Tau Fuata Fiafia he Fekafekauaga ha Iehova
“Kua iloa foki e tama ke he hana a tau gahua, kaeke ko e mea mo e hakohakao hana mahani.”—FAKATAI 20:11, New International Version.
1. Ko e heigoa e falu mena kua mua atu e kehe he Tohi Tapu ne talahau kua hagaao ki a Samuela?
KO E fuata ko Samuela, liga ko e tolu ni, ke he lima e tau tau he moui, he magaaho ne kamata a ia ke “fekafekau” ke he faituga ha Iehova i Sailo. Ko e taha he hana tau fekau ko e hafagi he “tau gutuhala he fale a Iehova.” Ne pehe e Tohi Tapu kua “lahi hake a Samuela mo e mitaki ke he onoonoaga ha Iehova, katoa mo e tau tagata.” He magaaho ne lahi, kua liuaki e ia a Isaraela ke he tapuakiaga moli. Ne fekafekau a ia “he tau aho oti he hana moui” ke he Atua. Pihia foki he magaaho kua “motua . . . mo e uluhina” a ia, kua fakamalolo e ia e tau tagata ke “matakutaku ni . . . kia Iehova, mo e fekafekau . . . kia ia mo e fakamoli.” Kua mitaki lahi nakai, kaeke kua maeke e tau tagata ke talahau e tau mena mitaki pehe nei ki a koe tuga he talahau mai he Tohi Tapu ki a Samuela?—1 Samuela 1:24; 2:18, 26, NW; 1 Sam 3:15; 7:2-4, 15; 12:2, 24.
2. Ko e heigoa ne iloa he tau kau ikiiki, ke he tau feleveiaaga he tau tagata a Iehova he vaha nei?
2 Kaeke ko e taha he tau Fakamoli ha Iehova a koe poke kua fano a koe ke he ha lautolu a tau feleveiaaga Kerisiano, kia onoono fano ke he Fale he Kautu kua taute e matakupu fakaakoaga nei ke fakaako ki ai. Kua kitia e koe kehekehe e tau tau he momoui he tau tagata. Liga kua ha ha i ai e tau tagata kua fita e “motua . . . mo e uluhina.” Ha ha i ai foki e tau mamatua, tau tagata fuata, tau fanau, mo lautolu foki e tau mukemuke ke he tau lima lukuluku. Kua fita kia, e tau kau ikiiki lalahi ke iloa taha mena? E. Kia huhu atu la ki a lautolu, ne fa uta, ke he tau feleveiaaga pihia, he tau magaaho ne ikiiki ai a lautolu. To tala atu fakamoli e lautolu ki a koe ko e kamata mai a lautolu he tau vaha ikiiki ke iloa ke fakalilifu ke he Atua, ke ofania hana tau tagata, mo e ke loto fakaaue ma e tau kaina ne tapuaki ki a ia. He mole atu ai e tau magaaho, kua iloa he tau kau ikiiki e tau kupu moli kua mua atu e mitaki. Tokologa e tau fuata, he mole e tutupu hake he maamaaga mo e loto fakaaue, kua eke ai mo taha he tau ‘fuata tane mo e tau tama afine, tau tane momotua mo e tau tama tane’ kua ole fakamakamaka e salamo ke “fakaheke . . . ke he higoa a Iehova; ha ko e hana higoa hokoia [kua mamao ligo e tokoluga, NW].”—Salamo 148:12, 13.
3. Ko e ha ne kehe ai e kitekiteaaga he tau tagata fuata ne iloa e Tohi Tapu ke he moui, ki a lautolu ne nakai iloa?
3 Kaeke ko e tagata fuata a koe ne fa uta tumau he tau mamatua hau a koe ke he tau feleveiaga pihia, kua mitaki lahi e monuina hau. Tokologa e falu he tau tagata fuata ne matematekelea ha ko e tau mena vihi he lalolagi. Kua matakutaku e falu he neke moumou he tau tagata e lalolagi. Kua iloa e koe to nakai fakaata he Atua e mena ia ke tupu, nakai toka e ia e tagata ke moumou tumau hana palaneta fulufuluola nei. To nakai fakaata e mena ia ke tupu, to taute he Atua, tuga ne fakamaama mai he Tohi Tapu, “ke moumou ai foki a lautolu kua moumou e lalolagi.” Iloa e koe ne mavehe e Tohi Tapu kua tata mai tuai e anoiha fulufuluola ke he lalolagi tututonu fou he Atua.—Fakakiteaga 11:18; Salamo 37:29; 2 Peteru 3:13.
