Fai Taui e Fakaalofa Moli
“Ha ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”—HEPERU 6:10.
1, 2. Ko e ha e fakaalofa moli ne fai taui ai ma e tagata ni?
KO E fakaalofa nakai fulukovi ko e taha na mahani mua ue atu, mo e lilifu lahi, ko e fuafuaaga ne uho lahi kua maeke ia tautolu ke fakakite. Ko e fakaalofa nei (Heleni, a·gaʹpe) kua lahi e tau mena ne ole tumau mai ki a tautolu. Ha ko e mena tufugatia he Atua fakafili tonu mo e fakaalofa a tautolu, ko e mena haia ne mailoga e tautolu e fai taui e fakaalofa nakai fulukovi. Ko e ha ne pihia ai e mena nei?
2 Ko e taha kakano ne taui e fakaalofa moli ha kua putoia ai e mahani ke tupu mai e tau gagao he manamanatuaga, ha ko e lauiaaga he tau manatu mo e logona hifo ke he ha tautolu a tau tino. Ko e taha pule he gagao fakaatukehe ne pehe: “‘Fakaalofa ke he hau a katofia’ ko e taha na valavala pulotu lahi a nei he fakatonuaga fakaekekafo ne talimai kua foaki.” E, “ko e tagata totonu kua eke fakamitaki atu e ia a ia ni.” (Fakatai 11:17) Tatai ne aoga mo e tau kupu nei: “To fakamuhu mena ai e tagata fakamokoi; ko ia foki kua fakamalū atu ke he falu, to fakamalū ai foki a ia.”—Fakatai 11:25; Fakatatai mo e Luka 6:38.
3. Ko e heigoa he Atua ne taute ke fai taui e fakaalofa moli?
3 Fai taui foki e fakaalofa, kakano ha ko e mena taui he Atua e nakai fulukovi. Ne totou e tautolu: “Ko ia kua fakaalofa ke he tagata nofogati kua ta age e ia hana a tau mena kia Iehova; to taui mai foki e ia [Atua] e tau mena ne ta age kia ia.” (Fakatai 19:17) Ne gahua e tau Fakamoli a Iehova ke felauaki mo e tau kupu nei ke he ha lautolu a fakapuloaaga he tala mitaki he Kautu he Atua. Ne iloa e lautolu ko e ‘mena nakai hepehepe e Atua ke nimo ha lautolu a tau gahua mo e fakaalofa ne fakakite e lautolu ke he hana a higoa.’—Heperu 6:10.
Ha Tautolu a Fakafifitakiaga Mitaki
4. Ko hai ne taute e fakafifitakiaga mitaki he fakaalofa moli ne fai taui, mo e taute fefe e ia?
4 Ko hai ne foaki e fakafifitakiaga mitaki, ke he fakaalofa moli ko e mena fai taui? Ko e ha, kua nakai foaki mai he taha, ka ko e Atua ni! “Nukua pihia e fakaalofa mai he Atua ke he lalolagi [he tau tagata] kua ta mai ai hana Tama fuataha.” (Ioane 3:16) Ko e foakiaga he hana a Tama ke maeke ia lautolu ne talia e lukutoto ke moua e moui tukulagi, kua moli e totogi lahi kia Iehova, mo e fakakite fakamahino mai kua ha ha i ai tokoua ia ia e fakaalofa mo e maama e tau logonaaga he falu. Ne fakakite fakamoli mai foki he tau ‘magaaho ne matematekelea oti a Isaraela i Aikupito, kua matematekelea kia ia.’ (Isaia 63:9) Ne mua atu e matematekelea a Iehova he kitia hana a Tama ne mamahi ke he akau fakakikiveka mo e logona a ia ne tagi fakalahi: “Hoku Atua na e, hoku Atua na e, ko e heigoa e mena kua tiaki mai ai e koe au?”—Mataio 27:46.
5. Ko e heigoa kua fakamoli ha ko e fakaalofa hofihofi he Atua ke he lalolagi ati foaki e ia hana Tama mo poa?
5 Moua nakai e Iehova mai he hana a fakaalofa moli e taui? Ne moua moli e ia. Ne mua ue atu e tali, ne maeke he Atua ke liti ke he mata he Tiapolo ha kua tumau e fakamoli a Iesu pete ni he loga e tau mena ha Satani ne taute ki a ia! (Fakatai 27:11) Ko e moli, ko e tau mena oti he Kautu he Atua ka kautu he fakamea e higoa a Iehova he tau ekefakakelea, liuaki mai e Parataiso ke he lalolagi nei, mo e foaki ke he tau miliona e moui tukulagi, to fakamoli ni ha ko e fakaalofa hofihofi he Atua ke he lalolagi, ati foaki ai hana a koloa uho he loto mo poa.
