Manako a Timoteo ke Lagomatai e Tau Tagata

Ko Timoteo ko e tama fuata ne fiafia ke lagomatai e tau tagata. Ne loga e matakavi ne fano a ia ke lagomatai e falu. Mai he mena nei, ne fiafia lahi e moui haana. Manako nakai a koe ke iloa e tau mena ia?—

Ne tupu hake a Timoteo he maaga ko Luseta. He vahā tote haana, ne kamata e tupuna fifine ha Timoteo ko Loi mo e matua fifine haana ko Eunike ke fakaako a ia hagaao ki a Iehova. He lahi hake a Timoteo, ne manako a ia ke lagomatai e falu ke iloa a Iehova.

He fuata a Timoteo ne ole a Paulo ki a ia ke fakatauō mo ia ke fakamatala he falu matakavi. Ne pehē a Timoteo: ‘E!’ Kua mau amanaki a ia ke fano ke lagomatai e falu.

Ne fakatauō a Timoteo mo Paulo ke he maaga i Maketonia ne higoa ko Tesalonia. Ke hoko ki ai, kua lata ia laua ke o hui he hala loa ti heke he toga. He hohoko atu a laua ne tokologa e tagata ne lagomatai e laua ke iloa hagaao ki a Iehova. Ka kua ita lahi falu tagata ti lali ke fakamamahi a laua. Ti o kehe ai a Paulo mo Timoteo mo e fakamatala he falu matakavi.

Fai mahina he mole, ne ole a Paulo ki a Timoteo ke liu ki Tesalonia ke fakakia kua fēfē e tau matakainaga i ai. Kua lata ni ke lahi e malolō ke liu ke he maaga hagahagakelea ia! Ka e fina atu a Timoteo ha kua tupetupe a ia ma e tau matakainaga i ai. Ne liu mai a ia ki a Paulo mo e tau tala mitaki. Kua mitaki agaia ni e tau matakainaga i Tesalonia!

Ne loga e tau tau ne gahua a Timoteo mo Paulo. Ne tohi e Paulo kua kitia e ia ko Timoteo e tagata kua lata tonu ke fakafano atu ke lagomatai e tau fakapotopotoaga. Kua fiafia a Timoteo ki a Iehova mo e tau tagata.

Fiafia nakai a koe ke he tau tagata ti manako ke lagomatai a lautolu ke iloa hagaao ki a Iehova?— Ka taute pihia e koe to fiafia lahi e moui haau, tuga ni a Timoteo!