Ko e Magaaho na Nei ke Kumi a Iehova
“Kua kitekite hifo a Iehova mai he lagi ke he fanau he tau tagata, ke fioia po ke ha i ai taha kua mahani iloilo, taha kua kumi ke he Atua.”—SALAMO 14:2.
1, 2. (a) Kua onoono fefe e tokologa ke he Atua moli, ko Iehova? (e) Kua iloa fefe e tautolu ko e iloa e Iehova e mahani nakai fia iloa he tau tagata?
HE VAHA nei, ko e Atua moli ko Iehova, nakai talia he tau tagata nakai tali tonu ko e fai atua, mo e tau tagata ne tua ko e nakai fakaai ke iloa moli ko e fai atua po ke nakai, mo e tau tagata ne tapuaki ke he tau atua hehe, mo e tau miliona kua talahau ko e tua ke he Atua ka e fakatikai he tau gahua ha lautolu a ia. (Tito 1:16) Tokologa ne tua tuga e tagata fakaako fakataitai Sihamani he senetenari ke 19 aki ko Nietzsche, kua “mate e Atua.” Kua nakai kia iloa e Iehova e mahani nakai fia iloa kelea lahi nei? Nakai, ha kua omoi he hana agaga a Tavita ke tohi: “Kua pehe hifo e tagata goagoa ke he hana loto, Nakai fai Atua. Kua kelea ni a lautolu; kua fakalialia ha lautolu a tau mahani; nakai fakai taha ke mahani mitaki.”—Salamo 14:1.
2 Ne matutaki atu a Tavita: “Kua kitekite hifo a Iehova mai he lagi ke he fanau he tau tagata, ke fioia po ke ha i ai taha kua mahani iloilo, taha kua kumi ke he Atua.” E, kua iloa he Iki ne Pule Katoatoa a lautolu kua kumi atu ke iloa mo e fekafekau ki a ia. Ti kua aoga lahi mahaki he mogonei ke kumi e tautolu a ia. To kakano ni e mena ia ko e vevehe kehe he moui tukulagi mai he fakaotiaga tukulagi.—Salamo 14:2; Mataio 25:41, 46; Heperu 11:6.
3. Ko e heigoa e maekeaga kua ha ha i ai ma e vaha i mua?
3 Ha kua pihia, kua maeke ai ia tautolu ke kitia ko e ha kua aoga lahi ai ke lagomatai e tautolu e falu ke kumi a Iehova he mogonei. Kua miliona e tau tagata ne nakai la feleveia mo e taha he tau Fakamoli a Iehova po ke logona e “tala mitaki nai he kautu.” Mo e lahi mahaki fefe e numela he “moto tagata tokologa” ka hoko ki ai ato hoko mai e “matematekelea lahi,” kua nakai iloa e tautolu. Ka kua maeke moli e tokologa ke kumi mo e moua e Atua ko Iehova he tau magaaho ku e i mua, neke tomui lahi. Ti ko e huhu he mogonei, Ko e heigoa kua maeke ia tautolu ke taute ke lagomatai e tau afe mo e tau afe ke moua e Atua?—Mataio 24:14; Fakakiteaga 7:9, 14.
4, 5. Ke he ha lautolu a kumiaga ma e taha atua, ko e heigoa kua loto ki ai e tokologa?
4 Tokologa e tau tagata he lalolagi he vaha nei kua kumikumi, ka e kua kumikumi ma e heigoa? Kua gahoa lahi kua kumi moli ke he Atua moli ni ko Iehova. Kua tokologa kua fia loto ke he atua kua tonu ke he ha lautolu ni a tau manako mo e tau mahani fili. Ko e tagata ne taute e kumikumi ke he tau manatu he tau tagata he U.S. ko George Gallup, Jr., ne talahau mai: “Kua nakai maeke ia koe ke moua moli mai e kehe he vaha loto he tau tagata o tapu mo e tau tagata nakai o tapu hagaao ke he mahani fakavai, tau lagatau kalo kehe ke totogi tukuhau, mo e kaiha mena ikiiki, kua lahi foki ke pihia ha ko e tau mena ke fakalataha ki ai ni e tau lotu loga.” He lafi atu a ia “kua tokologa ne taute ni e lotu kua hagahaga mitaki ki a lautolu mo e ke fakamaineine lahi a lautolu . . . Ne ui aki he taha tagata ko e lotu à la carte.”
