Fakaheke e Higoa Tapu a Iehova!

“To talahau atu hoku gutu e fakahekeaga a Iehova; to fakamonu atu ke he hana higoa tapu e tau tagata oti kana tukulagi tukumuitea.”​—SALAMO 145:21.

1, 2. (a) Ko e heigoa e puhala ne totoko he Tiapolo e pule he Atua? (e) Ko e heigoa e tau huhu ne laga hagaao ke he Salamo 145:11-21?

KUA nakai ha ha i ai ha fakauaua ko Iehova ko ia ko e Pule he Lalolagi Oti. Ka kua totoko e Satani e tututonu mo e tonu he pule he Atua. (Kenese 2:16, 17; 3:1-5) Ne huhu foki he Tiapolo e fakamoli he tau fekafekau oti he Atua i luga he lagi mo e lalolagi. (Iopu 1:6-11; 2:1-5; Luka 22:31) Ti fakaata e Iehova ke fai magaaho e tau mena momoui mo e lotomatala oti, ke kitia e tau fua he totoko ke he hana a pule mo e fakakite e ha lautolu a tau tutuaga ke he tau mena nei.

² Lagomatai he Salamo 145 a tautolu ke mauokafua e tau tutuaga ke he pule he Atua. Maeke fefe? Ko e heigoa ha Tavita kua talahau ke he tuaga patuiki ha Iehova? Taute fefe he Atua hana a tau tagata kua kau mo ia? Fakakite mai e tau lagomataiaga he tau tali he Salamo 145:11-21.

Tutala ke he Tuaga Patuiki ha Iehova

3. Kaeke ke uho e pule a Iehova ki a tautolu, ko e heigoa ha tautolu ka taute?

³ Ne aoga lahi e pule a Iehova ki a Tavita, ne pehe: “Kua vagavagahau a lautolu ke he lilifu he hāu a kautu, mo e talatalahau ke he hāu a malolo; Kia fakailoa atu ke he fanau he tau tagata hana tau gahua malolo, mo e lilifu he fulufuluola he hana kautu.” (Salamo 145:11, 12) Tutala e tau tagata ke he tau mena kua fiafia a lautolu ki ai. Ti tutala e tagata ke he hana a magafaoa, hana a kaina, hana a tau fua he fonua. “Kua ta mai he tagata mahani mitaki e tau mena mitaki mai he tau mena mitaki kua tanaki ke he hana a loto,” ne talahau e Iesu. (Luka 6:45) Kaeke kua uho ke he tau loto ha tautolu e pule he Atua, to liogi a tautolu ke hoko mai hana a Kautu, to talahau e tautolu ke he falu hana a fakafiliaga tonu, mafola, mo e tututonu ka nofo i lalo hifo he hana a pule. To fakaheke a tautolu ki a Iehova ha ko e “Patuiki tukulagi,” to talahau e tautolu hana a fakakiteaga he hana pule kua puhala mai he Kautu he Mesia ke he tau lima he hana Tama fakahele, ko Iesu Keriso. (Fakakiteaga 15:3, NW; Isaia 9:6, 7) Ko e fakamonuinaaga moli a ia ke talahau e lilifu he lagi he tuaga patuiki a Iehova, ka fakakite mai ai he fulufuluola he lalolagi parataiso ka puke ai he tau mena momoui fiafia mo e mitaki katoatoa!​—Luka 23:43.

4. Ha e fe e tau magaaho ke maeke ia tautolu ke talahau e “malolo” a Iehova mo e lagomatai fefe a tautolu he gahua ia?

⁴ Omoi foki he fakaaue a tautolu ke talahau e “malolo” a Iehova. Pete ne “mua ue atu hana malolo,” ka e nakai fakaaoga fakahehe e ia. (Iopu 37:23) Ne fakaaoga e ia e malolo hana ke tufugatia aki e lalolagi mo e tau tagata, mo e to fakagahuahua foki ke moumou aki e tau tagata mahani kelea. Ha ha ia tautolu a falu magaaho ke talahau e malolo he Atua ka fakapuloa e tautolu e tala mitaki. Ti nakai kia fakaaue a tautolu ke he Punaaga mua ue atu he malolo nei kua fakamalolo aki a tautolu ke taute e gahua nei? (Isaia 40:29-31) E, ko tautolu ko e tau Fakamoli a Iehova, ne lagomatai he malolo mo e agaga he Atua ke taute e fekafekauaga tapu nei. Ko e puhala nei ni ne fa e fakapuloa aki e fekau he Kautu ti maeke ai ke kautu lahi mahaki ke he lalolagi katoa.​—Salamo 28:7, 8; Sakaria 4:6.

