Kau Fakalatahaaga mo e Kau Fakatufono he Vaha Nei
“To kotofa e ia a ia ke pule ke he hana tau [koloa, “NW”] oti.”—LUKA 12:44.
1. Ko e heigoa e kautu ne kamata ai e Iesu ke pule he tau 33 V.N. mo e ko e heigoa e tau puhala?
HE Penetekoso 33 V.N., ko Iesu Keriso, ko e Ulu he fakapotopotoaga, ne kamata ke fakagahuahua e pule he Kautu ke he hana tau tupa ne fakauku he agaga. Taute fefe? Puhala mai he agaga tapu, tau agelu, mo e kau fakatufono kua kitia he mogonei. Tuga ne fakakite mai he aposetolo ko Paulo, ko e Atua ‘ne laveaki a lautolu ne fakauku mai he pule he pouli, mo e ta mai a lautolu ke he kautu he hana Tama fakahele.’—Kolose 1:13-18; Gahua 2:33, 42; 15:2; Kalatia 2:1, 2; Fakakiteaga 22:16.
2. Ko e heigoa e Kautu lahi ne kamata a Iesu ke pule ki ai he tau 1914?
2 Ko e fakaotiaga he “vaha he tau motu kehe,” ne fakalahi e Iehova e pule fakapatuiki a Keriso, mo e fakalaulahi atu ki mua he fakapotopotoaga Kerisiano. (Luka 21:24) E, ko e tau 1914, ne age he Atua ke he hana Tama e kotofaaga pule fakapatuiki ke pule ki luga he “tau motu,” “ko e . . . kautu he lalolagi,” ko e tau tagata oti.—Salamo 2:6-8; Fakakiteaga 11:15.
Kotofa ke Pule, “Ke he Hana tau Koloa Oti”
3, 4. (a) Ko e fakatai a Iesu ke he tau mina, ko hai ne fakatai he tagata he iki? (e) Ko e heigoa e tau fakaholoaga he Kautu ne hoko he tau 1918 mo e 1919?
3 Mailoga mitaki ko e fakatai a Iesu a nei ke he tagata ne fanau mai he ohi iki. (Luka 19:11-27) To fano he fenoga ke moua e pule malolo he iki, ne age he tagata ke he hana tau tupa e tau tupe (tau mina) ke fakagahua. Ka liu mai e tagata nei ne fakatai ki a Keriso, to ui e ia e “tau [tupa, NW] ia ne uta e ia ki ai e ario, ke o mai kia ia, kia iloa e ia takitaha ha lautolu a tau fakafua po ke fefe.” (Luka 19:15) Ti fakagahua fefe e mena nei he mole atu he moua e Iesu e malolo fakapatuiki?
4 Ko e tau 1918 ne moua he Patuiki kua nofo ke he nofoaiki ko Iesu Keriso e matakau tote he tau Kerisiano ne kua toka e lautolu e tau lotu Kerisitenitome mo e ha ne lavelave he leveki he tau mena he ha lautolu a Iki ha ha he lalolagi. Mole atu he hakahaka a lautolu tuga ke he afi, ne age e Iesu ke he hana tau fekafekau e fakalaulahiaga he pule he tau 1919. (Malaki 3:1-4; Luka 19:16-19) Ne kotofa e ia a lautolu ke pule “ke he hana tau [koloa, NW] oti.”—Luka 12:42-44.
“Tau Mena Kai ke he tau Magaaho Tonu”
5, 6. (a) Ko e heigoa e gahua fakalaulahi ne moua he tau fekafekau pule a Keriso? (e) Ko e heigoa e tau perofetaaga ne amanaki ke fakamoli he mole e tau 1914, mo e gahua fakamalolo fefe e vahega fekafekau pule nei he ha lautolu a fakamoliaga?
