“Kia Kumi e Mafola mo e Tutuli ki Ai”

“Kia fakamatalahi a Iehova, ko ia ne kolikoli ke he mafola he hana fekafekau.”​—SALAMO 35:27, “NW.”

1. Ko e ha kua fakaaue a tautolu ke he mafola kua fiafia a tautolu ki ai?

KO E olioli moli ni i loto he lalolagi mavehevehe nei ke ha ha ai e mafola! Kua kolikoli moli ke tapuaki ki a Iehova, “ko e Atua ni he mafola,” mo e kau fakalataha ke he tau monuina he hana “maveheaga he mafola”! Kua hauhau mitaki ha, ke he vaha he moui pehia, he iloa e “mafola he Atua ne fakamahomo ue atu e tau manatu oti” mo e ke iloa e ‘pipiaga he mafola’ ne fakalataha e tau tagata he Atua pete ni ko e heigoa ha lautolu a tau motu, vagahau, lanu, poke tau tutuaga ke he fakalatahaaga!​—1 Tesalonia 5:23, NW; Esekielu 37:26, NW; Filipi 4:7, NW; Efeso 4:3.

2, 3. (a) Ke he magaaho taha ko e tau tagata katoa he Atua ka fakauka, liga ko e heigoa ka tupu ke he tau Kerisiano takitaha? (e) Ko e heigoa ne ole mai e Tohi Tapu ki a tautolu ke taute?

² Ha ko e tau Fakamoli ha Iehova, kua takiofa e tautolu e mafola nei. Ka e pete ni, kua nakai lata a tautolu ke fakahanoa ki ai. Ne nakai tumau noa e mafola ha kua fa fefakalatahaaki a tautolu mo e fakapotopotoaga Kerisiano poke ko e taha he magafaoa Kerisiano. He magaaho taha, ko lautolu ne toe ne fakauku mo e ha lautolu a tau hoa ko e falu “mamoe kehe” ka fakauka ha ko e fuifui taha ato hoko atu ke he fakaotiaga, ka e liga maeke he faku takitokotaha ke galo ha lautolu a mafola mo e to kehe ai.​—Ioane 10:16; Mataio 24:13; Roma 11:22; 1 Korinito 10:12.

³ Ne hataki atu e aposetolo ko Paulo ke he tau Kerisiano ne fakauku he hana vaha: “Ko e tau matakainaga na e, a mutolu, neke toka ia taha e loto kelea mo e nakai talia fakatonu, ke o kehe ai a mutolu mai he Atua moui.” (Heperu 3:12) Kua hagaao atu foki e hatakiaga nei ke he moto tagata tokologa. Ti kua ole fakamakamaka mai e Tohi Tapu ke he tau Kerisiano: “Kia kumi e mafola mo e tutuli ki ai. Ha kua hagao e na fofoga he Iki [Iehova] ke he tau tagata tututonu, kua fanogonogo mai foki hana tau teliga ke he tau liogi ha lautolu. Ka kua fofoga mai e Iki [Iehova] mo e ita ke he tau tagata mahani kelea.”​—1 Peteru 3:10-12; Salamo 34:14, 15.

“Ha ko e Loto ke he tau Mena he Tino”

4. Ko e heigoa kua maeke ke lipilipi ha tautolu a mafola mo e Atua?

⁴ Kua maeke he heigoa ke fakalavelave e tutuliaga ha tautolu ke he mafola? Kua talahau e Paulo e taha mena he magaaho ne pehe a ia: “Ha ko e loto ke he tau mena he tino ko e mate haia; ka koe loto ke he tau mena he Agaga, ko e moui haia mo e mafola. Ha ko e loto ke he tau mena he tino, ko e faitaua ia ke he Atua.” (Roma 8:6, 7) He “tino,” kua hagaao a Paulo ke he ha tautolu a tutuaga he tau tagata nakai mitaki katoatoa ne moua e tau mahani he tufaaga agahala. Ka fakalolelole atu ke he tau manako he tino kua tolalo ai ka moumou ha tautolu a mafola. Kaeke kua taute he Kerisiano e mahani feuaki mo e nakai tokihala, fakavai, kaiha, uta e tau vai kona, po ke ke he falu puhala kua moumou e matafakatufono he atua, ne moumou e ia e mafola he vaha loto hana mo Iehova ne kua olioli a ia ki ai. (Fakatai 15:8, 29; 1 Korinito 6:9, 10; Fakakiteaga 21:8) Ke lafi ki ai, kaeke kua fakaata e ia e tau koloa fakatino ke mua atu ki a ia mai he tau mena fakaagaga, kua hagahaga kelea lahi e tuaga he hana mafola mo e Atua.​—Mataio 6:24; 1 Ioane 2:15-17.

