Maeke Fefe ia Tautolu ke Taute mo e Nakai Fulukovi ke he Fakaalofa he Atua?
“Kaeke kua pihia e fakaalofa mai e Atua kia tautolu, lata ni ke feofanaki a tautolu.”—1 IOANE 4:11.
1, 2. Ko e heigoa ne lata ia tautolu ke taute mo e nakai fulukovi ke he tau fakakiteaga he fakaalofa he Atua?
KO IEHOVA e fakakiteaga he fakaalofa. E moli lahi, i loto he tala fakamua, ne kitia e tautolu e loga lahi moli he tau fakakiteaga he hana fakaalofa. Ne kitia foki e tautolu, ko e taute mo e nakai fulukovi fefe a Mose, Tavita, mo Iesu Keriso ke he tau fakakiteaga fakaalofa ia. Kua nakai kia, kua lata e tau Fakamoli ha Iehova takitokotaha ke manako ke taute tatai pihia? Moli lahi!
2 Ko e heigoa kua lata kaeke ke taute mo e nakai fulukovi a tautolu ke he talahauaga he fakaalofa he Atua? Ma e taha e mena, kua lata a tautolu ke foaki age ki a ia e tuaga fakamua, he ha tautolu a tau momoui fakaalofa atu ki a ia, mai he ha tautolu a loto katoa, solu, loto manamanatu mo e malolo. (Mareko 12:29, 30) Kua kakano, ke mahani mo e Atua, kua ha ha i ai e fakafetuiaga mafana he tagata mo Iehova. Kua manako nakai a tautolu ke tutala ke he ha tautolu a Matua he lagi ke he tau liogi? Kua liogi he tau magaaho oti nakai a tautolu mo e fakamakutu ke fakauka ke taute tumau ke liogi? Po kua fakaaveave ni a tautolu ke oti ha tautolu a tau liogi, mo e he falu a magaaho kua lavelave lahi ke liogi? (Roma 12:12; 1 Tesalonia 5:17) Kua takitaki nakai e tautolu e kikiteaga ki a Iehova, foaki age ki a ia mo e hana fakatokatokaaga e nava ma e tau mena kua liga ne maeke ia tautolu ke taute? (1 Korinito 3:7; 4:7) E moli, kua manamanatu nakai a tautolu ke tuga e salamo? Ne pehe a ia hagaao ke he Atua: “Takilagafitu ni ke he aho ke fakaheke atu ai e au kia koe.”—Salamo 119:164.
3. Ka tolo fakalataha ke he tau fiafia a tautolu, to maeke fefe ia tautolu ke fakakite kua taute mo e nakai fulukovi a tautolu ke he fakaalofa he Atua?
3 Kaeke kua taute mo e nakai fulukovi a tautolu ke he fakaalofa he Atua, poke nakai, liga fakakite ai ka tolo fakalataha a tautolu ma e tau magaaho fakafiafia. Kua tutala viko nakai a tautolu ke he tau tala noa, poke tau mena fakaagaga? Nakai kua pehe ke fakaako Tohi Tapu fakalahi a tautolu he tau magaaho oti ka tolo fakalataha a tautolu mo e tau faoa Kerisiano. Ka e kua moli nakai, kua maeke foki a tautolu ke moua e falu mena mitaki fakaagaga ke lafi atu ke he tutala ha tautolu. Kae kua ke talahau e tau mena ne iloa he o he fonua, tutala ke he kupu Tohi Tapu ne fiafia pauaki a tautolu ki ai, talahau ko e iloa fefe e tautolu e kupu moli, poke talahau e tau mena moli ne kitia e levekiaga fakaalofa mo e fakamonuinaaga he Atua?
