Hukia e Tau Logonaaga​—“Kaeke kua Mahani Kelea Taha” ki a Tautolu

MAAMA nakai ia koe e tuaga ha Linda, ne hukia lahi a ia he tau gahua he taha matakainaga? Momoko ai, ha kua tupetupe lahi e falu ha ko e tau mahani fakatagata, ti lauia e tau fakaholoaga fakaagaaga ha lautolu. Pihia nakai e mena ne tupu ki a koe?

Maeke Nakai ha Tagata ke “Fakamavehe a Tautolu mo e Fakaalofa he Atua”?

Mooli, liga uka lahi a tautolu ke fakamagalo e matakainaga ne fakahukia a tautolu. Kua lata he tau Kerisiano ke feofanaki. (Ioane 13:34, 35) Ka ekefakakelea he matakainaga a tautolu, ko e mena fakatupetupe mo e mamahi lahi a ia.​—Salamo 55:12.

Kua talahau mai he Tohi Tapu, ko e tau Kerisiano he falu magaaho to “mahani kelea” e taha ki a taha. (Kolose 3:13) Ka tupu taha mena pihia ki a tautolu, liga ko e paleko lahi mahaki a ia ma tautolu. Fai puhala nakai kua maeke ke lagomatai a tautolu? Onoono la ke he tolu e matapatu fakaakoaga he Tohi Tapu:

Mailoga he ha tautolu a Matua he lagi e tau mena oti. Kitia e Iehova e tau mena oti ne tutupu, putoia e nakai fakafili tonu ne fehagai mo tautolu mo e matematekelea ne tupu mai ai. (Heperu 4:13) Mua atu, ka mamahi a tautolu to pihia foki a Iehova. (Isaia 63:9) To nakai fakaatā e Ia e “matematekelea . . . po ke fakaatukehe” po ke ha mena​—putoia foki e taha fekafekau haana​—“ke fakamavehe a tautolu mo e fakaalofa he Atua.” (Roma 8:35, 38, 39) Tali atu pihia nakai a tautolu ke nakai fakaatā taha mena po ke taha tagata ke fakatauhele aki e vahāloto ha tautolu mo Iehova?

Ke fakamagalo kua nakai tatai mo e fakaatāaga. Ka fakamagalo e tautolu a lautolu ne ekefakakelea mai ki a tautolu, kua nakai ko e mena noa, fakavaivai, kumi lagatau po ke fakaatā e tau gahua ha lautolu. Manatu, nakai talia e Iehova e agahala ka e fakamagalo e ia ka fai kakano ke fakamagalo. (Salamo 103:12, 13; Hapakuka 1:13) He fakamafana e Iehova a tautolu ke fakamagalo atu, kua ole mai a ia ke fifitaki a ia. Ko Iehova ne “nakai taofi tukulagi hana ita.”​—Salamo 103:9; Mataio 6:14.

Ka tiaki e tautolu e fakafualoto, kua aoga ai ma tautolu. He puhala fē? Manamanatu ke he fakatai nei. Lagaki hake e koe e patuō māmā, ti fakaloa e lima mo e totō ai. He magaaho ku liga ai fai lekua a koe he totō e patuō ia. Ka e kua ka leva e totō e koe e patuō? Fiha e loa ka maeke ia koe ke totō ai​—falu minuti? taha e tulā? po ke loa atu foki? To ligoligo lahi e lima haau! Ka e mau agaia e mamafa he patuō. He leva e totō e koe to mamafa fakahaga ai he logona e koe. Pihia foki e fakafualoto. Ka leva e fakafualoto ha tautolu​—pete he tote​—to fakamamahi atu ni e tautolu a tautolu. Ko e kakano haia ne fakamafana e Iehova a tautolu ke tiaki e fakafualoto. Mooli ai, ko e mitaki ni ma haau ke tiaki e fakafualoto.​—Tau Fakatai 11:17.

“Logona Hifo e Au Tuga kua Tutala Ni a Iehova ki a Au”

Ko e heigoa ne lagomatai a Linda ke nakai fakafualoto ke he taha matakainaga talitonu? Lafi ke he falu mena foki, ne manamanatu fakahokulo a ia ke he tau kakano faka-Tohi Tapu ke fakamagalo atu. (Salamo 130:3, 4) Ne omoomoi lahi a Linda he iloa ka fakamagalo atu a tautolu, to fakamagalo mai foki e Iehova a tautolu. (Efeso 4:32–5:2) Hagaao ke he tau mena uho ia ne omoomoi a Linda, ne pehē a ia: “Logona hifo e au tuga kua tutala ni a Iehova ki a au.”

Fai magaaho, ti maeke a Linda ke tiaki e fakafualoto. Ne fakamagalo e ia e matakainaga fifine, ti ko e kapitiga fakahele haana e matakainaga ia mogonei. Ne kua holo atu ki mua a Linda he fekafekauaga haana ki a Iehova. Kia mauokafua kua manako a Iehova ke lagomatai a koe ke taute pihia foki.