5 To pehe e falu, “Kua lata mitaki lahi ni e lotu haku mo au.” E, kua lata moli ni e huhu ke pehe, “Kua lata mitaki moli nakai e lotu haku ma e Atua?” Moli, ko e tokologa lahi mai i Kerisitenitome mo e tau lotu faka-Hinitu kua loto lahi ni ke fakalilifu atu ke he ha lautolu a tau mena fakafifitaki mo e tau tupua. Tokologa lahi mai ia lautolu ne ui ko e tau Kerisiano kua lata lahi ni mo lautolu e atua Tolu Taha. Mo e kua molea atu he 900 he tau miliona he tau tagata Musulimi ne tua ki a Allah. Ka e ke he taha fahi, kua miliona e tau tagata ne nakai tali tonu ke he Atua ne pehe ko e nakai fai Atua.
Ko Lautolu Kua Lata ke Moua Lagomatai
6. Ko e heigoa kua moua he tau tagata tokologa ne totou e Ko e Kolo Toko?
6 Ka e kua a lautolu ia tautolu ne totou tumau e mekasini nei? Ne kumi a tautolu ke he Atua moli mo e kua moua tuai a ia. Ne fakamoli e tautolu e tau kupu ha Iakopo 4:8: “Kia fakatata atu a mutolu ke he Atua, ti fakatata mai ai a ia kia mutolu.” He fefakalatahaaki tumau mo e fakapotopotoaga Kerisiano, kua fakatata lahi a tautolu ke he Atua, mo e ne iloa moli e tautolu ni ko e fakatata lahi mai a Iehova ki a tautolu.—Ioane 6:44, 65.
7. Iloa fefe e tautolu kua tokologa e tau tagata kua fiafia agaia ke maeke ke gahua tumau ke he kupu moli?
7 Ka e pete ni, kua iloa e tautolu kua tokologa agaia a lautolu ne fiafia ke fakalataha ke he falu he tau magaaho mo e tau tagata ha Iehova ka e nakai la taute e tau gahua kua lata ke fakatata atu ki a Iehova he taute e tukuleleaga mo e papatiso. Kua iloa fefe e tautolu e mena nei? He tau 1990 kua teitei ke hogofulu e tau miliona he tau tagata ne o ke he Fakamanatu he matulei ha Iesu. Ka e tokologa fefe kua gahua tumau ke fakailoa e tala mitaki he Kautu? Kua molea fakatote e fa e tau miliona. Kakano he mena ia kua liga hagaao ke he ono e tau miliona kua fiafia mai ke he kupu moli mo e he falu magaaho kua olioli ke fakalataha auloa mo tautolu ka e nakai la kamata ia ke tuku atu e vagahau he kupu moli mo e fakamatala e tala mitaki he Kautu. Ti kua nakai fakauaua ai, ke he falu a tau magaaho kua tokologa ne vagahau atu ke lago a Iehova mo e pule he hana Kautu. Ka e pete ni kua nakai la fakamailoga fakamali e lautolu a lautolu ko e tau Fakamoli ha Iehova. Ko lautolu nei foki kua manako a tautolu ke lagomatai.—Sefanaia 3:9; Mareko 13:10.
8, 9. (a) Ko e heigoa kua fakamalolo mai e Iehova ki a tautolu ke taute? (e) Ko e ha kua nakai pulotu ke tiaki e fakatonuaga ha Iehova?
