Veveheaga Taha
Kaufakalataha e Tapuaki he Vaha ha Tautolu—Ko e Heigoa e Kakano?
1, 2. (a) Ko e heigoa e gahua ofoofogia hane tupu he vaha ha tautolu? (e) Ko e heigoa e amaamanakiaga mitaki lahi kua moua he tau tagata loto fakamoli?
KE HE lalolagi katoa kua ofoofogia e gahua ke kaufakalataha e tapuakiaga. Kua tamai fakalataha e tau miliona tagata mai he tau motu, tau magafaoa, mo e tau vagahau oti kana. Loga atu agaia hane fakapotopoto mai he tau tau takitaha. Ko lautolu nei ne fakakite he Tohi Tapu ko e “tau fakamoli” a Iehova ti kua fakahigoa ko e “moto tagata tokologa.” Kua fekafekau a lautolu ke he Atua “ke he aho mo e po.” (Isaia 43:10-12; Fakakiteaga 7:9-15) Ko e ha ne taute e lautolu e mena nei? Kakano kua iloa e lautolu ko Iehova ko e Atua moli tokotaha. Kua fakaohooho he mena nei a lautolu ke fakalautatai e tau momoui ha lautolu mo e hana tau puhala tututonu. Pihia foki, ne ako e lautolu kua nonofo a tautolu he “tau aho fakamui” he lalolagi kelea nei, ka uta kehe vave ai he Atua, mo e to hukui aki e ia e lalolagi fou parataiso hana.—2 Timoteo 3:1-5, 13; 2 Peteru 3:10-13.
2 Kua mavehe mai e Kupu he Atua: “Toe tote, ti nakai ha i ai e tagata mahani kelea; . . . Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.” (Salamo 37:10, 11) “To eke ni e motu ma e tau tagata tututonu, to nonofo muatua ai a lautolu.” (Salamo 37:29) “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:4.
3. Moua fefe e tapuakiaga kaufakalataha moli?
3 Ko lautolu kua kaufakalataha ke he tapuakiaga moli he mogonei ka eke mo tau tagata fakamua he lalolagi fou. Ne kua ako e lautolu e finagalo he Atua ti hane taute katoatoa ke he mena ne fahia a lautolu ki ai. He fakakite e aoga he mena nei, ne pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Ne tohi he aposetolo ko Ioane: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:17.
Ko e Kakano Moli
4. (a) Ko e heigoa e kakano moli he fakapotopoto mai e tau tagata tokologa lahi ke tapuaki fakalataha he vaha ha tautolu? (e) Fakamaama fefe he Tohi Tapu e fakapotopoto maiaga nei?
4 Ko e heigoa e kakano moli he fakapotopoto mai e tau tagata tokologa lahi ke tapuaki fakalataha he vaha ha tautolu? Ko e fakamoliaga mahino kua tata lahi mahaki a tautolu ke he fakaotiaga he lalolagi kelea nei, ti to kamata e lalolagi fou he Atua ka mole e mena ia. Ko tautolu kua ono mata e fakamoliaga he tau perofetaaga he Tohi Tapu ne talahau tuai e fakapotopoto maiaga aoga lahi nei. Taha he tau perofetaaga ia ne pehe: “Ka to hoko ni ke he tau aho a mui [tau aho fakahiku nei], to fakamau ai e mouga ha i ai e fale a Iehova [hana tapuaki tokoluga moli] ke he tapunu mouga he tau mouga [ki luga muatua he ha vahega tapuaki], . . . ti tafe atu ki ai e tau motu oti kana. To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova, ko e fale foki he Atua a Iakopo; to fakaako mai e ia a tautolu ke he hana tau puhala, ti o ai a tautolu ke he hana tau puhala.”—Mika 4:1, 2; Salamo 37:34.
5, 6. (a) Kua moli fefe e hane fuluhi e tau motu ki a Iehova? (e) Ko e heigoa e tau huhu kua lata ke huhu e tautolu ki a tautolu ni?
5 Pete he nakai o mai e tau motu oti kana ke he fale fakaagaga ha Iehova ke tapuaki, kua totou miliona e tau tagata takitokotaha mai he tau motu oti kana hane taute pihia. He ako e lautolu hagaao ke he finagalo fakaalofa mo e aga fulufuluola ha Iehova ko e Atua, ne omoomoi lahi e tau loto ha lautolu. Kua kumi fakatokolalo a lautolu ke iloa e mena kua manako e Atua mai ia lautolu. Kua tatai e tau liogi ha lautolu mo e salamo ne pehe: “Kia fakaako mai e koe au ke eke hāu a finagalo; ha ko koe ni ko e haku a Atua.”—Salamo 143:10.