4. Kua lata a tautolu ke fefe e onoonoaga kaeke kua momoko a tautolu hagaao ke he falu a monuina he fekafekauaga?
4 Ko e taha tutuaga foki ka fakakite e tokoluga atu he ha tautolu a fakaaue ma e fakaalofa he Atua, ka nakai moua e tautolu falu kotofaaga he fekafekauaga i loto he fakatokatokaaga ha Iehova. Kua fefe ha tautolu a tauteaga? Kaeke kua manamanatu lahi a tautolu ke he fakahekeaga ma Iehova, to talia ni a tautolu kua tatai lahi ni e fakahekeaga ke he Atua, pete ni ko hai ne moua e kotofaaga fekafekau pauaki ia. (Fakatatai mo e Luka 9:48) Ka e, kaeke kua manamanatu lahi ni a tautolu ke he tau mena ma tautolu ni poke higoa, to momoko lahi he nakai moua e kotofaaga, liga to manatu pihia a tautolu. Kua lata a tautolu ke manatu kua fakaalofa a Iehova ki a tautolu mo e liga kua iloa e ia kua nakai maeke ia tautolu he magaaho nei ke fua e kavega mamafa ke he taha mena he pule he atua. Liga kua uho lahi e fakamonuinaaga hana ki a tautolu ke he falu a puhala, mo e tau fakakiteaga pihia he hana fakaalofa kua lata ke lagomatai aki a tautolu ke tumau ha tautolu a tutuaga mitaki fakaagaga.—Fakatai 10:22.
Ofania e Tututonu, Vihiatia e Mahani Kelea
5. Kua lata ke fefe ha tautolu a tau mahani ha ko e fakakiteaga he fakaalofa he Atua?
5 Ko e fakakiteaga he fakaalofa he Atua ki a tautolu kua lata ke omoi a tautolu ke fifitaki atu ke he Keriso, ke ofania e tututonu mo e vihatia e mahani kelea. (Heperu 1:9) Moli, nakai maeke a tautolu ke taute fakamitaki katoatoa e mena nei, tuga ne taute e Iesu. Ka e, maeke ia tautolu ke taute ai mo e foli ki ai ke tapu, fakamoli, mo e omaoma ke he tau mata fakatufono kua maeke ia tautolu e nakai mitaki katoatoa ke taute. Ke taute e mena nei, kua lata a tautolu ke nakai hokoia ke talaga e fakaalofa ma e tututonu mo e tau mena mitaki, ka e pihia foki ke taute ke vihiatia, fakavihia fakalahi mahaki, ko e vihiatia lahi, ma e tau mahani kelea. Tuga a nei ne talahau he aposetolo ko Paulo: “Kia fakavihia e tau mena kelea, kia pipiki ke he tau mena mitaki.” (Roma 12:9) Ko e kupu malolo lahi e “fakavihia” kua kakano ke “hagaao ke nakai talia fakalahi mahaki ki ai.”—Webster’s New Collegiate Dictionary.
6. Ko e heigoa ka lagomatai a tautolu ke puipui atu ke he tau kamatamata ne tuku mai he lalolagi, he tino hala ha tautolu, mo e Tiapolo, ke he ha tautolu a tau puhala?
