To Leva Fefe e Tumau he Fakauka he Atua?

KE HE 3,000 he tau tau i tuai, ne tohia he tagata tane pulotu: “Kua pule ai e taha tagata ke he taha, ke kelea ai e ia ni.” (Fakamatalaaga 8:9) Tali mai he taute e ia e kitekiteaga ia, nakai la laukauka mai e mitaki he tau mena. Mai he fakamauaga katoa he vaha i tuai, ko e tau tagata takitokotaha po ke tau matakau ne kua hamutia fofo e pule, e taha he mole atu e taha, kua pule lahi mo e fakaaoga hehe e falu tagata. Ka kua fakauka lahi e Atua ko Iehova ke he mena nei.

Ne fakauka a Iehova he tau magaaho ne fakafano atu he tau fakatufono e tau miliona ke he ha lautolu a mateaga he felakutaki mo e fakaata e fakafuakoloa kelea lahi mahaki kua nakai tonu ke he matafakatufono. He vaha nei, kua fakagahuahua agaia e ia e fakauka he moumou he tau tagata e aolagi osone mo e takiva e matagi he pulagi mo e tahi. Kua liga ko e fakamamahi lahi atu ki a ia he kitia e kelekele talumelie mitaki ne moumou mo e moumouaga nakai fai aoga he tau vaouhi mo e tau manu momoui he vaouhi!

Ko e Ha Kua Fakauka Lahi e Atua?

Kua liga lagomatai mai he fakataiaga mukamuka a tautolu ke tali e huhu nei. Kia manamanatu la ke he mena ka tupu ke he fakatugahua ka mule tumau e taha tagata gahua. Ko e heigoa kua lata ke taute he tagata he hana fakatugahua? Kua liga to fakalagalaga he matafakatufono tonu he mukamuka a ia ke fakaoti agataha e tagata gahua. Ka e kua liga to manatu e ia e fakatai he Tohi Tapu: “Ko ia kua fakatuai ke ita, kua lahi hana pulotu; ka ko ia kua manava hogohogo, kua ta hake ki luga e ia e mahani goagoa.” (Fakatai 14:29) Ko e manamanatuaga ka omoi a ia ke fakatali ato taute ha mena. Kua liga fifili e ia ke fakaata e magaaho ma e hukui ke fakaako ke nakai maeke ke fakalavelave atu foki e fakatugahua.

Kua liga to taute he loto fakaalofa fakatagata a ia ke fakatali. Fefe ke hataki atu ke he tagata gahua ke kitia ko e to fakamitaki nakai e ia hana tau puhala? Ko e ha he tutala ki a ia mo e kitia ko e fa mule tumau a ia ha kua tupu mai he lekua kua maeke ke taute fakamitaki po ke mai he hana manamanatu kelea ne nakai maeke ke tului? Kaeke kua liga fifili e tagata he hana fakatugahua ke fakagahuahua e loto fakauka, ka e pete ni to nakai ha ko e nakai fai kaupaaga hana fakauka. Kua lata ni e tagata gahua ke liliu kehe hana mahani po ke mena ni ne toe ko e fehagaaki mo e fakaoti e gahua. Kua hako moli ni ke he fakatugahua mo e ke he tau tagata gahua kua muitua ke he tau poakiaga.

Ke tuga e puhala ia, kua fakagahuahua he Atua ko Iehova e loto fakauka ka fehagaaki mo e taha mena hepe he taha ke maeke ke fai magaaho ke taute e tali kua tonu ma e taha lekua pauaki. Ko e taha mena foki, kua tuku age he loto fakauka hana ke he tau tagata ne taute mena hepehepe e magaaho ke liliu ha lautolu a tau puhala mo e ke moua e tau lagomataiaga tukulagi. Ti kua fakamalolo he Tohi Tapu a tautolu ke aua neke nakai fiafia ke he fakauka he Atua. Ka e, kua pehe mai: ‘Kia manatu ai e mutolu e fakauka he Iki ha tautolu.’​—2 Peteru 3:15.

Ko e Fakatai he Fakauka he Atua

Kua fakauka e Atua ko Iehova fakamua ato hoko e Fakapuke lahi mahaki he vaha a Noa. Ne puke e lalolagi he vaha ia ke he mahani vale mo e kua lahi e mahani kelea. Kua totou e tautolu: “Ne fioia e Iehova kua lahi ni e mahani kelea he tau tagata ke he lalolagi; . . . Ti pehe age ai a Iehova, To tafi kehe e au mai he fuga kelekele e tau tagata ne eke e au.” (Kenese 6:5, 7) E, kua ha ha he loto a Iehova e tali kua lata tonu lahi ke he lekua he mahani kelea i tuai: ko e fakaotiaga he tau tagata mahani kelea. Ka e nakai gahua agataha a ia. Ko e ha?