8 Kua manako a tautolu ke fakamalolo a lautolu nei ke fiafia ke taute ai mo tau Fakamoli a Iehova kua gahuahua ke he gahua lahi mahaki he vaha fakahiku kua taute ke he lalolagi katoa he mogonei. Fakamolemole kia mailoga la e uiina fakaalofa ha Iehova he Fakatai 1:23: “Kia liliu mai ā he akonaki atu e au kia mutolu; kitiala, to liligi atu e au haku Agaga kia mutolu; to fakailoa atu e au haku a tau kupu kia mutolu.” (Fakatatai Ioane 4:14) Kua fakamalolo mai ha he iloa, ko e to fai mena a Iehova ka taute kaeke kua taute e tautolu e tau lakaaga mitaki ke fakamailoga aki a tautolu ke he higoa mo e tapuaki hana! Kua moli lahi, kua nakai manako a tautolu ke lafi fakalataha atu mo lautolu ne fakamaama mai ia Fakatai 1:24, 25: “Ne ui atu au ka e nakai mafai a mutolu; ne fakaolo atu e au haku tau lima, ka e nakai haga mai taha; Ne tiaki e mutolu haku a pule oti ni; mo e nakai mafai a mutolu ke fanogonogo ke he haku a tau akonakiaga.”
9 Ko lautolu ne tiaki e tau fakatonuaga ha Iehova kua lata a lautolu ke kumi ki a ia he magaaho kua maeke ai a ia ke moua, mo lautolu ne toka ha lautolu a fifiliaga ato taute la ka kitia moli kua kamata e matematekelea lahi, ka moua ai e lautolu a lautolu kua to lahi e leva he fakatali. Ko e puhala pihia kua fakakiteaga ko e noa mo e tua mo e pulotu mo e to fakakiteaga e vihiatia ke he totonu noa ha Iehova.—2 Korinito 6:1, 2.
10. Ko e ha kua hagahaga kelea lahi e mahani nakai fia loto mo e nakai fia iloa ke he ha mena?
10 Ke fakatai aki ko e ha kua lata lahi ai ke gahua ni he mogonei, to leo ni kia a koe ke fatua ua e nimonia ka moua to muitua ke he tomatomaaga mitaki he ekekafo? Po ke kua pehe, he magaaho ia ni ne mailoga ai e koe e tau fakamailoga fakamua he gagao? Ti ko e ha he mogoia kua leo ai a koe ke vevehe kehe mai a koe ni he lalolagi gagao ha Satani mo e ke kau mo Iehova mo e hana tau Fakamoli? Ko e fakahikuaga he mahani nakai fia loto, nakai fia manatu ke he ha mena, mo e nakai talia kua taute fakamali mai ia Fakatai 1:26-29: “Ko e mena ia to kata foki au ke he malaia ha mutolu; to va au ka hoko mai e mena ke matakutaku ai a mutolu; . . . Ti ui mai a lautolu kia au ka e nakai tali atu ai au kia lautolu; to kumi fakamakutu e lautolu au ka e nakai ni moua e lautolu au. Ne vihiatia e lautolu e iloilo; nakai manako foki a lautolu ke matakutaku kia Iehova.” Kia nakai moua mai a tautolu kua ‘kumi ki a Iehova’ he magaaho kua tomui lahi!
11. Ko e heigoa e lagomatai kua maeke ke moua e lautolu kua kumi ke fekafekau ke he Atua?
11 Ko e falu ne totou e mekasini nei kua liga hane kumi agaia ke he Atua moli. Kua fiafia lahi a mautolu he fakatumau a koe ke he hau a kumikumiaga. Kua liogi a mautolu ke omoi he hau a lotomatala ke he Tohi Tapu ke taute e falu gahua mitaki ke tu mo e mauokafua ke he kupu moli. Kia iloa moli ko e tau fakapotopotoaga takitaha he tau Fakamoli a Iehova kua tumau tuai ke lagomatai a koe ke he hau a kumikumiaga.—Filipi 2:1-4.
Magaaho ke Fakamakutu mo e Gahuahua
12, 13. Ko e ha kua lata a tautolu ke taute e tau gahua kua hagaao ke he tapuaki moli?