Fakafifitakiaga Mitaki ha Iesu
6. Omoi he fakaalofa a Iesu ke taute e heigoa?
6 Ko e taha fakafifitakiaga mitaki kua fakamoliaki ko e fai taui e fakaalofa moli, ko e tama ni he Atua, ko Iesu Keriso. Ne fakaalofa a ia ke he hana a Matua he lagi, ti ko e fakaalofa ia ne omoi aki a Iesu ke taute e finagalo a Iehova ke he tau taui oti. (Ioane 14:31; Filipi 2:5-8) Ne fakakite tumau e Iesu hana a fakaalofa ke he Atua pete ni he ole a ia ke he hana a Matua ke he falu a magaaho mo e “tagi lahi mo e tau hihina mata.”—Heperu 5:7.
7. Ke he heigoa e tau puhala ne moua he fakaalofa moli ha Iesu e tau taui?
7 Fai taui nakai a Iesu ha ko e fakaalofa poa pihia? Ne taui moli a ia! Manamanatu la ke he fiafia ne moua e ia ha ko e tau mena mitaki oti ne taute e ia ke he hana a tolu mo e hafa e tau ke he fekafekauaga. Ne lagomatai lahi e ia fakaagaga mo e ke he tino e tau tagata! Ka e mua atu, he fakakite ko e maeke he tagata mitaki katoatoa ke tumau e fakamoli ke he Atua pete ne loga e tau fakalavelave ha Satani ki a ia, ne ha ha ia Iesu e makonaaga he fakamoli ko e pikopiko e Tiapolo. Ko e taha mena foki, ha ko e fekafekau fakamoli he Atua, ne moua e Iesu e taui lahi mahaki ko e moui nakai fai mate ke he liu tumai hana ke he moui he lagi. (Roma 6:9; Filipi 2:9-11; 1 Timoteo 6:15, 16; Heperu 1:3, 4) Ha ha i ai foki e tau fakamonuinaaga fulufuluola ki mua hana ke he aho a Amaketo mo e hana a Pule ke he Afe Tau, ka liuaki mai e Parataiso ke he lalolagi mo e afe e tau miliona ka liliu tutu mai he mamate! (Luka 23:43) Ne nakai fai huhu, kua moua e Iesu e fakaalofa moli, ke fai palepale.
Fakafifitakiaga ha Paulo
8. Ko e heigoa ne iloa e Paulo ha ko e hana a fakaalofa moli ke he Atua mo e hana a katofia?
8 Ko e aposetolo ko Peteru ne huhu ki a Iesu: “Kitiala, kua toka e mautolu e tau mena oti, ka e mumui atu kia koe; ko e heigoa e mena ke moua ai e mautolu?” Ko e vala he tali ha Iesu: “Kaeke ke toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina, ha ko e haku a higoa, to moua e ia takiteau māna, to eke foki māna e moui tukulagi.” (Mataio 19:27-29) Ha ha ia tautolu foki e fakafifitakiaga mitaki lahi ke he mena nei ke he aposetolo ko Paulo, ne fiafia ke he loga e tau fakamonuinaaga, ne tohi pauaki mai e Luka i loto he tohi ha Gahua. Ko e fakaalofa moli ke he Atua mo e hana a katofia ne omoi a Paulo ke toka hana a gahua lilifu lahi he Farasaio. Manamanatu foki la ke he tau fakauka ha Paulo ke he tau fahi, tau fetamakina ke mate, tau hagahaga kelea mo e tau hoge mo e nakai fai mena ke fakamalu ai—ko e tau mena oti nei ha ko e fakaalofa fakamoli ke he Atua mo e Hana a fekafekauaga tapu.—2 Korinito 11:23-27.