6 Kitia nakai e koe a koe he vahaloto he moto tagata tokologa kua fakapotopoto e Iehova mogonei ke tapuaki fakalataha? Kua fakakite nakai he tali hau ke he fakaakoaga ne moua e koe he hana Kupu e loto fakaaue moli hau ko Iehova e Punaaga he Tohi Tapu? To laulahi fefe hau a ‘fano he hana tau puhala’?
Puhala ke Moua Aki
7. (a) To lahi fefe e kaufakalataha ke he tapuakiaga ka moua he magaaho fakahiku? (e) Ko e ha kua fakamafiti ke eke mo tagata tapuaki ha Iehova mogonei, mo e lagomatai fefe e tautolu falu ke taute pihia?
7 Ko e finagalo ha Iehova ma e tau tufugatia lotomatala oti kana ke kaufakalataha ke he tapuakiaga moli. Kua manako ha a tautolu ke he aho ka tapuaki e tau tagata oti kua momoui ke he Atua moli tokotaha ni! (Salamo 103:19-22) Ka e ato hoko ai, to uta kehe oti e Iehova a lautolu ne nakai talia ke taute hana finagalo tututonu. He fakaalofa noa, kua fakailoa tuai e ia e mena hana ka taute, ke maeke he tau tagata he tau matakavi oti ke moua e magaaho ke hikihiki ha lautolu a tau puhala. (Isaia 55:6, 7) Ko e mena ia, he vaha ha tautolu ko e “tau motu kehe oti, mo e tau magafaoa, mo e tau vagahau kehekehe, mo e tau motu,” kua hane taute e ole fakamafiti nei: “Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi mo e tau vai puna.” (Fakakiteaga 14:6, 7) Kua talia nakai e koe e uiina ia? Kaeke pihia, ko e kotofaaga hau ke uiina falu ke iloa mo e tapuaki ke he Atua moli.
8. He mole e ako e tau matapatu fakaakoaga he Tohi Tapu, ko e heigoa e lakaaga kua lata ia tautolu ke eketaha ke taute?
8 Nakai finagalo a Iehova ke tapuaki he tau tagata ne talahau kua talitonu ki a ia ka e matutaki ke tutuli e tau mena ne fiafia ni a lautolu ki ai. Manako e Atua ke he tau tagata ke “maama mitaki ke he hana finagalo” ti fakaata e mena nei he tau momoui ha lautolu. (Kolose 1:9, 10) Ko e mena ia, kua manako e tau tagata loto fakaaue ne ako e tau matapatu fakaakoaga he Tohi Tapu ke hokotia ke motua faka-Kerisiano. Manako a lautolu ke iloa lahi a Iehova, ke fakalaulahi mo e fakahokulo e maamaaga ha lautolu ke he hana Kupu, mo e fakagahua katoatoa ai he tau momoui ha lautolu. Kua kumi a lautolu ke fakaata e tau aga he ha tautolu a Matua he lagi mo e ke onoono ke he tau mena tuga he kitia e ia. Kua omoomoi he mena nei a lautolu ke kumi puhala ke fakalataha ke he gahua fakamoui hane fakatokatoka e ia he lalolagi he vaha ha tautolu. Pihia foki nakai e manako hau?—Mareko 13:10; Heperu 5:12–6:3.
9. Ko e heigoa e tau puhala kua maeke e kaufakalataha moli he mogonei?
9 Kua fakakite he Tohi Tapu ko lautolu ne fekafekau ki a Iehova kua lata ko e tau tagata kaufakalataha. (Efeso 4:1-3) Lata ke moua ni mogonei e kaufakalataha nei, pete kua nonofo a tautolu he lalolagi mavehevehe mo e hane taufetului agaia mo e tau nakai mitaki katoatoa ha tautolu ni. Ne liogi fakamakamaka a Iesu ke loto taha e tau tutaki oti hana, ke olioli e kaufakalataha moli. Ko e heigoa e kakano he mena nei? Fakamua, ke mitaki e fakafetuiaga ha lautolu mo Iehova mo e hana Tama. Uaaki, ke kaufakalataha a lautolu ko e taha mo e taha. (Ioane 17:20, 21) Ke moua ai, ko e fakapotopotoaga Kerisiano kua eke mo fakatokatokaaga ne kua fakaako mai e Iehova e tau tagata hana.
Ko e Heigoa ne Lafi ke he Kaufakalataha?
10. (a) Ko e heigoa ha tautolu ka feaki he fakaaoga fakatagata e tautolu e Tohi Tapu ke manamanatu ke he tau tali he tau huhu kua lauia a tautolu? (e) Manamanatu ke he tau puhala ne lafi ke he kaufakalataha faka-Kerisiano he tali e tau huhu ne tohi he paratafa nei.
