Olioli e Magafaoa ha Iehova ke he Fakalatahaaga Uho
“Kitiala, ko e mena mitaki lahi mo e fulufuluola, ke nonofo fakalataha e tau matakainaga.”—SALAMO 133:1.
1. Ko e heigoa e tuaga he tokologa he tau magafaoa he vaha nei?
KO E magafaoa ha he tuaga matematekelea lahi he vaha nei. I loto he tau magafaoa loga, ko e pipiaga he tau fakamauaga kua ha ha he mena hagahaga kelea. Kua eke ai e tau vevehe mo mena fa mahani ke tupu tolomaki, mo e loga e fanau he tau hoa tokoua ne tau vevehe kua logona hifo e momoko lahi. Ko e tau miliona he tau magafaoa kua nakai fiafia mo e kua nakai kaufakalataha. Ka e, ha i ai taha magafaoa ne iloa e olioli moli mo e fakalataha moli. Ko e magafaoa he lalolagi mo e lagi katoatoa he Atua ko Iehova. I ai, kua afe mo e afe e tau agelu nakai kitia mata ne taute e tau matagahua kotofa ha lautolu ke lauia mo e finagalo faka-Atua. (Salamo 103:20, 21) Ka e fai magafaoa nakai he lalolagi hane fa e olioli e fakalatahaaga pihia?
2, 3. (a) Ko hai he mogonei kua eke mo vala he magafaoa he lalolagi mo e lagi katoatoa he Atua, mo e liga fakatatai e tautolu ke he heigoa e Tau Fakamoli a Iehova oti kana he vaha nei? (e) Ko e heigoa e tau huhu ka fakatutala a tautolu ki ai?
2 Ne tohi mai he aposetolo ko Paulo: “Kua fakatokotui ai au ke he Matua. . . . Ko ia kua fakahigoa mai ai e tau faoa oti kana ha he lagi katoa mo e lalolagi.” (Efeso 3:14, 15) Kua tuku age he tau magafaoa oti kana he lalolagi e higoa ha lautolu ke he Atua ha ko ia ko e Tufuga. Pete ni he nakai fai magafaoa tagata he lagi, ke he vagahau fakatai kua mau e Atua ke he hana a fakatokatokaaga i luga he lagi, mo e to moua e Iesu e kitofaitane fakaagaga ke kaufakalataha mo ia i luga he lagi. (Isaia 54:5; Luka 20:34, 35; 1 Korinito 15:50; 2 Korinito 11:2) Ko lautolu ne fakauku kua tua fakamoli he lalolagi, ko e vala he mogonei he magafaoa he lalolagi mo e lagi katoatoa he Atua, mo e ko e ‘tau mamoe kehe’ ha Iesu, ne ha ha ai e tau amaamanakiaga ke he lalolagi, ko e tau faoa ha lautolu a ia ne amaamanaki ki ai. (Ioane 10:16; Roma 8:14-17; The Watchtower, Ianuali 15, 1996, lau tohi 31) Ka e pete ni ia, ko e Tau Fakamoli a Iehova oti kana he vaha nei kua maeke ke fakatatai atu ke he magafaoa kaufakalataha he lalolagi katoa.
3 Ko e vala kia a koe he magafaoa homo ue atu he lalolagi katoa he tau fekafekau he Atua? Kaeke ko koe taha, kua olioli ai a koe ke he taha he tau monuinaaga mahaki ka moua ni he ha tagata. Ko e tau miliona ka talahau fakamoli ko e magafaoa ha Iehova he lalolagi katoatoa—hana a fakatokatokaaga kitia mata—ko e matakavi talumelie he mafola mo e fakalatahaaga i loto he tutakale fetotokoaki mo e nakai fakalataha he lalolagi. Maeke fefe e fakalatahaaga he magafaoa he lalolagi katoa ha Iehova ke fakamaama? Mo e ko e heigoa e tau mena ne fakamalolo aki e fakalatahaaga pihia?
Kua Mitaki mo e Fulufuluola Ha Ia!