6 Ko e heigoa ka maeke ke lagomatai a tautolu ke puipui atu ke he tau kamatamata ka tuku mai he lalolagi ki a tautolu, mai he ha tautolu ni a tino hala, mo e Tiapolo? Ko e fakamoli ke he Atua ko Iehova. Ne ole fakamitaki mai a ia ki a tautolu: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” (Fakatai 27:11) E, ko e mahani fakamoli ki a Iehova ka omoi a tautolu ke uta e puhala pulotu, ke fakavihia e tau mena ne vihiatia a ia ki ai. Ke lafi ki ai, pete ni kua mitaki lahi e fiafia ka moua, poke tuga e mena fiafia lahi ka moumou taha mata fakatufono he Atua, kua lata a tautolu ke talahau tumau ki a tautolu ni, ko e nakai fai aoga ka taute pihia. (Kalatia 6:7, 8) Ne kelea lahi e afo he loto e tagata, keukeu, fakavai, tuga foki ne fakamanatu mai ki a tautolu ia Ieremia 17:9. Fia loto e loto he Kerisiano ke he tau mena mitaki, fulufuluola, mo e mea. Ka e, ko e falu a magaaho kua eke foki he tau manako he tino hala, ke loto ke he tau mena kelea. Tuga e tau Isaraela ne tapuaki ki a Iehova ka e toka e “tau mena tokoluga,” he tau tupua ha lautolu ti kua maeke foki he tau loto ha tautolu ke fulukovi mo e kelea e tau lagatau. (1 Patuiki 22:43; Teutaronome 12:2) Liga to lali e loto nakai mitaki katoatoa ha tautolu ke kumi lagatau ke tuku atu a tautolu ke he puhala kamatamata. Liga to lali ke fakatotetote hifo e kelea he tau mena hehe ne kamatamata a tautolu i ai. Poke liga ko e tau loto ha tautolu ne lali ke talia e tautolu ko e mena ku lahi e fakahala.
7. Ko e ha, kua lata a tautolu ke puipui atu ke he manako lahi ke he tau mena kelea?
7 Mai he fakaaue ma e fakaalofa he Atua, kua lata a tautolu ke puipui atu ke he fia loto lahi ke he tau mena kelea, tuga e falanaki atu ke he mahani feuaki, pete ni ko e tagata nofo tokotaha po ke fai hoana a tautolu. He taha magaaho mo e taha magaaho foki, ne kamata tuga ko e kalahi nakai kelea, ne tupu ai, ke ua e Kerisiano ne lauia lahi e tau logonaaga ha laua tokoua, ti taute e laua e agahala mo e fakaoti e fakalataha ha laua ke he fakapotopotoaga. Ti pihia foki e tau momotua, kua lata ke mitaki lahi e tau fakatai ke he fuifui, kua lauia kelea foki ke he tau mena nei!—Fakatatai mo e 1 Patuiki 15:4, 5.
8. Ko e heigoa e fakatai ne poaki mai he aposetolo ko Paulo ki a tautolu, mo e liga ke fakatai fefe e mena vihi pihia?
8 Kia manamanatu la ke he aposetolo ko Paulo, ne monuina ke he tau fakakiteaga mana mo e tau malolo, mo e mena fakaalofa he omoi he agaga he atua ke talahau. Ke kautu he hana taufetului ke he manako agahala, kua tatuki e ia—e, fahi fakalahi—hana tino. Kua fia fakahanoa kia a tautolu ke fiafia ke taute fakatote ke he mena ia a tautolu? (Roma 7:15-25; 1 Korinito 9:27) Kua tuga ke pehe, kua nonofo a tautolu i loto he poti tote i luga he vailele ne tafe mafiti, mo e hane tafea atu ke he hana tafeaga. Ke kalo kehe mai he matematekelea lahi, kua lata a tautolu ke alo fakamakamaka ki tua ke totoko ke he tafe malolo. Liga kua tuga ko e nakai taute ha kehe, ka e fakamalolo tumau a tautolu ke eketaha, to nakai mokulu a tautolu he tafeaga ke he ha tautolu a fakaotiaga. Kua moli, ko e fakakiteaga he fakaalofa he Atua ko Iehova ki a tautolu kua lata ke taute a tautolu ke fakamalolo ke eketaha ke fakamoli ki a ia, he vihiatia e tau mahani kelea mo e ofania e tututonu.