Ko e Hau ni a Tua
4. Ko e heigoa e kavega ne kua fakalago ke he tau fuata ha kua iloa e tau puhala he Atua, mo e ko e ha e fuata ko Samuela ko e fakatai mitaki lahi ke he mena nei?
4 Fakamua, liga ko e tutuliaga he hau a tau mamatua e puhala moli he Kerisiano. Liga kua fano a koe ke he tau feleveiaaga Kerisiano he uta e laua a koe, mo e liga kua kau fakalataha a koe ke he fekafekauaga fakaatua ha ko laua ne taute ai. Kae ha ne mole atu e tau magaaho, kua maeke e fekafekauaga mo e omaoma ki a Iehova mo hau a fiafia foki. Kua kamata he matua fifine he fuata ko Samuela a ia ke he puhala hako, ka e kua lata ke eke foki e ia a ia ke muitua ki ai. Kia totou e tautolu: “Kua iloa foki e tama ke he hana a tau gahua, kaeke ko e mea mo e hakohako hana mahani.”—Fakatai 20:11, NIV.
5. (a) Ko e aoga lahi mahaki ke he heigoa e Tohi Tapu? (e) Ko e heigoa ne talage e Paulo ki a Timoteo ne hagaao ke he mua atu e aoga he tohiaga Kupu he Atua?
5 Kua talahau he tau Tohiaga Tapu ki a tautolu ko e heigoa ne manako e Atua ke taute e tautolu. Ne fakakite maaliali e lautolu ki a tautolu ko e maeke fefe ke fakafiafia a ia, mo e loga e tau fakailoaaga ne foaki mai, kua maeke ke aoga lahi ki a tautolu. Ne talage he aposetolo ko Paulo ke he hana lagomatai ko e fuata ko Timoteo: “Ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, Kia katoatoa ai e mitaki he tagata he Atua, kia taute ni a ia ke he tau gahua mitaki oti kana.”—2 Timoteo 3:16, 17.
6. Ko e heigoa ne talahau he tohi ha Fakatai ne hagaao ke he mua atu e aoga lahi he lotomatala mo e pulotu fakaatua?
6 Ne talahau foki he Tohi Tapu ki a tautolu ke “fanogonogo ke he tau akonaki mo e eke ke loto matala ai.” Ne pehe ke “toka [fakakoloa uho, NW]” e tau fakatufono he Atua, ke “fakateliga hau a tau teliga ke he iloilo,” mo e ke “ke kumi fakamakutu,” e loto matala tuga ka kumi a koe ke he tau koloa galo takiofa. Kaeke ke muitua a koe ke he tomatomaaga nei, ti kua “iloa ai e koe e matakutaku kia Iehova, mo e moua ai e koe e iloilo ke he Atua.” Kua moua foki e tautolu e tau fakaakoaga nei: “Hanai, ko e fanau na e, kia fanogonogo mai ā kia au; ha kua monuina a lautolu kua omaoma ke he haku a tau puhala. Kia fanogonogo mai a mutolu ke he tau mena kua fakaako atu, kia iloilo ai a mutolu, ka e aua neke tiaki e mutolu. [Fiafia, NW] e tagata kua fanogonogo mai kia au; . . . Ha ko ia kua moua au, kua moua e ia e moui; to moua foki e ia e fakaalofa mai ia Iehova.” Kua lahi pihia nakai hau tokiofa ke he Tohi Tapu mo e taute e fakamakutu pihia ke fakaako ke he tau mena ne talahau mai ai?—Fakatai 2:1-5; 8:32-35.