12 Ko e ha kua aoga lahi ai ia tautolu oti ke taute e tau gahua kua fakamailoga a tautolu ni mo e Atua ko Iehova mo e hana tapuaki moli? Ha kua holo atu e tau mena tutupu he lalolagi ke he tapunu he fakahikuaga. Ko e tau lau tohi he fakamauaga tuai kua fulufuluhi vave lahi mai he maekeaga he tagata ke totou a lautolu. Nakai ko e magaaho a nei ke nofo i luga he pa po ke ke mafanafana noa. Ne talahau fakamali lahi e Iesu: “Ko ia kua nakai kau mo au, kua kau kehe a ia ia au; ko ia nakai tanaki fakalataha mo au kua fakatafola kehe e ia.” Kua pehe foki a ia: “Ha ko e tagata ke ma ia au, mo e haku a tau kupu, to ma ni ia ia e Tama he tagata, ka hau a ia mo e lilifu hana, mo e lilifu he Matua, mo e lilifu he tau agelu tapu.”—Mataio 12:30; Luka 9:26.
13 Ko e magaaho ni a nei ke fakamakutu mo e ke gahuahua! Kua iloa e tauotlu e puhala ka holo ki ai e tau mena tutupu he lalolagi, mo e ko Amaketo hane hake mai he patulagi. Ha kua pihia, kua ui atu ai ke kumi a Iehova he mogonei fakamua ato hoko mai e ‘aho he ita hana’ he magaaho kua maeke agaia a ia ke moua. Ke he matematekelea lahi, kua tomui lahi tuai.—Sefanaia 2:2, 3; Roma 13:11, 12; Fakakiteaga 16:14, 16.
14. Ko e heigoa ha tautolu a kakano ke kumi atu ke he Atua?
14 Kua lata moli lahi e tau tagata oti ke kumi e fiafia he Atua he mogonei ni. Ko e aposetolo ko Paulo ne fakailoa tonu mai ia Gahua 17:26-28: “Kua eke foki [he Atua] e tau motu oti he tau tagata ke he toto taha, ke nonofo ai ke he fuga kelekele oti kana, kua tuku foki e tau tau ne kotofa tuai mo e tau katofia he tau mena ke nonofo ai a lautolu; Kia kumi a lautolu ke he Iki, po ke maeke he tamotamo a lautolu mo e kitia e lautolu a ia; ka e nakai ni mamao a ia mo tautolu takitokotaha. Ha ko e mena kua momoui a tautolu ia ia, mo e gahuahua ia ia, ha ha i ai foki a tautolu ia ia.” Ko e tau kupu fakahiku ia, “kua momoui a tautolu ia ia, mo e gahuahua ia ia, ha ha i ai foki a tautolu ia ia,” kua foaki tonu mai e kakano ke lata a tautolu ke kumi e Atua. Kua fakaaue ke he totonu noa ha Iehova, kua moui ai a tautolu he vaha loto pukilu ka e aoga lahi he nonofoaga he tau momoui he matakavi ne takai he lalolagi mo e aolagi he lalolagi tote nei. Nakai kia kua lata a tautolu ke fakaaue lahi ke he Iki ne Pule Katoatoa ke he lagi mo e lalolagi katoatoa? Mo e nakai kia kua lata a tautolu ne fakakiteaga ha tautolu a loto fakaaue ki a ia ke he tau puhala kua aoga?—Gahua 4:24.
15. (a) Ko e heigoa ke he logonaaga he tagata fakamau tala tuai ko Arnold Toynbee e finagalo he lotu kua tokoluga atu? (e) Ko e heigoa kua lata ia tautolu ke taute ke maeke ke fakalilifu atu ke he Atua?
