Fakakite he Kaufakalataha e Tapuakiaga Mooli
“To tuku fakalataha e au a lautolu . . . tuga ne fuifui mamoe i Posara.”—MIKA 2:12.
1. Kitia fēfē e iloilo he Atua ke he tufugatiaaga?
KO E salamo ne fakailoa: “Iehova na e, kualoga ue atu hāu a tau gahua! Ne eke e koe e tau mena oti ia mo e iloilo, kua puke e lalolagi ke he hāu a tau mena.” (Sala. 104:24) Kua kitia e iloilo he Atua ke he fegahuaaki he loga ue atu he tau akau, tau moko ikiiki, mo e tau manu ne ofoofogia e halavihi he talagaaga he moui he lalolagi. I loto foki he tino haau, totou afe e tau vala kehekehe, mai he tau alaga lalahi ke hoko ke he tau vala ikuhila he tau tegatega moui haau, kua gahua fakalataha ke eke a koe mo tagata kua katoatoa mo e tino malolō.
2. He fakakite he lau 13, ko e ha ne tuga ko e mena mana e kaufakalataha he tau Kerisiano?
2 Ne tufuga e Iehova e tau tagata ke gahua fakalataha. Ti kitia ke he tau foliga, tau aga, mo e tau lotomatala kehekehe he tau tagata. Lafi ki ai, ne tuku age e ia ke he tau tagata fakamua e tau mahani Atua ke maeke ia laua ke felagomataiaki mo e fefalanakiaki. (Kene. 1:27; 2:18) Ka ko e tau tagata tokologa mogonei kua fuluhi kehe mai he Atua ti nakai maeke ke gahua fakalataha auloa. (1 Ioa. 5:19) Ko e mena ia, he manamanatu ke he fakapotopotoaga Kerisiano he senetenari fakamua ne moua mai he tau tagata kehekehe tuga e tau fekafekau Efeso, tau fifine talahaua Heleni, tau tagata taane pulotu Iutaia, mo e tau tagata tapuaki tupua fakamua, ti tuga ko e mena mana e kaufakalataha ha lautolu.—Gahua 13:1; 17:4; 1 Tesa. 1:9; 1 Timo. 6:1.
3. Fakamaama fēfē he Tohi Tapu e kaufakalataha he tau Kerisiano, ti ko e heigoa ka fakatutala a tautolu he vala tala fakaako nei?
3 Fakamalolō he tapuakiaga mooli e tau tagata ke felagomataiaki auloa tuga e tau fahi tino ha tautolu ni. (Totou 1 Korinito 12:12, 13.) Falu vala ka kumikumi ki ai a tautolu he vala tala nei ko e: Fakalataha fēfē he tapuakiaga mooli e tau tagata? Ko e ha ko Iehova hokoia ka fakalataha e tau tagata tokologa lahi mahaki mai he tau motu oti? Ko e heigoa e tau fakatauhele ke he kaufakalataha kua lagomatai e Iehova a tautolu ke kautū ki ai? Hagaao ke he kaufakalataha, kehe fēfē e faka-Kerisiano mooli mai he Kerisitenitome?
Tamai Fakalataha Fēfē he Tapuakiaga Mooli e Tau Tagata?
4. Tamai fakalataha fēfē he tapuakiaga mooli e tau tagata?
4 Ko e tau tagata kua fakagahua e tapuakiaga mooli ne mailoga e mena ia ha kua tufuga e Iehova e tau mena oti kana, ko ia e Pule Katoatoa tonuhia he lagi mo e lalolagi. (Fakakite. 4:11) Ti pete e nonofo e tau Kerisiano mooli he tau motu loga mo e i lalo he tau tuaga kehekehe, kua fakalataha a lautolu oti he omaoma ke he tau fakatufono he Atua mo e momoui a lautolu ke he tau matapatu fakatufono he Tohi Tapu. Kua talahau fakalilifu he tau tagata tapuaki mooli oti a Iehova ko e “Matua.” (Isaia 64:8; Mata. 6:9) Ti ko e tau matakainaga fakaagaaga oti a lautolu mo e maeke ke olioli e kaufakalatahaaga fulufuluola ne fakamaama he salamo: “Kitiala, ko e mena mitaki lahi mo e fulufuluola, ke nonofo fakalataha e tau matakainaga.”—Sala. 133:1.
