“Kia Fakauka”
1 He kitia e tautolu e fakaotiaga ke he fakatokaaga tuai ha Satani hane tata lahi mahaki mai, kua lata ia tautolu “kia fakauka” he tatali atu ke he aho a Iehova he fakahaoaga. Mua atu ke he tau tula mafiti nei, ko e tau matakau fi kelea hane fakamalolo ke liliu e onoonoaga ha tautolu mai he matakupu aoga lahi he pule katoatoa a Iehova mo e kamatamata a tautolu ke tauhele he tau manako fakatagata. He puhala nei, to hele e Satani a tautolu ke tiaki po ke fakamanou e gahua fakamatala he Kautu. (Iako. 5:7, 8; Mata. 24:13, 14) Ko e heigoa e tau puhala ke fakakite e tautolu e fakauka pihia?
2 Ha ko e Mahani Fakauka: Ka fehagai a tautolu mo e favale po ke totokoaga he fekafekauaga ha tautolu, ko e mahani fakauka to lagomatai a tautolu ke fakauka ke he fakamatalaaga. To nakai mukamuka a tautolu ke matakutaku, po ke ita ka feleveia a tautolu mo e tau tagata fa fakaheu po ke vale. (1 Pete. 2:23) Ko e malolo lahi nei i loto kua puipui a tautolu mai he vagahau fakakelea hagaao ke he tau tagata he matakavi ne kua fakakite e fekehekeheaki po ke vihiatia ke he gahua ha tautolu, he mailoga ko e tau tutala pihia ka fakalolelole a tautolu mo lautolu kua gahua mo tautolu he fekafekauaga.
3 Ko e Fakauka Tumau: Maeke ke fakakalau e fakauka ha tautolu ka oti e fakatutalaaga mitaki he fekafekauaga ke he fonua, ti nakai liu foki ke moua e tagata fiafia ia he kaina. Kua moli foki kaeke ke fakatuai a lautolu kua fakaako mo tautolu ke tupu ki mua po ke ke tumau ke he kupu moli. Ka ko e fakauka tumau kua fa palepale ke he tau fua mitaki. (Kala. 6:9) Ne lagaloga e liu ahi atu he matakainaga fifine ke he fifine fuata to maeke ke kamata e fakaakoaga Tohi Tapu. He tau ahi atu lima fakamua, kua lavelave tuai e fifine ke he falu mena foki. He lali ke lagaono aki, kua auhia e matakainaga fifine he afa pakulagi, ka e nakai fai tagata i kaina. Moha ia, ne fifili e matakainaga ke lagataha e liu ahi atu fakahiku ke he fifine, ti liu a ia fina atu mo e moua e fifine kua mautali ke fakaako. Fakamui, ne holo mitaki e tagata fakaako mo e ke he magaaho ku ni ti tukulele e ia hana moui ki a Iehova.
4 Iloa e tautolu nakai mule mai e aho a Iehova. Ti tatali a tautolu ke he tau gahuahuaaga hana, he iloa ko e fakauka faka-Atua to fua mai e tau fua mitaki. (Hapa. 2:3; 2 Pete. 3:9-15) Kua lata ia tautolu ke fakagahuahua e fakauka tuga kua taute e Iehova ti nakai tiaki foki e fekafekauaga. “Ke he tua mo e fakauka,” kia ono atu ki a Iehova ka palepale a koe ma e gahua malolo hau.—Hepe. 6:10-12.