5. Ha kua tokologa ne nakai iloa e tau “gahua malolo” a Iehova, ko e heigoa ha tautolu kua lata ke taute?

⁵ Kua lata ia tautolu ke fakailoa ke he tau fanau he tau tagata e tau “gahua malolo” a Iehova, tuga e tau Isaraela ne talahau ke he ha lautolu a tau fanau e puhala ne fakahao he Atua a lautolu mai he tau liliaga ha Aikupito. (Esoto 13:14-16) Ne talaga he tau tagata e tau maka fakamailoga ma e tau tagata ne mailoga e lautolu ko e talahaua e tau gahua, ka e toko fiha la ne iloa e tau gahua malolo he Atua? Tuku pehe he taha tagata fakaako: “Ne tohi e lautolu e tau gahua he tau toa ha lautolu ke he tau apa kula, ka ko e tau gahua lilifu a Iehova ne tohi ke he oneone, mo e hokohoko he tau magaaho, ne fufulu kehe mai a lautolu he tau manamanatuaga he vaha nei.” Ne nakai fufulu kehe moli e tau gahua ia, pete ne nakai iloa he tokologa. Ke he ha tautolu a gahua ke he taha fale mo e taha fale, ka fakaako Tohi Tapu ke he tau kaina, mo e falu a magaaho foki, kia talahau mo e fakamakutu e tau gahua malolo he Atua.

6. (a) Ko e heigoa e toloaga he tau tau kua mole ne tonu e talahauaga ke he agaga fakamakutu ke taute aki e gahua fakamatala ha tautolu? (e) Ko e heigoa e alito he talahauaga he 1922 ke he fakapuloaaga he Kautu?

⁶ Kua lata foki ia tautolu ke fakamukutu ke fakailoa e lilifu he tuaga patuiki he Atua. Ne kitia mali e fakamakutu ke he fekafekau ma e Kautu ke he tau 1922, ko J. F. Rutherford, ko e pelesiteni he Kaufakalatahaga Kolo Toko, ne fakailoa ke he fonoaga i Cedar Point, Ohio, mo e pehe: “Tali mai he tau 1914 ko e Patuiki he lilifu kua fita hana a pule . . . Ha ha hinei e Kautu he lagi; kua pule e Patuiki; kua veli e kautu ha Satani; tau miliona kua momoui he vaha nei to nakai mamate. Talia tonu nakai e koe? . . . Kia liliu atu ke he fonua, Ko mutolu ko e tau fanau he Atua tokoluga! Tui ha mutolu a tau taute tau! Aua neke momohe, kia mataala, kia fakagahuahua, kia malolo. Kia eke ko e tau fakamoli ne mahani mo e loto fakamoli, ma e Iki. Kia o atu ki mua ke he tau, ato moumou katoatoa a Papelonia. Fakapuloa e fekau ke he tau mena mamao mo e laulahi. Kia iloa he lalolagi ko Iehova e Atua, mo Iesu Keriso e Patuiki he tau patuiki mo e Iki he tau iki. Ko e aho na nei he tau aho oti. Kitiala, kua pule e Patuiki! Ko e tau tagata fakailoa tala hana a mutolu. Ko e mena haia kia fakapuloa, fakapuloa, fakapuloa, e Patuiki mo e hana a kautu.”