Fakakite e Fakaalofa Fakamatakainaga
9. Ko e heigoa e fakatonuaga ne foaki mai he aposetolo ko Ioane, ke fakaalofa atu ke he ha tautolu a tau matakainaga?
9 Kua lata foki he fakakiteaga he fakaalofa he Atua ke omoi a tautolu ke fakaalofa atu ke he tau matakainaga ha tautolu, tuga ne fakaalofa a Iesu Keriso ke he hana tau tutaki. (Ioane 13:1) Kua lata lahi moli, ne pehe e aposetolo ko Ioane: “Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu; ne fakafano mai foki e ia hana Tama ko e lukutoto mo e tau hala ha tautolu. Ko e tau tagata fakahelehele na e, kaeke kua pihia e fakaalofa mai e Atua kia tautolu, lata ni ke feofanaki a tautolu.” (1 Ioane 4:10, 11) Ne moli ai, ne pehe a Iesu ko e puhala kua maeke ke kitia hana tau tutaki moli, ko e fakaalofa ne ha ha ia lautolu.—Ioane 13:34, 35.
10, 11. Ko e heigoa a falu puhala kua maeke ia tautolu ke fakakite e fakaalofa ke he tau matakainaga ha tautolu?
10 Ne iloa e tautolu kua lata e tau Kerisiano ke fakakite e fakaalofa fakamatakainaga. Ka e kua nakai hepe ke fakamanatu e tautolu ki a tautolu e tau puhala kehekehe kua maeke ia tautolu ke fakakite e fakaalofa nei tuga ha Keriso ke he taha mo e taha. Ko e fakaalofa pihia ka lagomatai a tautolu ke tiaki e kehekeheaga he kili he tagata, motu he fanauaga, fakaakoaga, mahani fakamotu, mo e tutuaga he moui. Ke lafi ki ai, ko e fakaalofa fakamatakainaga ka omoi a tautolu ke tolo fakalataha he tau feleveiaaga. Kaeke kua fakaalofa fakamoli a tautolu ke he ha tautolu a tau matakainaga, kua nakai toka e tautolu e matagi kelea poke taha manamanatuaga tote he tino ke uta kehe ia tautolu e fiafia he fakalataha mo lautolu mo e kau ke he tufatufaaga auloa ke he fefakamaloloaki. (Roma 1:11, 12) Ke lahi atu he mena ia, kua taute he fakaalofa fakamatakainaga a tautolu ke tauteute fakamitaki ma e ha tautolu a tau feleveiaga mo e taute e tau vala gahua ia lautolu ke maeke ai ia tautolu ke fakalagalaga atu e taha ke he taha ke fakaalofa ko e gahua fakamitaki.—Heperu 10:23-25.
11 Ka e fefe ke lagomatai ha tautolu a tau matakainaga ke he fekafekauaga he fonua? Ne eke ai ke laga loga ne kitia e tau momotua mo e tau fekafekau lagomatai ne o he fekafekauaga ke he taha fale mo e taha fale, ko lautolu ni, poke takitokotaha he magaaho kua maeke ia lautolu, mo e fakatokatokaaga tote, ke uiina e tau tagata fakailoa he Kautu, ne kua lata ke moua lagomatai ke he fekafekauaga ke o fakalataha mo lautolu. Ka fakakite e fakaalofa ke he puhala nei to taute ai e fekafekauaga he fonua ma e tau momotua mo e tau fekafekau lagomatai ke fakafahiua e taui. Mo e fefe ke uta e taha tagata fakailoa fou ke he taha fakaakoaga Tohi Tapu?—Roma 15:1, 2.
