Fekafekauaga ha Tautolu​—Fakamailoga Aki e Fakauka

1. Fakakite fēfē e Iehova e fakauka ke he tagata?

¹ Ko e fakauka ko e matapatu fakamailoga he fakafehagaiaga he Atua mo e tau tagata. (Esoto 34:6; Sala. 106:41-45; 2 Pete. 3:9) Taha e fakafifitakiaga mua ue atu he haana fakaalofa mo e fakauka kua maeke ke kitia ke he matutakiaga he gahua fakamatala he Kautu ke he lalolagi katoa. Kua teitei ke 2,000 tau he fakatau gahua a Iehova mo e tagata ka e fakatumau agaia a ia ke futiaki mai e tokologa ha lautolu ne loto fakamooli ki a ia ni. (Ioane 6:44) Maeke fēfē he ha tautolu a fekafekauaga ke fakaata e fakauka a Iehova?

2. Fakakite fēfē e fakauka ka gahua he fonua ha tautolu?

² Fekafekauaga he Taha Fale ke he Taha Fale: Kua fifitaki e tautolu e fakauka a Iehova ka fakamatala mo e ‘nakai okioki’ he tau matakavi ne nakaila fiafia e tau tagata ke fanogonogo. (Gahua 5:42) Kua fakauka a tautolu mo e fakamanavalahi ke he tau fekehekeheaki, fakafiufiu, mo e totoko ke he ha tautolu a fekafekauaga. (Mare. 13:12, 13) Kua fakakite foki e tautolu e fakauka ka fakatumau e tau laliaga ha tautolu ke fuifui e tau tega he kupu mooli pete ni kua uka ke moua a lautolu ne fiafia he tau kaina.

3. Ko e ha ne kua latatonu ke ha ha i ai e fakauka ka taute e tau liu aahi atu mo e takitaki e tau fakaako Tohi Tapu?

³ Tau Fakaako Tohi Tapu: Ko e to he akau kua lata ke ha i ai e fakauka. Kua maeke ia tautolu ke feaki, ka e nakai maeke ke fakamafiti haana moui. (Iako. 5:7) Ti pihia foki, ko e moui fakaagaaga kua maeke ke tupu fakatekiteki mo e fakapapahi. (Mare. 4:28) Ko lautolu ne fakaako mo tautolu na liga uka ke tiaki e tau taofiaga he tau lotu pikopiko po ke tau aga fakamotu ne nakai fakavē ke he Tohi Tapu. Ua lali a tautolu ke fakaohooho a lautolu ne fakaako ke holo ki mua e mafiti he taute e tau hikihikiaga. Kua lata ke ha ha i ai mooli e fakauka ke fakaatā e falu magaaho ke maeke e agaaga tapu he Atua ke gahuahua he loto haana ne fakaako.​—1 Kori. 3:6, 7.

4. Maeke fēfē he fakauka ke lagomatai a tautolu ke fakamatala fakamitaki ke he tau magafaoa nakai talitonu?

⁴ Tau Magafaoa Nakai Talitonu: Pete kua manako malolō a tautolu ke iloa he tau magafaoa nakai talitonu e kupu mooli, fakakite e tautolu e fakauka ka fakatalitali ke he magaaho tonu ke fakatutala mo lautolu ke he tua, ka e fakaeneene ke ua tapoohi aki e tau manatu loga a lautolu. (Fakama. 3:1, 7) Ka e he mogonei, fakaatā e tautolu e tau fakafifitakiaga ha tautolu ke vagahau ma tautolu mo e mau amaamanaki ke fakakite e tua mo e loto molū mo e lilifu hokulo. (1 Pete. 3:1, 15) Ko e mooli, ko e fekafekauaga kua fakamailoga aki e fakauka kua to lahi ni e mitaki ti maeke ke fakafiafia aki ha tautolu a Matua he lagi.