10 Fitu e matapatu manatu kua lafi ke he kaufakalataha he tapuaki kua fakakite mai i lalo. He tali e koe e tau huhu i ai, manamanatu ke he puhala kua lauia e tau vala takitaha ke he fakafetuiaga hau mo Iehova mo e tau matakainaga Kerisiano. He manamanatu ke he tau vala nei mo e tau kupu tohi ne tutu i ai ka e nakai fatiaki ka lafi ke atihake e pulotu mahani Atua hau, loto manamanatu, mo e lotomatala—tau aga kua lata ke moua e tautolu oti. (Tau Fakatai 5:1, 2; Filipi 1:9-11) Fakatutala takitaha e tau puhala nei.
(1) Talia e tautolu e tonuhia ha Iehova ke fakatu e tuaga he mitaki mo e kelea. “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.”—Tau Fakatai 3:5, 6.
Ko e ha kua lata ia tautolu ke kumi e tomatomaaga mo e takitakiaga ha Iehova ka taute e tau fifiliaga? (Salamo 146:3-5; Isaia 48:17)
(2) Ha ha ia tautolu e Kupu he Atua ke takitaki a tautolu. “Ha kua talia e mu[tolu] e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua (ko e moli ni haia,) kua gahua ai ni i loto ia mutolu kua tua.”—1 Tesalonia 2:13.
Ko e heigoa e hagahagakelea ka taute e tautolu e tau mena ne “manatu” a tautolu kua hako? (Tau Fakatai 14:12; Ieremia 10:23, 24; 17:9)
Kaeke nakai iloa e tautolu e fakatonuaga he Tohi Tapu ne talahau ke he taha matakupu pauaki, ko e heigoa ha tautolu kua lata ke taute? (Tau Fakatai 2:3-5; 2 Timoteo 3:16, 17)
(3) Kua aoga oti a tautolu mai he taha e fakaholoaga kai fakaagaga. “To fakaako e Iehova hau a fanau oti.” (Isaia 54:13) “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho [he moumouaga].”—Heperu 10:24, 25.
Ko e heigoa e tau aoga ne moua e lautolu ne fakaaoga katoatoa e tau fakaholoaga ha Iehova ma e kai fakaagaga? (Isaia 65:13, 14)
(4) Ko Iesu Keriso, nakai fai tagata, e Takitaki ha tautolu. “Aua neke ui a mutolu Rapai; ha ko e mena tokotaha ha mutolu a takitaki, ko e Keriso haia; ka ko mutolu oti, ko e matakainaga a mutolu. Aua foki neke ui e mutolu taha ke he lalolagi ko e matua ha mutolu; ha ko e mena tokotaha ha mutolu a Matua, ko ia ha he lagi. Ti aua neke ui a mutolu ko e tau takitaki; ha ko e mena tokotaha ha mutolu a Takitaki, ko e Keriso haia.”—Mataio 23:8-10.
Lata nakai he taha ia tautolu ke talitonu kua mua hake a tautolu ke he falu? (Roma 3:23, 24; 12:3)
(5) Onoono atu a tautolu ke he fakatufono he Kautu he Atua ko e amaamanakiaga hokoia ni ma e tau tagata. “Hanai, kia liogi pehe a mutolu, Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi. Kia kumikumi fakamua a mutolu ke he kautu he Atua mo e hana tututonu.”—Mataio 6:9, 10, 33.
Puhala fe he ‘kumikumi fakamua ke he kautu’ ka lagomatai ke puipui e kaufakalataha ha tautolu? (Mika 4:3; 1 Ioane 3:10-12)
(6) Fakatupu he agaga tapu ke he tau tagata tapuaki ha Iehova e tau fua aoga ma e kaufakalataha faka-Kerisiano. “Ko e fua he [a]gaga ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.”—Kalatia 5:22, 23.
Ko e heigoa kua latatonu ia tautolu ke taute ke maeke he tau fua he agaga he Atua ke tupu ia tautolu? (Gahua 5:32)
Puhala fe he moua e agaga he Atua kua fakaohooho ke he fakafetuiaga ha tautolu mo e tau matakainaga Kerisiano? (Ioane 13:35; 1 Ioane 4:8, 20, 21)
(7) Fakalataha oti e tau tagata tapuaki moli he Atua ke fakamatala e tala mitaki he Kautu. “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mataio 24:14.
Ko e heigoa kua lata ke omoomoi aki a tautolu ke manako ke fakalataha katoatoa ke he gahua fakamatala nei? (Mataio 22:37-39; Roma 10:10)
11. Ka fakagahua e tautolu e tau kupu moli he Tohi Tapu he tau momoui ha tautolu, ko e heigoa e lauiaaga?
11 Ko e tapuaki kaufakalataha ki a Iehova kua fakatata lahi atu a tautolu ki a ia mo e maeke ia tautolu ke olioli e lafiaga hauhau mo e tau matakainaga talitonu. Pehe e Salamo 133:1: “Kitiala, ko e mena mitaki lahi mo e fulufuluola, ke nonofo fakalataha e tau matakainaga.” Kua hauhau ha ia ke o mai kehe he lalolagi lotokai, mahani kelea, mo e favale mo e fakapotopoto mo lautolu ne fakaalofa moli ki a Iehova mo e omaoma hana tau fakatufono!