5. Ko e heigoa e mahani ne lafi ke he kaufakalatahaaga he tau tagata tapuaki mooli?
5 Pete he nakai mitaki katoatoa e tau Kerisiano mooli, kua tapuaki fakalataha a lautolu ha kua fakaako a lautolu ke fakafeofanaki. Kua fakaako e Iehova a lautolu ke fakaalofa ha kua nakai fai tagata ke fakaako foki a lautolu. (Totou 1 Ioane 4:7, 8.) Pehē e Kupu Haana: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua, ko e tau tagata tapu mo e ofania; kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo [noa] mai a [Iehova] kia mutolu, kia pihia foki a mutolu. Ka e ha i luga he tau mena oti ia e fakaalofa ko e pipi haia ke fakamaopoopo ai.” (Kolo. 3:12-14) Ko e pipiaga mitaki katoatoa nei he fakaalofa ko e matapatu mahani ke fakakite aki e tau Kerisiano mooli. Mai he iloaaga haau ni, kua kitia nakai e koe e kaufakalatahaaga nei ne kehe lahi he tapuakiaga mooli?—Ioane 13:35.
6. Lagomatai fēfē he amaamanakiaga he Kautu a tautolu ke olioli e kaufakalatahaaga?
6 Ne kaufakalataha foki e tau tagata tapuaki mooli ha kua onoono a lautolu ke he Kautu he Atua ko e amaamanakiaga hokoia ma e tau tagata. Iloa e lautolu to nakai leva ti hukui he Kautu he Atua e tau fakatufono he tagata mo e fakamonuina e tau tagata omaoma aki e mafola tukulagi mooli. (Isaia 11:4-9; Tani. 2:44) Ati muitua he tau Kerisiano e mena ne tala age e Iesu hagaao ke he tau tutaki haana: “Nakai ko e tau tagata he lalolagi a lautolu, ke tuga foki au, nakai ko e tagata he lalolagi au.” (Ioane 17:16) Kua fakatumau e tau Kerisiano mooli ke tū uho mai he tau taufetoko he lalolagi; ti maeke ia lautolu ke olioli e kaufakalatahaaga pete he felakutaki e tau tagata ne takatakai ia lautolu.
Taha e Punaaga he Fakaakoaga Fakaagaaga
7, 8. Puhala fe he fakaakoaga he Tohi Tapu kua lafi ke he kaufakalatahaaga ha tautolu?
7 Ne olioli he tau Kerisiano he senetenari fakamua e kaufakalataha ha kua moua e lautolu oti e fakamalolō mai he taha e punaaga. Ne mailoga e lautolu ko Iesu ne fakaako mo e takitaki e fakapotopotoaga he puhala he kau fakatufono, ne ha ha ai e tau aposetolo mo e tau patu i Ierusalema. Ne fakavē e tau fifiliaga he tau patu fakamooli nei ke he Kupu he Atua ti ha ha i ai e tau leveki faifano ne tala age e tau fakaakoaga ha lautolu ke he tau fakapotopotoaga he tau motu loga. Hagaao ke he falu leveki ia, kua pehē e Tohi Tapu: “Kua o age a lautolu ke he tau māga, mo e ta atu e lautolu kia lautolu e tau poakiaga, ne kotofa ai he tau aposetolo mo e tau patu ha i Ierusalema ke omaoma ki ai a lautolu.”—Gahua 15:6, 19-22; 16:4.
8 Pihia foki he vahā nei ne moua e Kau Fakatufono mai he tau Kerisiano fakauku he agaaga ne lafi ke he kaufakalatahaaga he fakapotopotoaga he lalolagi katoa. Ne taute fakailoa he Kau Fakatufono e tau tohi fakaagaaga atihake ke he loga e tau vagahau. Ko e tau mena kai fakaagaaga nei kua fakavē ke he Kupu he Atua. Ti ko e mena ne fakaako ne nakai mai he tau tagata ka e mai ia Iehova.—Isaia 54:13.