4. Ke he hau tau kupu ni, maeke fefe ia koe ke fakamaama e mena ne talahau he Salamo 133 ne hagaao ke he fakalatahaaga fakamatakainaga?
4 Ko e salamo ko Tavita kua hokulo lahi e fakaaue ma e fakalatahaaga fakamatakainaga. Kua omoi foki a ia ke lologo hagaao ki ai! Kia manamanatu ki a ia mo e hana kitara he lologo a ia: “Kitiala, ko e mena mitaki lahi mo e fulufuluola, ke nonofo fakalataha e tau matakainaga. Kua tuga ne lolo uho ki luga he ulu, ne lele hifo kehe hafe, ko e hafe ni a Arona, ne lele hifo ke he ua he hana tau tapulu. Kua tuga ni e hahau e Heremoni ne to hifo ke he tau mouga ko Siona; ha kua poaki e Iehova kia hoko ki ai hana a monuina, ko e moui tukulagi ni haia.”—Salamo 133:1-3.
5. He fakave ai ke he Salamo 133:1, 2, ko e heigoa e fakatataiaga kua maeke ke futia mai he vahaloto he tau Isaraela mo e tau fekafekau he Atua he vaha fou nei?
5 Ko e tau kupu ia kua fakahagaao atu ke he fakalatahaaga fakamatakainaga ne olioli ai e tau tagata he Atua i tuai, ko e tau Isaraela. He mogo ne ha ha i Ierusalema ma e ha lautolu a tau galue tolu ne taute takilagataha he tau, kua nonofo fakalataha moli a lautolu. Pete ni kua o mai a lautolu he tau magafaoa kehekehe, kua magafaoa taha na lautolu. He nonofo auloa kua ha i ai e hufia malolo mitaki ki a lautolu, tuga e lolo fakauku ne fakahauhau aki mo e mahofi fulufuluola. He magaaho ne liligi e lolo pihia ke he ulu a Arona, kua tafe hifo ke he hana a hafe mo e holo atu ke he kola tapulu hana. Ma e tau Isaraela, ko e nonofo auloa, kua ha i ai e fakaohooho mitaki ne fakagahuahua atu ke he toloaga tagata katoatoa. Ko e tau fehalakaki kua fakamaama, mo e kua fakamalolo ai e fakalatahaaga. Ko e fakalataha pihia kua kitia ke he magafaoa ha Iehova he lalolagi katoa he vaha nei. Ko e feoaki tumau ka moua ai e hufia fakaagaga malolo mitaki ki a lautolu i ai. Ko e ha fehalakaki po ke tau mena uka kua uta kehe he fakagahuahua e fakatonuaga he Kupu he Atua. (Mataio 5:23, 24; 18:15-17) Lahi e fakaaue he tau tagata ha Iehova ke he tau felagomataiaki ne fua mai he ha lautolu a fakalatahaaga fakamatakainaga.
6, 7. Kua eke fefe e fakalatahaaga ha Isaraela ke tuga e hahau he Mouga ko Heremoni, mo e moua mai fe e fakamonuinaaga he Atua he vaha nei?
6 Kua maeke fefe e nonofo auloa he tau Isaraela he fakalatahaaga ke tuga foki e hahau he Mouga ko Heremoni? E, ha kua molea e 2,800 mita he tapunu he mouga nei ki luga he puke tahi, kua ufitia ai he kiona ke tetei ke he tau katoa. Ko e tapunu ufia kiona a Heremoni kua fakatupu e ahua mamiti he po ke hiki ke he vala vai mo e ti moua ai e lahi he hahau ne puipui aki e tau akau ikiiki he magahala loa he vaha magomago. Ko e matagi momoko mai he matakavi Heremoni kua maeke ke uta e tau ahua mamiti pihia ke hoko ke he kavi fahi toga mamao i Ierusalema, kavi ia ne hiki ai ke he hahau. Ti kua hakotia e vagahau he salamo hagaao ‘ke he hahau a Heremoni ne to hifo ke he tau Mouga ko Siona.’ Ko e fakamanatu mitaki ha ia he fakaohoohoaga fakahauhau ne fakamalolo e fakalatahaaga he tau tagata tapuaki he magafaoa ha Iehova!