5 Ne age he Patuiki ne pule ko Iesu Keriso, e gahua fakalaulahi ke he hana tau fekafekau, po ke takitaki he fale, ha he lalolagi. Ko e tau Kerisiano fakauku ko e tau “fekafekau” he Atua ne hukui aki e patuiki kua fakafoufou ne moua e malolo ke pule ke he tau tagata oti he lalolagi. (2 Korinito 5:20; Tanielu 7:14) Ti ko e ha lautolu a kavega fakalataha, kua nakai ke he kau fekafekau fakauku ma Keriso ni hokoia, ke foaki age “ha lautolu a tau mena kai ke he tau magaaho tonu.” (Luka 12:42, NW) Ka ko e magaaho nei ke taute e lautolu e gahua malolo he fakaholoaga he tau perofetaaga kua hoko mai tuai ke fakamoli, he mole atu e fakatu he Kautu he tau 1914.
6 Ko e heigoa e kakano he tuku ke fakagahua? Ko e kakano ke fakalaulahi e fakamatala he ‘tala mitaki nei he kautu ke he lalolagi oti.’ (Mataio 24:14) Pihia foki, ko e hana kakano ke fakailoa e tau fekau malolo ke he fakafiliaga he fakatokaaga matahavala a Satani mo e hana tau tagata kau fakalataha. To tupu mai e mena nei ke ‘lulu e tau motu.’ Ko e mena ia, ne kamata o mai ai e “tau mena kua manako ki ai,” ko e tau “mamoe kehe” a Keriso. (Hakai 2:7; Ioane 10:16) Mai he tau 1935 atu ki mua, ne kamata ai e “moto tagata tokologa” he lalolagi katoa ke fakapotopoto mai ke he fakatokatokaaga he lalolagi katoa a Iehova. (Fakakiteaga 7:9, 10) Ko e uiaga a nei ke tupu fakahaga e holoaga fakamitaki he fakatokatokaaga. Ka vagahau fakatai, ko e hukui he tau patuo lapatoa e, ko e e apa kula ke he patu akau; ko e lapatoa ke he ario, ko e apa kula ke he auro. (Isaia 60:17) Kua fakamoli oti e tau mena nei tali mai he tau 1919 i lalo hifo he takitakiaga tata mo e malolo a Iesu Keriso, ko ia ne foaki age oti hana fiafia ke he tau mena lalolagi he Kautu, po ke tau koloa oti, ke he hana vahega tupa mo e hana Kau Fakatufono.
7. Ko e patoia ke he heigoa kavega fakalaulahi he tau fekafekau pule?
7 Kua mukamuka ia tautolu ke mama ko e kavega mamafa he fakalaulahi kua tuku age ni ke he tupa he Iki, fekafekau pule poke takitaki feua he fale kua putoia ke he tau gahua lahi ke tohia e tau tohi. Ko e tau fuafuaaga mena kai fakaagaga kua fakailoa tumau ke he tau magaaho tonu, he Kolo Toko. Ko e tau 1919, The Golden Age (ko e mekasini hoa ne taute fakamui ko e Consolation [Fakamafanaaga], ti ko e Awake! [Ala!]) ne kamata ai ke fakailoa kakano ke fakatupuaki e fiafia he tau tagata, lafi atu foki ke he ati hakeaga he tau “fekafekau.” (Mataio 24:45) Ko e tau tohi loga, tau tohi ikiiki, mo e tau pepa lotu kua leva mai e tau tau he taute.
Tau Hakahakaaga Tumau
8. Ko e heigoa e tau mena ne fakakitiaaki fakamua, e tau tagata he Kau Fakatufono, mo e ko e heigoa e talahauaga ne taute he Ko e Kolo Toko (Peritania) he tau 1944?
