Mena ne Fakaako e Iesu Hagaao ke he Kautu he Atua

“Ti haele takai ai a ia ke he tau māga, mo e tau magamotu, kua . . . fakamatala e [tala] mitaki he kautu he Atua.”—LUKA 8:1.

KUA manako a tautolu ke tutala ke he tau mena ne uho ki a tautolu, tau mena ne fiafia lahi a tautolu ki ai. Tuga ne talahau ni e Iesu, “ko e loga he tau mena he loto ke vagahau mai ai e gutu.” (Mataio 12:34) He manamanatu ke he tau mena ne vagahau e Iesu he magaaho ne gahua fakamatala a ia, maeke ia tautolu ke fakahiku aki kua uho lahi ki a ia e Kautu he Atua.

Ko e Heigoa e Kautu he Atua? Ko e kautu ko e fakatufono ne pule he patuiki. Ti ko e Kautu he Atua ko e fakatufono ne fakatū he Atua. Ne tutala fakalaulahi a Iesu hagaao ke he Kautu he Atua, he eke mo matapatu he fekau haana. Kavi ke he 110 e talahauaga ke he Kautu ia he tau Evagelia ne fā. Ka e nakai fakaako a Iesu ke he tau kupu hokoia. Kua lahi foki e mena ne fakaako he tau gahua haana hagaao ke he Kautu he Atua mo e tau mena ka taute ai.

Ko Hai e Patuiki? Ko e Patuiki he Kautu he Atua kua nakai vili he tau tagata he lalolagi. Ka ko e Pule nei kua fifili ni e ia ko e Atua. He fakaakoaga ha Iesu, ne fakakite e ia ko ia ne fifili he Atua ke eke mo Patuiki.

Ne iloa e Iesu ko e tau perofetaaga he Tohi Tapu ne talahau tuai ko e Mesia ne mavehe mai to pule ke he Kautu tukulagi. (2 Samuela 7:12-14; Tanielu 7:13, 14; Mataio 26:63, 64) Manatu na fakailoa mooli ni e Iesu ko ia ka eke mo Mesia ne talahau tuai. Ne talahau mooli e Iesu ko ia e Patuiki ne kotofa he Atua. (Ioane 4:25, 26) Latatonu ai, ne lagaloga e fakaaoga e Iesu e talahauaga “haku a kautu.”—Ioane 18:36.

Ne fakaako foki e Iesu to ha ha i ai e falu ka pule fakalataha mo ia he Kautu. (Luka 22:28-30) Ne fakahigoa e ia a lautolu nei ka pule fakalataha ko e “fuifui mamoe gahoa,” ha kua fakakaupā e numera ha lautolu. Ne pehē a ia hagaao ki a lautolu: “Ko e mena finagalo ha mutolu a Matua ke foaki mai e kautu kia mutolu.” (Luka 12:32) Kua fakakite he tohi fakahiku he Tohi Tapu to 144,000 he katoa ha lautolu ka moua e kotofaaga ke pule fakalataha mo Keriso.—Fakakiteaga 5:9, 10; 14:1.

Fakatū i fe e Kautu? “Nakai ko e kautu he lalolagi nai haku a kautu,” he tala age e Iesu ke he pule Roma ko Ponotio Pilato. (Ioane 18:36) Ko e Kautu he Atua i lalo he Keriso to nakai pule he puhala he tau matakau tagata. Ne hagaao tumau a Iesu ke he Kautu he Atua ko e “kautu he lagi.”a (Mataio 4:17; 5:3, 10, 19, 20) Ko e Kautu he Atua mogoia ko e fakatufono he lagi.

Ne amaamanaki katoa a Iesu ke liu ke he lagi he mole e nofo haana he lalolagi. I ai, ne pehē a ia, ko ia ka “taute taha mena ke nonofo ai,” he hafagi e puhala ma e tau tagata haana ka pule fakalataha mo ia.—Ioane 14:2, 3.

Ko e heigoa kua taute he Kautu? Ne fakaako e Iesu e tau tagata fanogonogo haana ke liogi ke he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Kua fitā e finagalo he Atua he eke ke he lagi. Ko e Kautu e puhala ka fakahoko mai e finagalo he Atua ke he lalolagi. Ke taute e mena ia, to taute he Kautu e tau hikiaga ofoofogia ke he lalolagi nei.

Ko e heigoa he Kautu ka taute he lalolagi? Fakaako e Iesu to fakaotioti he Kautu he Atua e kelea muitui he utakehe a lautolu kua fifili ke taute e tau mahani ia. (Mataio 25:31-34, 46) Kakano he mena ia to fakaotioti e tau matahavala mo e tau mahani kelea oti kana. Ko e lalolagi, he fakaako e Iesu, to puke ke he tau tagata “mahani molu,” tututonu, fakaalofa noa, “loto mea,” mo e fakatupu e fakafeilo.—Mataio 5:5-9.

