooli mai e Atua ki a tautolu: “To pihia ni haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai.” (Isaia 55:11) Molea e 3,000 tau he tufuga e tagata, ne pehē e Tohi Tapu hagaao ke he Tufugatia mo Ia ne eke ai e lalolagi nukua “nakai eke noa ai e ia,” ka e “eke e ia ke nonofo ai e tau tagata.” (Isaia 45:18) Nakaila hiki e finagalo he Atua. To eke mooli e lalolagi mo parataiso.

Mooli foki kua loga e tau talahauaga he Tohi Tapu hagaao ke he Parataiso ne fakamaama tumau e moui ke he lalolagi. Ma e fakatai, ne talahau he perofetaaga ha Isaia: “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.” (Isaia 65:21) To tā i fe e tau fale, mo e tō i fe e tau uluvine? Kai i fe e tau fua akau? He lalolagi. Ne talahau fakahako he Tau Fakatai 2:21: “Ko lautolu ne mahani hakohako to nonofo a lautolu ke he motu.”

Ne vagahau foki a Iesu hagaao ke he parataiso he lalolagi. Mooli, ne mavehe foki a ia ke he parataiso he lagi, ka e tokogahoa ni ne fifili. (Luka 12:32) He mole e mate, kua liu tutū mai a lautolu nei ke he Parataiso he lagi mo e fakalataha mo Keriso ke pule ke he Parataiso he lalolagi. (Fakakiteaga 5:10; 14:1-3) Ko lautolu nei ka pule fakalataha ke he lagi to mailoga ke leveki mo e pule fakamitaki ke he Parataiso he lalolagi fakatatau ke he tau tutūaga he Atua.

Iloa e Iesu ko e finagalo he Atua anei ma e lalolagi. Ha ko ia mo e Matua haana he lagi he magaaho ne tufugatia e kaina ko Etena. Ko e moui he parataiso he lalolagi anoiha kua hafagi ke he tau tagata oti ne fakagahuahua e tua he vahā nei. (Ioane 3:16) Kia lautolu ia, ne mavehe a Iesu: “[To] fakalataha ai a taua mo koe i parataiso.”—Luka 23:43.