9. Taui fefe a Paulo he fakakite e fakaalofa moli?
9 Taui nakai e Iehova a Paulo, ha ko e fakafifitakiaga mitaki lahi he fakakite atu he fakaalofa moli? Manamanatu la ke he tau fua ne moua e Paulo ke he hana feua fakamatala. Ne maeke ia ia ke fakatu e taha fakapotopotoaga Kerisiano mo e taha atu foki ti pihia fakahaga. Mo e tau mana ne foaki age he Atua e malolo ke taute e ia! (Gahua 19:11, 12) Ne monuina foki a Paulo ke kitia e tau fakakiteaga mo e tohia 14 e tau tohi ne putoia ai ke he tau Tohiaga tapu Kerisiano faka-Heleni. Ke fakafoufou oti aki e tau mena nei, ko e totogi he moui nakai maeke ke mate ke he lagi ne foaki age ki a ia. (1 Korinito 15:53, 54; 2 Korinito 12:1-7; 2 Timoteo 4:7, 8) Ne kitia moli e Paulo ko e taui he Atua e fakaalofa moli.
Fai Taui e Fakaalofa Moli he Vaha ha Tautolu
10. Liga ko e heigoa e totogi kaeke ke eke a tautolu mo tau tutaki a Iesu mo e talahau ha tautolu a fakaalofa ma Iehova?
10 Ne moua pihia foki he tau Fakamoli a Iehova he vaha nei kua taui mitaki e fakaalofa fakamoli. Ko e fakakiteaga he ha tautolu a fakaalofa ma Iehova ha ko e ha tautolu a kau kia ia mo e eke foki a tautolu mo tau tutaki a Iesu, to liga uta kehe foki ha tautolu a tau momoui ha ko e tau tagata fakamoli. (Fakatatai mo e Fakakiteaga 2:10) Ko e mena haia ne pehe ai a Iesu ke totou e totogi. Ka e nakai taute e tautolu e mena ia ke fifili aki ko e fai po ke nakai fai taui ka eke ko e tutaki. Ka ko e taute pihia e tautolu ke taute mau a tautolu ke totogi e taui he gahua tutaki.—Luka 14:28.
11. Ko e ha ne kaumahala ai e falu ke tukulele e tau momoui ke he Atua?
11 Ko e vaha nei, tokologa—kua nakai fakauaua ko e tau miliona—ne talitonu ke he fekau ne tamai he tau Fakamoli a Iehova ki a lautolu mai he Kupu he Atua. Ka e tolomuli ni ki tua a lautolu ke tukulele atu ha lautolu a tau momoui ke he Atua mo e papatiso. Kua pihia ka, e mena nei ha ko e ha lautolu a nakai fakaalofa moli ke he Atua ne ha ha i ai he falu? Ne tokologa ne kaumahala ke taute e tau lakaaga he tukulele mo e papatiso, ha kua manako a lautolu ke fakafiafia he hoa ne nakai ha ha i ai e tua. Ha ha i ai e falu ne nakai fakatata ke he Atua ha kua ha ha ia lautolu e manamanatuaga he tagata fakatu gahua ne tala age ke he taha Fakamoli: “Ne loto au ke he hala.” Kua moli, ko e vahega tagata pihia ne nakai fai fakaaue ke he tau mena oti ne taute he Atua mo Keriso ma lautolu.
12. Ko e heigoa ne talahau he senolo nei ne fakakite fakalahi e tau taui he lotomatala ne toho fakatata atu a tautolu ke he Atua ha ko e fakaalofa moli?
12 Kaeke ke ha ha ia tautolu e fakaaue moli ke he tau mena oti ne taute he Atua ko Iehova mo Iesu Keriso ma tautolu, to fakakite aki e tautolu e fiafia ke totogi ha totogi ni he tau totogi ke fekafekau ke he ha tautolu a Matua he lagi mo e eke ai mo taha he tau tutaki a Iesu. Ha ko e fakaalofa moli ke he Atua, tau tagata tane mo e tau fifine he tau momoui kehekehe—tau tagata fakatu gahua ne monuina lahi, tau tagata sipoti mahuiga, mo e pihia atu foki—ne kua tautui e tau feua ne kumi mana ni, aki e fekafekauaga Kerisiano, tuga ne taute he aposetolo ko Paulo. Mo e nakai uta e lautolu ha mena taha, ke tautui aki e tau taui, he iloa mo e fekafekau ke he Atua. Hagaao ke he mena nei, ne lagataha e pehe he Watch Tower (Kolo Toko): “Ne huhu a mautolu ke he falu a magaaho, Toko fiha e tau matakainaga ne fiafia ke uta e tau afe tala ha ko e Kupu Moli ne iloa e lautolu? Ne nakai kitia ha lima! Ko hai ka uta e hogofulu e afe tala? Nakai fai! Ko hai ka uta e miliona e tau tala? Ko hai ka uta e lalolagi katoa ke taui aki e tau mena hana ne iloa ki a ia ne Tapu mo e Fakatokatokaaga Tapu? Nakai fai tagata. Ne pehe foki a mautolu, Nakai ko e tau tagata nakai fiafia a mutolu tokologa, ma tau kapitiga fakahelehele. Kaeke ke logona e mutolu e muhu mena ti nakai uta ha mena taha ti taui aki e lotomatala ha mutolu ke he Atua, ti logona e mutolu e muhu mena tuga ni a mautolu.” (Tesema 15, 1914, lau tohi 377) E, ko e maama moli ke he Atua mo e hana a finagalo ka toho fakatata a tautolu ki a ia he fakaalofa moli ne fai taui moli.