15 Ne tohi he tagata fakamau tala tuai ko Arnold Toynbee he taha magaaho: “Ko e finagalo moli he lotu kua tokoluga atu ke fakakikila mai e tau fakatonuaga fakaagaga mo e kupu moli ko e hana alito ki loto he tau solu tokologa kua maeke ke hokotia ki ai, ke taute ai e tau solu takitaha nei ti liga ke maeke ai he magaaho ia ke fakamoli e fakahikuaga moli he Tagata. Ko e fakahikuaga moli he tagata ke fakalilifu e Atua mo e ke olioli ki a Ia tukulagi.” (An Historian’s Approach to Religion, tau lau tohi 268-9) Ke maeke ai ke fakalilifu e Atua, kua lata a tautolu ke kumi fakamua a ia mo e moua e lotomatala tonu hagaao ki a ia mo e hana finagalo. Ti kua tonu lahi e uiiaga ha Isaia: “Kia kumi e mutolu a Iehova ka kua maeke he moua e mutolu a ia; kia tauui atu ā mutolu kia ia ka kua tata mai a ia; Kia tiaki e ia ne mahani kelea hana mahani, mo e tagata mahani hepehepe kia tiaki e ia hana tau manatu; ti liu atu a ia kia Iehova, ti fakaalofa mai a ia kia ia; kia liu atu a ia ke he Atua ha tautolu, ha ko e mena to fakamagalo fakalahi mai e ia.”—Isaia 55:6, 7.
Ko e Heigoa e tau Lagomatai kua Maeke ia Tautolu ke Foaki?
16. (a) Ko e heigoa e foliaga uka kua fehagaaoaki mo e fakapotopotoaga Kerisiano? (e) Ko e heigoa e tau puhala aoga kua maeke ia tautolu ke lagomatai aki e falu ke fekafekau ki a Iehova?
16 Ko e tau miliona nei ko e tau tagata ne fia iloa ka e nakai la gahuahua mo tau tagata fakailoa, kua tuku mai e foliaga ki a tautolu oti. Ti ko e heigoa e puhala aoga kua taute e tautolu ko e tau momotua, fekafekau lagomatai, tau tagata foafoa, mo e tau tagata fakailoa ke lagomatai a lautolu nei kua fiafia ke he kupu moli ke gahua fakalataha i loto he tapuakiaga moli mo tautolu? Ko e taha e puhala ke foaki e lagomatai aoga ke he tau mena kua lata, ka ui atu ke he ha lautolu a tau kaina mo e uta a lautolu ke he tau feleveiaaga he Fale he Kautu ke maeke ai foki ia lautolu ke olioli ke he tau lagomatai aoga ne moua mai he agaga ha Iehova ke he tau magaaho tumau. Ko e fakatonuaga ha Paulo ke he tau Heperu i loto he He veveheaga 10, tau kupu 24, mo e 25, kua mafiti lahi e fekau ke he vaha nei tuga i tuai: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” Kua fakamalolo atu a mautolu ke he tau tagata oti kua manako ke iloa e finagalo ha Iehova ke fakalataha atu tumau mo e tau Fakamoli a Iehova ke he ha lautolu a Fale he Kautu he kavi ia.
17. Kaeke ke maeke ia tautolu ke lagomatai e tau tagata fakaako Tohi Tapu ke holo fakapapahi atu ha lautolu a kumiaga ki a Iehova, ko e heigoa e tau huhu kua lata ke fai tali?
17 Kaeke kua fakaako Tohi Tapu a tautolu mo e taha tagata ne fa fano tumau ke he tau feleveiaaga, kua maeke nakai ia tautolu ke lagomatai e tagata ia ke lata mo tagata fakailoa he tala mitaki? (Kikite ke he Organized to Accomplish Our Ministry, tau lau tohi 97-9.) Mo e he magaaho kua taute a ia ko e tane po ke fifine mo tagata fakailoa kua nakai la papatiso, kua foaki atu nakai e uiina ke o fakalataha tumau mo tautolu ke he gahua fakamatala ke he tau tagata mo e ke he falu he tau fakaakoaga ha tautolu mo e tau liliu ahiahi atu? (Kikite ke he fufuta tohi he Kolo Toko [Peritania] ia Tesema 1, 1989, lau tohi 31.) Ke he falu a tau kupu, he magaaho kua lata pihia a lautolu ne fou, kua fakamalolo nakai e tautolu a lautolu he toka ai a lautolu ke kitia fakamua e falu taui kua mitaki he ha tautolu a tau gahua fakamatala?—Mataio 28:19, 20.