To nonofo kia a lautolu ia ne tua fakamooli he palaneta kiva? Nakai pihia! Ne mavehe mai a Iesu to ha ha ai e tau hikiaga mua ue atu ke he lalolagi i lalo he Kautu he Atua. Ko e tagata he tapa ha Iesu ne amanaki ke tamate ne pehē: “Ko e Iki na e, kia manatu mai a a koe kia au ka haele mai a koe ke he hau a kautu.” He tali, ne pehē a Iesu: “Ko e moli, ke tala atu e au kia [“koe he aho nai, to” NW] fakalataha ai a taua mo koe i parataiso.” (Luka 23:42, 43) E, to hiki he Kautu he Atua e lalolagi nei mo parataiso katoatoa—ke tatai mo e parataiso he katene ko Etena.

Ko e heigoa foki ka taute he Kautu ma e tau tagata? Nakai ni mavehe mai e Iesu e mena ka taute he Kautu he Atua. Ne fakakite foki e ia e mena ka taute he Kautu. Ne loga e fakamauluaga fakamana ne taute e Iesu, ti fakatātā ke he puhala tote e mena ka taute e ia ke he puhala mua ue atu anoiha he magahala ka pule e Kautu haana. Ne pehē e fakamauaga omoomoi he Evagelia hagaao ki a Iesu: “Kua takai e Iesu a Kalilaia oti, kua fakaako a ia ke he tau sunako ha lautolu, kua fakamatala atu foki e ia e vagahau mitaki he kautu, mo e fakamalolo e ia e tau tagata gagao oti, mo e tau tagata mamahi oti he motu.”—Mataio 4:23.

Ne fakamaulu e Iesu e tau matulituli kehekehe. Ko ia ne “fakaala e . . . tau mata ha taha ne fanau mai kua matapouli.” (Ioane 9:1-7, 32, 33) He aamo fakatekiteki, ne fakamaulu e Iesu e tagata ne matematekelea he gagao kelea he lepela. (Mareko 1:40-42) He magaaho ne tamai ki a Iesu e “tagata teliga tuli mo e leo fakakilole,” ne fakatātā e ia na maeke a ia ke “fakafanogonogo e ia e tau tagata teliga tuli, katoa mo e tau tagata kuhukuhu, kua fakavagahau.”—Mareko 7:31-37.

Kua ha ha i ai foki he Patuiki ne fifili he Atua e malolō ke utakehe katoatoa e mate. He tau magaaho tolu ne fakamau, ne fakamomoui e Iesu a lautolu ne mamate. Ne fakaliu tu mai e ia e tama taane fuataha he takape, ko e tama fifine ne 12 e tau tau he moui, mo e kapitiga fakahele haana ko Lasalo.—Luka 7:11-15; 8:41-55; Ioane 11:38-44.

He fakamaama e homo ue atu he vahā anoiha hane fakatoka mai ma e tau tagata he Kautu he Atua, ne talahau tuai e Iesu puhala he aposetolo ko Ioane: “Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 1:1; 21:3, 4) Manamanatu la—ko e lalolagi kua nakai fai hihina mata he momoko, nakai fai matematekelea, mo e nakai fai mate! Ti ko e liogi ma e finagalo he Atua ke eke ke he lalolagi tuga ne eke ke he lagi to fakamooli katoatoa.

Magaaho fe ka hoko mai e Kautu he Atua? Ne fakaako e Iesu ko e kamataaga he pule fakapatuiki haana to felauaki mo e magahala pauaki ne fakahigoa ko e “haele mai [po ke ha ha hinei].” Ne talahau e Iesu e perofetaaga fakamatafeiga ke fakakite e magahala ka kamata e haele mai haana he pule fakapatuiki. To fakamailoga e magahala nei he tau lekua ke he lalolagi katoa, putoia e tau felakutaki, tau hoge, tau mafuike, tau tatalu, mo e tupu lahi e matahavala. (Mataio 24: 3, 7-12; Luka 21:10, 11) Ko e tau mena nei mo e falu vala loga ne talahau tuai e Iesu kua kitia maaliali tali mai he 1914, ko e tau ne hoko e Felakutaki I he Lalolagi. Ti ko Iesu mogonei hane pule ko e Patuiki. Nakai leva to hoko mai e Kautu mo e eke e finagalo he Atua ke he lalolagi.b

Ko e heigoa e kakano he Kautu he Atua hane hau ma haau fakatagata? Fakave katoatoa ni ke he puhala kua fifili e koe ke tali atu ke he fekau ha Iesu.

[Tau Matahui Tala]