Ko e Heigoa e Kautu he Atua?

1. Ko e heigoa e Kautu he Atua?

Ko e Kautu he Atua ko e fakatufono he lagi. To hukui ai e tau fakatufono oti foki mo e to fakatupu e finagalo he Atua ke taute he lagi mo e he lalolagi. Ko e tala hagaao ke he Kautu he Atua kua mitaki. Nakai leva to fakamakona he Kautu he Atua e tau manako he tagata ma e fakatufono mitaki. To fakalataha e tau tagata oti ne nonofo he lalolagi.​—Totou Tanielu 2:44; Mataio 6:9, 10; 24:14.

Kua lata e kautu, po ke fakatufono ke fai patuiki. Ne kotofa e Iehova e Tama haana ko Iesu Keriso ke eke mo Patuiki he Kautu Haana.​—Totou Fakakiteaga 11:15.

Kitekite e vitiō Ko e Heigoa e Kautu he Atua?

2. Ko e ha ko Iesu e Patuiki kua latatonu?

Ko e Tama he Atua ko e Patuiki kua latatonu ha ko ia kua totonu, ti mauokafua a ia ma e mena kua hako. (Mataio 11:28-30) Pihia foki kua malolō lahi a ia ke lagomatai e tau tagata ha ko e mena to pule a ia ke he lalolagi katoa mai he lagi. He mole e fakaliu tū mai haana, ne hake a ia ke he lagi mo e nofo ke fakatali he faahi matau ha Iehova. (Heperu 10:12, 13) Fakahiku ai, ne age he Atua ki a ia e malolō ke kamata ke pule.​—Totou Tanielu 7:13, 14.

3. Ko hai ka pule mo Iesu?

Ko e matakau ne fakahigoa ko e “tau tagata tapu” to pule fakalataha mo Iesu ke he lagi. (Tanielu 7:27) Ko e tau tagata tapu fakamua ne fifili ko e tau aposetolo fakamooli ha Iesu. Ne fakatumau a Iehova ke fifili e tau tagata taane mo e tau fifine fakamooli ko e tau tagata tapu ato hoko mai mogonei. Tuga a Iesu, ne fakaliu tū mai a lautolu ke he tino fakaagaaga.​—Totou Ioane 14:1-3; 1 Korinito 15:42-44.

Tokofiha e tagata ka o hake ke he lagi? Ne fakahigoa e Iesu a lautolu ko e “fuifui mamoe gahoa.” (Luka 12:32) To katoatoa e numera ha lautolu ke he 144,000. To pule a lautolu mo Iesu ke he lalolagi katoa.​—Totou Fakakiteaga 14:1.

4. Ko e heigoa ne tupu he kamata a Iesu ke pule?

Ne kamata e Kautu he Atua ke pule he 1914.a Ko e mena fakamua ne taute e Iesu ko e Patuiki ko e tolo hifo a Satani mo e tau temoni haana ke he lalolagi. Ne ita lahi mahaki a Satani mo e kamata ke fakatupu lekua ke he lalolagi oti. (Fakakiteaga 12:7-10, 12) Tali mai ai, kua tupu lahi mahaki e malaia he tau tagata. Ko e tau felakutaki, tau hoge, tau tatalu, mo e tau mafuike ko e tau vala oti he “fakamailoga” ka nakai leva ti pule katoatoa e Kautu ke he tau mena oti he lalolagi.​—Totou Luka 21:7, 10, 11, 31.

5. Ko e heigoa kua fakakatoatoa he Kautu he Atua?

Puhala he gahua fakamatala he lalolagi katoa, kua fitā e Kautu he Atua he fakapotopoto e moto tagata tokologa he tau tagata mai he tau motu oti kana. Totou miliona e tau tagata mahani molū kua ha ha i lalo ha Iesu. Ko e Kautu he Atua to puipui a lautolu ka moumou e fakatokaaga kelea he lalolagi. Ko lautolu oti kua manako ke aoga mai he Kautu he Atua kua lata ke fakaako ke omaoma he ha ha i lalo ha Iesu.​—Totou Fakakiteaga 7:9, 14, 16, 17.

He 1,000 tau, to fakakatoatoa he Kautu e finagalo fakamua he Atua ma e tau tagata. To eke e lalolagi mo parataiso katoatoa. Fakahiku ai, to liuaki age e Iesu e Kautu ke he haana a Matua. (1 Korinito 15:24-26) Iloa nakai e koe ha tagata ka manako a koe ke tala age e Kautu he Atua ki ai?​—Totou Salamo 37:10, 11, 29.