7 Ato fakatu e fakapotopotoaga Kerisiano, ko Siona, po ko Ierusalema, e lotouho he tapuaki moli. Ti, mai i ai ne poaki he Atua ke toka ai e fakamonuinaaga. Ha kua nofo, ke he puhala fakatai, e Punaaga he tau monuina oti kana he haeleaga tapu i Ierusalema, to mafuta mai ai i ai e tau monuina. Ha kua nakai falanaki e tapuaki moli ke he taha e ha matakavi pauaki, ko e mena haia, kua maeke ai ke moua e fakamonuinaaga, feofanaki, mo e fakalatahaaga he tau fekafekau he Atua he tau fahi oti he lalolagi he vaha nei. (Ioane 13:34, 35) Ko e heigoa e falu he tau mena ne fakamalolo aki e fakalatahaaga nei?
Tau Mena ne Fakamalolo Aki e Fakalatahaaga
8. Ko e heigoa ne ako e tautolu hagaao ke he fakalatahaaga he Ioane 17:20, 21?
8 Ko e fakalatahaaga he tau tagata tapuaki ha Iehova kua fakave aki e fakatauo mo e maamaaga tonuhia he Kupu he Atua, ti putoia ai foki e tau fakaakoaga ha Iesu Keriso. He fakafano mai e Iehova e hana Tama ke he lalolagi ke talahau e kupu moli mo e ke mate e poa mate, kua hafagi ai e hala ma e fakatuaga he fakapotopotoaga Kerisiano ne kaufakalataha. (Ioane 3:16; 18:37) Ke eke ai ke fai fakalatahaaga moli ia lautolu i ai kua fakamahino mai he magaaho ne liogi a Iesu: “Nakai fakaigati haku a liogi ma lautolu nai, ka ko lautolu foki ka tua kia au, ha ko e ha lautolu a kupu. Kia taha a lautolu oti ke tuga a koe, ma Matua na e, ha i loto ia au, ko au foki ha i loto ia koe, kia taha a lautolu ki loto ia taua; kia talia ai he lalolagi ne fakafano mai e koe au.” (Ioane 17:20, 21) Ne moua moli he tau tutaki ha Iesu e fakalatahaaga pihia ni ne ha ha he vahaloto he Atua mo e hana a Tama. Kua tupu ai e mena nei ha kua fakatauo a lautolu mo e Kupu he Atua mo e tau fakaakoaga foki ha Iesu. Ko e mena aoga lahi e aga pihia he vaha nei ke fakalataha aki e magafaoa ha Iehova he lalolagi katoa.
9. Ko e heigoa e matagahua ne taute he agaga tapu ke he fakalatahaaga he tau tagata ha Iehova?
9 Ko e taha mena ne fakalataha aki e tau tagata ha Iehova ko e ha ha ia tautolu e agaga tapu, po ke malolo gahuahua he Atua. Kua lagomatai mai ai ki a tautolu ke maama e kupu moli ne fakatata he Kupu ha Iehova mo e kua taute ke kaufakalataha he fekafekau atu ki a ia. (Ioane 16:12, 13) Kua lagomatai he agaga a tautolu ke kalo kehe mai he tau gahua he tino ne nakai fefakalatahaaki tuga e taufetoko, ita tafua, vale, mo e lagalagahou. Ka e kehe mai, kua fakatupu he agaga he Atua ia tautolu e fua fefakalatahaaki ko e fakaalofa, fiafia, mafola, fakauka, mahani totonu, mahani mitaki, tua, mahani molu, mo e mahani fakalatalata.—Kalatia 5:19-23.
10. (a) Ko e heigoa e fakatataiaga kua maeke ke taute he vahaloto he fakaalofa ne moua he magafaoa tagata ne kaufakalataha, mo e he fakaalofa ne kitia moli ia lautolu ne fakamoli ki a Iehova? (e) Fakamaama mai fefe he taha he Kau Fakatufono hana a tau logonaaga hagaao ke he fakafehagaiaga mo e tau matakainaga fakaagaga hana?