9. Lagomatai fēfē he gahua foaki he Atua a tautolu ke kaufakalataha?
9 Kua fakaholo ki mua foki he tau leveki Kerisiano e kaufakalatahaaga he taki e gahua fakamatala. Ko e aga he fakafetui tata kua fakalataha a lautolu ne gahua auloa he fekafekauaga he Atua nukua mua atu e malolō ke he aga he fakafetuiaga he falu he lalolagi ne fakafiafia auloa noa ni. Ne fakavē e fakapotopotoaga Kerisiano, nakai ke gahuahua tuga e kalapu fakafiafia, ka ke fakaheke a Iehova mo e ke taute e matagahua—ko e gahua he fakamatala e tala mitaki, taute tutaki, mo e fakamafana e fakapotopotoaga. (Roma 1:11, 12; 1 Tesa. 5:11; Hepe. 10:24, 25) Ati pehē e aposetolo ko Paulo hagaao ke he tau Kerisiano: “Kua tumau a mutolu mo e loto fakalataha, mo e manatu fakalataha, mo e fakamakamaka fakalataha ha ko e tua ha he vagahau mitaki.”—Filipi 1:27.
10. Ko e heigoa falu puhala kua fakalataha a tautolu ko e tau tagata he Atua?
10 Hagaao ke he tau tagata a Iehova, kua kaufakalataha a tautolu ha kua talia e tautolu e pule katoatoa a Iehova, fakaalofa ke he tau matakainaga ha tautolu, amaamanaki ke he Kautu he Atua, ti fakalilifu a lautolu ne fakaaoga he Atua ke taki a tautolu. Lagomatai e Iehova a tautolu ke kautū mai he falu aga ha ko e tau hehē ha tautolu neke tauhele e kaufakalataha ha tautolu.—Roma 12:2.
Kautū Mai he Fakaikaluga mo e Mahekeheke
11. Ko e ha kua vehe e fakaikaluga ti lagomatai fēfē e Iehova a tautolu ke kautū ki ai?
11 Vehe he fakaikaluga e tau tagata. Kua loto e tagata fakaikaluga ke manamanatu kua mua a ia ti fa moua e tau manako lotokai ha ko e mahani palau. Ka e fa tauhele he mena nei e kaufakalataha; ti ko lautolu ne logona e palau kua liga mahekeheke. Ne talahau fakatonu he tutaki ko Iakopo ki a tautolu: “Kua kelea ni e tau hula oti kana pihia.” (Iako. 4:16) Nakai ko e fakaalofa ke taute fakateaga e falu. Mua atu ai, ko Iehova e fifitakiaga he mahani fakatokolalo ha kua fehagai a ia mo e tau tagata nakai mitaki katoatoa tuga a tautolu. Ne tohi e Tavita: “Ko e hau [Atua] a holoilalo kua fakamatalahi ai au.” (2 Samu. 22:36) Lagomatai he Kupu he Atua a tautolu ke kautū ke he fakaikaluga he fakaako a tautolu ke fakamaama fakamitaki e tau manatu. Ne fakaohooho a Paulo ke hūhū: “Ko hai kia kua eke a koe mo tagata kehe? Ko e heigoa foki e mena ha ha ia koe kua nakai foaki atu ai? Kaeke foki kua foaki atu kia koe, ti ko e heigoa e mena kua hula ai a koe tuga e mena kua nakai foaki atu ni?”—1 Kori. 4:7.
12, 13. (a) Ko e ha kua mukamuka ai ke mahekeheke? (e) Ko e heigoa ne fua mai he moua e onoonoaga ha Iehova ke he falu?