5. Ko e heigoa kua putoia ke he tutuliaga he mafola?

⁵ Ka e he taha fahi, ne pehe a Paulo: “Ka ko e loto ke he tau mena he Agaga, ko e moui haia mo e mafola.” Ko e vala he tau fua he agaga e mafola, mo e kaeke kua fakaako e tautolu ha tautolu tau loto ke loto fakaaue ke he tau mena fakaagaga, ka liogi ma e agaga he Atua ke lagomatai a tautou ke he mena nei, ti to kalokehe ai tuai a tautolu mai he “loto ke he tau mena he tino.” (Kalatia 5:22-24) He 1 Peteru 3:10-12, ne matutaki atu e mafola mo e tututonu. (Roma 5:1) Kua pehe a Peteru ke he tutuliaga he mafola kua lafi ki ai e ‘kia kalo kehe he kelea, mo e taute e tau mena mitaki.’ Ko e agaga he Atua kua maeke ke lagomatai a tautolu ke “tutuli e tututonu” mo e kua puipui ha tautolu a mafola mo e Atua.​—1 Timoteo 6:11, 12.

6. Ko e heigoa e taha he tau kavega kua lago ke he tau momotua hagaao ke he mafola he fakapotopotoaga?

⁶ Ke tutuli e mafola ko e mena lahi ke he tau manamanatuaga he tau momotua i loto he fakapotopotoaga. Ke fakatai ki ai, kaeke kua lali e taha ke tamai e tau mahani fakatakiva, kua lago e kavega ke he tau momotua ke puipui e fakapotopotoaga he lali ke akonaki e tagata agahala. Kaeke kua talia e ia e akonakiaga, to liu a ia ke moua hana mafola. (Heperu 12:11) Kaeke kua nakai, liga kua lata a ia ke tuku ki tua ke puipui e vaha loto mafola lahi he fakapotopotoaga mo Iehova.​—1 Korinito 5:1-5.

Mafola Mo e ha Tautolu a tau Matakainaga

7. Kua hagaao ke he heigoa e taha mena he ‘loto ke he tino’ ne hataki atu a Paulo ke he tau tagata Korinito?

⁷ ‘Loto ke he tau mena he tino’ kua maeke ke moumou nakai ni hokoia ha tautolu a mafola mo e Atua ka e pihia foki ha tautolu a vaha loto mitaki mo e tau Kerisiano. Ne tohia a Paulo ke he tau Korinito: “Ha ko e mena omaoma agaia a mutolu ke he tino; ha kua ha ha i ai ia mutolu e mahekeheke, mo e taufetoko, mo e feveheveheaki, kua nakai kia omaoma a mutolu ke he tino, ti mahani tuga ne tau tagata?” (1 Korinito 3:3) Tutu he fahi kehe lahi e mahani mahekeheke mo e taufetoko ke he mafola.