Kua Lata Moli ke Kumi a Iehova
18. Kua fakakiteaga fefe e Iehova hana fakaalofa hofihofi noa ke he tau tagata?
18 Ha ko e lukutoto ne taute poa e Iesu Keriso, kua nakai manatu tumau e Iehova ha tautolu a tau agahala tuai mo e tau mahani fakahanoa ke fakakelea aki a tautolu kaeke kua tokihala a tautolu mo e fakagahuahua e tua. Kia mailoga la e tau kupu ha Tavita: “Nakai eke e ia kia tautolu ke lata mo e ha tautolu a tau hala; nakai taui foki e ia a tautolu ke lata mo e ha tautolu a tau mahani hepehepe. Ha ko e mena tuga ne lagi kua tokoluga ke he lalolagi, kua pihia ni e lahi he hana fakaalofa kia lautolu kua matakutaku kia ia. Tuga ne vaha mamao e fahi uta mo lalo, kua fakamamao pihia e ia ia tautolu ha tautolu a tau holifono. Tuga ne hofihofi e fakaalofa he matua ke he hana fanau, kua hofihofi pihia e fakaalofa a Iehova kia lautolu kua matakutaku kia ia, Ha kua fioia e ia e mena ne eke aki a tautolu; kua manatu e ia ko e kelekele ni a atu tautolu nai.”—Salamo 103:10-14; Heperu 10:10, 12-14.
19. Ko e heigoa e fakamaloloaga kua ha ha ai ma lautolu kua liga ke tafea kehe mai he kupu moli?
19 Ko Iehova moli ni e Atua ne foaki lagomatai mo e fakaalofa hofihofi noa. Kaeke kua omai a tautolu ki a ia he loto holoilalo mo e tokihala, kua fakamagalo ai ti nimo e ia. Ne nakai fakafualoto tukulagi a ia ti hoko atu ke he fakakikiveka ke he afi tukulagi. Nakai, kua tuga ni foki he talahau e Iehova: “Ko au, ko au ni kua holoholo kehe ai hau a tau holifono, ha ko au ni; ko e hau a tau hala foki nakai manatu ai e au.” Kua lata lahi e fakamaloloaga ke he taha mo e taha, kua liga kua tafea kehe mai he kupu moli mo e kua taute fakahanoa ha lautolu a vaha loto mo Iehova! Ne fakamalolo atu foki ki a lautolu ke kumi ki a Iehova he mogonei mo e liliu mai ki loto ke gahua fakalataha mo e tau tagata ne ui aki hana higoa.—Isaia 43:25.
20, 21. (a) Ko e heigoa e fakatai fakamalolo kua ha ha i Iutaia i tuai ma tautolu? (e) Ko e heigoa kua lata ke taute he tau tagata ne nonofo i Iuta ke moua e fakamonuina ha Iehova?
20 Hagaao ke he mena nei, kua ha ha i ai kia, ia tautolu e fakamaloloaga he fakatai he Patuiki ko Asa i Iutaia i tuai. Ne huhuo kehe e ia e tapuaki pikopiko mai he hana kautu, ka e fai vala ikiiki he tapuaki pouliuli ne toe agaia. Ko e fakamauaga he 2 Nofoaga he Tau Patuiki 15, he tau kupu 2 ke he 4, kua talamai ki a tautolu e vagahau he perofeta ko Asaraia ki a Asa ke manatu: “Ha ha ia mutolu a Iehova, ka ha ha ia ia a mutolu; kaeke foki ke kumi e mutolu a ia, to moua e mutolu a ia; ka ko e mena ka tiaki e mutolu a ia, to tiaki e ia a mutolu. Ko e tau aho loga ni kua noa a Isaraela mo e Atua moli . . . Ka kua liliu mai a lautolu kia Iehova ko e Atua a Isaraela he matematekelea a lautolu, ne kumi foki e lautolu a ia ti moua e lautolu a ia.”