12. Ke maama fefe e tautolu e 1 Ioane 3:16-18?
12 Kua taute foki he fakaalofa a tautolu ke oatu ke lagomatai ha tautolu a tau matakainaga kua liga ne lata moli ma e tau mena ke lata ma e tino. Ne tohia he aposetolo ko Ioane: “Ko e mena foki hanai kua iloa ai e tautolu e fakaalofa he tuku atu e ia hana moui ke hukui aki a tautolu; lata foki kia tautolu ke tuku atu e tau moui ha tautolu ke hukui aki e tau matakainaga. Ko e tagata kua toka ki ai e koloa he lalolagi, kua kitekite foki e ia ke he matakainaga hana kua nofogati ka e pa atu hana loto kia ia, kua nofo fefe e fakaalofa ke he Atua ke he loto hana? Haku fanau ikiiki na e, aua neke fakaalofa a tautolu ke he kupu po ke alelo, ka ko e mahani mo e fakamoli.” (1 Ioane 3:16-18) Liga ne nakai ole he mogonei ke foaki atu ha tautolu a tau solu ma lautolu, ka ko e tau magaaho kua ha ha i ai e tau magaaho ke fakakite e fakaalofa ma lautolu ke he falu a puhala, nakai ni hokoia ke he tau kupu po ke alelo ka e pihia foki ke he tau gahua. Kua nakai hehe e tau kupu fakaalofa ma e tau matakainaga ha tautolu, ka e kua nakai manako ni a tautolu ke kaupa ha tautolu a fakaalofa ke he mena nei, he magaaho ka manako a lautolu ma e tau mena ke lata mo e tino. Ne pehe e talahauaga a Iesu “kua lahi mai e fiafia ka foaki atu, ke he moua mena” kua hagaao foki ke he foakiaga he lagomatai ke he tau mena he tino.—Gahua 20:35, NW.
13. (a) Ko e heigoa a falu he tau matapatu he kupu moli ne fakaako ki ai a tautolu he lagomatai he fakatokatokaaga ha Iehova ne maeke ke kitia? (e) Ko e heigoa e matakupu moli ne taute e Charles Taze Russell?
13 Kua ha ha i ai e tau magaaho ki a tautolu ke fakakite e fakaalofa ma e ha tautolu a tau matakainaga ne takitaki e fakapotopotoaga po ke ne matutaki atu mo e fakatokatokaaga ha Iehova he lalolagi katoa. Kua fakalataha e mena nei ke fakamoli ke he “tupa fakamoli mo e loto matala.” (Mataio 24:45-47, NW) Kua lata a tautolu ke haga atu ke he moli, pete ni ko e lahi fefe he totou e tautolu e Tohi Tapu, ne nakai fakaako ni e tautolu a tautolu ke iloa e kupu moli. Ne nakai maeke ia tautolu ke moua e moli hagaao ki a Iehova, hana finagalo mo e tau mahani, e kakano mo e aoga lahi he hana higoa, he Kautu, lukutoto ha Iesu, mo e kehe he fakatokatokaaga he atua mo e ha Satani, po ke ko e ha, ne fakaata he Atua e mahani kelea. Ke tuga ni he tohia he pelesiteni fakamua he Watch Tower Society (Kaufakalatahaaga he Kolo Toko) ko Charles Taze Russell, he tau 1914: “Nakai kia ko e tau tagata monuina mo e fiafia a tautolu? Nakai kia ko e fakamoli e Atua ha tautolu? Kaeke kua iloa he taha ha mena kua mua atu e mitaki, toka a ia ke uta ai. Kaeke kua moua e mutolu taha mena kua mua atu e mitaki, kua amaamanaki a mautolu ke talahau e koe ki a mautolu. Kua nakai iloa e mautolu ha mena ne mua atu he mitaki po ke hafa ke tatai e mitaki ke he tau mena ne moua e mautolu i loto he Kupu he Atua. . . . Kua nakai fai alelo po ke pene kua maeke ke talahau e mafola, e fiafia mo e monuina ne moua mai he iloa maaliali e Atua moli, ke he tau loto ha mautolu mo e tau momoui. Ko e Tala ke he Pulotu he Atua, Fifiliaga Tonu, Malolo mo e Fakaalofa ne fakamakona katoatoa e tau manako he ha mautolu a tau ulu mo e ha mautolu a tau loto. Ti kua nakai kumi foki a mautolu ma e falu mena. Kua nakai ha ha i ai ha mena ne manako ki ai, ka e, tuku fakamaaliali lahi e Tala ofoofogia nei ki mua he tau loto manamanatu ha mautolu.” (The Watchtower, Tisema 15, 1914, tau lau tohi 377-8) Kua moli ha, e tau kupu ne tohia mitaki ai!