8. Liga ko e heigoa ka tupu ke he taha ne uhu e mahani mahekeheke mo e taufetoko i loto he fakapotopotoaga?

⁸ Kua moli lahi e kelea ka fakalavelave ke he mafola he fakapotopotoaga he uhu e mahani mahekeheke mo e taufetoko. Kua vagahau ke he fuafuaaga ne hagaao ke he mafola ko e fua he agaga, ne hataki mai e aposetolo ko Ioane: “Kaeke ke pehe age taha, Kua fakaalofa au ke he Atua, ka e vihiatia e ia hana matakainaga, ko e pikopiko a ia; ha ko ia kua nakai fakaalofa ke he matakainaga hana kua kitia, maeke fefe ia ia ke fakaalofa ke he Atua, kua nakai kitia e ia?” (1 Ioane 4:20) Ti tuga ke pihia e puhala, kaeke kua uhu he taha e mahani mahekeheke poke taufetoko ke he vaha loto he tau matakainaga, kua maeke moli nakai a ai ke mafola mo e Atua? Moli ni kua nakai! Ne ole fakamakamaka mai ki a tautolu: “Kia tumau ke olioli lahi, ke fehikitaki, ke mafanatia, ke fetataiaki e tau manamanatu, ke moui mo e mafola; mo e ko e Atua he fakaalofa mo e he mafola to fakalataha atu ki a mutolu.” (2 Korinito 13:11, NW) E, kaeke kua tumau a tautolu ke moui mo e mafola e taha ke he taha, he magaaho ia ko e Atua he fakaalofa mo e mafola ka fakalataha mai ki a tautolu.

9. Iloa fefe e tautolu ke he falu a magaaho to nakai femaamaaki mo e nakai fetaliaaki e tau Kerisiano?

⁹ Kua nakai kakano e mena nei ke pehe ko e femaamaaki tumau e vaha loto he tau Kerisiano. Ke fakatai ki ai, he tau fahi tapu ne mole mai e Penetekoso, kua ha ha i ai e nakai fetaliaaki i loto he fakapotopotoaga Kerisiano fou hagaao ke he tufatufa mena kai he tau aho takitaha. (Gahua 6:1) He taha magaaho kua nakai fetaliaaki e vaha loto ha Paulo mo Panapa ne takitaki atu ai “ti pa mo e matila e ita.” (Gahua 15:39, NW) Kua taute ai e Paulo e fakatonuaga ki a Evotia mo Sunetuke, kua nakai maleku ko e tau matakainaga mitaki mo e makutu lahi, ke “manamanatu a laua ke he mena taha ke he Iki.” (Filipi 4:2) Ti kua nakai ofo ai he foaki atu e Iesu e tomatomaaga fakamatafeiga ke taute e tau mena fakalavelave ke he mafola he vaha loto he tau Kerisiano mo e fakamaama fakalahi e mafiti mo e aoga ke taute fakaave e tau mena vihi pihia! (Mataio 5:23-25; 18:15-17) Kua nakai maeke ia ia ke foaki mai e tomatomaaga nei kaeke kua nakai amaamanaki a ia ke fai mena uka ke he vaha loto he tau tagata ne muitua ki a ia.

10. Ko e heigoa a falu mena tutupu ne fa tutu hake i loto he fakapotopotoaga, mo e ko e heigoa e kavega kua lago e mena nei ki a lautolu oti ne putoia ki ai?

¹⁰ He vaha nei, liga nakai fiafia e taha ke he tau kupu vagahau tea po ke kua kitia kua eke fakakelea mai e taha Kerisiano. Ko e mahani fakahogohogomanava he taha tagata kua liga ke he taha tagata ko e mena vihiatia lahi. Liga to fepa e tau mahani fakatagata. Liga to nakai talia lahi he taha tagata e fifiliaga ne taute he tau momotua. I loto he matakau ni he tau momotua, liga taha e motua ne loto malolo lahi mo e lali ke pulelahi ke he falu momotua. Pete ni ko e fa tupu mai moli e tau mena ia, kua lata agaia a tautolu ke kumi e mafola mo e tutuli ki ai. Ko e foliaga kua lata ke taute e tau mena vihi pihia ke he puhala Kerisiano ke maeke ai ke puipui e “pipiaga he mafola.”​—Efeso 4:3.

