Maeke Fēfē a Koe ke Aoga Mai he Tau Feleveiaaga he Tau Fakamoli a Iehova?

Kua uiina nakai a koe ke he tau feleveiaaga he Tau Fakamoli a Iehova? Ka nakaila fano a koe ke he tau feleveiaaga kua liga tupetupe a koe he fano he magaaho fakamua. Liga manatu hifo a koe: ‘Ko e heigoa ne tupu he tau feleveiaaga nei? Ko e ha ne aoga ai? Ko e ha kua lata au ke fano ki ai?’ He fakaakoaga nei, to iloa e koe e puhala ka fakatata he feleveiaaga a koe ke he Atua mo e lagomatai ki a koe.

1. Ko e heigoa e kakano aoga lahi ke feleveia auloa?

Mailoga e mena ne talahau he tagata tohia he Tohi Tapu ke he kakano ne mua atu e aoga ke feleveia mo e falu: “To fakamonu au kia Iehova ki mua he fakapotopotoaga.” (Salamo 26:12) Pihia foki, fiafia lahi e Tau Fakamoli a Iehova he feleveia auloa. He lalolagi katoa ne feleveia a lautolu he tau tapu takitaha ke fakaheke e Atua, lologo, mo e liogi. Fai magaaho foki he tau tau takitaha ne o atu a lautolu ke he tau fakapotopotoaga lalahi ma e tapuakiaga.

2. Ko e heigoa haau ka fakaako he tau feleveiaaga ha mautolu?

He tau feleveiaaga kua hagaaki a mautolu ke he Kupu he Atua, mo e “fakakite atu ai . . . e alito.” (Totou Nehemia 8:8.) He tau feleveiaaga ha mautolu, to fakaako e koe hagaao ki a Iehova mo e tau aga mua ue atu haana. He iloa fakahaga e koe hagaao ke he fakaalofa haana ma haau, to fakatata lahi a koe ki a ia. To iloa foki e koe e puhala ka lagomatai e ia a koe ke moua e moui fiafia.​—Isaia 48:17, 18.

3. Aoga fēfē a koe he lafi mo e falu he tau feleveiaaga ha mautolu?

Takitaki e Iehova a tautolu ke “manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu.” (Heperu 10:24, 25) He tau feleveiaaga ha mautolu, to feleveia a koe mo e tau tagata ne fakaalofa mooli ke he taha mo e taha, ti tuga a koe kua fiafia ke fakaako fakalahi hagaao ke he Atua. To logona e koe a lautolu ne talahau e tau manatu mafanatia mai he Tohi Tapu. (Totou Roma 1:11, 12.) To tutala foki a koe ke he falu kua kautū ke he tau lekua ne fehagai e tau tagata nonofo takitokotaha mo e tau hoa mau ki ai. Ko e falu kakano ni anei kua manako a Iehova ke feleveia auloa tumau a tautolu!

KUMIKUMI FAKAHOKULO

4. Feleveiaaga he Tau Fakamoli a Iehova

He senetenari fakamua, ne fakalataha tumau e tau Kerisiano ke tapuaki auloa ki a Iehova. (Roma 16:3-5) Totou Kolose 3:16, ti tutala ke he hūhū nei:

• Puhala fe kua tapuaki e tau Kerisiano fakamua ki a Iehova?

VITIŌ: Ko e Heigoa ne Tupu he Fale he Kautu? (2:12)

• Ko e heigoa e tau mena kua mailoga e koe ne tatai he mena ne tupu he Fale he Kautu mo e mena ne totou e koe ia Kolose 3:16?

• He vitiō po ke fakatino, fai mena foki nakai ne kitia e koe he tau feleveiaaga ne fiafia a koe ki ai?

Totou 2 Korinito 9:7, ti tutala ke he hūhū nei:

• Ko e ha e tau feleveiaaga he Tau Fakamoli a Iehova kua nakai totogi?

Onoono mo e faiaoga haau ke he mena ka tutala he taha he tau feleveiaaga he faahi tapu nei.

• Ko e vala fe he feleveiaaga kua fiafia lahi a koe ki ai po ke aoga ki a koe?

Iloa nakai e koe?

He jw.org, maeke a koe ke moua e matakavi mo e magaaho he tau feleveiaaga he lalolagi katoa.

1. A. Putoia he tau feleveiaaga ha mautolu e tau lauga, tau fakatātāaga, mo e tau vitiō. Kamata mo e fakaoti e tau feleveiaaga aki e lologo mo e liogi

2. E. He falu vala he fakaholoaga, kua uiina ke he toloaga ke tali

3. I. Uiina ke he tau tagata oti​—tau magafaoa, tagata nonofo takitokotaha, tau momotua, mo e tau fanau

4. O. Nakai totogi e tau feleveiaaga he Tau Fakamoli a Iehova ti nakai oko tupe foki

5. Lali fakalahi ke fina atu ke he tau feleveiaaga

Manamanatu ke he fakafifitakiaga he magafaoa ha Iesu. Ke o atu he toloaga ne taute lagataha he tau, ne ō hui a lautolu kavi ke he 100 e kilomita he atu mouga mai i Nasareta ki Ierusalema. Totou Luka 2:39-42, ti tutala ke he tau hūhū nei:

• Manatu nakai a koe ko e fenoga nei ki Ierusalema kua lahi e gahua?

• Ko e ha kua liga lata a koe ke lali fakalahi ke fina atu ke he tau feleveiaaga?

• Manatu nakai a koe kua aoga mooli? Ko e ha?

• Ko e ha kua lata a tautolu ke o atu tumau ke he tau feleveiaaga?

MANATU KATOA

To lagomatai he fakalataha ke he tau feleveiaaga a koe ke fakaako atu foki hagaao ki a Iehova, fakahokulo e kapitiga haau mo ia, mo e tapuaki auloa mo e falu ki a ia.

Liu Fakamanatu

• Ko e ha ne fakamafana e Iehova a tautolu ke feleveia auloa?

• Ko e heigoa haau ka fakaako he tau feleveiaaga he Tau Fakamoli a Iehova?

• Aoga fēfē foki he manatu e koe he o atu ke he tau feleveiaaga?

KUMI FOKI

Ka e kua ka tupetupe a koe he fano ke he feleveiaaga? Kitia e puhala kua lagomatai e tagata ne logona hifo pihia ke fiafia ke he tau feleveiaaga.

To Nakai Nimo e Maua e Fakaalofa (4:16)

Kitia e puhala kua fiafia e taha fuata taane ke he tau feleveiaaga mo e mena ne taute e ia ke fakalataha atu ki ai.

Fiafia Lahi Mahaki Au ke he Tau Feleveiaaga! (4:33)

Fakaako ke he tau logonaaga he falu he o atu ke he tau feleveiaaga.

“Ko e Ha ne O Atu ke he Tau Feleveiaaga he Fale he Kautu?” (Vala tala he kupega hila)

Totou ke he puhala ne hiki e moui he tagata he kege he mole e fano a ia ke he feleveiaaga he Tau Fakamoli a Iehova.

“Uta Tumau e Fana Haaku ka Fano” (Ko e Kolo Toko, Sepetema-Oketopa 2014)