8 Ka ono ki tua he “vaha he fakaotiaga,” nei, kua nakai ofo a tautolu ha ko e tau tagata he Kau Fakatufono kua kitia maali fakamua ai mo e kau gahua he Kaufakalatahaaga Kolo Toko ne tohi e tau tohi. (Tanielu 12:4, NW) Ko e vala tala he “The Theocratic Alignment Today,” (“Ko e Fakahako Fakaatua he Vaha Nei”) ne fakailoa ai he Ko e Kolo Toko (Peritania) ia Novema 1, 1944 pehe: “Mailoga mitaki, ko lautolu ne kotofa ke he tauteaga he tau fakailoaaga he tau kupu moli he Tohi Tapu ne fakakite, kua kitia ai ko e kau fakatufono ne fifili he Iki ke takitaki oti a lautolu, ne manako ke tapuaki ke he Atua mo e agaga mo e fakamoli, mo e fekafekau fakalataha ki a ia ke fakalaulahi e tau fakakiteaga moli nei ke he falu ia lautolu ne hoge mo e fia inu.”
9. Ko e heigoa ne fakakitia ke he magaaho fakamui ne fetataaki ke he Kau Fakatufono, mo e ko e ha?
9 Ne ha ha i ai e tau fakailoaaga he tau matafakatufono ne putoia e tau mekasini mo e falu a tohi lagomatai he fakaakoaga Tohi Tapu. Ko e mena ia ne fakatu mo e fakamau ai e Kaufakalatahaaga Tohi Tapu mo e Pepa Lotu he Kolo Toko he fahi ko Pennsylvania i U.S.A. (Tau Fahi Kau Fakalataha ha Amelika). Kua loga e tau tau ne fakakitia ai e Kau Fakatufono he kitiaaga nei, mo e tokofitu he matakau takitaki he fakalatahaaga nei ne fakatu ke taute e tau fakailoaaga he tau tohi lagomatai he fakaakoaga Tohi Tapu ne manako mo e ke fakaaoga he tau tagata he Iki ne ha ha he lalolagi.
10, 11. Ko e heigoa e hakahakaaga ne taute he tau 1944, mo e ko e heigoa e talahauaga ne taute he Ko e Kolo Toko ke he mena nei?
10 Ko e tau pule fakatonu tokofitu he Kaufakalatahaaga, ko e tau Kerisiano fakamoli. Ka ko e ha lautolu a fekau mo e tau tutuaga he matakau fakatu matafakatufono nei, kua liga kua pehe ko e lago ni ke he kau he Kaufakalatahaaga Kolo Toko kua Fakatu he matafakatufono, ha kua fifili e lautolu a lautolu ke he Kau Fakatufono. Pihia ai foki, ko e fakatufono, ke he tau tuaga pihia mo e tau monuina he viliaga, na fa mahani ni mai fakamua ke foaki ki a lautolu ne fa foaki mena fakaalofa ke he Kaufakalatahaaga. Kua lata ni e fakatokaaga nei ke hiki. Ti kua taute e mena nei he fonoaga lagataha he tau he matakau a Pennsylvania he Kaufakalatahaaga Kolo Toko ne fakahoko ia Oketopa 2, 1944. Ko e tau matafakatufono he Kaufakalahaaga ne fakahakohako ai, ke nakai maeke ke fakamatapatu aki e mouaga tuaga ke he tau tupe. Na fifili ni e tau tagata, mai he tau fekafekau fakamoli a Iehova, mo e fakalataha atu foki ki a lautolu, a lautolu koe tau fekafekau tumau he matapatu he Kaufakalatahaaga i Brooklyn, New York, mo e hana tau lala he lalolagi.
11 Ko e hokotaki mai he holo mitaki nei, ne talahau he Ko e Kolo Toko (Peritania) ia Novema 1, 1944 ne pehe: “Ko e tupe, kua fakakite mai he tau mena tuku fakaalofa kua nakai fai leo, ti kua fakafifili moli ka e nakai fai mena ke he tauteaga he fakahuaga ke he kau fakatufono he tau fakamoli a Iehova he lalolagi. . . . Ko e agaga tapu, ko e malolo gahuahua ne hifo mai ia Iehova ko e Atua, puhala mai ia Keriso Iesu, ko e mena haia kua lata ke fifili mo e takitaki e fekau.”