Fekafekau atu ki a Lautolu i Tua
14. Kua lata fefe he tau talahauaga he fakaalofa he Atua ke omoi a tautolu ke gahua atu ki a lautolu i fafo?
14 Ko e tau fakailoaga he fakaalofa he Atua ne moua e tautolu e fiafia kua lata ke omoi a tautolu ke fakakite e fakaalofa ki a lautolu i tua he fakapotopotoaga. Maeke fefe ia tautolu ke taute e mena nei? Liga to fakakite he tau tutuaga ha tautolu ko e maeke ke lagomatai ha tautolu a tau katofia ke he puhala fakakoloa he tino. Ka ko e heigoa, kua lata lahi atu foki e aoga, kua lata ke maeke ia tautolu ke fakakite e fakaalofa ke he tau katofia, ka uta e tala mitaki he Kautu he Atua ke he falu mo e lagomatai a lautolu ne ofania e mahani tututonu, ke eke mo tau tutaki ha Iesu Keriso. Kua taute tumau nakai e tautolu e fekafekauaga nei ke he tau tagata, po ke kua tiaki ni e tautolu? Kua eke kia, ke taute ha kua mahani ki ai, po ke taute fakatote ke pehe kua gahua ke he fekafekauaga? Po kua omoi moli he fakaalofa ke he katofia a tautolu? Kua fakakite nakai e tautolu e manamanatu ma e taha? Kua fakauka nakai a tautolu, ke fakatali ma e tau tagata ke talia? Fakamalolo nakai e tautolu e tau tagata he kaina ke vagahau? E, nakai ke eke ni ke tala tumau, kia fakaata he fakaalofa ma e katofia ke omoi a tautolu ke fanogonogo mo e taute e tau tutalaaga faka-Tohi Tapu mitaki, mo e tau tagata ne feleveia mo tautolu he ha tautolu a fekafekauaga.
15. (a) Ko e ha ne mitaki e higoa “fakamoli he tau magaaho noa” mai he “fakamoli tupu noa”? (e) Ko e ha, ke fakaaoga e tau magaaho oti ne moua ke fakamoli atu he tau magaaho noa?
15 Kua mataala nakai a tautolu ke maeke fefe ke fakaaoga e tau mena oti ke fakamoli atu he tau magaaho noa? Kua lata ke mailoga ko e nakai ko e fakamoli tupu noa a nei, ke pehe ko e gahua nakai fakatokatoka fakamua poke tote lahi e aoga. Ne aoga lahi e tutala fakamoli he tau magaaho noa, mo e to taute he fakaalofa ma e falu he tau tagata a tautolu ke fiafia ke taute ai he tau magaaho oti. Kua lahi e tau fua ne fa mahani ke moua mai, he tau tutala fakamoli pihia! Ke fakatai ki ai, he magaaho ne fano ke he fonoaga he tau Fakamoli ha Iehova i Italia, ne fano e taha matakainaga tane ke he fale taute motoka ke taute taha moli i mua he motoka. He magaaho ne leo a ia, ne tutala fakamoli a ia ki a lautolu ne ha ha i ai viko ia ia mo e age ki a lautolu e lau pepa uta lima, ne uiina a lautolu ke o ke he lauga faka-Tohi Tapu ke he toloaga tagata, he aho Tapu. He fonoaga he kautu katoa i Roma he tau ne mole atu, ne mafanatia e fakafeleveiaaga he matakainaga tane ne nakai iloa e ia ki a ia. Ko hai kia e matakainaga nei? Ko e taha mai he tau tagata tane ne age e ia e tau lau pepa uta lima he fale taute motoka he tau fakamua! Ne fano e tagata tane ke logona e lauga ke he tau tagata mo e tuku atu hana higoa ma e fakaako Tohi Tapu. Ti ko e, he magaaho nei ko e tau Fakamoli tukulele ha Iehova a ia mo e hana hoana. Ti kua nakai fai huhu ai, kua maeke ke lahi e taui he tutala fakamoli he tau magaaho noa!