Ha kua nakai mahani kelea e tau tagata oti. Kua mahani tututonu a Noa mo e hana magafaoa ke he onoonoaga he Atua. Ti ma e ha lautolu a lagomatai, ne fakatalitali a Iehova mo e fakauka ke fakaata e tau tagata tututonu gahoa ke taute e tau tauteuteaga ma e fakamouiaga. Mo e taha mena foki, kua tuku atu he fakataliaga kua leva nei ki a Noa e magaaho ke eke “ko e ogo he tututonu,” kua tuku atu ke he tau tagata mahani kelea ia e magaaho ke liliu ha lautolu a tau mahani. Kua pehe e Tohi Tapu: “He fakatalitali mai e fakauka he Atua i tuai ke he vaha kia Noa, ka kua taute ai e vaka, ne hao ai ke he vai e tau tagata tokogaogao, ko e tokovalu ni.”​—2 Peteru 2:5; 1 Peteru 3:20.

Ko e Ha kua Fakauka e Atua he Magaaho Nei

He vaha nei, kua pihia foki ni e tutuaga. Kua puke foki e lalolagi ke he mahani vale. Tuga he vaha a Noa, kua fita he fakafili he Atua e lalolagi nei, ko e mena kua pehe e Tohi Tapu, kua “taofi ma e afi ke he aho ke fakafili ai mo e mahakava ai e tau tagata matahavala.” (2 Peteru 3:7) He magaaho ka tupu e mena ia, to nakai moumou e tau mena he fonua, tapehiaga fakamatematekelea ki a lautolu ne lolelole, po ke fakaaoga fakahanoa e pule he lotokai.

Ko e ha he mogoia, kua leva ai ka e nakai fakaoti he Atua e tau tagata ne nakai mahani fakaatua? Ha kua ha ha i ai e tau matakupu kua lata ke taute e tali mo e tau mena aoga lahi ke fakatokatoka. Moli, kua holo atu a Iehova ke taute e tau tali kua tumau ke he lekua he tau mahani kelea kua putoia e tau mena loga, kua fakalataha ki ai e fakahaoaga he tau tagata kua loto hakohako mai he pipiaga ke he kafokia mo e mate.

Ke he mena fakahiku nei he loto manamanatu, ne fioia a Iehova ke foaki mai e Fakamouiaga kua maeke ke foaki mai e lukutoto ma e ha tautolu a tau agahala. Hagaao ki a ia, kua pehe e Tohi Tapu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Kua fakamole e tau afe he tau tau ke tauteute e puhala ke hau a Iesu mo e taute poa hana moui ma e tau tagata. He vaha he tau tau oti kana ia, kua fakaalofa lahi e fakauka he Atua. Ka e kua aoga lahi nakai e foakiaga mena pihia ke fakatalitali ki ai?

Ne foaki mai e Iesu e lukutoto ma e tau tagata he tau tau kua teitei ke ua e afe i tuai. Ti ko e ha he mogoia, ne fakagahuahua agaia he Atua e loto fakauka? Ke taha mena, ne fakakite mai he mate ha Iesu e kamataaga he fakaholoaga he aoga fakaako. Kua lata ni he tau tagata ke iloa e foakiaga fakaalofa nei mo e ke tuku age e magaaho ke talia ai po ke nakai talia. To maeke e mena ia ke fakaaoga e tau magaaho, ka ko e tau magaaho kua fakaaoga mitaki lahi. Kua pehe e Tohi Tapu: “Kua nakai mule mai e Iki ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.”​—2 Peteru 3:9.

Ko e Matakupu he Fakatufono

Ko e taha mena aoga lahi kua fai magaaho foki ke fakamole ki ai. Kua lata ai ke taute fakamitaki e lekua he fakatufono he tau tagata. Ke kamata aki, ne nofo i lalo he fakatufono he atua e tagata. Ka e i loto he kaina ko Etena, ne fuluhi e tau tua he tau mamatua fakamua ha tautolu ke he mena ia. Ne fifili a laua ke tututokataha mai he Atua, kua manako ke pule ne laua a laua. (Kenese 3:1-5) Kua moli ni, ne nakai tufugatia e tagata ke pule na ia ki a ia ni. Ne tohia he perofeta ko Ieremia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.”​—Ieremia 10:23; Fakatai 20:24.

Ka e pete ni ia, talimai he malagaki hake e matakupu ke he fakatufono, kua fakauka a Iehova he fakaata e magaaho ke taute e fifiliaga. Moli, ne fakaata lahi e ia e tau afe he tau tau ke lali e tau tagata ke taute e tau vahega fakatufono kua maeke ke manatu ki ai. Ti ko e heigoa e fua? Kua taute ai ke kitia moli kua nakai maeke ha fakatufono he tagata ke uta kehe e tapehiaga fakamatematekelea, nakai tonu, po ke falu he tau mena kua fakatupu mai e nakai fiafia.

Moli, ke he onoonoaga he fakamauaga tuai he tagata, kua maeke nakai e taha ke talahau moli kua nakai tonu e Atua he magaaho ne fakailoa e ia hana manako ke uta kehe e tau fakatufono oti kana he tagata mo e hukui aki a lautolu mo e taha hana ni? Kua nakai pihia! Kua fakafeleveia fiafia moli e tautolu e fakamoliaga he perofeta nei he Tohi Tapu: “Ko e vaha he tau patuiki ia to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”​—Tanielu 2:44.