7. Kua lata ke fefe ha tautolu a tau logonaaga, ke he ha tautolu a gahua ko e tau tagata fakapuloa he Kautu?

⁷ Kua lahi e fiafia ke ‘manamanatu ke he higoa he Atua,’ ke talahau atu ke he falu e hana a pule, mo e fakapuloa e Kautu he Mesia he hana a Tama fakahele! (Malaki 3:16) Ko e tau tagata fakamatala mo e gahua he Kautu, ne kuku e tautolu ha tautolu a monuina ke fakapuloa e tala mitaki mo e hagaao e tau loto he falu ke he Atua, Keriso, mo e Kautu. I loto ia tautolu, kua lata ke ha ha i ai e vela kaka e manako, ke talahau ke he falu e lilifu fulufuluola he tuaga patuiki a Iehova.​—Fakatatai mo e Ieremia 20:9.

8. (a) I loto he heigoa, ne hukui e pule a Iehova he vaha nei? (e) Ko e ha ne pehe ai ko e Atua ne pule ke he “hahau mo hahau”?

⁸ Kua lata a tautolu ke holo ki mua, ke fakapuloa e Kautu he Atua mo e fakamakutu, he matutaki atu pehe a Tavita: “Ko e hāu a kautu ko e kautu tukulagi ia; mo e hāu a pule to hahau mo hahau ia.” (Salamo 145:13) Ko e manamanatuaga he salamo ke he tuaga patuiki a Iehova ne matutaki, ne hiki e ia e “hana” ke he “hāu,” hagaao fakahako ne tau kupu liogi hana ke he Atua. Ko e moli, ko e pule a Iehova ne hukui he Kautu he Mesia ka e nakai uta e tuaga patuiki tukulagi he Atua. Ko e moli, ka hokotia e tau tagata omaoma ke he mitaki katoatoa, to liuaki age e Keriso e Kautu ke he hana a Matua. (1 Korinito 15:24-28) Ti ha ha he Atua e pule ke he “hahau mo hahau.” Ko e Patuiki a Iehova he magaaho ne tufugatia ai a Atamu mo e to ha ha ia ia e pule ke he tau tagata tututonu tukulagi.

9. Ke he Salamo 145, ko e heigoa e talahauaga ke lata ai mo e kupu ne kamata aki e matatohi Heperu ko e nun?

⁹ Ke he atu matatohi he salamo nei, ne tiaki ai he tohi Masoretic e taha kupu ne kamata aki e matatohi Heperu ko e nun. Ke lata mo e tohi Heleni, Septuagint, ko e tohi Siria ko e Peshitta, mo e tohi Roma ko e Vulgate, taha e tohi Heperu ne totou pehe: “Ne fakamoli a Iehova ke he hana a tau kupu oti, mo e lahi e fakalofa mo e totonu [poke fakamoli] ke he hana a tau gahua oti.” (New World Translation of the Holy Scriptures​—With References, matahui tala) Kua fakamoli oti he Atua hana a tau maveheaga mo e fakamoli, fakalofa, mo e totonu ki a lautolu oti ne fakaaue ke he hana a mahani mitaki.​—Iosua 23:14.

Nakai Kaumahala e tau Lagomatai a Iehova

10. ‘Lagomatai mai’ fefe e Iehova a tautolu?

¹⁰ Ne nakai tiaki he Patuiki Tukulagi e tau matematekelea he hana a tau fekafekau. Ati pehe ai a Tavita: “Kua toto hake e Iehova a lautolu oti kua veveli; ko ia foki kua fakatu hako a lautolu oti kua fakatolotolo.” (Salamo 145:14) Tali mai he vaha ha Apelu, ne lagomatai e Iehova Hana a tau tagata ne tapuaki ki a ia. Ka ne mai ko tautolu ni hoko tautolu, to lagaloga e veveli ha tautolu i lalo hifo he ha tautolu a tau kavega. Ne nakai ha ha ia tautolu e malolo ke fua aki e tau mamahi he mouiaga nei mo e tau favale ne moua e tautolu ha ko e tau tagata he Atua, ka e lagomatai e Iehova a tautolu. Ko e kupu gahuahua faka-Heperu ne fakaaoga he mena nei kua fakakite mai kua fakatumau ni e Atua ‘ke foaki mai ma tautolu e tau lagomatai.’ Ne mailoga foki ia Ioane Papatiso mo e Tama he Atua ne lagomatai ke lagaki hake e tau tagata hala ne veveli ke mahani mitaki. Ko e magaaho ne tokihala ai e tau tagata nei ti eke a lautolu mo tau fekafekau a Iehova, ti fiafia a lautolu ke he lagomatai fulufuluola tapu.​—Mataio 21:28-32; Mareko 2:15-17.

