Maeke Fēfē e Tohi Tapu ke Lagomatai a Koe?

Manako oti a tautolu ke iloa lahi hagaao ke he moui, matematekelea, mate, mo e vahā i mua. Lata foki a tautolu ke moua e lagomatai ke fakamafola e tau lekua, tuga e leveki po ke fakafiafia e magafaoa. Tokologa e tagata ne iloa kua nakai ni lagomatai he Tohi Tapu a lautolu ke tali e tau hūhū aoga lahi he moui ka e foaki foki ki a lautolu e fakatonuaga uho lahi ma e moui he tau aho takitaha. Manatu nakai a koe na maeke e Tohi Tapu ke lagomatai ha tagata kua iloa e koe?

1. Ko e heigoa e falu hūhū kua tali he Tohi Tapu?

Tali he Tohi Tapu e tau hūhū aoga nei: Kamata fēfē e moui? Ko e heigoa e kakano he moui? Ko e ha ne matematekelea e tau tagata mitaki? Ko e heigoa kua tupu ka mate e tagata? Ka manako e tau tagata oti ke he mafola, ko e ha kua lahi mahaki e felakutaki? Ko e heigoa ka tupu ke he lalolagi he vahā i mua? Fakamafana he Tohi Tapu a tautolu ke kumi e tau tali, ti tokologa lahi ne moua e tau tali mauokafua.

2. Maeke fēfē e Tohi Tapu ke lagomatai a tautolu ke fiafia e moui he tau aho takitaha?

Foaki mai he Tohi Tapu e fakatonuaga mitaki ki a tautolu. Ma e fakatai, fakaako ai ke he tau magafaoa ke fiafia mooli. Tala mai ai ki a tautolu e mena ke taute ka tupetupe a tautolu mo e puhala ke fiafia e gahua ha tautolu. To iloa e koe e mena ne fakaako he Tohi Tapu ke he tau matakupu nei mo e loga atu foki he tutala a tautolu ke he vala tala nei. Liga talia e koe “ko e tau Tohi Tapu oti kana . . . kua aoga.”—2 Timoteo 3:16.

KUMIKUMI FAKAHOKULO

Manamanatu ke he puhala ne lagomatai he Tohi Tapu e tau tagata, puhala kua maeke a koe ke fiafia he totou ai, mo e kakano kua mitaki ke moua e lagomatai ke maama ai.

3. Maeke e Tohi Tapu ke takitaki a tautolu

Ko e Tohi Tapu kua tuga e molī kasa kua maama lahi. Fakaaoga e tautolu e Tohi Tapu ke fakakite ki a tautolu e puhala ke taute e tau fifiliaga mitaki mo e ke lagomatai a tautolu ke kitia e tau mena ka tutupu i mua.

Totou Salamo 119:105, ti tutala ke he tau hūhū nei:

• Fēfē e manatu he tagata ne tohia e salamo nei hagaao ke he Tohi Tapu?

• Fēfē e manatu haau ke he Tohi Tapu?

4. Maeke e Tohi Tapu ke tali e tau hūhū ha tautolu

Taha e fifine kua iloa kua foaki he Tohi Tapu e tau tali ke he tau hūhū ne kua leva lahi e fakatauhele ki a ia. Tā e VITIŌ, ti tutala ke he tau hūhū nā.

VITIŌ: Ua Mahala e Amaamanaki! (1:48)

• He vitiō, ko e heigoa e tau hūhū he fifine nei?

• Lagomatai fēfē a ia he fakaako ke he Tohi Tapu?

Fakamafana he Tohi Tapu a tautolu ke hūhū e tau hūhū. Totou Mataio 7:7, ti tutala ke he hūhū nā:

• Ko e heigoa e tau hūhū haau kua liga maeke e Tohi Tapu ke tali?

5. Maeke a koe ke fiafia he totou e Tohi Tapu

Tokologa e tagata ne fiafia he totou e Tohi Tapu mo e kua aoga mai ai. Tā e VITIŌ, ti tutala ke he tau hūhū nā.

VITIŌ: Totou e Tohi Tapu (2:05)

• He vitiō, fēfē e logonaaga he tau fanau fuata ke he puhala totou?

• Ko e ha kua kehe e logonaaga ha lautolu mogonei he totou e Tohi Tapu?

Pehē e Tohi Tapu kua maeke ai ke foaki ki a tautolu e fakamafana mo e amaamanaki. Totou Roma 15:4, ti tutala ke he hūhū nei:

• Fiafia nakai a koe ke he maveheaga he Tohi Tapu ke he fakamafana mo e amaamanaki?

6. Maeke e falu ke lagomatai a tautolu ke maama e Tohi Tapu

Lafi ke he totou ni e lautolu e Tohi Tapu, tokologa ne iloa ko e fakatutala mo e falu hagaao ki ai kua lagomatai. Totou Gahua 8:26-31, ti tutala ke he hūhū nei:

• Maeke fēfē a tautolu ke maama e Tohi Tapu?​—Kikite e tau kupu tohi 30 mo e 31.

MANATU KATOA

Foaki he Tohi Tapu e fakatonuaga ma e moui he tau aho takitaha, tali e tau hūhū aoga lahi, mo e foaki ke he tau tagata e fakamafana mo e amaamanaki.

Liu Fakamanatu

• Ko e heigoa e fakatonuaga ka moua e tautolu he Tohi Tapu?

• Ko e heigoa falu hūhū kua tali he Tohi Tapu?

• Ko e heigoa haau kua manako ke iloa mai he Tohi Tapu?

KUMI FOKI

Manamanatu ke he puhala kua aoga e fakatonuaga he Tohi Tapu mogonei.

“Tau Fakaakoaga he Tohi Tapu​—Pulotu Katoatoa” (Ko e Kolo Toko Nu. 1 2018)

Kitia e puhala ne lagomatai he Tohi Tapu e tagata taane ne taufetului mo e tau logonaaga haana tali mai he vahā tote.

Kamata he Moui Fiafia Foou Haaku (2:53)

Kumikumi ke he fakatonuaga aoga he Tohi Tapu ma e moui magafaoa.

“12 e Mena Galo ne Kautū e Magafaoa” (Ala! Nu. 2 2018)

Fakaako e puhala kua fakahako he Tohi Tapu e manatu hehē hagaao ki a ia kua pule mooli ke he lalolagi.

Ko e Ha ne Fakaako e Tohi Tapu?​—Vitiō Loa (3:14)