12 Ko e mahekeheke e taha fakatauhele aga mau ke he kaufakalataha. Ha ko e nakai mitaki katoatoa pauaki, ha ha ia tautolu oti e ‘loto kua manako lahi ke he mahekeheke,’ ti fa logona hifo foki he tau Kerisiano kua leva, e mahekeheke ke he tau tuaga, tau koloa, tau kotofaaga, po ke tau lotomatala he falu. (Iako. 4:5) Ma e fakatai, ko e matakainaga taane fai magafaoa kua liga logona hifo e mahekeheke ke he matakainaga fekafekau mau ne moua e tau kotofaaga, ka e nakai mailoga ai kua liga mahekeheke e matakainaga fekafekau mau ke he tagata fai magafaoa kua fai fanau. Puipui fēfē a tautolu ke he mahekeheke pihia neke tauhele e kaufakalataha ha tautolu?
13 Ke lagomatai a tautolu ke kalo kehe he mahekeheke, liu manatu na fakatatai he Tohi Tapu e tau matakainaga fakauku he fakapotopotoaga Kerisiano ke he tau fahi tino he tagata. (Totou 1 Korinito 12:14-18.) Ma e fakatai, pete kua mua hake e mata haau ke he atevili haau, nakai kia aoga ua e tau mena ia ki a koe? Pihia foki, aoga ki a Iehova e tau tagata oti he fakapotopotoaga pete he fai magaaho e mua atu he falu ke he falu. Kia moua e tautolu e onoonoaga ha Iehova ke he tau matakainaga ha tautolu. He nakai mahekeheke ke he falu, maeke ia tautolu ke fakakite e manamanatuaga mo e fiafia fakatagata ki a lautolu. He taute pihia, kua lafi e tautolu ke he kehekehe he tau Kerisiano mooli mo lautolu he tau lotu Kerisitenitome.
Kerisitenitome—Kitia ha ko e Mavehevehe
14, 15. Mavehevehe fēfē e lotu faka-Kerisiano ne tiaki taofiaga?
14 Ko e kaufakalataha he tau Kerisiano mooli kua nakai tatai ke he miha ne tupu he tau lotu Kerisitenitome. He senetenari ke fāaki, ne holofa lahi e tiaki taofiaga faka-Kerisiano ti takitaki ai he pule atu motu ha Roma ne nakai faka-Atua ati lafi ke he tupuaga he Kerisitenitome. Ha ko e mavehevehe tumau, loga e matakau ne vevehe kehe mai i Roma ti fakatū ni e tau lotu he Motu ha lautolu.
15 Loga he tau kautu ia ne felatauaki ke he tau tau loga lahi mahaki. He senetenari ke 17 aki mo e 18 aki, ko e tau tagata he tau Faahi Kaufakalataha, Falani, mo Peritania ne fakatupu e fakamooli ke he Motu ha lautolu, ti eke e papale fakamotu ke tuga e lotu. He senetenari ke 19 aki mo e 20 aki, ne kamata e papale fakamotu ke fakapehia e tau manamanatuaga he laulahi he tau tagata. Fakahiku, ne mavehevehe e tau lotu Kerisitenitome ke he loga e tau vahega lotu, ati tokologa ai ne muitua ke he papale fakamotu. Ko e tau tagata ō tapu foki ne ō he tau ke totoko e tau tagata lotu ha lautolu he taha motu. He vahā nei, kua mavehevehe e Kerisitenitome ha ko e tau taofiaga he tau vahega lotu mo e papale fakamotu.
16. Ko e heigoa e tau matalekua ne vehe a lautolu he Kerisitenitome?
16 He senetenari ke 20 aki, ko e falu he tau vahega lotu loga lahi mahaki he Kerisitenitome ne fakatū e laliaga ke fakatupu e kaufakalataha. Ka e loga e tau tau he mole e lali, gahoa e lotu ne lafi fakalataha, ti mavehevehe agaia e tau tagata ō tapu ke he tau hūhū tuga e tupu mai noa, fakatōtama, mahani fakasotoma, mo e fakaukuaga he tau fifine. He falu vala he Kerisitenitome, kua lali e tau takitaki lotu ke fakapotopoto e tau tagata mai he tau vahega lotu kehekehe he fakatote e aoga he tau fakaakoaga fakamavehevehe fakamua. Ka ko e fakatote hifo he tau fakaakoaga ne taute e tau tagata ke lolelole e tua ti nakai fakalataha mooli e tau lotu mavehevehe he Kerisitenitome.