10 Ko lautolu he magafaoa kaufakalataha kua fefakaalofaaki mo e kua fiafia ke fakaauloa. Ke fakatatai, ko lautolu he magafaoa fefakalatahaaki he tau tagata tapuaki a Iehova kua fakaalofa ki a ia, hana Tama, mo e tau katofia tua. (Mareko 12:30; Ioane 21:15-17; 1 Ioane 4:21) Ke tuga ni e magafaoa fefakaalofaaki he tino ne olioli e kai afiafi auloa, ko lautolu ne fakamoli atu ke he Atua kua fiafia ke ha ha he tau feleveiaaga, tau toloaga, mo e tau fono Kerisiano ke moua e lagomatai mai he feoaki mitaki mo e tau mena kai fakaagaga ne mua e mitaki. (Mataio 24:45-47; Heperu 10:24, 25) Taha mai he Kau Fakatufono he Tau Fakamoli a Iehova ne fakamaama mai pehe: “Ki a au, ko e feleveia mo e tau matakainaga ko e taha fiafia lahi mahaki a ia he moui mo e ko e punaaga he fakamaloloaga. Loto lahi au ke to mua ke he Fale he Kautu, mo e ke fano fakamui, ka lata. Logona e au e olioli halaloto he magaaho ka fetutalaaki mo e tau tagata he Atua. He magaaho ne ha ha au mo lautolu, kua logona e au e totoka mitaki mo e haku a magafaoa.” Ko e pihia nakai e logonaaga hau?—Salamo 27:4.
11. Ko e heigoa e gahua ne mua atu e fiafia lahi he Tau Fakamoli a Iehova ki ai, ti ko e heigoa e tau fua mai he taute e fekafekauaga he Atua mo ute he ha tautolu a tau momoui?
11 Na moua he magafaoa kaufakalataha e fiafiaaga he taute mena auloa. Kua moua pihia foki e lautolu he magafaoa he tau tagata tapuaki a Iehova e olioli he taute e gahua fakamatala he Kautu mo e taute tutaki. (Mataio 24:14; 28:19, 20) Ko e fakatumau ke kauauloa ki ai ka futia fakatata atu a tautolu ke he falu he Tau Fakamoli a Iehova. Ke taute e fekafekau he Atua mo ute he tau momoui ha tautolu mo e ke felagomataiaki ke he tau gahua oti he tau tagata hana, ka fakamahomo ki mua e agaga fakamagafaoa ia tautolu.
Aoga Lahi e Maopoopo Fakateokarasi
12. Ko e heigoa e tau mahani he magafaoa fiafia mo e kaufakalataha, mo e ko e heigoa e fakatokaaga ne fakamalolo aki e fakalatahaaga he tau fakapotopotoaga Kerisiano he senetenari fakamua aki?
12 Ko e magafaoa ne ha ha i ai e takitakiaga malolo ka e fai fakaalofa mo e kua maopoopo, liga to eke ai ke kaufakalataha mo e fiafia. (Efeso 5:22, 33; 6:1) Ko Iehova ko e Atua he mafola maopoopo, mo ko lautolu oti i loto he hana a magafaoa kua onoono atu ki a ia ko “Ia ne Mua Ue Atu.” (Tanielu 7:18, 22, 25, 27; 1 Korinito 14:33) Kua mailoga foki e lautolu kua kotofa e ia hana Tama, ko Iesu Keriso, ha lautolu a hakeaga he tau mena oti mo e kua kotofa ki a ia e pule malolo katoa i luga he lagi mo e he lalolagi. (Mataio 28:18; Heperu 1:1, 2) Mo Keriso e hana a Ulu, ko e fakapotopotoaga Kerisiano ko e fakatokatokaaga maopoopo mo e kaufakalataha. (Efeso 5:23) Ke leveki e tau gahua he tau fakapotopotoaga he senetenari fakamua aki, kua ha i ai e kau fakatufono, ko e tau aposetolo mo e falu he “tau patu,” kua momotua fakaagaga. Kua ha ha he tau fakapotopotoaga takitaha e tau epikopo kotofa, po ke tau motua, mo e tau tiakono. (Gahua 15:6; Filipi 1:1) Ko e omaoma ki a lautolu ne takitaki ka fakamalolo e fakalatahaaga.—Heperu 13:17.