11. Ko e heigoa e puhala ne ‘fakatu hako e Iehova a lautolu oti kua fakatolotolo’?

¹¹ Ha ha i ai e mafanatia ke iloa ko Iehova ne ‘fakatu hake a lautolu oti kua fakatolotolo’ ha ko e tau kamatamata kehekehe. Kua fakafiafia e ia a lautolu ne fakaatukehe kua ha ha ia tautolu, fakamafana a lautolu ne momoko, mo e lagomatai a tautolu ke vagahau hana a kupu mo e malolo ka lauia ai a tautolu ke he favale. (Gahua 4:29-31) Ne nakai fakaata e ia e tau kavega ha tautolu ke fakapehia aki a tautolu kaeke ke talia e tautolu hana a lagomatai. (Salamo 55:22) Ke tuga e “tama fifine a Aperahamo” ne “kua fakatolotolo” ka e fakamalolo fakatino e Iesu a ia, ti kua lata ia tautolu ke “fakaaue atu . . . ke he Atua” he magaaho ka fakaalofa a ia ke lagaki hake a tautolu fakaagaga. (Luka 13:10-17) Ne tukutuku hifo a lautolu ne fakauku ke he liliaga a Papelonia ka e fakaaue ke he magaaho ne lagaki hake he Atua a lautolu he tau 1919, mo e lagaki hake foki e ia a lautolu ko e tau “mamoe kehe” tali mai he tau 1935.​—Ioane 10:16.

12. Ko e ha ne pehe ai ko e “hagaao atu . . . e tau mata he tau mena oti kana” mo e amaamanakiaga ke he Atua?

¹² Ne nakai tiaki e Iehova hana a tau tagata, tuga ne fakamahino mai e Tavita he pehe: “Kua hagaao atu kia koe e tau mata he tau mena oti kana; kua ta age e koe ha lautolu a mena kai ke he hana ni a aho. Kua fakamafola e koe hāu a lima, mo e fakamakona e manako he tau mena momoui oti.” (Salamo 145:15, 16) Kua tuga ni kua hagaao e tau mata he tau mena momoui oti ke he Pule he Lalolagi Katoatoa ke moua e amaamanakiaga. Ne hagaao e tau agelu ke he Atua ke tumau e tau momoui. Tuga ni e tama ne hagaao ke he matua ke he tau mena ne manako ki ai, ti pihia a tautolu ke he ha tautolu a Matua he lagi. Ko e moli, ko e mai ia ia e fakamouiaga he tau tagata mo e tau manu. Nakai maeke ia taha ke fakamamakona ha lautolu a tau manako. Ne foaki age he Atua ha “lautolu a mena kai ke he hana ni a aho,” kakano pehe a ia, ke he tau magaaho kua manako ki ai.