11. Ko e heigoa e tau mena ne foaki mai e Iehova ke lagomataiaki a tautolu ke tutuli e mafola ke he taha mo e taha?

¹¹ Kua pehe e Tohi Tapu: “Kia fakamatalahi a Iehova, ko ia ne kolikoli ke he mafola he hana fekafekau.” (Salamo 35:27, NW) E, kua manako a Iehova ke mafola a tautolu. Ti ko e mena ia, kua taute e ia ua e tau fakatokaaga kua mua atu ke lagomatai aki a tautolu ke puipui e mafola he vaha loto ha tautolu kia tautolu ni mo e mo ia. Taha ko e agaga tapu, ko e hana fua e mafola, fakalataha mo e a falu fua mafola, tuga e fakauka, totonu, molu, mo e manako fakalatalata. (Kalatia 5:22, 23) Ko e taha foki ko e pulotu fakaatua, ko e mena kua maeke ia tautolu ke totou: “Ka ko e iloilo mai luga, kua fakamua hana a mea, ti mafola, ti totonu, ti fulumokoi, kua puke ke he fakaalofa mo e tau fua mitaki.”​—Iakopo 3:17, 18.

12. Ko e heigoa kua lata ia tautolu ke taute kaeke kua lavelave ha tautolu a mafola mo e tau matakainaga ha tautolu?

¹² Ha kua pihia, ka fakalavelave ha tautolu a mafola mo e falu, kua lata a tautolu ke liogi ma e pulotu mai i luga ke fakakiteaga mai ki a tautolu ke taute fefe, mo e kua lata a tautolu ke ole ma e agaga tapu ke fakamalolo a tautolu ke taute e tau mena kua hako. (Luka 11:13; Iakopo 1:5; 1 Ioane 3:22) Ke tatai mo e ha tautolu a tau liogi, kua maeke ai ia tautolu ke onoono ki loto he punaaga he pulotu fakaatua, ko e Tohi Tapu, ma e tau takitakiaga, pihia foki ke kumikumi a falu tohi fakamaama Tohi Tapu ma e fakatonuaga ke taute fefe e tau kupu he Tohiaga Tapu. (2 Timoteo 3:16) Liga kua manako foki a tautolu ke kumi lagomatai ke he tau momotua i loto he fakapotopotoaga. Ko e lakaaga fakamui ai ke muitua ke he tau takitakiaga ne moua. Kua pehe mai a Isaia 54:13 (NW): “Mo e tau tama oti hau ko e tau tagata kua fakaako e Iehova, mo e ko e mafola he hau a tau tama to lahi mahaki.” Kua fakahaha mai e mena nei kua falanaki ha tautolu a mafola ke he ha tautolu a fakaaogaaga he tau mena ne fakaako e Iehova ki a tautolu.

“Fiafia a Lautolu ne Loto Mafola”

13, 14. (a) Ko e heigoa ne fakahaha ki ai e tau kupu ha Iesu koe “loto mafola”? (e) Maeke fefe a tautolu ke taute mo tau tagata taute mafola?

¹³ Ko Iesu, i loto he na Lauga he Mouga ne pehe: “Fiafia a lautolu ne loto mafola, ha kua to ui a lautolu ko e tau ‘tama he Atua.’” (Mataio 5:9, NW) Ne nakai hagaao e “loto mafola” nei ke he tagata ne totonu pauaki e tau mahani. Ne kakano e kupu Heleni fakamua ke he “tagata taute mafola.” Kua iloilo lahi e tagata taute mafola ke liuaki mai e mafola he magaaho ka fakalavelave ai. Mua e aoga foki, ka lali e tagata taute mafola ke kalo kehe mai ke nakai fakalavelave atu ke he mafola mai he kamataaga. ‘Kua pule foki e mafola ke he loto hana.’ (Kolose 3:15) Kaeke kua lali e tau fekafekau he Atua ke taute e mafola, ti kua nakai lahi e tau mena vihi ke he tau vaha loto ha lautolu.