13. Kua lata ke fefe e onoonoaga ha tautolu ke he kumikumiaga fakatagata?
13 Kaeke ke fakaalofa a tautolu ke he Atua, to fakamakamaka a tautolu ke iloa mo e taute hana a finagalo. (1 Ioane 5:3) To fakamakamaka a tautolu ke he kumikumi fakatagata, liogi, mo e o atu tumau ke he tau feleveiaaga Kerisiano. Ko e tau mena oti nei kua lata ke poa he tagata a ia, ha kua putoia he tau gahua oti nei e tau magaaho, malolo, mo e falu a koloa foki. To liga fifili e tautolu ko e kitekiteaga ke he tau fakaholoaga he televisoni po ke taute he kumikumiaga Tohi Tapu fakatagata. Ti moua e tautolu e malolo lahi fakaagaga, mo e fakamatala mo e lotomatala lahi ke he falu, mo e moua lauka lahi mai he tau feleveiaaga Kerisiano kaeke ke fakamakutu e kumikumi fakatagata mo e fakaata pauaki e tau magaaho ke he gahua ia!—Salamo 1:1-3.
14. Fefe e aoga he liogi mo e fakafetuiaga mitaki mo e Atua ko Iehova?
14 Fiafia tumau nakai a tautolu ke tutala ke he ha tautolu a Matua he lagi ha ko e ‘fakamakamaka ke he liogi’? (Roma 12:12) Po ke lavelave lahi a tautolu ke taute fakamitaki e fakamonuinaaga uho nei? Ko e ‘liogi fakamakamaka’ ko e puhala ne mua atu e aoga ke fakamalolo aki ha tautolu a fakafetuiaga mo e Atua ko Iehova. (1 Tesalonia 5:17) Ti nakai ha ha i ai ha mena mitaki ke tuga e fakafetuiaga mitaki mo Iehova ke lagomatai aki a tautolu ka feleveia mo e tau kamatamata. Ko e heigoa, ati maeke ai ia Iosefa ke totoko ke he magaaho ne kamatamata ai he hoana a Potifara? Mo e ko e ha, ne nakai oti ai e liogi ha Tanielu ke he magaaho ne nakai maeke he fakatufono Metai mo Peresia a ia ke ole ki a Iehova? (Kenese 39:7-16; Tanielu 6:4-11) Ko e ha, ko e fakafetuiaga mitaki mo e Atua ne lagomatai aki e tau tagata ia ke kautu, ti pihia ni ka lagomatai a tautolu ke taute foki pihia!
15. Kua lata ke fefe ha tautolu a onoonoaga ke he tau feleveiaaga Kerisiano, mo e ko e ha?
15 Ti fefe e fakamakutu ha tautolu ke o atu ke he tau feleveiaaga ne lima he fahi tapu? Toka ka, e tautolu e mategugu, ko e hagahaga kelea fakatote he tino, po ke matagi kelea tote ke fakalavelave mo e ha tautolu a gahua, ke nimo e fakapotopoto fakalataha mo e tau matakainaga ne ha ha i ai e tua? (Heperu 10:24, 25) Taha e tagata Amerika totogi mitaki he gahua ke he tau matini ne kitia e fakalavelave he gahua hana mo e hana a fakalataha ke he tau feleveiaaga Kerisiano. Ne hiki e ia hana a gahua, talia ke to hifo ai hana a totogi ke maeke ia ia ke finatu tumau ke he tau feleveiaaga he fakapotopotoaga. Maeke he tau feleveiaaga ha tautolu ke fakafiafia a tautolu ha ko e feutaaki he tau fakamafanaaga mo e fefakamaloloaki e tua he taha mo e taha. (Roma 1:11, 12) Ke he tau mena oti nei, nakai kia moua e tautolu e mena ha “ko ia kua fakalahi hana a saito kua gana, to fakalahi foki hana helehele mai”? (2 Korinito 9:6) E, ko e fakakite he fakaalofa moli ke he tau puhala pihia kua moua e tau taui.
