Aho he Fakafiliaga​—E Magaaho ke Amaamanaki!

KAEKE kua fakamatakutaku he manatu he aho he fakafiliaga a koe, ko e ha kua nakai kumikumi ai ko e heigoa kua talahau he Tohi Tapu hagaao ke he mena ia? Ke fakatai ki ai, kua moli kia ko e magaaho ka fakahoko he Atua e fakafiliaga ke he tau tagata agahala, kua tolo a lautolu ki loto he afi a helo?

Kua pehe, ko e fakafiliaga he atua ne fakamau fakamua ne taute tonu ni he kamataaga he fakamauaga tuai he tagata. Kua ha ha ia Atamu mo Eva e magaaho ke momoui tukulagi ki luga he lalolagi parataiso. (Kenese 1:26-28; 2:7-9, 15-25) Pete ni, ne agahala a laua, mo e kua huhu i lalo he fakafiliaga nakai fiafia he Atua. Ko e taui? Ne uta kehe he Atua e mena fakaalofa ko e moui. Ke he falu a kupu, ne mamate a laua. Ne talaage e Atua ki a laua: “To kai foki e koe hau a mena kai mo e kavakava he hau a mata, ato liu a koe ke he kelekele; ha ko e mena eke mai ai a koe; ha ko e efuefu ni a koe, to liu foki a koe ke he efuefu.”​—Kenese 3:16-19.

Ko e fakafiliaga kelea lahi a nei, ka e kua tonu. Mo e kua nakai putoia moli ki ai e afi a helo. He magaaho ne mamate a Atamu mo Eva, ne liliu a laua ke he efuefu. Ne fakaoti a laua ke he moui. Ne nakai fai mena i loto he Tohi Tapu kua talahau ko e taha e vala ha Atamu po ke he falu tagata ne hao mai he mate ke fakakikiveka tukulagi tukumuitea he taha mena. Ka e pehe ni, kua totou e tautolu: “Ha ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena.”​—Fakamatalaaga 9:5.

Kua iloa nakai e koe ne talahau he Tohi Tapu e mena nei? Kua iloa foki nakai e koe, kua nakai fakaaoga he Tohi Tapu e talahauaga he “solu nakai maeke ke mate”? Kua kehe ai, he pehe: “Ko e solu kua agahala, to mate ai ni.” (Esekielu 18:4, King James Version) Kua tatai katoa ai mo e puhala he Tohi Tapu: “Ko e totogi he hala e mate.” (Roma 6:23, KJ) Kua lauia oti a tautolu he pule nei. Ko e tau fanau oti he tagata agahala ko Atamu a tautolu, ti kua hala oti a tautolu mo e kua moua e palepale he hala, ko e mate. Tuga he pehe e Tohi Tapu: “He taha e tagata ne hoko mai ai e hala ki loto he lalolagi, mo e mate he hala; mo e hoko ai e mate ke he tau tagata oti, ha kua hala oti.” (Roma 5:12, KJ) Ko e Aho he Fakafiliaga ko e matapatu he fakatokaaga he Atua ke laveaki mai a tautolu he tutuaga nei.

Ko e Fakaveaga ma e Aho he Fakafiliaga

Hagaao ke he Tohi Tapu, kua teitei ke 2,000 he tau tau i tuai ne tuku hifo he Atua e fakaveaga ma e mena ka tupu he Aho he Fakafiliaga. Ko e magaaho a nei ne hau a Iesu ke he lalolagi mo e foaki hana moui mitaki katoatoa fakatagata ma tautolu. Ne fakamaama mai e ia ni ko Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”​—Ioane 3:16.

Kaeke kua fakagahuahua e tautolu e tua ki a Iesu, kua lagomatai mai hana poa ki a tautolu he magaaho nei foki ke he puhala fakaagaga. Kua fakamagalo he Atua ha tautolu a tau agahala mo e fakaata a tautolu ke fakatata atu ki a ia. (Ioane 14:6; 1 Ioane 2:1, 2) Ka e nakai mitaki katoatoa agaia a tautolu, ko e tau tagata agahala, mo e ha kua pihia, ne fa gagao agaia ha tautolu a tau tino mo e hoko ai e mate. Kua nakai la ha ha ia tautolu e moui tukulagi ne mavehe mai e Iesu. To hoko mai e mena nei ha ko e taui he Aho he Fakafiliaga.