13. Futia fefe e Iehova e tau tagata, mo e ko e heigoa ne fua mai he mena nei?
13 Ka e pehe kia e tau poakiaga oti nei, ko e fakalatahaaga he tau tagata tapuaki ha Iehova kua liga tupu mai he takitakiaga mao mo e nakai aga mafanafana? Ai pihia! Nakai fai mena ne nakai fakaalofa ai e Atua po ke he fakatokatokaaga hana. Nukua futia e Iehova e tau tagata he fakakiteaga he fakaalofa, mo e he tau tau takitaha ko e tau teau he tau afe ne foaki noa mo e olioli lahi mai kua eke mo vala he fakatokatokaaga ha Iehova, he papatiso ke fakakite ha lautolu a tukuleleaga mo e loto katoa ke he Atua. Kua tatai e aga ha lautolu mo e ha Iosua, ko ia ne tala age ke he tau katofia Isaraela: “Ti fifili la e mutolu ke he aho nai, po ko hai ke fekafekau ki ai a mutolu; . . . ka ko au mo e haku a magafaoa, to fekafekau a mautolu kia Iehova.”—Iosua 24:15.
14. Ko e ha kua maeke ia tautolu ke talahau ko e fakatokatokaaga fakateokarasi ha Iehova?
14 Ha ko e vala he magafaoa ha Iehova, kua nakai olioli hokoia a tautolu ka e nakai haofia foki. Kua pehenei ai ha ko e fakatokatokaaga fakateokarasi hana. Ko e Kautu he Atua ko e teokarasi (mai he faka-Heleni the·osʹ, atua, mo e kraʹtos, ko e pule). Ko e pule he Atua a ia, nukua kotofa mo e fakamau e ia. Kua omaoma e “motu tapu” fakauku ha Iehova ke he hana a pule mo e ko e mena ia ne fakateokarasi ai foki. (1 Peteru 2:9) Mo e Teokarasi Mua Ue Atu, ko Iehova, ko e ha tautolu a Iki Fakafili, Foaki Matafakatufono, mo e Patuiki, kua ha ia tautolu e tau kakano oti ke logona e nakai haofia. (Isaia 33:22, fakatatai NW.) Ka e kua ke mafuta mai e falu totokoaga mo e fakamatakutaku aki e olioli, nakai haofia, mo e fakalatahaaga ha tautolu?
Ati Gahua ai e Kau Fakatufono
15, 16. Ko e heigoa e totokoaga ne mafuta hake he senetenari fakamua aki, mo e ko e ha?
15 Ke puipui mai e fakalatahaaga he magafaoa, kua lata e totoko ke tau taofi hifo he falu magaaho. Fakalata, mogoia, kua lata e mena vihi fakaagaga ke tului ke puipui aki e fakalatahaaga he tau tagata tapuaki he magafaoa he Atua he senetenari fakamua aki V.N. Ko e heigoa mogoia? Kua gahua ai e kau fakatufono, mo e taute ai e tau fifiliaga ke he tau lekua fakaagaga. Kua ha ia tautolu e fakamauaga faka-Tohiaga Tapu he tau gahua pihia.