Kehe Mai he Matakau Takitaki
12. Ko e heigoa ne fakakiteaki kua fakamonuina e Iehova e hakahakaaga i lalo he takitakiaga he Kau Fakatufono?
12 Ko e holo mitaki he gahua fakamatala he tau hogofulu tau fakamui kua fakamoli ai kua fakamonuina e Iehova e tau mena kua hakahaka fakamua ke he maamaaga mitaki he Kau Fakatufono. (Fakatai 10:22) Ha ko e, hopo hake e numela he tau tagata fakailoa he Kautu he tau fahi oti he lalolagi, mai he tote hifo he 130,000 he tau 1944 ke he 1,483,430 he tau 1970! Ka e lahi agaia e holo ki mua ne toe.
13. (a) To hoko e tau 1971, ko e heigoa e tuaga ne hagao ke he Kau Fakatufono? (e) Ko e heigoa ne hoko he fonoaga lagataha he tau he tau 1971?
13 A to hoko ke he tau 1971, ko lautolu he Kau Fakatufono kua mailoga agaia, fakalataha mo e tokofitu he matakau takitaki he Kaufakalatahaaga Tohi Tapu mo e Pepa Lotu he Kolo Toko a Pennsylvania. Ko e pelesiteni he Kaufakalatahaaga ne hahamo e matapatu kavega he gahua ke taute e tau fifiliaga ne haofia e fakaholoaga he tau lala he Kaufakalatahaaga he tau fahi oti he lalolagi. Ka ko e lauga fakapapahi he tau vaha, kua fakamatala ai he fonoaga lagataha he tau ne fakahoko ia Oketopa 1, 1971. Ko e pelesiteni he Kaufakalatahaaga ne tutala ke he fakaakoaga “Ta maiaga he Tuaga Tapu Ke He Tuaga Tonu,” ko e hukui pelesiteni he vala “Ko e Kau Fakatufono Kua Kehe Mai he Fakalatahaaga Fakatu.” Ko e heigoa e kehekeheaga he Kau Fakatufono mo e fakalatahaaga fakatu?
14. Ko e heigoa e kehekeheaga he fakalatahaaga fakatu matafakatufono mo e Kau Fakatufono?
14 Tuga he fita e fakatutala, ko e Kaufakalatahaaga Tohi Tapu mo e Pepa Lotu he Kolo Toko a Pennsylvania kua ha ha i ai e matakau takitaki, kaupa mai ni he tokofitu e tagata. Ko e tau tagata Kerisiano tukulele nei, ne fifili ni e lautolu he kaufakalatahaaga ke tolu e tau, mo e numela katoa, nakai molea e 500, ti ko e laulahi ha lautolu na, nakai ko e tau Kerisiano fakauku. Pihia foki, ha ko e fakagahuahuaaga he kaufakalatahaaga ko e aia ni, fakamatatufono, mo e matapatu kua fakave ke he matapatu kaina he taha fahi motu, kua maeke ke tanumia ia Kaisara, kakano, ha ko e Fakatufono. (Mareko 12:17) Ka e taha e e mena, ko e Kau Fakatufono nakai ko e kanavaakau fakamatafakatufono. Mena nakai vili hana tau tagata. Ka ko lautolu, na kotofa he agaga tapu i lalo he takitakiaga a Iehova ko e Atua mo Iesu Keriso. (Fakatatai Gahua 20:28) Ko e taha mena foki, ko lautolu he Kau Fakatufono ko e tau tagata kotofa he agaga mo e nakai fai mataofiaga ke nonofo tumau he taha fahi motu poke tau matapatu kaina.
15. Ko e heigoa e talahauaga hagao ke he fakapotopotoaga ne taute he Ko e Kolo Toko (Peritania) ia Tesema 15, 1971, mo e ko e heigoa ka talahau ke he Kau Fakatufono he vaha nei?