Ko e Aho he Fakafiliaga

Ne kitia he aposetolo ko Ioane e fakakiteaga he Aho he Fakafiliaga, mo e ne fakamaama mai e ia tuga ne muitua mai: “Kitia e au e nofoaiki tea lahi mahaki, mo ia ne nofo i ai, ne fehola mai he hana fofoga e lalolagi mo e lagi; mo e nakai moua ai ha nonofoaga ma lautolu. Mo e kitia e au a lautolu ne mamate, kua ikiiki mo e lalahi mamahaki, kua tutu i mua he Atua; mo e tau tohi kua hafagi: ko e taha foki e tohi ne hafagi, ko e tohi he moui a ia: mo e fakafili ai a lautolu ne mamate ke he tau mena ia ne tohia i loto he tau tohi, ke lata ai moe ha lautolu a tau gahua.”​—Fakakiteaga 20:11, 12, KJ.

E, hagaao ke he fakakiteaga ha Ioane, to takitaki e ia ni ko e Atua e Aho he Fakafiliaga. Ka kua putoia foki e taha. Ne fakamaama mai he aposetolo ko Paulo: “Ko e [Atua] ne kotofa e aho, ke fakafili e ia e lalolagi ke he tututonu mai he tagata kua fakatapu e ia.” (Gahua 17:31, KJ) Ko hai e tagata tane ia? Ko Iesu, ko ia ni ne pehe: “Nakai fakafili he Matua e tagata, ka e tuku atu e tau fakafiliaga oti kana ke he Tama.” (Ioane 5:22, KJ) Ti ko Iesu e Iki Fakafili ne kotofa he Atua ke he Aho he Fakafiliaga.

Ko e tala mitaki a nei ma e tau tagata. Kua fakakite mai he Tala Mitaki a Iesu ko e lahi mahaki e loto fakaalofa ia ia. Nakai loto fakatokoluga a ia po ke poaki mena lahi ka e “totonu mo e loto holoilalo.” (Mataio 11:29; 14:14; 20:34) Kua fiafia a tautolu ke nonofo i lalo he tau lima he iki fakafili pihia.

To Hoko Mai A Fe?

Ka pihia, to hoko mai a fe, e Aho he Fakafiliaga? Kua pehe a Fakakiteaga to tupu mai he magaaho “[ne] hola kehe e lalolagi mo e lagi mai mua hana.” Kua fakamanatu mai he mena nei ki a tautolu e tau kupu he aposetolo ko Peteru: “Ka ko e lagi a enei mo e fonua kua fakatoka ha ko e kupu ia ni, kia taofi ma e afi ke he aho ke fakafili ai mo e mahakava ai e tau tagata matahavala.” (2 Peteru 3:7) To tugi kia e lalolagi he mouiaga moli nei? Nakai, kua mahino lahi e Tohi Tapu ke he mena nei. To nakai moumou e lalolagi he mouiaga moli nei. “Ko e lalolagi . . . [to] nakai uta kehe tukulagi.” (Salamo 104:5, KJ) Kua fakakite mai he laulahi he tau kupu ha Peteru ko e fakatokaaga he tau mena nei he lalolagi nakai mahani fakaatua ka taute ai ke moumou. Ko e tau tagata nakai mahani fakaatua, nakai ko e palaneta he Lalolagi, ka fakaotioti.​—Ioane 12:31; 14:30; 1 Ioane 5:19.

To moumou e tau tagata nakai mahani fakaatua nei ke he mena kua ui he Tohi Tapu ko e tauaga i Amaketo​—ko e mena, tuga kua fakakite mai tumau he mekasini nei, to nakai leva ti tupu. (Fakakiteaga 16:14, 16) He moli ai, to tuku a ia ni ko Satani ki loto he pahua mo e hataki ke nakai fakalavelave atu ke he tau tagata ke taha e afe he tau tau, mo e tau afe tau nei e vaha moli he Aho he Fakafiliaga. (Fakakiteaga 19:17–​20:3) Ko e heigoa e mena ka tupu ki a lautolu ne fakamoli he magaaho ka fakaotioti e tau tagata nakai mahani fakaatua i Amaketo? To hao mai a lautolu ti hoko tonu atu ke he Aho he Fakafiliaga. Ke totou e tautolu ko: “Lautolu ne katoatoa e mitaki ha lautolu a mahani to toe ai a lautolu [ke he lalolagi]; Ka to vevehe kehe mai he motu a lautolu ne mahani kelea.”​—Fakatai 2:21, 22.