13. Ko e heigoa e tau puhala ha Iehova ne ‘fakamafola e ia hana a lima mo e fakamakona e manako he tau mena momoui oti’?

¹³ Ne ‘fakamafola he Atua hana a lima, mo e fakamakona e manako he tau mena momoui oti.’ (Salamo 104:10-28) Ko e moli, mamate e falu a manu ha kua nakai fai mena kai. Tokologa e tau tagata ne hoge ha kua lauia he mahani lotokai, mahani kelea, mo e fakaaoga hehe he tau koloa. Ko e taha mena foki, ne talahau tuai e Iesu, “to ha ha i ai e tau hoge” ko e taha mai he tau “fakamailoga” he hana a liu haele mai ke he tau aho fakahiku. (Mataio 24:3, 7) Ka e nakai tutupu mai e tau mena nei ha ko Iehova kua lamakai po ke nakai maeke ke foaki mai. Manamanatu la ke he afe he tau miliona he tau mena momoui ne fagai ai e ia! Ko e taha mena foki, ko e fakakite mai he salamo nei e amaamanakiaga ki lalo he pule he Kautu, ka ‘nakai pule ai taha tagata ke he taha, ke kelea ai a ia ni,’ to fakamakona he Atua ha tautolu a tau manako ke he tau koloa mo e manako fakaagaga. (Fakamatalaaga 8:9; Isaia 25:6) Pihia ni e vaha nei, ne nakai hoge a tautolu ke he tau mena kai fakaagaga, ha ko e mena foaki fakalahi mai he Atua ke he hana ni a vaha, puhala mai he “fekafekau fakamoli mo e loto matala.” (Mataio 24:45-47; 1 Peteru 2:2) Ko e vagahau fakaagaga, ko e tau Fakamoli a Iehova ni e tau tagata ne fagai mitaki lahi he lalolagi. Fakakite nakai e koe e fakaaue lahi mahaki ke he tau fua loga ia?

Puipui e Iehova a Lautolu ne Fakaalofa ki a Ia

14. Ko e ha ne pehe ai a Tavita “kua tututonu a Iehova ke he hana tau mahani oti; kua fakamoli ke he hana tau gahua oti”?

¹⁴ Ko e goagoa ha tautolu ke ‘fakakeukeu ai ha tautolu a puhala’ mo e moua mai e tau mena uka ki luga ia tautolu, ka e nakai tuku e tautolu e kelea ke he Atua ha ko e tau mena vihi nei. (Fakatai 19:3) Fakakite mai e Tavita e kakano ke he tau kupu nei: “Kua tututonu a Iehova ke he hana tau mahani oti; kua fakamoli ke he hana tau gahua oti.” (Salamo 145:17, NW) Gahua tumau e Atua ke he tau puhala hako, tonu, mo e fakaalofa hofihofi. Mua ue atu e moli he hana a fakaalofa he hana a foaki mai he fakamouiaga ne puhala mai he lukutoto ha Iesu. (Gahua 2:21; 4:8-12) Ko Iehova foki “kua fakamoli ke he hana a tau gahua oti,” mahani fakamoli tumau, fakaalofa, mo e nakai fakamailoga tagata. Ha ko e tau “fifitaki . . . ke he Atua,” kua lata ni a tautolu ke mahani hakohako, tonu, fakaalofa hofihofi noa, nakai fakamailoga tagata, mo e fakamoli.​—Efeso 5:1, 2; Teutaronome 32:4; Salamo 7:10; 25:8; Isaia 49:7; Gahua 10:34, 35.

15. Kua ‘ui fefe a tautolu ke he Atua mo e fakamoli,’ mo e ko e heigoa e fua ha kua ui pihia a tautolu?

¹⁵ Ha kua tututonu mo e fakamoli e Atua, ne toho fakatata a tautolu ki a ia. Ko e taha mena foki, ne fakamoli mai e Tavita kia tautolu: “Kua tata mai a Iehova kia lautolu oti kana ne ui atu kia ia, ko lautolu oti ne ui kia ia mo e fakamoli.” (Salamo 145:18) Ko e papatisoaga ha ko e tau tagata kua tali tonu mo e tukulele, ne ui a tautolu ke he higoa a Iehova. (Gahua 8:12; 18:8; Roma 10:10-15) Ha kua fakatata a tautolu ke he Atua, ti fakatata foki a ia ki a tautolu. (Iakopo 4:8) Ko tautolu “ne ui kia ia mo e fakamoli,” kakano ha ko e mena taute ne tautolu ke he puhala moli ia Iesu Keriso. To tumau e fakatata ha Iehova kaeke ke tapuaki a tautolu ki a ia mo e “agaga mo e fakamoli,” fakakiteaga he “tua fakamoli,” ha ‘kua fakauka tuga ne mena kua kitia a Ia nakai kitia.’ (Ioane 4:23, 24; 1 Timoteo 1:5, Heperu 11:27) Ti nakai liogi noa a tautolu, po ke feleveia tokotaha mo e lalolagi ha Satani, ka e tumau a tautolu ke fiafia ke he lagomatai mo e fakatonuaga tapu. (Salamo 65:2; 1 Ioane 5:19) Ko e hagahaga mitaki ni ka moua.