Ke Moua e Iloilo
7. Ko e heigoa e tau mena kua aoga lahi kua lata ia tautolu ke fakaako?
7 Ko e maeke he falu tagata fuata ke iloa oti e tau mena tutupu he tau sipoti, poke maeke ia lautolu ke tala atu ki a koe e tau mena oti ne hagaao ke he ha lautolu a matakau lologo kua fiafia ki ai. Kua mukamuka e tau mena nei ke fakaako e lautolu mo e manamanatu ki ai ha ko e fiafia a lautolu ki ai. Ka ko e huhu ne mua atu e aoga, Ko e heigoa ha lautolu ne iloa ke he Atua? Kia manamanatu la ke he tau mena ne taute e ia. Ne taute he Atua e lalolagi likoliko katoatoa. Ne talahau tuai e ia ko e heigoa ka taute he tau tagata mo e ko e heigoa ka tutupu ato hoko e tau mena ia. Ne talahau he Tohi Tapu ki a tautolu nakai ni ke he Atua hokoia ka e kua fakaako, ke maeke fefe ia tautolu ke fakafiafia a ia. Kua fakakite mai ke maeke fefe ke moua e moui fiafia he magaaho nei mo e maeke fefe ke moua e moui tukulagi ke he lalolagi tututonu fou hana. Nakai kia mua atu e aoga he mena ia, mai ke iloa ko hai ne mua he pele polo poke fakaako ke iloa e tau higoa he tau tagata ta kofe, ne nakai leva ti nimo he tau tagata?—Isaia 42:5, 9; 46:9, 10; Amosa 3:7.
8. Ko e heigoa e tau fakatai mitaki ne toka e Iosia mo Iesu?
8 He magaaho ne 15 e tau tau he moui he Patuiki fuata ko Iosia, “ne kamata ai a ia ke kumi ke he Atua a Tavita hana matua.” Ko e magaaho ne 12 a Iesu, kua moua a ia “ha ne nofo ke he vaha loto he tau akoako” he faituga ha Iehova, “kua fanogonogo kia lautolu mo e hūhu mena kia lautolu.”a Pete ni ko e heigoa hau a tau tau he moui, pihia nakai a koe, tuga a Iosia mo Iesu, kua talaga e fiafia moli ke fakaako ke he tau mena ne hagaao ke he tau mena ne taute mo e tau mena foki ne nakai la hoko ai ke taute he Atua?—2 Nofoaga Patuiki 34:3, Luka 2:46.
9. (a) Ko e heigoa e tau mena uka ne tokologa e tau tagata fuata ke moua? (e) Maeke he heigoa ke taute e totou mo e fakaako ke mukamuka, mo e kitia nakai e koe ko e moli e mena nei?
9 Ka e taha e mena, liga to pehe a koe: ‘Ko e gahua uka e fakaako.’ Tokologa e tau tagata, tau fuata mo e tau fuakau, kua nakai lahi ke totou mena ke maeke ai ke mukamuka. Ka laga loga hau a totou mena, ti mukamuka ai ke totou. Ka lahi e kumikumi hau, kua mukamuka tuai e fakaakoaga. Kua fakapiki e koe e tau manatu fou ke he tau mena kua fita e iloa e koe, ti kua taute ai ke mukamuka ke maama a lautolu mo e liu ke manatu ai a lautolu.
10. (a) Maeke fefe ia koe ke loga e tau mena ka moua mai he tau feleveiaaga Kerisiano? (e) Ko e heigoa hau a fakafehagaiaga ke he tau mena nei?
10 Maeke he heigoa ke lagomatai a koe ke fakalahi atu hau a fakaako ke he Atua? Liga, kua lata ia koe ke fano tumau ke he tau feleveiaaga Kerisiano. Maeke nakai ia koe ke taute fakamua mo e lali fakalahi ke tali? Ke fakatai aki, maeke nakai ia koe ke moua mai e fakahokulo atu ke he hau a iloilo ke he fakaako nei ka fakaati e tau kupu Tohi Tapu ne tohi kae nakai lagaki e tau kupu? Kua tohi nakai e koe e taha kupu poke ua he kala ke fakamau ke fakamanatu ki a koe, ko e heigoa ne lafi mai he tau kupu nei ke he palatafa poke ke he fakaakoaga? Kua fakamahani nakai a koe ke lafi ke he hau a tali, taha mai he tau kupu ia, ke fakakite hau a fiafia mae fakatutalaaga Tohi Tapu? Kua pehe e taha tagata motua he fakapotopotoaga ne fa fano tumau ke he tau feleveiaaga ke he loga e tau tau: “Kua uka lahi ia au ke toka haku a loto ke he taha fakaako ne kua nakai taute tuai, ka ko e mitaki ha, e fiafia ke muitua ke he taha, kua fita he fakaako fakamitaki e au.”
11. Maeke fefe ke lahi hau a mena ka moua mai he tau lauga fakamatapatu mai he Tohi Tapu, mo e ko e ha ne mua atu e aoga lahi he mena nei?