Ko e Patuiki i luga he lagi he Kautu ia ko Iesu ne kua liu tu mai. Kua tauteute a ia ma e tuaga ia​—mo e kua fifili foki e tau tagata ke taute mo tau pule fakalataha mo ia​—kua fakaaoga e tau magaaho ki ai. He vaha katoa he magaaho ia, ne fakagahuahua he Atua e loto fakauka.

Lagomatai Mai e Fakauka he Atua he Magaaho Nei

He vaha nei, kua miliona e tau tagata takitaha kua nakai tote mai he 212 e tau motu kua lagomatai he fakauka he Atua. Kua taute a lautolu ke fakalataha auloa ke he ha lautolu a manako ke omaoma ke he Atua mo e fekafekau ke he hana fakatufono i luga he lagi. Ka feleveia auloa a lautolu i loto he ha lautolu a tau Fale he Kautu, kua ako a lautolu kua mitaki lahi ni ka fakaaoga e tau mahani he Tohi Tapu i loto he tau momoui ha lautolu. Kua nakai kau fakalataha a lautolu ke he tau mena fakamavehevehe fakapolitika he lalolagi nei, ka e pete ni kua fakalilifu a lautolu ke he tau fakatufono he tagata ke leva ni he fakaata he fakauka he Atua e tau mena ia ke gahuahua.​—Mataio 22:21; Roma 13:1-5.

Ko e fekauaki pihia ke he vaha loto he tau tagata tokologa kua fakamatalahi a Iehova ha ko Ia ni kua maeke ke tamai e felauaki ke he vaha loto he tau tagata ne hake mai ni he tau loto ha lautolu ke fakaako ke fakaalofa ki a ia mo e kua manako ke fekafekau ki a ia. Kua nakai fakauaua ai kua fita he feleveia a koe mo lautolu nei, he matutaki atu tumau a lautolu ke he gahua taha ne kamata e ia ni ko Iesu, ko e fakailoaaga he tala mitaki he Kautu he Atua. Kua talahau tuai e Iesu e tapunuaga he gahua nei he magaaho ne pehe a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:14.

Nakai Tuai Leva Lahi Foki!

Kua maeke he tau mena tupu moli kua kitia ke fakamoli aki kua teitei lahi ke katoatoa e fakatokaaga he fakatufono tututonu he Atua, ke uta e pule ke he tau mena oti he tau aho he lalolagi. He mole mai e fakamaamaaga ke he tau fua kelea lahi he kaumahala he tau fakatufono he tagata ne kua kitia e tautolu he vaha he senetenari nei, ne pehe a Iesu: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.”​—Luka 21:10, 11, 31.

Kua nakai leva, to uta kehe he Atua e tau tagata mahani kelea mai he lalolagi. To fai hagaaoaga moli ke he mouiaga nei e tau kupu he salamo: “Ha ko e mena fakaotioti a lautolu kau mahani kelea; . . . Toe tote, ti nakai ha i ai e tagata mahani kelea; ka manamanatu foki a koe ke he mena hana ne nofo ai, nakai ha i ai a ia.” (Salamo 37:9, 10) Kua maeke nakai a koe ke manamanatu ke he lalolagi kua noa mo e mahani kelea? Ko hai ka takitaki e tau mena he mogoia? Kua pehe e Tohi Tapu: “Kitiala, to pule e patuiki [ko Iesu Keriso ne nofo he nofaiki i luga he lagi] ha ko e mahani tututonu, to pule foki e tau iki [ko e hana tau tagata fakamoli ne kotofa he lalolagi] ha ko e tonu. Ko e mena ke tupu mai he mahani tututonu ko e monuina haia; to tupu mai foki he mahani tututonu e okioki mo e nakai haofia tukulagi.”​—Isaia 32:1, 17, 18.

Ti ko e, fakatufono he Atua he lagi ka vevete e lauiaaga kelea he tau mena hepe he tau tagata mo e fakatokatoka a lautolu kua amaamanaki ki a Ia ke he kaufakalatahaaga tagata kua felauaki. Kua fakamaama mai e felauaki nei, kua pehe e Tohi Tapu: “To nonofo fakalataha e luko mo e punua mamoe, to takoto foki e nameri fakalataha mo e punua koti, to fakalataha foki e punua povi mo e punua leona katoa mo e manu gako, to takitaki foki he tama tote a lautolu. . . . Nakai mahani kelea a lautolu, to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.”​—Isaia 11:6-9.

Kua homo ue atu ha e fua kua moua mai he fakagahuahua he Atua e loto fakauka! Ha kua pihia, he kehe mai he fetogitogiaki kua leva lahi he Atua, ko e ha he fakaaoga fakamitaki hana fakauka he tuku atu e koe a koe ki lalo he hana Kautu? Kia fakaako mai he Tohi Tapu ko e heigoa hana tau puhala mo e liliu fakafou e mahani ke he tau mena ia. Kia lafi mo e falu kua felauaki he nonofo i lalo ia ia. He magaaho ia, to tupu mai he fakauka he Atua e tau monuina tukulagi mau.