15 Ko e tau fakahakahakaaga pihia ke maamaaga, Ko e Kolo Toko (Peritania) ia Tesema 15, 1971 ne pehe: “Fakaaue lahi ha kua iloa moli moe pehi fakamalolo he tau fakamoli Kerisiano a Iehova, nakai ko e fakapotopotoaga lotu he tagata tokotaha a nei, ka ko e ha ha i ai e kau fakatufono he tau Kerisiano fakauku he agaga.” Ko e Kau Fakatufono he vahega tupa fakauku mo e tau hoa miliona ha lautolu he tau mamoe kehe kua fakakoloa fakahaga ke leveki hana feua he ofisa takitaki.
16. Tupu lahi fefe e tau mena a Iesu he lalolagi tali mai he tau 1971, mo e ko e heigoa falu he tau mena nei ne tuku age e ia ke leveki he tupa fakamoli mo e lotomatala, ne hukui he Kau Fakatufono?
16 Ko e tau mena he Patuiki ko Iesu Keriso he lalolagi ha ne tupu tumau. Tali mai he tau 1971 ne hopo hake e numela he tau Fakamoli mai i lalo he 1,600,000 ke he tapunu kua molea e 3,700,000 he tau 1989. Ko e fakamoliaga na ia he fakamonuina a Iehova! (Isaia 60:22) Ko e tupu lahi nei kua ui ke fakalaulahi e tau fale he matapatu he Kaufakalatahaaga mo e hana tau lala, pihia foki mo e fakafouaga he tau puhala taute mo e tufatufa. Kua fua ne moua mai ai ko e talagaaga he loga he tau Fale he Kautu mo e tau Fale he Toloaga ke he tau fahi oti he lalolagi. Ko e tau magaaho oti, kua hahamo tumau he Kau Fakatufono e kavega ke kitekite ke he gahua fakamatala, mo e tauteute e tau koloa he fakaakoaga Tohi Tapu, mo e kotofa e tau leveki he tau lala, tau fahi motu, tau takaiaga, mo e tau fakapotopotoaga. Ko e tau mena mahuiga he Kautu hanei ne age e Iesu ke leveki he tupa fakamoli mo e loto matala, ne hukui he hana Kau Fakatufono.
17. Ko e heigoa falu mena ne taute ke fakaholo ki mua e mitaki e kitekiteaga leveki he tau 1971, 1974, mo e 1976?
17 Ko e kau fakatufono he senetenari fakamua kua fakalahi ke lafi atu kua molea e tau aposetolo a Iesu. Ko e magaaho ne fakafili ai e matakupu ke he peritome, ne lafi ke he kau ia ko e “tau aposetolo mo e tau patu i Ierusalema.” (Gahua 15:1, 2) Ko e fakatataiaga, ne fakalahi e Kau Fakatufono he tau 1971 mo e liu foki he tau 1974. Ke lagomatai ha lautolu a gahua ke ua fakateaga, ne fakatokatoka ai he Kau Fakatufono tokolima e komiti ke kamata gahua ia Ianuari 1, 1976. Kua igatia e komiti mo e moua mai he tokotolu ke he tokoono e tagata, ko lautolu oti haia ne leo taha ke he fakatutalaaga he tau matakupu. Ko e takitaki he tau komiti takitaha kua fekafekau ke taha e tau, ka ko e tau tagata takitokotaha he Kau Fakatufono kua gahua he taha po ke loga he tau komiti nei. Kua igatia e tau komiti tokolima nei mo e kitekite fakamahino ke he taha mena he tau koloa ha Iesu he lalolagi nei. Ko e komiti ke ono aki—ko e Takitaki Komiti, ne fa hiki viko a lautolu i ai he tau tau takitaha, ne taute e tau mena vihi tufakaofo.
Gahuahua Fakalataha Mo e Kau Fakatufono
18. Fakagahua fefe e Kau Fakatufono, mo e ko e heigoa taha puhala ke fakakiteaki ha tautolu a kaufakalataha mo e mena ia?