Ke lagomatai aki e mena nei, kua talahau mai e Tohi Tapu ke he “moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe” ka tupu fakamua ke he lalolagi ato hoko a Amaketo. Ko lautolu nei ne “o mai he matematekelea lahi”; ke he falu a kupu, kua hao mai a lautolu he fakaotiaga he lalolagi nakai mahani fakaatua ke tuga a Noa ne hao mai he fakaotiaga he lalolagi he vaha hana. (Fakakiteaga 7:9-17; 2 Peteru 2:5) Kua iloa nakai e koe kua ha ha i ai foki ke he lalolagi katoa e moto tagata tokologa he tau Kerisiano gahuahua he magaaho nei? Kua amaamanaki a lautolu nei ke hao mai he matematekelea lahi mo e momoui tukulagi he lalolagi. Ko e ha lautolu a ha ha hinei ko e fakamoliaga moli ke he tatamaiaga he Aho he Fakafiliaga.

Ko Hai Ka Fakafili?

To fakafili e moto tagata tokologa nei he Aho he Fakafiliaga. Ka e to nakai ko lautolu ni hokoia. Kua matutaki atu e fakamauaga ha Ioane: “Kua tuku ke he he tahi a lautolu ne mamate ne ha ha i ai; mo e mate mo e helo ne fakatoka atu a lautolu ne mamate kua ha ha ai ia laua: mo e ne fakafili ai a lautolu ko e tau tagata oti kana hagaao ke he ha lautolu a tau gahua.” (Fakakiteaga 20:13, KJ) Hanei e falu fakakiteaga moli ko e nakai matematekelea tukulagi e tau tagata i loto ia helo. Kaeke kua tuku kehe e helo a lautolu ne mamate i loto ia ia, to maeke fefe ia taha ke nofo tukulagi i ai? Kua moli lahi, ko e tukuaga noa he tau tagata a helo he Tohi Tapu kua ha ha i ai a lautolu ne mamate kua nakai logona ha mena ne fakatalitali ke he liliu tutumai. He Aho he Fakafiliaga, to fakagatigati katoa e helo a lautolu ne mamate.​—Fakamatalaaga 9:10.

Ko hai ka liu tumai he mate he Aho he Fakafiliaga? Ne pehe e aposetolo ko Paulo: “To ha ha i ai e liliu tutu mai ha lautolu ne mamate, a lautolu kua tututonu mo lautolu kua nakai tututonu.” (Gahua 24:15, KJ) Ha kua pihia, ko e tau fekafekau fakamoli he Atua, “ne tututonu,” ka liu tumai. Ka e to pihia foki a falu “ne hepehepe” kua nakai maeke ke totou. Kua fakakite moli, to fakalataha ke he liu tumai a lautolu oti kana ne mamate mo e ha ha i ai agaia he tukuaga​—kua kehe mai ia taha kua kelea lahi e tau agahala ti kua fita he fakafili he Atua a lautolu kua nakai lata katoatoa mo e moui.​—Mataio 12:31.

Ko e Fakafiliaga

Ko e heigoa foki, ka tupu ke he moto tagata tokologa kua hao mai mo lautolu ne liliu tutu mai he Aho he Fakafiliaga? Kua pehe e Tohi Tapu: “Mo e fakafili ai a lautolu ne mamate ke he tau mena kua tohi i loto he tau tohi, ke lata ke he ha lautolu a tau gahua.” Ko e magaaho a nei ke kitekite fakalahi ki ai. Ko lautolu oti kana kua manako ke taute mena kua hagaao ke he ‘tau mena kua tohi ke he tau tohi’​—kua fakakite moli ko e tau manako he Atua ke he tau tagata he magaaho ia​—ka fakamau ai i loto he “tohi he moui.” (Fakakiteaga 20:12, KJ) To ha ha i ai a lautolu he puhala ke moua e moui tukulagi!