Taute Tumau ke he Fakaalofa he Atua
16. Ko e heigoa e tau huhu ne liga kua mitaki a tautolu ke huhu ki a tautolu ni?
16 Kua loga lahi moli e tau fakakiteaga he fakaalofa ha Iehova ke he tau mena momoui ne tufugatia e ia. Tuga he kitia e tautolu, ne foaki mai he Tohiaga Tapu ki a tautolu e tau fakatai mitaki ha lautolu ne taute nakai fulukovi ke he fakakiteaga he fakaalofa he Atua. Ti kua lata lahi, e talahauaga he salamo ne omoi he agaga: “Kia fakaaue atu e tau tagata ki a Iehova ma e hana fakaalofa noa mo e ma e hana tau gahua ofoofogia ke he tau fanau he tau tagata.” (Salamo 107:8, 15, 21, 31, NW) Kua hanihani kia a tautolu ke talia e fakaalofa noa he Atua mo e mole noa e hana finagalo? Kia liga ke nakai pihia! (2 Korinito 6:1) Ti kia eke ai takitokotaha a tautolu ke huhu ki a tautolu ni: ‘Kua fakaaue moli nakai a au ke he fakailoaaga he fakaalofa he Atua ne fita he moua e au e fiafia mo e mauokafua e amaamanakiaga ke fiafia pihia he vaha i mua? Kua omoi nakai e lautolu a au ke fakaalofa ki a Iehova mo e haku a loto katoa, solu, loto manamanatu, mo e malolo? Ko e fa mahani moli nakai a au mo e Atua? Ko e ofania nakai e au e mahani tututonu mo e vihatia e mahani kelea? Kua fakakite nakai e au e fakaalofa fakamatakainaga? Mo e fefe e tata he laliaga haku ke fano he tau tuagahui ha Iesu kua hagaao atu ke he haku a fekafekauaga’?
17. Ko e heigoa ka taui mai kaeke kua taute e tautolu mo e nakai fulukovi ke he fakakiteaga he fakaalofa he Atua ko Iehova?
17 Kua moli lahi, kua ha ha i ai e tau puhala loga ke fakakite e tautolu e fakaaue moli ma e tau fakakiteaga fakaalofa oti he Atua kua iloa e tautolu. Ka taute oti e tau magaaho ke fakakite e fakaaue pihia, to taute e tautolu e loto he ha tautolu a Matua he lagi ke fiafia, mo e eke ke monuina a falu, mo e moua e fiafia, mafola, mo e loto fiafia ki a tautolu ni. Kia tumau pihia a tautolu ke taute mo e nakai fulukovi ke he tau fakakiteaga he fakaalofa he Atua.
To Taute Fefe e Koe?
◻ Ko e heigoa kua lata ke taute ke nakai fulukovi ke he fakaalofa e Atua?
◻ Maeke fefe ia tautolu ke puipui atu ke he tau kamatamata?
◻ Ko e heigoa a falu puhala e fakakite e fakaalofa fakamatakainaga?
◻ Kua lata fefe he fakakiteaga he fakaalofa ha Iehova ke omoi a tautolu ke taute atu ke he ha tautolu a tau katofia?
[Fakatino he lau 29]
Kua lata a tautolu ke taufetului atu ke he tau manako he agahala, ke kalo kehe mai he matematekelea
[Fakatino he lau 30]
Kua fakakite he tau momotua e fakaalofa fakamatakainaga he o fakalataha mo e falu ke he fekafekauaga he Kautu
[Fakatino he lau 31]
Ko Charles Taze Russell, ko e pelesiteni fakamua he “Watch Tower Society,” ne talahau ke kikite atu ke he mafola, fiafia mo e monuina ne maeke ni he Atua ke foaki