18 Ko e tau komiti he Kau Fakatufono na fa hokofono lagataha he fahi tapu ke liu kitekite ke he tau matakupu aoga, taute e tau fifiliaga manatu ka oti e fakatutala liogi, mo e fakatokatoka e tau gahua ha he pule he Atua ma e tau vaha i mua. Tuga ne kitia ai fakamua, kua fakakite mai he Gahua veveheaga 15 ko e manako ke moua he tali ke he huhu uka, ti kua uta ai ke kitekite e kau fakatufono he senetenari fakamua ki ai. Tatai ni mo e vaha nei, ko e tau huhu aoga kua uta ke he Kau Fakatufono katoa, ka fono lagataha he fahi tapu po ke fono tumau kaeke kua lata. Ko e tau tagata he Kau Fakatufono toko 12 e numela he magaaho nei, ne kumi ke he takitakiaga a Iehova ko e Atua ke he tau Tohiaga tapu mo e tau liogi. Taha puhala ke fakakiteaki ha tautolu a kaufakalataha mo e Kau Fakatufono, ke manatu a lautolu nei ne fifili pauaki he tau liogi ha tautolu he tau aho takitaha.—Roma 12:12.
19. Hoko fefe e tau fakatonuaga he Kau Fakatufono ke he tau fakapotopotoaga?
19 Ka e hoko fefe e tau fakatonuaga mo e tau manatu he Kau Fakatufono ke he tau fakapotopotoaga? Ka hoko e tau tagata he kau fakatufono he senetenari fakamua ke he fakaotiaga he ha lautolu a fifiliaga, ke he lagomatai he agaga he Atua, ti fakafano e tohi ke he tau fakapotopotoaga. (Gahua 15:22-29) Ko e mena ia, ko e puhala he fakatonuaga he vaha nei kua puhala mai he tau tohi Kerisiano.
20. (a) Ko e heigoa falu hakahakaaga he tau fakatokatokaaga ne taute he tau 1976? (e) Kaufakalataha fefe e tau La Komiti mo e Kau Fakatufono?
20 Tali mai he mahina Fepuari 1, 1976, kua igatia e tau lala he Kaufakalatahaga Kolo Toko mo e La Komiti kua ha ha i ai e tau tagata loto matala ne kotofa he Kau Fakatufono. Ha kua eke a lautolu mo tau hukui he Kau Fakatufono he motu po ke tau motu i lalo he takitakiaga he la ha lautolu, kua lata ni e tau matakainaga nei ke tua mo e fakamoli. Kua fakamanatu mai ki a tautolu e tau tagata loto matala mo e matakutaku ke he Atua, tau tagata mahani fakamoli ne lagomatai a Mose ke fakafili e tau tagata i Isaraela he vaha fakamua. (Esoto 18:17-26) Ko e tau fakatonutonuaga ne fa fakaaoga kua moua he tau tagata he La Komiti he tau tohi he Kaufakalatahaaga mo e tau mekasini mo e Our Kingdom Ministry (Fekafekauaga Kautu ha Tautolu), pihia foki mo e tau tohi po ke tau tohi pauaki ke lata mo e tauteaga he tau mena vihi fakamotu. Ko e La Komiti ne fakailoa tumau ke he Kau Fakatufono e holo mitaki he gahua he tau motu takitaha, mo e tau mena vihi ne fa tutupu ai. Ko e tau hokotaki pihia ne moua mai he lalolagi katoa ne lagomatai aki e Kau Fakatufono ke fifili ko e heigoa e tau matapatu mena ka fakatutala ki ai e tau tohi he Kaufakalatahaaga.