11 He tau magaaho ne fanogonogo a koe ke he tau lauga Tohi Tapu, kua tohi fakaku nakai e koe e tau kupu ke lagomatai a koe ke kitia, ko e fakapapahi fefe e lauga mo e ke toka ai hau a loto ke he tau mena kua talahau? Kua fakatatai nakai e koe e tau mena ne logona e koe mo e tau mena kua fita e iloa e koe, ke maeke ia koe ke mukamuka ke maama mo e liu ke manatu mitaki? Ne liogi a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Nakai kia ko e fakamaamaaga ne takitaki ke he moui ko e fakamaamaaga kua mua atu ni e mitaki ke maeke ai ia koe ke moua? Kitiala e mena ne talahau he Tohi Tapu ke he mena nei: “Ha ko Iehova kua foaki mai e iloilo; mai he fofoga hana e iloilo mo e loto manamanatu; Ha ko e mena hoko atu e iloilo ke he loto hāu; ti mitaki foki kia koe e pulotu; To leveki a koe he loto manamanatu; to leoleo a koe he pulotu.”—Fakatai 2:6, 10, 11.
Tupu ke he Fakaaueaga
12. Ko e heigoa e falu mena kua mua atu ne taute he Atua ma tautolu?
12 Kua fakaaue fakamoli nakai a tautolu ke he tau mena ne taute he Atua ma tautolu? Ne tufugatia e ia e lalolagi fulufuluola mo e taute ai ke lata mo e tau momoui. Ne tufugatia e ia ha tautolu a tau mamatua fakamua, ti kua maeke ai ia tautolu ke fanau mai. Ko e fakatokatokaaga hana ma tautolu ke moua e tau lagomatai he tau magafaoa mo e ke he fakapotopotoaga fakafeofanaki. (Kenese 1:27, 28; Ioane 13:35; Heperu 10:25) Ne fakafano mai e ia hana Tama fuataha ke he lalolagi ke fakalahi e fakaako ha tautolu kia Ia mo e ke foaki mai e lulutoto ke maeke ai ke fai moui tukulagi. Kua fakaaue fakamoli nakai a koe ke he tau mena fakaalofa mitaki lahi pihia? Kua omoi aki nakai a koe he talia hana uiina ke fakaako kia ia mo e ke fekafekau kia ia?—Mataio 20:28; Ioane 1:18; Roma 5:21.
13. Ko e ha ke he hau a logonaaga ko e fiafia e Atua ke iloa e tau tagata takitokotaha?
13 Kua fiafia e Tufuga he lalolagi likoliko katoatoa ke iloa e tau tagata. Ne ui e ia a Aparahamo ko e “haku a kapitiga,” mo e pehe a ia kia Mose: “Kua iloa e au a koe ke he hau a higoa.” (Isaia 41:8; Esoto 33:12) Kua fakakite he tohi ha Fakakiteaga ko e fai tohi ke he fakataiaga poke “tohi he moui” ne toka ai e tau higoa he hana tau fekafekau fakamoli “mai he fakaveaga he lalolagi.” To toka nakai hau a higoa i ai?—Fakakiteaga 3:5; 17:8; 2 Timoteo 2:19.
14. Maeke fefe hau a moui ke mitaki, ka muitua ke he tau puhala he Atua?
14 Kua gahua e tau puhala he Atua. Ka taute e tau mena ke he hana puhala, kua uta kehe, loga e tau mena uka—mahani feuaki, haofia ke he tau vai kona, gagao inu kava, faitama kua nakai fia loto ki ai, ko e gagao maiafi, favale, keli tagata, mo e loa foki e tohiaga he falu gagao. Ka muitua ke he hana tau puhala kua lagomatai foki a koe ke moua e tau kapitiga moli mo e ke moua e moui fiafia. Nakai kia kua aoga lahi ke taute ai? (1 Korinito 6:9-11) Pihia foki e tagata fuata ne kua fita malolo e loto ke taute e tau mena ke he tau puhala he Atua, kua maeke ke moua e fakalahi atu he maloloaga ke taute e mena hako. Ne pehe e Tohi Tapu: “Kua mahani fakaalofa a [Iehova] kia ia kua fakaalofa.” Ka e kua fakamafanatia foki kia tautolu ko e to “nakai tiaki foki e ia hana tau tagata tapu nakai toka e Iehova hana motu.”—Salamo 18:25; 37:28; 94:14; Isaia 40:29-31.
