Atāina ke Fakamagalo

MATAPATU FAKAAKOAGA HE TOHI TAPU: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [“Iehova,” NW] kia mutolu, kia pihia foki a mutolu.”​—Kolose 3:13.

Ko e heigoa e kakano? I loto he Tohi Tapu ko e agahala kua tuga e kaitalofa, ti fakatatai e fakamagalo ke he fakagalo noa he kaitalofa. (Luka 11:4) Pehē e taha tohi hagaao ke he tau Tohiaga Tapu, ko e kupu Heleni ne fakaliliu “fakamagalo” kua kakano ke “fakagalo noa e kaitalofa, he nakai poaki ke totogi ai.” Ti ka fifili a tautolu ke fakamagalo e tagata ne hepe mai ki a tautolu, kua fakagalo noa e tautolu e manako ke liu totogi mai e kaitalofa. Ko e makai ha tautolu ke fakamagalo atu kua nakai kakano ke talia e tautolu e mahani kelea po ke fakatote e mamahi ne logona e tautolu. Ka e fifili a tautolu ke fakatoka kehe e fakafualoto, pete foki kua lata ia tautolu ke hogohogo manava ka “mahani kelea taha kia tautolu.”

Aoga kia he vahā nei? Ha ko e tau tagata nakai mitaki katoatoa, kua agahala a tautolu oti. (Roma 3:23) Ti pulotu mogoia a tautolu ke hihiga ke fakamagalo atu ke he falu, ha ko e mena nakai leva to lata e falu ke fakamagalo mai a tautolu. Mua atu, ka fifili a tautolu ke fakamagalo, to aoga lahi foki ki a tautolu ni. He puhala fe?

Ka ita mo e fakafualoto a tautolu ti nakai fakamagalo atu, to fakamamahi ni e tautolu a tautolu. Ko e tau logonaaga kelea pihia ka fofō e fiafia ha tautolu, fakakaupā e tuaga he moui, ti fakaatukehe a tautolu. Maeke foki ke lauia kelea e malolō tino. Ko e hokotaki he Journal of the American College of Cardiology, ha Dr. Yoichi Chida mo e Professor of Psychology ko Andrew Steptoe, ne pehē: “Ko e tau kumikumiaga foou ne mailoga ai e matutaki hagahagakelea he ita mo e vale ke he gagao ate (coronary heart disease).”

He fakahikuaga mitaki, manamanatu ke he tau fua mitaki he fakamagalo. Ka atāina ke fakamagalo atu e falu, kua puipui e tautolu e kaufakalatahaaga mo e mafola ti fakatumau foki e tau fakafetuiaga. Mua atu ai, kua fakamooli e tautolu a tautolu ko e tau fifitaki he Atua, ko ia ne atāina ke fakamagalo e tau tagata agahala ne tokihala ti amanaki ke taute pihia foki e tautolu.​—Mareko 11:25; Efeso 4:32; 5:1.