Ko e Mena ne Ako e Tautolu Mai ia Iesu

Hagaao ke he Kautu he Atua

Ko e heigoa e Kautu he Atua?

Ko e Kautu he Atua ko e fakatufono ka pule ke he lalolagi katoa. Ne talahau e Iesu: “Hanai, kia liogi pehe a mutolu, . . . Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:9, 10; Tanielu 2:44.

Ko hai ka pule he Kautu he Atua?

Ne fanau a Iesu ke eke mo Pule he Kautu he Atua. Ne pehē e agelu ke he matua fifine ha Iesu: “To foaki atu [e Iehova] ko e Atua kia ia e nofoaiki a Tavita hana matua; to eke a ia mo Patuiki.” (Luka 1:30-33) Lafi ki ai, ne fifili e Iesu e falu tutaki haana ke pule mo ia. Ne pehē a ia ke he tau aposetolo haana: “Ko mutolu nā, ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu.” (Luka 22:28, 29; Tanielu 7:27) Ko e 144,000 e katoa he tau tutaki ha Iesu ka pule fakalataha mo ia.—Fakakiteaga 5:9, 10; 14:1.

To fakatū i fe e fakatufono?

To pule e Kautu he Atua mai he lagi. Ne pehē a Iesu ke he tau tutaki haana: “Kaeke foki ke fano au mo e taute taha mena ke nonofo ai a mutolu [he lagi], to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au . . . ko e mena fano au ke he haku a Matua.”—Ioane 14:2, 3, 12; Tanielu 7:13, 14.

Ko e heigoa ka taute he Kautu he Atua hagaao ke he kelea muitui?

To fakameā e Iesu e lalolagi he tau tagata mahani kelea. Ne pehē a Iesu: “Ka hau e Tama he tagata [ko Iesu] mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; to fakapotopoto ki mua hana e tau motu oti kana; ati vevehe kehekehe ai e ia a lautolu. . . . Ati o atu ai a lautolu [ne mahani kelea] ke he fakahala tukulagi; ka ko e tau tagata tututonu ke he moui tukulagi.”—Mataio 25:31-34, 46.

Ko hai ka nonofo he lalolagi i lalo he Kautu?

Ne pehē a Iesu: “Uhoaki [po ke fiafia] a lautolu ne mahani molu; ha ko e mena to eke ma lautolu e motu.” (Mataio 5:5; Salamo 37:29; 72:8) To puke e lalolagi he tau tagata hane ako foki ke feofanaki he mogonei. Ne pehē a Iesu ke he tau tutaki haana: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”—Ioane 13:34, 35.

Ko e heigoa ka taute he Kautu he Atua ma e tau tagata he lalolagi?

To fakamaulu e Iesu e tau gagao he tau tagata. He nofo he lalolagi, ne vagahau a Iesu ke he moto tagata hagaao “ke he kautu he Atua, ti fakamalolo e ia a lautolu ne fia malolo.” (Luka 9:11) He mole e kitia a Iesu ne liu tu mai he fakakiteaga, ne pehē e aposetolo ko Ioane: “Ne kitia foki e au e lagi fou mo e lalolagi fou . . . Ne logona foki e au e leo lahi mai he lagi; kua pehe mai, Kitiala, kua fakalataha mo e tau tagata e fale uta fano he Atua . . . To holoholo kehe he Atua e tau hihina mata oti mai he tau mata ha lautolu; ti nakai tuai fai mate.”—Fakakiteaga 21:1-4.

To liuaki mai he Kautu he Atua e Parataiso ke he lalolagi. Ne pehē e tagata mahani kelea ne fakatautau mo Iesu: “Ko e Iki na e, kia manatu mai a a koe kia au ka haele mai a koe ke he hau a kautu.” Ti pehē a Iesu ki a ia: “Ko e moli, ke tala atu e au kia koe [“he aho nei, to” NW] fakalataha ai a taua mo koe i parataiso.”—Luka 23:42, 43; Isaia 11:4-9.

Ma e tau vala tala foki, kikite e veveheaga 8 he tohi Ko e Heigoa ne Fakaako Moli he Tohi Tapu?a

[Matahui Tala]