O Atu ki Mua he Fekafekauaga ke he Atua
15. Ko e heigoa e tau tomatomaaga fakaatua ne foaki mai e Solomona ke he tau fuata?
15 Kua tuhi fakatonu kia hau a tau foliaga ke he lalolagi tuai, hane mate, poke ke he mena fou mo e tututonu? Kua fanogonogo nakai a koe ke he Atua, poke kua fanogonogo na koe ke he tau tagata iloilo fakalalolagi ne fetokoaki ki a ia? Kua mua kia e tau mena fakafiafia tino, tau fakaako tokoluga, poke gahua tupe ne mole lahi e tau magaaho, ke he Atua mo e hana fekafekauaga? Ne tohia he Patuiki pulotu ko Solomona e tohi katoa he Tohi Tapu ko e Fakamatalaaga, ke fakakite ko e heigoa e mena kua lata ke mua ke he ha lautolu a tau momoui. Ti pehe fakamui a ia: “Hanai, kia manatu a a koe ke he hāu a vaha fuata kia ia ne eke a koe, ka kua nakaila hohoko mai e tau aho kelea, ka kua nakaila fakatata mai e tau tau ke pehe ai a koe, Nakai tuai fiafia au ki ai; Kia fanogonogo a a tautolu ke he fakahikuaga he tau mena oti ia, Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.”—Fakamatalaaga 12:1, 13.
16. Maeke fefe he tau tagata fuata ke foli ma e falu gahua uho?
16 Ko e tau matakainaga Kerisiano momotua oti ne iloa e koe—ko e tau momotua, ko e tau tagata foafoa, mo e hau a tau tagata leveki he takaiaga mo e tau fahi motu—ko e tau fanau ikiiki foki a lautolu he vaha fakamua. Ko e heigoa ne takitaki atu ke he tau monuina ke he ha lautolu a fiafia he vaha nei? Ko e ofania e lautolu e Atua mo e manako ke fekafekau kia ia. Tokologa mai ia lautolu ke he tau vaha fuata ne fakaaoga e tau magaaho ne ata ke moua e tau iloaaga mo e fakamahani ke he taha mena. Kua fakaako a lautolu mo e kau ke he tau matagahua ke he tau feleveiaga. Kua gahua fakalataha a lautolu ke fakaako e falu, mo e foli ke he falu kotofaaga uho—gahua foafoa, fekafekauaga he Peteli, poke falu gahua ne uho e taui. Nakai ko e tau ‘fuata mitaki lahi’ a lautolu kae kua nakai kehe e tau mahani fiafia mo e tau manatuaga ha lautolu kua tuga ne ha ha i ai ia koe. Ka e pete ni ia, kua taute fakahako ne lautolu ke he fakatonuaga: “Ko e tau mena oti foki kua eke e mutolu kia eke mo e loto, tuga ne eke [ki a Iehova, NW], ka e nakai ke he tau tagata.”—Kolose 3:23; fakatatai Luka 10:27; 2 Timoteo 2:15.
17. Maeke he heigoa ke lagomatai e tau tagata fuata ke tupu fakapapahi ki mua ke he fekafekauaga he Atua?
17 Ka e kua a koe? Kua fiafia fakamoli nakai a koe ke he tau mena fakaatua? Kua fifili nakai e koe hau a tau kapitiga mai ia lautolu ne tuku fakamua e tau mena fakaagaga? Kua fakamalolo nakai e koe e falu ke o fakalataha mo koe ke he tau gahua Kerisiano? Kua fano nakai a koe ke he fekafekauaga Kerisiano mo lautolu ne motua mo e kua mahani lahi ke iloa taha mena mai ia lautolu, ke iloa ha lautolu a fiafia, mo e ke moua e tau fakamalolo ha ko e ha lautolu a tau gahua mitaki? Ne manatu he taha Fakamoli e aho, kua teitei ke 20 e tau tau kua mole atu, he magaaho fakamua ne mafanatia e uiina he taha tagata lahi ki a ia, ke o fakalataha mo ia ke he fekafekau he fonua. Ko e tapuni he moui hana a nei he talahau e ia. “Ko e magaaho fakamua la ia he fano ai au ha kua fia loto a Au, nakai ha ko e uta he tau mamatua haku a au.”