16. Ko e ha mo e ‘taute fefe e Iehova e tau manako ha lautolu ne matakutaku ki a ia’?

¹⁶ Ha ha ia tautolu e mafola moli ha ko e falu mena foki ne taute e Iehova ma tautolu. Ne pehe a Tavita: “Kua eke e ia e mena kua manako ki ai a lautolu kua matakutaku kia ia; to fanogonogo a ia ke he ha lautolu a kalaga atu, ti fakamoui e ia a lautolu.” (Salamo 145:19) Ko Iehova ne ‘eke e ha tautolu a tau manako’ kakano ha kua ha ha ia tautolu e fakalilifu lahi ke he Atua mo e matakutaku ke nakai fakafiafia a ia. (Fakatai 1:7) Ko e tau loto omaoma ha tautolu ne omoi a tautolu ke taute e tukuleleaga ki a Iehova, mo e ha tautolu a manatu, “Kia eke hau a finagalo.” Ha ko e hana a finagalo ne fakapuloa e tautolu e fekau he Kautu, ne fakamoli e ia e ha tautolu a tau manako ke taute e gahua ia. (Mataio 6:10; Mareko 13:10) Ne ‘taute he Atua ha tautolu a manako’ ha ko e mena nakai liogi mo e lotokai a tautolu ka e ole ni ke he tau mena ne felauaki mo e hana a finagalo. Ne foaki mai e ia e tau mena ne lata mo e hana a finagalo mo e mitaki foki ai na tautolu.​—1 Ioane 3:21, 22; 5:14, 15; Fakatatai mo e Mataio 26:36-44.

17. Ko e ha e mena ne mauokafua ai a tautolu ko e ha tautolu a “tagi ke lagomatai” to logona ia he Atua?

¹⁷ Ha ko e tau Fakamoli tumau a Iehova, to fakamoli tumau ha tautolu a “tagi ke lagomatai” ha ko e mena nakai to ia, ke he tau teliga tuli. Ne fakahao mai he Atua a Tavita mai he malaia mo e fakahao foki a Iesu, ne fakaliu tu mai foki a ia he mate. I lalo hifo he totoko he tau fi, mua atu ke he totoko ha Koku, to mauokafua a tautolu ke fakahao mai e Iehova. (Esekielu 38:1–39:16) Ko e moli, ke he ha magaaho matematekelea, kia tuga a Tavita a tautolu ke liogi mo e malolo: “Iehova na e, kia fakaalofa mai a koe kia au, ha kua matematekelea au . . . Ha kua logona e au e tokologa ne eke fakakelea mai; kua agaagai au he matakutaku, he pulega fakalataha a lautolu kia au, ne eke lagatau e lautolu ke mate ai au. Ka ko au nai, kua tua au kia koe Iehova na e, kua pehe atu au, Ko koe ni ko e haku a Atua.”​—Salamo 31:9-14.

18. Aoga fefe ma tautolu ke iloa ko e ‘leoleo’ e Iehova a lautolu oti ne fakaalofa ki a ia, ‘ka e tamate a lautolu oti kana kua mahani kelea’?

¹⁸ Ne mautali tumau e Atua ko Iehova ke lagomatai a tautolu. Tuga he vagahau e Tavita: “Kua leoleo e Iehova a lautolu oti kua fakaalofa kia ia; ka e tamate e ia a lautolu oti kana kua mahani kelea.” (Salamo 145:20) E, ka fakaalofa a tautolu ke he Atua, to fakamonuina mo e leveki e ia a tautolu. (Numela 6:24-26) Ne ‘taui fakalahi e ia a lautolu kua mahani fakatokoluga’ ka e puipui hana a tau fekafekau holoilalo, nakai fakaata ha mena ke mamahi tukulagi a lautolu. Ha kua fakalataha a Iehova mo tautolu, kia tumau e fakamalolo ha tautolu. (Salamo 31:20-24; Gahua 11:19-21) ‘To nakai fai ka­nava­akau ke tau mai kia tautolu ka kautu.’ (Isaia 54:17; Salamo 9:17; 11:4-7) Pihia la he logona e lautolu ne fakamoli ha lautolu a fakaalofa ke he Atua ko e hana a tau fekafekau fakamoli mo e fakatapu. Ko e matakau, to hao atu e tau Fakamoli a Iehova mai he “matematekelea lahi” ka fakahoko ke he tau tagata mahani kelea. (Fakakiteaga 7:14) Ko e fakamonuinaaga e fakahako he mena vihi lahi he tuaga patuiki a Iehova ke he lalolagi katoatoa ma “lautolu oti kua fakaalofa kia ia.”

