FAKAAKOAGA 03
Maeke Nakai a Koe ke Falanaki ke he Tohi Tapu?
I loto he Tohi Tapu kua loga e maveheaga mo e fakatonuaga. Liga fia iloa a koe he tau mena ne fakaako i ai, ka e liga mataala foki a koe. To falanaki kia a koe ke he tau maveheaga mo e tau fakatonuaga he tohi tuai ia? Maeke mooli kia a koe ke talitonu ke he tau mena ne talahau he Tohi Tapu hagaao ke he fiafia e moui mogonei mo e vahā i mua? Tokologa e tagata ne talitonu. Kitekite la, maeke foki ka koe ke taute pihia.
1. Ko e tohi mooli po ke nakai mooli kia e Tohi Tapu?
Talahau he Tohi Tapu ko e tau fakamauaga i ai kua “tonu ia, ko e tau kupu moli ni.” (Fakamatalaaga 12:10) Kua fakakite e tau mena ne tutupu ne putoia e tau tagata mooli. (Totou Luka 1:3; 3:1, 2.) Tokologa e tau tagata fakamau tala tuai mo e tau tagata keli kelekele ne fakamooli e hakotika he tau aho, tau tagata, tau matakavi, mo e tau mena tutupu ne fakamaama he Tohi Tapu.
2. Ko e ha kua maeke a tautolu ke talahau kua aoga agaia e Tohi Tapu?
Fa talahau he Tohi Tapu e tau mena ne nakaila iloa ia he magaaho ne tohia ai. Ma e fakatai, kua putoia ai e tau matakupu fakasaiene. Loga he tau matakupu ia kua nakai talitonu he tau tagata tokologa he magaaho ne tohia ai. Ka e fakamooli he tau mena fakasaiene mogonei kua hakotika e tau mena ne talahau he Tohi Tapu. Kua “fakamoli . . . e tau mena ia ke tukulagi tukumuitea.”—Salamo 111:7, 8.
3. Ko e ha kua maeke a tautolu ke falanaki ke he mena ne talahau he Tohi Tapu hagaao ke he vahā i mua?
Ko e tau perofetaagaa he Tohi Tapu kua talahau tuai e “tau mena nakaila eke.” (Isaia 46:10) Kua hakotika e tau mena loga ne talahau tuai ato tutupu e tau mena ia. Fakamaama fakamatafeiga foki e tau tuaga he lalolagi mogonei. He fakaakoaga nei, to kumikumi a tautolu ke he falu perofetaaga he Tohi Tapu. Ofoofogia e hakotia he tau perofetaaga ia!
KUMIKUMI FAKAHOKULO
Kumikumi ke he puhala kua talia he tau mena fakasaiene mogonei e Tohi Tapu, mo e kitekite fakahokulo ke he falu perofetaaga ofoofogia he Tohi Tapu.
4. Talia he saiene e Tohi Tapu
He vahā i tuai, laulahi he tau tagata ne talitonu na fai mena ne toko hake e fua lalolagi. Tā e VITIŌ.
Mailoga e mena ne fakamau he tohi a Iopu he kavi 3,500 e tau kua mole. Totou Iopu 26:7, ti tutala ke he hūhū nei:
Ko e ha kua ofo ke he talahauaga kua “nakai ha i ai ha mena” ne tautau e fua lalolagi ki ai?
Ko e hoko laia ke he kavi 200 tau kua mole ato maama mitaki e holoaga he vai he fua lalolagi. Ka e mailoga e mena ne talahau he Tohi Tapu he kavi 3,500 tau kua mole. Totou Iopu 36:27, 28, ti tutala ke he tau hūhū nei:
Ko e ha kua ofoofogia e fakamaamaaga mukamuka nei ke he holoaga he vai?
Fakamalolō kia he tau kupu tohi ne totou laia e koe e falanaki haau ke he Tohi Tapu?
5. Talahau tuai he Tohi Tapu e tau mena tutupu aoga lahi
Totou Isaia 44:27–45:2, ti tutala ke he hūhū nei:
Ko e heigoa e tau vala tala fakamatafeiga ne talahau tuai he Tohi Tapu he 200 tau fakamua ato hoko e veliaga ha Papelonia?
Fakamooli he fakamauaga tala tuai ko e Patuiki ko Kuresa i Peresia mo e kautau haana ne moumou e maaga ko Papelonia he 539 F.V.N.b Ne hiki e lautolu e tafe he vailele ne puipui e maaga. He mole e huhū atu he tau gutuhala he maaga ne nakai pā, ne fofō ai e lautolu ka e nakai tau. Mogonei, molea 2,500 tau he mole, malona tiaki agaia a Papelonia. Mailoga e mena ne talahau tuai he Tohi Tapu.
Totou Isaia 13:19, 20, ti tutala ke he hūhū nei:
Fakamooli fēfē e perofetaaga nei ke he mena ne tupu ki Papelonia?
Papelonia ne malona i Iraq he vahā nei
6. Talahau tuai he Tohi Tapu e tau mena kua kitia e tautolu mogonei
Talahau he Tohi Tapu kua nonofo a tautolu he “tau aho fakamui.” (2 Timoteo 3:1) Mailoga e mena ne talahau tuai he Tohi Tapu ke he magahala nei.
Totou Mataio 24:6, 7, ti tutala ke he hūhū nei:
Ko e heigoa e tau tuaga kelea ne talahau he Tohi Tapu ka tutupu he tau aho fakamui?
Totou 2 Timoteo 3:1-5, ti tutala ke he tau hūhū nei:
Fakamaama fēfē he Tohi Tapu e tau mahani he tau tagata he tau aho fakamui?
Ha e fe he tau mahani nei kua kitia e koe?
PEHĒ FALU TAGATA: “Ko e Tohi Tapu ko e tohi he tau tala tuai mo e tau tala fakatai.”
He manatu haau, ko e heigoa ati mauokafua a koe kua maeke a tautolu ke falanaki ke he Tohi Tapu?
MANATU KATOA
Fakakite he fakamauaga tuai, saiene, mo e tau perofetaaga kua maeke a koe ke falanaki ke he Tohi Tapu.
Liu Fakamanatu
Ko e tohi mooli po ke nakai mooli kia e Tohi Tapu?
Ko e heigoa falu matakupu ne talia he saiene e Tohi Tapu?
Manatu nakai a koe kua talahau tuai he Tohi Tapu e vahā i mua? Ko e ha ne manatu pihia a koe, po ke ko e ha ne nakai manatu pihia a koe?
KUMI FOKI
Fai manatu hepe fakasaiene kia i loto he Tohi Tapu?
“Talitonu Nakai e Saiene ke he Tohi Tapu?” (Vala tala he kupega hila)
Ko e heigoa e tau vala tala mooli hagaao ke he “tau aho fakamui”?
“6 e Perofetaaga he Tohi Tapu Kitia e Koe Hane Fakamooli” (Ko e Kolo Toko, Iulai-Sepetema, 2011)
Fakaako ke he puhala ne fakamooli e tau perofetaaga he Tohi Tapu hagaao ke he Pule Atu Motu Heleni.
Kumikumi ke he puhala ne hiki he tau perofetaaga he Tohi Tapu e onoonoaga he taha tagata ke he Tohi Tapu.
a Ko e tau perofetaaga kua putoia e tau fekau mai he Atua hagaao ke he tau mena tutupu he vahā i mua.
b Ko e F.V.N. kua kakano “Fakamua to Vahā Nei,” mo e V.N. kua kakano “Vahā Nei.”