18. Ko e heigoa e tau mena ke manamanatu ki ai, ato foaki a tautolu ke papatiso?
18 Ka eke kua holo atu hau a tupuaga, ke taute e tau mena ke he puhala he Atua, liga kua kamata tuai a koe ke manamanatu ke he papatisoaga. Ko e mena aoga lahi ke manatu, ko e nakai ko e taha puhala he liliuaga ke he fuata lahi, e papatisoaga. Nakai ko e fakakite ai kua lahi tuai a koe, nakai foki ko e mena ke taute e koe ha kua taute pihia e lakaaga he hau a tau kapitiga. Fakamua to huhu ke papatiso, kua lata ia koe ke iloa e fakaveaga he kupu moli mo e fakatatai hau a puhala he moui mo e Kupu he Atua. Kua lata foki ia koe ke mahani ke foaki atu e maamaaga ia ke he falu mo e iloa ko e vala he uho a nei he tapuaki moli. (Mataio 24:14; 28:19, 20) Kua lata foki ia koe ke iloa ka mole ai e lakaaga mua atu nei he Kerisiano, kua amaamanaki ni ki a koe, ke fakatatai hau a moui mo e tau mahani tututonu he puhala he Tohi Tapu.b Ke he loto hau kua lata a koe, ke tukulele hau a moui ke he hau a Matua Tane fakahele ha ha he lagi.—Fakatatai Salamo 40:8, 9.
19. Magaaho fe kua lata e tagata ke papatiso?
19 Ko e lakaaga he papatisoaga ka taute e koe he magaaho kua mauokafua hau a fifiliaga, ko e pete ni ko e heigoa ka tupu ke he moui katoa hau, to fekafekau na koe ke he Atua. Ko e fakakiteaga a ia ke he tau tagata, kua taute tuai e koe e fakatokaaga katoatoa, mo e nakai fai fakafepaaga ke he hau a tukulele ki a Iehova mai ia Iesu Keriso ke taute e finagalo he Atua. Taha e motua Kerisiano ne manatu e aho, kua teitei ke he lotouho he senetenari kua mole atu, he magaaho ne iloa e ia: “Kua lata ni au ke taute taha mena!” Ko Michelle, ko e Fakamoli fuata ne papatiso i Newcastle, i Igilani, he gahoa e tau tau kua mole, ne pehe: “Ke he tau tau ke 13 aki he moui, kua iloa e au, kua lata a au ke tukulele haku a moui mo e taute ke papatiso; kua nakai fai mena ne fia loto au ke taute ka e fekafekau ke he Atua.
20. (a) Ko e heigoa e tau fakatai mitaki, kua fita he fakatu he tau hogofulu e tau afe he tau tagata fuata? (e) Kua lata ke fefe e kitekiteaga ke he lakaaga nei?
20 Ko e tau hogofulu e tau afe he tau tagata fuata ne papatiso he magaaho ku kua mole. Kua fakaako a lautolu ke he Kupu he Atua mo e iloa hana tau puhala, mo e ne papatiso ai, kua fiafia a lautolu ke matutaki ke he tokologa kua motua ke fakakite ke he tau tagata ha lautolu a tukuleleaga ke he Atua. Kua iloa e lautolu nakai ko e fakaotiaga ke he papatiso ka ko e kamataaga ke he puhala he moui tukulele moli, kua mauloto ai a lautolu ke muitua tukulagi ke he fekafekauaga ha Iehova.
[Tau Matahui Tala]
a Fakaati e matakupu “Tau Fuata he Vaha he Tohi Tapu” he lau tohi 4.
b Kua nakai kakano e mena nei ke pehe, ‘kua nakai la papatiso a au’, ko e fakaata a ia ke taute e tau mena hehe. He magaaho ia ne iloa ai e tautolu, ko e heigoa ne loto e Atua ki ai, kua maaliali tuai, ko e kavega haia ha tautolu ke omaoma ki a ia.—Iakopo 4:17.
To Tali Fefe a Koe?
◻ Ko e aoga lahi he ha e maamaaga ke he Kupu he Atua
◻ Maeke fefe ia koe ke loga e tau mena ka moua ke he tau feleveiaga Kerisiano?
◻ Ko e heigoa e tau fakamonuinaaga he Atua kua lata ke omoi a tautolu ke omaoma ki a ia?
◻ Maeke fefe ia koe ke holo atu ki mua he fekafekauaga he Atua?
◻ Kua lata he magaaho fe, e taha ke papatiso?