Fakatumau e Kaufakalataha he Fakapotopotoaga

Kaeke ko tautolu mo e tau matakainaga, logona hifo a tautolu tuga e Patuiki ko Tavita: “Ko e mena mitaki lahi mo e fulufuluola, ke nonofo fakalataha e tau matakainaga.” (Salamo 133:1) Nakai tupu noa e kaufakalataha ha tautolu. Igatia a tautolu mo e fakatumau ke kaufakalataha.

1. Ko e heigoa e mena ne ofoofogia he tau tagata he Atua?

Ka fano a koe he fakapotopotoaga he taha motu, liga ai maama e koe e vagahau ka e logona e koe e fakaalofa i ai. Ko e ha? Ha kua fakaako e tautolu e Tohi Tapu he tatai e tau tohi ne fakaaoga. Ti eketaha a tautolu ke fakakite e fakaalofa ke he taha mo e taha. Pete ni e kehekehe e tau mena ne nonofo a tautolu ka e “ui atu a [t]autolu oti ke he higoa a Iehova, mo e fekafekau . . . kia ia mo e loto fakalataha.”​—Sefanaia 3:9.

2. Ko e heigoa haau ka taute ke fakaholo ki mua e kaufakalataha?

“Kia feofanaki fakalahi ai a mutolu mai he loto mea.” (1 Peteru 1:22) Fakagahua fēfē e koe e fakatonuaga nei? He nakai hagaaki ke he tau nakai mitaki katoatoa he falu, kumi ke he tau mahani mitaki ha lautolu. He nakai lafi ni mo e tau tagata ne tatai e tau aga mo e haau, lali ke iloa e tau matakainaga ne kehe e feakiaga mai he haau. Eketaha foki a tautolu ke huo kehe e tau logonaaga fili tagata ha tautolu.​—Totou 1 Peteru 2:17.a

3. Ko e heigoa ka taute e koe ka taufetoko mo e matakainaga Kerisiano?

Kaufakalataha a tautolu ka e nakai mitaki katoatoa foki. Falu magaaho kua fakaita po ke fakahukia e tautolu e taha. Ti pehē mai e Kupu he Atua “kia . . . fefakamagaloaki,” lafi ki ai: “Tuga ne fakamagalo mai a [“Iehova,” NW] kia mutolu, kia pihia foki a mutolu.” (Totou Kolose 3:13.) Loga e magaaho ne fakahukia e tautolu a Iehova ka e fakamagalo e ia a tautolu. Ti amanaki a ia ki a tautolu ke fakamagalo e tau matakainaga. Ka mailoga ai kua fakahukia e koe e taha, kia fakailoilo ke fakamafola e tau lekua.​—Totou Mataio 5:23, 24.b

KUMIKUMI FAKAHOKULO

4. Kautū ke he fili tagata

Manako a tautolu ke fakaalofa ke he tau matakainaga oti ha tautolu. Ka e liga taufetului a tautolu ke talia e taha tagata kua kehe mai ia tautolu. Ko e heigoa ka lagomatai? Totou Gahua 10:34, 35, ti tutala ke he tau hūhū nei:

• Talia e Iehova e tau tagata kehekehe oti mo Tau Fakamoli haana. Ti lata ke lauia fēfē e onoonoaga haau ke he falu kua kehe e feakiaga mai he haau?

• Ko e heigoa e tau aga fili tagata ne mahani mau he matakavi haau kua manako a koe ke kalo kehe mai ai?

Totou 2 Korinito 6:11-13, ti tutala ke he hūhū nei:

• Fēfē e manatu haau ke he puhala ka fakatata lahi a koe ke he tau matakainaga he tau feakiaga kehekehe?

5. Atāina ke fakamagalo mo e taute e mafola

Atāina a Iehova ke fakamagalo a tautolu pete kua nakai lata a ia ke fakamagalo e tautolu a ia. Totou Salamo 86:5, ti tutala ke he tau hūhū nei:

• Lahi fēfē e fakamagalo ha Iehova?

• Ko e ha kua fakaaue a koe ke he fakamagalo haana?

• Ko e heigoa e tau tuaga ka uka ia tautolu ke mafola tumau mo e falu?

Fifitaki fēfē e tautolu a Iehova mo e fakatumau e kaufakalataha mo e tau matakainaga? Totou Tau Fakatai 19:11, ti tutala ke he hūhū nei:

• Ka fakaita po ke fakahogohogo manava he taha a koe, ko e heigoa ka taute e koe ke fakamafola e tuaga?

Falu magaaho kua fakaita e tautolu e falu. Ka tupu e mena ia, ko e heigoa kua lata ke taute e tautolu? Tā e VITIŌ, ti tutala ke he hūhū nā.

VITIŌ: Ko e Taute he Mafola kua Tamai e Tau Monuina (6:01)

• He vitiō, ko e heigoa ne taute he matakainaga fifine ke moua e mafola?

6. Kumi e mitaki he tau matakainaga haau

Ka iloa lahi e tautolu e tau matakainaga, ti iloa e tautolu e tau mahani mitaki ha lautolu mo e tau mena ne kūkū a lautolu. Hagaaki fēfē a tautolu ke he tau mena ne mitaki a lautolu? Tā e VITIŌ, ti tutala ke he hūhū nā.

VITIŌ: Kia Fakaheke Atu Foki ki Ai! (5:10)

• Ko e heigoa ka lagomatai a koe ke kitia e tau aga atihake he tau matakainaga haau?

Hagaaki a Iehova ke he tau mahani mitaki ha tautolu. Totou 2 Nofoaga he Tau Patuiki 16:9a, ti tutala ke he hūhū nei:

• Fēfē e logonaaga haau he iloa kua hagaaki a Iehova ke he tau mahani mitaki haau?

MANATU KATOA

Maeke a koe ke fakatumau e kaufakalataha he fakapotopotoaga he fakamagalo atu mo e fakakite e fakaalofa ke he tau matakainaga oti.

Liu Fakamanatu

• Kautū fēfē a koe mai he fili tagata?

• Ko e heigoa ka taute e koe ka taufetoko mo e matakainaga Kerisiano?

• Ko e ha kua manako a koe ke muitua e fakafifitakiaga ha Iehova he fakamagalo e falu?

KUMI FOKI

Fakaako ke he taha he tau fakataiaga ha Iesu ke lagomatai a tautolu ke kalo kehe he fakafili e falu.

Tiaki e Akau Fakalava (6:56)

Lata kia a tautolu ke fakamolemole ka e logona hifo kua nakai fai mena hepe ne taute e tautolu?

“Fakamolemole​—Ko e Kei ke he Tuaga Mafola” (Ko e Kolo Toko, Novema 1, 2002)

Kitia e puhala ne fakaako e falu tagata ke nakai fakamailoga tagata.

Ua Fakafili he Kitekite ke he Fofoga (5:06)

Fakaako ke he puhala ke fehagai mo e tau taufetoko neke hokotia ke tauhele e mafola he fakapotopotoaga.

“Fakamafola e Tau Fekehekeheaki he Aga Fakaalofa” (Ko e Kolo Toko, Me 2016)