FAKAAKOAGA 14

Taute e Tau Matapatu Manatu ke Kitia Maali

Heperu 8:1

MENA KE TAUTE: Lagomatai e toloaga ke muitua ke he lauga haau, ti fakakite fakamaali e matutakiaga he tau matapatu manatu takitaha ke he foliaga mo e matakupu haau.

PUHALA KE TAUTE AI:

Fai Foliaga. Manamanatu ko e foliaga he lauga haau ke fakailoa, ke omoomoi, po ke fakalagalaga e toloaga, ti feaki fakatatau ki ai. Eketaha ko e tau matapatu manatu oti kua lagomatai a koe ke hokotia ke he foliaga haau.

Hūhū ki a koe: ‘Ko e heigoa e tau hūhū po ke tau totokoaga ka hūhū he toloaga hagaao ke he matakupu nei? Ko e heigoa e tau hūhū po ke tau totokoaga ka amanaki au ki ai?’ Ti fakatokatoka fakapapahi e tau manatu haau ke maeke e toloaga ke muitua, maama, mo e talia e vala tala.
Peehi e matakupu he lauga haau. Hagaaki ke he matakupu he lauga haau he fatiaki e tau matapatu kupu i ai po ke fakaaoga e tau kupu ne tatai.
Taute e tau matapatu manatu ke maama mo e mukamuka. Fifili ni e tau matapatu manatu ne matutaki ke he matakupu ti maeke a koe ke fakaako fakamitaki he magaaho kua fafati. Ua fakaloga e tau matapatu manatu, fakakite fakamaali e tau matapatu manatu takitaha, fakamanou he tau manatu takitaha, ti takitaki mai he taha matapatu manatu ke he taha.

Liga talahau e koe e tau matapatu manatu he kamataaga ke lagomatai e toloaga ke muitua po ke liu talahau ai he fakaotiaga ke lagomatai e toloaga ke manatu.