¹⁴ Ka taute mo tau tagata taute mafola kua putoia ai ke mailoga e tautolu ha tautolu a tau mahani lolelole. Ke fakatai ki ai, liga ko e fa ita vave po ke mukamuka ke hukia vave mo e mukamuka ke nakai fiafia. Ka ha ha i lalo he pehiaaga, liga to taute he hana a logonaaga ke nimo e tau mahani he Tohi Tapu. Nakai ko e mena kua nakai amaamanaki ki ai e mena nei ha ko e nakai mitaki katoatoa he tau tagata. (Roma 7:21-23) Ka e pete ni, faitaua, taufetoko, mo e vale e tau mena ne tohia kua hagaao ke he tau gahua he tino. (Kalatia 5:19-21) Kaeke kua kitia e tautolu e tau mahani pihia ia tautolu​—po ke kaeke kua fakakiteaga mai he taha ki a tautolu​—kua lata a tautolu ke fakamakamaka ke liogi tumau ma e agaga a Iehova ke tupu mai i loto ia tautolu e mahani fakauka mo e molu. E moli lahi, kua lata e tau tagata oti ke lali ke taute e tau fua pihia mo vala he hana a mahani fou.​—Efeso 4:23, 24; Kolose 3:10, 15.

15. Kua totoko fefe e pulotu mai i luga ke he ulu uka kua nakai loto molu?

¹⁵ Ke falu a magaaho, ko e fakapotopotoaga po ke matakau he tau momotua ne fakalavelave he taha tagata kua ulu uka, he fa fia loto na ia ke he hana a puhala. Moli, he magaaho ka hoko ai ke he matafakatufono he atua, kua lata e Kerisiano ke malolo e loto, ti eke foki ke nakai malokuloku. Mo e kaeke kua logona e tautolu kua mitaki e taha manatu ha tautolu kua liga kua lata lahi ma e falu, kua nakai hehe ke fakailoa atu e tautolu ha tautolu a manatu, ti kua lata ni ka fakamaama e tautolu e kakano he manatu ha tautolu. Ka e kua nakai manako a tautolu ke tuga a lautolu he lalolagi ne “nakai fia loto mafola.” (2 Timoteo 3:1-4) Ko e pulotu mai i luga e loto mafola, mo e loto maama. Ko lautolu ne taute tumau e lautolu e puhala ulu uka mo e nakai malokuloku, kau lata ke omaoma ke he fakatonuaga ha Paulo ke he tau tagata Filipi ke ‘aua neke . . . fetoko mo e hula noa.’​—Filipi 2:3.

16. Maeke fefe he fakatonuaga ha Paulo i loto he tohi ha Filipi ke lagomatai a tautolu ke fakakaumahala e loto fakatokoluga?

¹⁶ I loto he tohi taha, kua ole fakamakamaka mai a Paulo kua lata a tautolu, ‘mo e loto fakatokolalo’ ke fakamoli lahi ‘kua mua e faoa oti ki a tautolu.’ Ko e taha fahi kehe lahi a nei ke he hula noa ki a ia ni. Ne nakai manamanatu fakamua e Kerisiano motua ke omomoi ni hana tau manamanatu, ke mitaki ai ni, po ke ke puipui hana tuaga mo e pule malolo. Ha kua fekeheaki e mena nei ke he akonakiaga ha Paulo ke ‘aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.’​—Filipi 2:4; 1 Peteru 5:2, 3, 6.

Tau Kupu Fakamafola

17. Ko e heigoa e fakaaogaaga hehe he alelo kua maeke ke fakalavelave e mafola he fakapotopotoaga?

¹⁷ Ko ia ne tutuli e mafola kua mua atu e fakaeneene lahi ke he hana fakaaoga he alelo. Kua hataki mai a Iakopo: “Kua pihia foki e alelo, ko e mena tote a ia, ka e hula ke he tau mena lalahi. Kitiala, ko e tau akau loga kua tugi he afi tote.” (Iakopo 3:5) Uta tala matahavala, tala tua ke he falu, tau kupu nakai totonu mo e mao lahi, gugu mo e feguiaki, pihia foki ke navanava fakavai ke moua e tutu mitaki mana ni​—ko e tau gahua oti a nei he tino ne fakalavelave e mafola he tau tagata he Atua.​—1 Korinito 10:10; 2 Korinito 12:20; 1 Timoteo 5:13; Iuta 16.