21 Ne nakai tau fakamumuli a Iehova mo e Patuiki ko Asa ka e “moua e lautolu a ia.” Kua fefe e tauteaga he patuiki ke he fekau nei? I loto he veveheaga taha ia, ke he 2No 15 tau kupu 8 mo e 12 kua tali mai: “Kua fanogonogo a Asa ke he tau kupu na, . . . ti fakamalolo ai a ia, mo e uta kehe e ia e tau mena vihiatia he motu oti . . . mo e liu taute ai e ia e fatapoa a Iehova ha ha i mua he fakamaluaga he fale a Iehova. Ti eke foki e [Iutaia] e maveheaga ke kumi kia Iehova ko e Atua he tau matua ha lautolu mo e ha lautolu a tau loto katoa mo e ha lautolu a tau agaga katoa.” E, ne kumi fakamoli lahi ni a lautolu ki a Iehova “mo e ha lautolu a tau loto katoa mo e ha lautolu a tau agaga katoa.” Ti ko e heigoa e taui ke he motu? Kua talahau mai he 2No 15 kupu 15 ki a tautolu: “Ne fiafia a Iuta oti ke he omonuo; he omonuo a lautolu mo e loto katoa, mo e kumi e lautolu a ia mo e ha lautolu a tau manako oti; ne moua foki e lautolu a ia. Ne foaki mai e Iehova ke okioki ai a lautolu ke he tau fahi oti.”
22. Ko e heigoa kua fakamalolo mai ki a tautolu ke gahuahua he mogonei i loto he fekafekauaga ha Iehova?
22 He mogonei, nakai kia ko e fakamafanaaga ma tautolu oti ke taute e tau gahua mitaki hagaao ke he tapuaki mea ha Iehova? Kua iloa e tautolu kua ha ha i ai e maekeaga ma e falu he tau miliona ia ke fakaheke a Iehova. Kua nakai ha ha i ai e fakauaua, tokologa mai ia lautolu nei kua taute e tau liliuaga i loto he ha lautolu a tau momoui ke maeke ai ke feleveia mo e tau mahani kua lata he kupu he Tohiaga Tapu ma e fekafekauaga a Iehova. Kua tutupu e falu ke he lotomatala mo e tua, kua kumi a Iehova, mo e to omoi mai he tau loto a lautolu ke foaki atu e vagahau mea ke he falu he talahau ki a lautolu e maamaaga kua hokulo ke he kupu moli hagaao ki a Iehova mo e hana Kautu. Mo e ko e ha, kua aoga lahi ai ia tautolu oti ke kumi a Iehova he mogonei ni he magaaho kua maeke ai a ia ke moua? Ha kua tata lahi mai tuai hana lalolagi fou ne mavehe ki ai!—Isaia 65:17-25; Luka 21:29-33; Roma 10:13-15.
Manatu Nakai e Koe?
◻ Ko hai ne fakakiteaga e mahani nakai fia iloa ke he Atua moli ko Iehova?
◻ Ne fa mahani ke tokoluga fefe e lauiaaga he lotu ke he tau mahani?
◻ Liga ko e heigoa kua maeke ke holo ki mua e tau Fakamoli kua gahuahua?
◻ Ko e ha ko e magaaho na nei ke fakamakutu mo e ke gahuahua?
◻ Ko e ha kua lata lahi moli a Iehova ke kumi ki ai?
[Fakatino he lau 23]
Tokologa e tau kapitiga he tau Fakamoli ha Iehova ne fakalataha ke he Fakamanatu kua ha ha i ai e maekeaga ke eke mo tau fekafekau he Atua
Tau tagata he tau 1990 ne fakalata ke he Fakamanatu: 9,950,058
Tapuni he tau tagata fakailoa he tau 1990: 4,017,213
[Fakatino he lau 25]
He vaha he Patuiki ko Asa, ne liliu e motu ki a Iehova