Fakatumau ke Fakamonuina e Higoa Tapu a Iehova

19. Ko e ha e tau gutu ha tautolu ne vagahau e tau “fakahekeaga a Iehova”?

¹⁹ Ne fakaoti e Tavita e Salamo hokulo nei ke he tau kupu: “To talahau atu hoku gutu e fakahekeaga a Iehova; to fakamonu atu ke he hana higoa tapu e tau tagata oti kana tukulagi tukumuitea.” (Salamo 145:21) Ha ko e tau Fakamoli a Iehova, ne fakaaue a tautolu ke he mua ue atu, mahani mitaki, patuiki totonu, nakai kaumahala ke lagomatai, mo e leveki nakai lolelole mai he Atua. Tuga a Tavita, ko e tau gutu ha tautolu ke vagahau e tau fakahekeaga he Atua. Ne omoomoi a tautolu ke tapuaki ni kia ia tokotaha, fakaaue ki a ia ke he hana a tau fakamonuiaga loga, mo e fakaheke hana a ­“higoa lilifu.”​—1 Nofoaga he Tau Patuiki 29:10-13; Esoto 20:4-6.

20. Ka manamanatu a tautolu ke he moui tukulagi tukumuitea, ko e heigoa ha tautolu ka fakamakamaka ki ai ke he magaaho nei?

²⁰ Ha kua fakamonuina e Iehova a tautolu ke he tau aho oti, o mai a ke fakaheke tumau ki a ia, po ke talahaua mitaki a ia. Kia fakamakutu e fakamatala he tala mitaki ke fakaheke ke he Atua, talahau ke he falu to hoko fakamafiti ke ‘fakamonuina he tau tagata oti kana e hana a higoa tapu.’ To fulufuluola ke momoui ke he magaaho ka fakalataha oti e tau tagata he lalolagi​—ko e moli, ko e tau mena momoui lotomatala oti he lalolagi—​ke lologo e tau fakahekeaga ke he ha tautolu a Matua he lagi! (Salamo 148:1-13) Fakamonuina ki a Iehova he fakakite mai hana a higoa mo e tuku mai ki a tautolu e fakamonuinaaga ke eke mo tau Fakamoli hana. (Salamo 83:18; Isaia 43:10-12) Kia gahua a tautolu ke he mahani kua lata mo lautolu ne fakatapu e higoa ia mo e liogi ma e hana a fakatapuaga. (Luka 11:2) Kia fekafekau fakamoli a tautolu ke he Atua, ti ka hoko ke he hana a fakatokaaga fou, to logona ai ha tautolu a tau leo ke he lologo ha lautolu ne fakamonuina e higoa a Iehova tukulagi.

Ko e Heigoa Hau a tau Tali?

◻ Ko e heigoa ha tautolu ka taute ka uho e tuaga patuiki a Iehova ki a tautolu?

◻ Hukui he heigoa e tuaga patuiki he Atua he vaha nei?

◻ Taute fefe e Iehova ke ‘fakatu hake a lautolu oti kua fakatolotolo’?

◻ Ko e tau puhala fefe ne ‘fakamafola he Atua hana a lima mo e fakamakona e manako he tau mena momoui oti’?

◻ Maeke fefe ia tautolu ke fakaheke e higoa tapu a Iehova?

[Fakatino he lau 13]

Ke he tau 1922, ko e tau kupu ‘fakapuloa e Patuiki mo e Kautu’ ne omoi e tau tagata ne kau fakalataha mo e tuaga patuiki a Iehova ke he tau gahua lalahi