21. Fifili fefe e tau leveki o fano, mo e ko e heigoa ne lafi ke he ha lautolu a tau gahua?
21 I lalo he takitakiaga he agaga tapu, na fa fifili he tau La Komiti e tau tagata motua fakaagaga ke fekafekau ke he takaiaga mo e tau leveki fahi motu. Ka oti he kotofa mai ni he Kau Fakatufono, ti fekafekau a lautolu ke eke mo tau leveki o fano. Ko e tau matakainaga nei ne ahiahi ke he tau takaiaga mo e tau fakapotopotoaga, ko e kakano ke ati hake mo e lagomatai fakaagaga a lautolu ke omaoma ke he tau fakatonuaga ne moua mai he Kau Fakatufono. (Fakatatai Gahua 16:4; Roma 1:11, 12.) Ko e tau leveki o fano ne fa age e tau hokotaki ke he la ofisa. Mai he tau lagomatai he agaga tapu mo e tau Tohiaga Tapu, kua kaufakalataha e tau momotua he tau fakapotopotoaga ke fakatu e tau matakainaga kua fai lotomatala ke he kotofaaga he tau fekafekau lagomatai mo e tau momotua he tau Kau Fakatufono po ke hana tau hukui.—Filipi 1:1; Tito 1:5; fakatatai e 1 Timoteo 3:1-13; 4:14.
22. (a) Kaufakalataha fefe e tau momotua he fakapotopotoaga mo e Kau Fakatufono? (e) Ko e heigoa ne fakamoliaki kua fakamonuina e Iehova e fakatokaaga pule he atua nei?
22 Ko e magaaho nei, ko lautolu e matakau he tau momotua kua ‘mataala a mutolu kia mutolu, katoa mo e fuifui mamoe oti kana kua kotofa a lautolu he agaga tapu ke leveki a mutolu.’ (Gahua 20:28) Ko e tau tagata leveki nei ne kumi fakamoli ke omaoma ke he tau fakatonuaga ne moua mai he Atua ko Iehova mo Iesu Keriso kua puhala mai he tupa fakamoli mo e lotomatala mo e hana Kau Fakatufono. Kua fakamonuina e Iehova e fakatokatokaaga pule he atua ma e ‘tau fakapotopotoaga ke mauokafua ke he tua mo e fakatokologa ke he taha aho mo e taha aho.’—Gahua 16:5.
23. Hagao ke he Kau Fakatufono, kua lata a tautolu ke lali ke taute e heigoa?
23 Ko e fulufuluola ha ia ha kua puhala mai he Kau Fakatufono, e fakakiteaga he lagomatai he Atua ko Iehova mo e Iki ko Iesu Keriso ke he tau tagata he Atua! (Salamo 94:14) Ha ko e taha vala he fakapotopotoaga a Iehova, kua igatia a tautolu mo e moua mai e aoga he tau lagomataiaga pihia. (Salamo 145:14) Kua fakamalolo he mena nei a tautolu ke lali ke kaufakalataha mo e tau fakatokaaga he Atua. Moli, kia moua tumau a tautolu ha ne kaufakalataha mo e Kau Fakatufono he tau Fakamoli a Iehova kae oatu ki mua a tautolu ke he vaha ka “puke e lalolagi ke he maama kia Iehova, tuga ne toka kua ūfia ke he puke tahi.”—Isaia 11:9.
Au Matapatu Tala ke Manatu
◻ Ko e heigoa e tau gahua tupu lahi ne moua he vahega fekafekau pule he tau 1919?
◻ Ma e loga he tau tau, ko e heigoa ne fakakitiaaki aki e Kau Fakatufono he kitiaga nei?
◻ Ko e heigoa e tau hakahakaaga holo fakahaga ne taute he kotofaaga he tau tagata he Kau Fakatufono?
◻ Ko e heigoa e falu koloa a Keriso he lalolagi he tuku age ke he vahega tupa mo e hana Kau Fakatufono?
◻ Kaufakalataha fefe a tautolu mo e Kau Fakatufono?
[Tau Fakatino he lau 25, 26]
Mai he hana mataupu he lalolagi i Brooklyn, i New York, koe takitaki he Kau Fakatufono e tau tohi fakailoaaga mo e gahua fakamatala he tau Fakamoli a Iehova he 93 e lala he Kaufakalatahaga he Kolo Toko
Sihamani
Sapani
Afelika Toga
Pasili