Mahomo Hake he Papale Fakamotu
17. Talahau tuai fēfē e tapuakiaga mooli ke he tau tagata kaufakalataha ke “hoko ni ke he tau aho a mui”?
17 Pete he mavehevehe lahi mahaki e tau tagata mogonei, kua matutaki e kaufakalataha ke kitia maali e tau tagata tapuaki mooli. Ne talahau tuai he perofeta ko Mika: “To tuku fakalataha e au a lautolu . . . tuga ne fuifui mamoe i Posara.” (Mika 2:12) Ne talahau tuai e Mika to fakatokoluga hake e tapuakiaga mooli ki luga he falu lotu, pete ko e tau atua fakavai po ke eke e Motu mo atua. Ne tohi e ia: “To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga he tau mouga, to fakatokoluga ai foki ki luga he tau matiketike, ti tafe atu ki ai e tau motu oti kana. Ha ko e tau motu oti kua takitaha mo e fano ke he higoa he atua ha lautolu, ko tautolu foki, to o a tautolu ke he higoa a Iehova ha tautolu a Atua.”—Mika 4:1, 5.
18. Kua lagomatai he tapuakiaga mooli a tautolu ke taute e tau hikihikiaga fe?
18 Fakamaama foki e Mika e puhala ka fakalataha he tapuakiaga mooli e tau fī fakamua. “To o mai foki e [tau tagata he] tau motu kehe loga, mo e pehe age a lautolu, O mai a, kia o hake a tautolu ke he mouga a Iehova, ko e fale foki he Atua a Iakopo; to fakaako mai e ia a tautolu ke he hana tau puhala, ti o ai a tautolu ke he hana tau puhala; . . . ti tukituki e lautolu e tau pelu ha lautolu ke eke mo tau koho, ko e tau tao foki ha lautolu ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki a lautolu.” (Mika 4:2, 3) Ko lautolu ne tiaki e tapuakiaga he tau atua ne taute he tau tagata po ke tau motu ke lalago e tapuakiaga ha Iehova kua olioli e kaufakalataha he lalolagi katoa. Fakaako he Atua a lautolu ke he tau puhala he fakaalofa.
19. Ko e fakalataha he tau tagata tokologa ue atu he tapuakiaga mooli ko e fakamooliaga maaliali he heigoa?
19 Ko e kaufakalataha he lalolagi katoa he tau Kerisiano mooli he vahā nei kua homo ue atu ti kitia maali kua tumau a Iehova ke takitaki haana tau tagata puhala he haana agaaga. Kua fakalataha e tau tagata takitaha mai he tau motu oti kana ne nakaila kitia pihia ia he fakamauaga he tagata. Ko e fakamooliaga kehe lahi anei ne hagaao ki ai he Fakakiteaga 7:9, 14, ti fakakite ai to nakai leva ti fakatoka he tau agelu he Atua e “tau matagi” ka moumou e fakatokaaga kelea nai. (Totou Fakakiteaga 7:1-4, 9, 10, 14.) Nakai kia ko e lilifu ke fakalataha mo e tau matakainaga he lalolagi katoa? Maeke fēfē ia tautolu takitokotaha ke fai vala he fakalatahaaga ia? To fakatutala ke he mena nei he vala tala ka mui mai.
To Tali Fēfē e Koe?
• Fakalataha fēfē he tapuakiaga mooli e tau tagata?
• Puipui fēfē e tautolu e mahekeheke neke moumou e kaufakalataha ha tautolu?
• Ko e ha ne nakai vehe he papale fakamotu e tau tagata tapuaki mooli?
[Fakatino he lau 13]
Ko e tau Kerisiano he senetenari fakamua ne o mai he tau feakiaga loga?
[Tau Fakatino he lau 15]
Lafi fēfē e lagomatai haau ke he kaufakalataha he tau matagahua he Fale he Kautu?