Fakaalofa Moli mo e ha Tautolu a Fekafekauaga
16. Kua liga ko e heigoa e fua ka omoi he fakaalofa a tautolu ke fakamatala he tau magaaho noa?
16 Ko e fakaalofa ne omoi a tautolu ke fakamatala e tala mitaki ha ko e tau tagata a Iehova. Tuga pehe, kua omoi a tautolu ke fakamatala ke he ha tau magaaho noa. Liga to fakauaua a tautolu ke fakamatala ke he tau magaaho noa, ka ko e fakaalofa, to fakaohooho a tautolu ke vagahau. Ko e moli, ko e fakaalofa ne maeke ia tautolu ke manamanatu ke he tau puhala kua lata ke kamata aki e fakatutalaaga ti takitaki atu ke he Kautu. Ke fakatai aki: Ki loto he vakalele, ko e Kerisiano motua fakaagaga ne nofo he tapa he akoako Katolika. Ko e kamataaga, ko e matakainaga motua ne huhu ke he akoako e tau huhu nakai fai taufetoko. Ne hoko ke he magaaho ke fano kehe mai e akoako he vakalele, ko e mena ia, ko e hana a fiafia ne fakaohooho a ia ke uta ua mai he tau pepa ha tautolu. Ko e fua mitaki ha ko e fakamatala ke he magaaho noa!
17, 18. Maeke he fakaalofa ke fakaohooho a tautolu ke taute e heigoa hagaao ke he fekafekauaga Kerisiano?
17 Ko e fakaalofa moli foki ne fakaohooho a tautolu ke gahua fakalataha tumau ke fakamatala ke he taha fale mo e taha fale mo e falu a gahua foki he fekafekauaga. Ke he hokoaga, kua maeke ia tautolu ke taute e tau fakatutalaaga Tohi Tapu, to tamai e tautolu e fakalilifu ke he Atua ko Iehova mo e lagomatai e tau tagata tuga e tau mamoe ke o atu he puhala ke he moui tukulagi. (Fakatatai mo e Mataio 7:13, 14.) Pete ni nakai maeke ia tautolu ke fai fakatutalaaga Tohi Tapu, ko e ha tautolu a malolo to nakai fano noa. Ko e ha tautolu a hoko atu ke he tau kaina he tau tagata kua eke ai mo fakamoliaga, mo e ko e mena aoga ki a tautolu e fekafekauaga, ha ko e mena nakai maeke ia tautolu ke fakapuloa e tau kupu moli he Tohi Tapu mo e nakai fakamalolo ha tautolu a tua. Ko e moli, ko e mahani fakatokolalo ke maeke ke gahua ke he taha fale mo e taha fale, ‘kua eke e tau mena oti ke lata mo e tala mitaki, ke maeke ia tautolu ke uta atu a ia ke he falu.’ (1 Korinito 9:19-23) Ha ko e fakaalofa ke he Atua mo e tau tagata, ne gahua a tautolu mo e fakatokolalo mo e kua taui aki e tau monuina uho.—Fakatai 10:22.
18 Ko e fakaalofa foki ne maeke he tau fekafekau a Iehova ke fai manamanatu fakamakutu ke taute e tau liliu aahi atu ke he tau tagata ne fiafia ke he kupu moli he Tohi Tapu. Kua taute e tau aoga Tohi Tapu ke he taha fahi tapu mo e taha fahi tapu mo e taha mahina mo e taha mahina ko e fakakiteaga he fakaalofa ke he Atua mo e katofia, ha kua putoia he gahua nei e tau magaaho, malolo, mo e falu a koloa foki. (Mareko 12:28-31) Ka e taha e mena, ka kitia e tautolu taha mai ha lautolu ne fakaako Tohi Tapu ka taute ke papatiso mo e liga gahua tumau ke he fekafekauaga, nakai kia fakamoli mai ki a tautolu, kua moua e taui he fakaalofa moli?—Fakatatai mo e 2 Korinito 3:1-3.