Ti hoko ai fakamui, to tamai he poa he mate ha Keriso e tau lagomatai ma e tau mena he tino! Ko lautolu ne tohia i loto he tohi he moui he magaaho ia ka nakai liu tua ke he kafokia mo e mate. Ka e pehe, to liliu fakahaga a lautolu ke he mitaki katoatoa he tagata, fakalataha mo e moui tukulagi ne mavehe ki a lautolu ne fakagahuahua e tua ki a Iesu. Ko e amaamanakiaga homo lahi e kehe! Ka e pete ni, to fakakite moli ni he falu ko e nakai talia ke omaoma ‘ke he tau mena kua tohi ke he tau tohi.’ Ko e heigoa ka tupu ki a lautolu? To nakai moua e lautolu e moui tukulagi. Ka kua pehe, e tohiaga tapu: “Ko hai mo hai ne nakai tohia i loto he tohi he moui kua liti ki loto he loloto he afi.”​—Fakakiteaga 20:15, KJ.

Ko e afi a helo kia a nei ne vagahau a Kerisitenitome ki ai? Nakai, ha ko e tau kupu fakamua, kua totou e tautolu: “Ne liti e mate mo e helo ki loto he loloto he afi. Ko e mate ne ua a nei.” (Fakakiteaga 20:14, KJ) Kaeke kua liti ki loto he loloto he afi e helo, ti kua nakai ko e afi a helo e loloto. Ko e taha mena foki, nakai ko e mena mao e mate ke maeke ke toto hake moli mo e liti atu ke he taha mena. Ti kua lata ai ni e loloto he afi mo mena fakatai. Ke he heigoa? Kua pehe e Tohi Tapu: “Ko e mate ke ua a nei.” He magaaho ka liti hifo e mate mo e Hate ke he loloto he afi, kua “mamate” a laua, kua oti ke ha ha i ai. Ke tuga ki ai, ko e tau tagata ne totoko ka hoko atu ke he mena ia to mamate, po ke oti ke ha ha i ai. Ti ko e mate ke uaaki e mena nei, kua noa mo e ha amaamanakiaga ke liu tumai.

Ko e Aho he Fakafiliaga​—E Magaaho ke Amaamanaki

He magaaho ka manamanatu a tautolu ke he Aho he Fakafiliaga, kua nakai lata a tautolu ke matakutaku lahi po ke vihiatia. Ko e Aho he Fakafiliaga e magaaho ke amaamanaki, ko e magaaho ke liuaki ke he tau tagata e moui tukulagi ne fakagalo e Atamu. Kia fanogonogo la ke he tau monuina ka tamai ki a lautolu ne fakafili kua fakamoli: “Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai taui fai matematekelea; ha kua mole atu e tau mena fakamua.”​—Fakakiteaga 21:3, 4.

He fakaotiaga he afetau he Aho he Fakafiliaga, ko e tau tagata fakamoli ne o mai he tau fahi oti he lalolagi ka mitaki katoatoa fakamui. To “liu foki momoui” a lautolu ke he kakanoaga katoatoa, mo e to kautu ai e finagalo he Aho he Fakafiliaga. (Fakakiteaga 20:5) Ti kua pehe e Tohi Tapu, ko e magaaho fakahiku ni a ia ke fakaata ai a Satani ke hoko atu ke he tau tagata. (Fakakiteaga 20:3, 7-10) Ko lautolu ne totoko fakamalolo ki a ia he magaaho fakahiku nei ka moua e olioli katoatoa he fakamoliaga he maveheaga he Tohi Tapu: “To eke ni e motu ma e tau tagata tututonu, to nonofo muatua ai a lautolu.”​—Salamo 37:29.

Kua homoatu ha e foakiaga he Aho he Fakafiliaga! Mo e kua kehe lahi e mitaki ha kua maeke ia tautolu ke tauteute foki ma e mena ia he magaaho nei, he fakaako ke he Tohi Tapu, ke iloa e finagalo he Atua, mo e fakaaoga e finagalo nei he atua i loto he ha tautolu a tau momoui! Kua nakai ofo ai he fakailoa he salamo e loto olioli ke he manatu he fakafiliaga he Atua he magaaho ne tohia e ia: “Kia fiafia e lagi, mo e olioli e lalolagi; kia go mai e tahi mo e tau mena kua puke ai. Kia fiafia e fonua mo e tau mena oti ha i ai; ti kalaga fiafia ai e tau akau oti he kavei, Ki mua a Iehova; ha kua haele mai a ia, ha kua haele mai a ia ke fakafili e lalolagi.”​—Salamo 96:11-13.