16 He kavi 49 V.N., ne feleveia e kau fakatufono i Ierusalema ke taute e mena vihi hagahaga kelea mo e kua puipui mai e fakalatahaaga he ‘magafaoa he Atua.’ (Efeso 2:19) He falu he tau tau 13 fakamua atu, ne fakamatala e aposetolo ko Peteru ki a Konelio, ti ko e tau Tagata Motu Kehe, po ke tau tagata he tau motu, kua eke mo tau tagata tua fakamua aki ke papatiso. (Gahua, veveheaga 10) He magahala he fenoga misionare fakamua aki ha Paulo, tokologa e tau Tagata Motu Kehe ne kuku mau e Lotu Kerisiano. (Gahua 13:1–14:28) Ke he moliaga, kua fakatu ai e fakapotopotoaga Kerisiano he tau Tagata Motu Kehe i Anetioka, Suria. Ko e falu he tau Iutaia Kerisiano ne manatu kua lata e tau Tagata Motu Kehe ne liliuina ti pilitome mo e taofi e Matafakatufono faka-Mose, ka e nakai talia he falu. (Gahua 15:1-5) Ko e totokoaga nei ka liga tataki atu ke tiaki katoatoa e fefakalatahaaki, ke hoko atu foki ke fakatupu e mavehevehe he tau fakapotopotoaga Iutaia mo e tau Motu Kehe. Ti kua fakamafiti ai e kau fakatufono ke gahua ke puipui e fakalatahaaga faka-Kerisiano.
17. Ko e heigoa e fakaholoaga fakateokarasi kua lauia mitaki ne fakamaama he Gahua veveheaga 15?
17 Hagaao atu ke he Gahua 15:6-22, “ati fakapotopoto ai e tau aposetolo mo e tau patu ke pulega ke he mena na.” Kua ha ha i ai foki e falu, fakalataha foki mo lautolu ne o mai i Anetioka. Ne fakamaama fakamua e Peteru ko e ‘logona he tau tagata kehe e kupu he tala mitaki he gutu hana ti talia e lautolu.’ Ti fanogonogo e “lanu tagata” he fakamatala age e Panapa mo Paulo “e tau fakamailoga mo e tau mana loga ne eke he Atua ke he tau motu kehe ia laua.” Ti fakaholo atu a Iakopo ke talahau ko e liga tali fefe e huhu. He oti e taute he kau fakatufono e fifiliaga, kua pehe mai ki a tautolu: “Ti mitaki ai ke he tau aposetolo, mo e tau patu, katoa mo e ekalesia oti, ke fifili mo e fekau atu ki Anetioka fakalataha mo Paulo mo Panapa ni falu a tagata ha lautolu.” Ko e “falu a tagata” ia—ko Iuta mo Sila—kua uta e tohi fakamafanatia ke he tau katofia tua.
18. Ko e heigoa e fifiliaga ne taute he kau fakatufono ne putoia ai e Matafakatufono faka-Mose, mo e hufia fefe e tau Kerisiano Iutaia mo e tau Tagata Motu Kehe ha ko e mena nei?
18 Kua kamata e tohi ne fakailoa e fifiliaga he kau fakatufono mo e tau kupu: “Fakaalofa atu e tau aposetolo, mo e tau patu katoa mo e tau matakainaga nai ke he tau matakainaga ko e tau tagata he tau motu kehe ha i Anetioka, mo Suria, mo Kilikia.” Kua ha ai e falu he feleveiaaga talahaua nei, ka e kitia moli ai ko e kau fakatufono, ko e “tau aposetolo, mo e tau patu” ni hokoia i loto. Nukua takitaki he agaga he Atua a lautolu, ha kua fakakite mai he tohi: “Ko e mena kua mitaki ke he Agaga Tapu mo mautolu nai, aua neke tuku atu taha kavega kia mutolu, ko e tau mena nai hokoia ke lata; Kia fakamamao a mutolu mo e tau mena kua eke poa ai ke he tau tupua, mo e toto, mo e tau mena fofota, mo e feuaki.” (Gahua 15:23-29) Kua nakai poaki e tau Kerisiano ke pilitome mo e taofi ke he Matafakatufono faka-Mose. Ko e fifiliaga nei kua lagomatai aki e tau Kerisiano Iutaia mo e tau Tagata Motu Kehe ke gahua mo e vagahau fakalataha. Kua olioli ai e tau fakapotopotoaga, mo e fakatumau e fakalatahaaga uho, tuga ni he taute pihia he magafaoa he Atua he lalolagi katoa he vaha nei, i lalo he takitakiaga fakaagaga he Kau Fakatufono he Tau Fakamoli a Iehova.—Gahua 15:30-35.