Kalo Kehe he Tau Fakaohoohoaga Feveheveheaki
12. Ko e ha kua lata ia tautolu ke kalo kehe he aga tu tokotaha?
12 Ti ke nakai takiva ha tautolu a kaufakalataha uho he lalolagi katoa, latatonu ia tautolu ke kalo kehe he tau fakaohoohoaga feveheveheaki. Taha he tau mena nei ko e aga tu tokotaha mai he Atua mo e hana tau fakatufono. Lagomatai e Iehova a tautolu ke kalo kehe i ai he fakakite hana punaaga, ko Satani ko e Tiapolo. (2 Korinito 4:4; Fakakiteaga 12:9) Ko Satani ko ia ne fakaohooho a Atamu mo Eva ke fakaheu e talahauaga he Atua mo e taute e tau fifiliaga ne totoko ke he finagalo he Atua. Ko e fua ne matematekelea a laua mo tautolu. (Kenese 3:1-6, 17-19) Kua puke namo e lalolagi nei he aga tu tokotaha mai he Atua mo e hana tau fakatufono. Ti latatonu ia tautolu ke fakamamao e aga ia ia tautolu.
13. Ko e heigoa ka fakakite kua tauteute moli a tautolu ma e moui he lalolagi fou tututonu he Atua?
13 Ma e fakatai, manamanatu ke he maveheaga fulufuluola ha Iehova ke hukui e lalolagi kelea nei aki e lagi fou mo e lalolagi fou ke “nofo ai e tututonu.” (2 Peteru 3:13) Nakai kia omoomoi he mena ia a tautolu ke kamata ke tauteute ke nonofo he magaaho ia ka nofo ai e tututonu? Kakano e mena nei ke omaoma e tomatomaaga mahino he Tohi Tapu: “Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana.” (1 Ioane 2:15) Mena ia, kia tiaki e tautolu e agaga he lalolagi nei—aga tu tokotaha, manamanatu lahi ki a ia ni, mahani kelea mo e favale. Kia fakamahani a tautolu ke fanogonogo ki a Iehova mo e omaoma ki a ia mai he tau loto ha tautolu, pete he ha hihiga kehe he tau tino nakai mitaki katoatoa ha tautolu. Kua fakamoli he puhala moui katoa ha tautolu ko e tau manamanatuaga mo e tau fatuakiloto ha tautolu kua fakaako ke taute e finagalo he Atua.—Salamo 40:8.
14. (a) Ko e ha kua aoga ke fakaaoga e magaaho nei ke ako e tau puhala ha Iehova mo e mumuitua ki ai he tau momoui ha tautolu? (e) Ko e heigoa e kakano he tau kupu tohi ne tutu he paratafa ki a tautolu fakatagata?
14 Ka hoko e magaaho ha Iehova ke moumou e fakatokaaga kelea nei mo lautolu oti ne talia hana tau puhala, to nakai fakatuai a ia. To nakai fakatolomaki e ia e magaaho po ke huhui hana tau tutuaga ke lata mo lautolu hane tapiki agaia ke he lalolagi ka e ako mo e taute fakauaua e finagalo he Atua. Ko e magaaho a nei ke gahua ai! (Luka 13:23, 24; 17:32; 21:34-36) Kua mafanatia ha ia, mogoia, ke kitia e moto tagata tokologa kua fakaaoga e magaaho uho nei, ke kumi fakamakutu e tau fakaakoaga kua foaki mai e Iehova he hana Kupu mo e fakatokatokaaga ti kaufakalataha he o he hana tau puhala ke he lalolagi fou! Ti ka lahi e ako ha tautolu ki a Iehova, to lahi atu e fakaalofa ha tautolu ki a ia mo e manako ke fekafekau ki a ia.
Fakatutala Fakamanatu
• Ko e heigoa e finagalo ha Iehova ke he tapuaki?
• Mole e ako e tautolu e tau matapatu fakaakoaga he Tohi Tapu, ko e heigoa foki e lakaaga kua lata ia tautolu ke fakamakamaka ke taute?
• Ko e heigoa kua maeke ia tautolu takitokotaha ke taute ke kaufakalataha mo e falu tagata tapuaki ha Iehova?
[Fakatino he lau 4]
‘Ko e tau tagata mahani molu to eke ma lautolu e motu mo e fiafia he lahi e mafola’