18. (a) He fakaaoga fakahanoa he alelo, ko e heigoa e puhala hako ma e tau tagata oti kua putoia ke he mena ia? (e) He magaaho ka omoi he ita e taha ke talahau e tau kupu fakamamahi lahi, to tali atu fefe e tau Kerisiano momotua?

¹⁸ Moli, ne pehe a Iakopo: “Ko e alelo, kua nakai maeke ia taha ke fakaako ia.” (Iakopo 3:8) Kua talahau foki ni he tau Kerisiano motua e tau mena ne tokihala moli lahi a lautolu he magaaho fakamui. Kua amaamanaki oti a tautolu to fakamagalo he falu ha tautolu a tau mena hehe pihia tuga he fakamagalo e tautolu a lautolu. (Mataio 6:9, 10) He falu a magaaho ko e pa ai mo e matila e ita ti moua mai ai e tau kupu fakamamahi. To manatu he magaaho ia he tagata taute mafola “ko e tali totonu ke liliu kehe ai e ita; ka ko e kupu fakahukia kua tupu ai e ita.” (Fakatai 15:1) Kua tumau ni, ke fafagu fakahokulo lahi a ia mo e nakai talia ke fakafetaliaki e tau kupu ita mo e falu a tau kupu ita. He magaaho ka mole ai, kua matulu hifo e ita, ko e loto mitaki lahi he tagata taute mafola ne iloa ke fakanimo fefe e tau mena kua talahau ke he magaaho ita. Mo e to iloa he Kerisiano loto holoilalo ke fakamolemole atu fefe mo e lali ke tulutului e tau loto kafo ne taute e ia. Ko e fakamailoga he malolo he mahani mitaki ke maeke ke talahau fakamoli, “fakamolemole kua hehe tuai au.”

19. Ko e heigoa ne ako e tautolu mai ia Paulo mo Iesu hagaao ke foaki atu fefe e fakatonuaga?

¹⁹ Liga to fakaaoga e alelo ke fakatonu a falu. Ne akonaki e Paulo ki mua he tau tagata a Peteru he magaaho ne nakai hako e tau mena ne taute he patu fakamui i Anetioka. Mo e foaki atu e Iesu e fakatonuaga malolo i loto he hana tau fekau ke he tau fakapotopotoaga ne fitu. (Kalatia 2:11-14; Fakakiteaga, veveheaga 2, 3) Kaeke ke fakaako a tautolu ke he tau fifitakiaga nei, kua iloa e tautolu kua nakai lata e fakatonuaga ke molu lahi neke galo e fekau ne taute ai. Ka e pete ni, nakai mao poke fakamamahi atu a Iesu mo Paulo. Ko e tau fakatonuaga ha laua, nakai ko e puhala ke fakamavete mai ha laua a tau loto hogohogomanava. Kua lali fakamoli a laua ke lagomatai ha laua a tau matakainaga. Kaeke kua logona e ia ne foaki atu e fakatonuaga kua nakai maeke ia ia ke taofi hana alelo, liga to fifili a ia ke fakamaoki hifo mo e fakamalo hifo ato liu ke talahau taha mena foki. Neke liga to talahau e ia e tau kupu mao mo e une atu e vihi he mena kua lali a ia e taute.​—Fakatai 12:18.

20. Ko e heigoa kua lata ke takitaki aki e tau mena oti ka talahau e tautolu ki a poke hagaao ke he ha tautolu a tau matakainaga tane mo e tau fifine?

²⁰ Tuga kua fita he talahau, kua lahi e vaha loto he mafola mo e fakaalofa ha ko e tau fua he agaga. Kaeke ko e tau mena ne talahau e tautolu ke he ha tautolu a tau matakainaga​—po ke hagaao ki a lautolu​—kua ata mai tumau ha tautolu a fakaalofa ki a lautolu, ti kua foaki atu ke he mafola he fakapotopotoaga. (Ioane 15:12, 13) Kua lata ha tautolu a tau kupu ke “fakaalofa, kia fakamasima ke he masima.” (Kolose 4:6) Kua lata a lautolu ke humelie mitaki, tuga ko e fiafia e loto ki ai. Ne fakatonu mai a Iesu: “Kia ha ha ia mutolu e masima, kia mafola foki a a mutolu ia mutolu.”​—Mareko 9:50.