Fekafekau i Loto he Fakalatahaaga Fakateokarasi
19. Ko e ha ne matala mitaki ai e fakalatahaaga he tau tagata tapuaki he magafaoa ha Iehova?
19 Kua matala mitaki e fakalatahaaga he magaaho ka felagomataiaki a lautolu he magafaoa ko e taha ke he taha. Ko e mena moli taha ia foki he magafaoa he tau tagata tapuaki ha Iehova. Ha kua fakateokarasi, ko e tau motua mo e falu he fakapotopotoaga he senetenari fakamua aki kua fekafekau ke he Atua he felagomataiaki katoatoa mo e kau fakatufono mo e talia ai e tau fifiliaga. Mo e lagomatai he kau fakatufono, ko e tau motua kua ‘fakamatala e kupu’ mo e tau tagata he tau fakapotopotoaga katoa kua ‘taha e tau kupu oti kana.’ (2 Timoteo 4:1, 2; 1 Korinito 1:10) Ti ko e tau kupu moli faka-Tohiaga Tapu ia ni kua fakakite he fekafekauaga mo e ke he tau feleveiaaga Kerisiano, pete i Ierusalema, Anetioka, Roma, Korinito, po ke ha matakavi foki. Ko e tau fakateokarasi pihia kua kitia ai ke he vaha nei.
20. Ke puipui e fakalatahaaga mahani Kerisiano ha tautolu, ko e heigoa kua lata ia tautolu ke taute?
20 Ke puipui ha tautolu a fakalatahaaga, ko tautolu oti ne vala he magafaoa he lalolagi katoa ha Iehova kua lata ke gahua ke fakatata e fakaalofa fakateokarasi. (1 Ioane 4:16) Kua lata ia tautolu ke omaoma ke he finagalo he Atua mo e fakakite e fakalilifu hokulo ma e “fekafekau fakamoli” mo e Kau Fakatufono. Tuga ni ha tautolu a tukuleleaga ke he Atua, ko e ha tautolu a omaoma kua lata moli ke foaki noa mo e olioli lahi. (1 Ioane 5:3) Kua mitaki lahi e fakamatutakiaga he salamo e olioli mo e omaoma! Ne lologo a ia: “Haleluia. Uhoaki e tagata kua matakutaku kia Iehova, kua fiafia lahi ke he hana tau poaki.”—Salamo 112:1.
21. Maeke fefe ia tautolu ke fakakite moli ko e fakateokarasi a tautolu?
21 Ko Iesu, ko e Ulu he fakapotopotoaga, kua katoatoa fakateokarasi mo e tumau ke taute e finagalo he hana Matua. (Ioane 5:30) Ti, o mai a a tautolu, ke mumuitua ke he Fakafifitakiaga ha tautolu he taute fakateokarasi mo e kaufakalataha ke he finagalo ha Iehova he felagomataiaki katoatoa atu ke he Hana a fakatokatokaaga. Ti fakalataha mo e olioli mo e oue tulou mai he loto, kua maeke ia tautolu ke fakataogo e lologo he salamo: “Kitiala, ko e mena mitaki lahi mo e fulufuluola, ke nonofo fakalataha e tau matakainaga.”
To Tali Fefe e Koe?
◻ Kua maeke fefe e fakalatahaaga mahani Kerisiano ha tautolu ke matutaki atu ke he Salamo 133?
◻ Ko e heigoa e falu he tau mena ne fakamalolo aki e fakalatahaaga?
◻ Ko e ha e maopoopo fakateokarasi kua aoga lahi ai ma e tau tagata he Atua?
◻ Taute fefe e kau fakatufono he senetenari fakamua aki ke gahua ke puipui e fakalatahaaga?
◻ Ko e heigoa e kakano he fekafekau he fakalatahaaga fakateokarasi ki a koe?
[Fakatino he lau 11]
Kua gahua e kau fakatufono ke puipui e kau fakalataha