TAU HŪHŪ TOHI TAPU KUA TALI
Ko e heigoa e Aho Fakafili?
Ko e ha e aho fakafili ko e magaaho fiafia?
He tau vahā Tohi Tapu, ne fakaaoga he Atua e tau fakafili ke laveaki e tau tagata haana mai he tau aga nakai fakafili tonu. (Tau Fakafili 2:18) Fakamaama he Tohi Tapu ko e Aho Fakafili he vahā i mua ko e magaaho fiafia ka laveaki e Iehova ko e Fakafili he lalolagi katoa e tau tagata mai he nakai fakafili tonu.—Totou Salamo 96:12, 13; Isaia 26:9.
Ne kotofa he Atua a Iesu ke fakafili tonu a lautolu oti kua momoui mo e mamate. (Gahua 10:42; 17:31) Tokologa e tagata ne mamate ka e nakai iloa e Atua. Magahala he Aho Fakafili, to fakaliu tu mai e Iesu e tau tagata pihia ke maeke a lautolu ke iloa mo e fakaalofa ke he Atua mooli.—Totou Gahua 24:15.
Ko e ha e Aho Fakafili kua taha e afe tau he loa?
To fakaliu tu mai a lautolu ne mamate he magahala he taha e afe tau. (Fakakiteaga 20:4, 12) Lata a lautolu ke fai magaaho ke fakaako e tau puhala he Atua mo e omaoma ki a Ia. Kehe mai he tau manatu talahaua, ne fakakite he Tohi Tapu to fakafili e tau tagata fakavē ke he tau gahua ha lautolu he mole e fakaliu tu mai.—Totou Roma 6:7.
Fakamaama foki he Tohi Tapu e aho he fakafiliaga to hoko mai fakalutukia ato kamata e taha e afe tau. Fakahigoa foki e aho ia ko e fakaotiaga, tuga ne fakamaama he tau vala tala i mua he fufuta nei. He aho ia, to utakehe he Atua e tau tagata matahavala. (2 Peteru 3:7) Ti kua lata ia tautolu ke eketaha ke fakamooli e fakaalofa ha tautolu ma e Atua.—Totou 2 Peteru 3:9, 13.