“Kia Taute Hau a Fakamakamaka Lahi”

21. Kua kitia fefe ha tuolu a mafola ke he tau feleveiaga he tau fahi tapu mo e he tau magaaho he tau toloaga mo e tau fonoaga?

²¹ Ko e salamo ne tohia: “Kitiala, ko e mena mitaki lahi mo e fulufuluola, ke nonofo fakalataha e tau matakainaga.” (Salamo 133:1) Moli lahi, kua kolikoli a tautolu ke fakalataha mo e ha tautolu a tau matakainaga, mua atu ke he ha tautolu a tau feleveiaaga he tau fahi tapu mo e he tau magaaho he tau fonoaga lalahi mo e tau toloaga. He tau magaaho ia kua kitia moli ha tautolu a mafola ti pihia foki ni ki a lautolu i tua.

22. (a) To nakai leva ko e heigoa e mafola hehe ka maanamanatu e tau motu kua moua e lautolu, ti kua takitaki atu ke he heigoa? (e) Ko e heigoa e mafola moli ka takitaki atu ki ai he maveheaga mafola he Atua?

²² Nakai leva ti manamanatu ni e tau motu kua moua e lautolu e taha faga mafola mo e kua noa mo Iehova. Ka e he magaaho ka pehe a lautolu: “Kua mafola, kua nakai haofia!” ti fakalutukia e fakaotiaga ka hoko ki a lautolu oti kua nakai mafola mo e Atua. (1 Tesalonia 5:3) He mole mai e mena ia, ko e Tama Tane Patuiki he Mafola ka fakaholo atu ke fakamaulu mai e tau tagata, he tau mena matematekelea lahi ne tupu he galo e mafola mo e Atua. (Isaia 9:6, 7; Fakakiteaga 22:1, 2) He mogoia, ko e maveheaga he mafola he Atua ka moua mai e lalolagi milino lahi katoatoa. Pihia foki e tau manu he tau fonua ka okioki mai he mahani vale.​—Salamo 37:10, 11; 72:3-7; Isaia 11:1-9; Fakakiteaga 21:3, 4.

23. Kaeke kua takiofa e tautolu e amaamanaki ma e lalolagi mafola lahi fou, ko e heigoa kua lata a tautolu ke taute he mogonei?

²³ Ko e vaha lilifu lahi ha a ia! Kua leoleo mo e manako lahi nakai a koe ki ai? Kaeke kua pihia, “kia tutuli e mutolu e mafola mo e tau tagata oti kana katoa.” Kia kumi e mafola he mogonei, fakalataha mo e hau a tau matakainaga, mo e mua atu ni mo Iehova. E, “ha kua fakatalitali a mutolu ke he tau mena nei, kia taute hau a fakamakamaka lahi ke moua mai e ia kua nakai ilaila mo e nakai fai kelea mo e kua mafola.”​—Heperu 12:14; 2 Peteru 3:14, NW.

Manatu Nakai e Koe?

◻ Kua maeke he heigoa ke lipilipi ha tautolu a mafola mo Iehova?

◻ Liga ko e heigoa e tau faga mena nakai femaamaaki kua lata ke taute ke mitaki i loto he fakapotopotoaga?

◻ Ko e heigoa e tau mena ne foaki mai e Iehova ke lagomatai a tautolu ke kumi e mafola mo e tutuli ki ai?

◻ Ko e heigoa e tau manamanatu he tino kua maeke ke fakalavelave e mafola he fakapotopotoaga, mo e maeke fefe ia tautolu ke fakaliliu tua a lautolu?

[Fakatino he lau 26]

Kua lahi mahaki e mafola ke he vaha loto ha lautolu ne fakaako e Iehova

[Fakatino he lau 28]

Kua fuluola ha e mafola he tau matakainaga kua fekafekau fefakalataha