19. Ko e heigoa e fakafetuiaga ke he vahaloto he fakaalofa mo e gahua fekafekau mau?
19 Ko e fakaalofa nakai fulukovi ke omoi aki a tautolu ke poa e tau koloa hagahaga mitaki ke lata mo e gahua mau, kaeke kua maeke ia tautolu ke gahua ke he tau vahega gahua pihia. Ko e afe mo afe he tau Fakamoli a Iehova kua maeke ke talahau fakamoli ko e fakakiteaga he ha lautolu a fakaalofa ke hoko atu pihia ne moua ai e tau taui lalahi. Kaeke kua maeke hau a moui ke gahua mau ke he fekafekauaga ka e nakai fakaaoga fakamitaki e koe, ne nakai iloa e koe e tau monuina hau kua fakatonoa e koe.—Fakatatai mo e Mareko 10:29, 30.
Taui Mai ke he Falu Puhala
20. Lagomatai fefe he fakaalofa a tautolu ke fefakamagaloaki?
20 Ko e taha puhala ne taui foki e fakaalofa moli ko e lagomatai a tautolu ke fefakamagaloaki. E, ko e fakaalofa “nakai talahaua e kelea ke he taha.” Ko e moli, “ha ko e fakaalofa ke ufiufi ai e tau hala loga.” (1 Korinito 13:5; 1 Peteru 4:8) Kua kakano nakai e “loga” ko e loga lahi e tau agahala, kua pihia nakai? Mo e taui mitaki ka fefakamagaloaki! Ka fakamagalo atu a koe, ti maeke ia koe mo ia ne hala ki a koe ke logona hifo e mitaki he tau manatu. Ka ko e mena ne mua atu e aoga ko e moli kaeke kua fita he fakamagalo atu ki a lautolu ne hala mai ki a tautolu ti nakai amaamanaki a tautolu ke fakamagalo e Iehova a tautolu.—Mataio 6:12; 18:23-35.
21. Lagomatai fefe he fakaalofa moli a tautolu ke mahani omaoma?
21 Ko e taha mena foki, ne fai taui foki e fakaalofa moli ke lagomatai aki a tautolu ke mahani omaoma. Kaeke ke fakaalofa a tautolu ki a Iehova, ti fakatokolalo a tautolu ki lalo hifo he hana a lima malolo. (1 Peteru 5:6) Ko e fakaalofa foki ki a ia ke omoi a tautolu ke omaoma ke he hana kanavaakau fifili, “ko e tupa fakamoli mo e lotomatala.” Kua putoia he mena nei e omaoma ki a lautolu ne takitaki ke he fakapotopotoaga. Fai taui e mena nei ha ko e mena ka kaumahala ke taute pihia, ko e mena ke “moumou” aki a tautolu. (Mataio 24:45-47, NW; Heperu 13:17, NW) Ko e moli, ko e fakatufono nei ke mahani omaoma, maeke foki ke taute ki loto he magafaoa. Fai taui e puhala nei, kakano he moua mai e fiafia he magafaoa, mafola, mo e felauaki mitaki mo e moua mai e tautolu e mauokafua he iloa e tautolu ko e fakafiafia e tautolu e Atua.—Efeso 5:22; 6:1-3.
22. Maeke fefe ia tautolu ke fiafia moli?
22 Kua maama mitaki tuai, ko e mahani ne mua ke taute e tautolu ko e a·gaʹpe, ko e vahega fakaalofa nakai fulukovi. Ti nakai fakauaua, ko e fai taui e fakaalofa fakamoli. Ti ko e mena ia ke fiafia moli a tautolu, kaeke ke taute mo e fakakite e mahani nei ke fakalaulahi atu ke he lilifu he ha tautolu a Atua fakaalofa ko Iehova.
To Taute Fefe a Koe?
◻ Ko e tau puhala fefe he Atua ko Iehova ne fakakite aki e fakaalofa moli?
◻ Fakakite fefe e Iesu Keriso e fakaalofa?
◻ Ko e heigoa e fakafifitakiaga ne fakatu e Paulo ke he fakakiteaga he fakaalofa moli?
◻ Fakakite fefe he tau Fakamoli a Iehova e fakaalofa?
◻ Ko e ha ne pehe ai a koe ko e fai taui e fakaalofa moli?
[Fakatino he lau 14]
Ko e fakaalofa he Atua ke he tau tagata ne omoi a ia ke foaki mai hana a Tama ke maeke ia tautolu ke moua e moui tukulagi. Fakaaue nakai a koe ke he fakaalofa moli pihia?
[Fakatino he lau 16]
Ko e fakaalofa moli ki a Iehova ne omoi aki a tautolu ke “fakamakamaka ke he liogi”